1 Timothy 1
1
1Ukut latat Paul‑meng pinguut apostle‑nganeng Christ Jesus‑em. Apostle‑ngughtekaagunga qelellghakun Kiyaghneghem Yugulighistemta, Christ Jesus‑emllu sighimakegkamta.
2Timothy‑mun; ighnepikamken ugpeqillemtegnegun. Kiyaghneghem Atam, Christ Jesus‑emllu Atanemta quyasliten, nangllekliten, nekeggmellelguslitenllu.
Kelengasaallghet Apeghtughistesighwaaghneng
3Aghulaqnaqumalunga Macedonia‑mun Ephesus‑metesqegkaqamken. Ilangi yuget tamaanlenguut apeghtughinguut ipangunghilngughmeng apeghtuusaneng. Qeleghqi taaqesqelluki 4sangillghaatkegpenakinguq akuzimghhutkelluki ungipaghaatengllaqat, sivunelghuteghllagetlu aatghit. Tamaakut aaghtiiraaghusighhiinaagut, kayutngunghitut qepghaqaanun Kiyaghneghem. Ellngan qepghaqaa apeghiighaquq ugpeqillghiinaghhaghqun. 5Qeleluugutkaqa ugpeqat piniqutepiigesqelluki, umyugaqeglluki, ipapigmeng ugpeqillelguluki. 6Ilangita yuget pegtekaqiit tamaakut enkaam aaghtiiraaghaqut temngimeng. 7Apeghtughistenguyugaqut Kiyaghneghem Liilightuusaanun. Iwernga liigikigatiit akuzitkegkateng qaywa apeghtuusaqeghngaaghmegteki ipasugnilluki.
8Liisimakaput Liilightuusat pinightut elqughlluki atuqelghiini. 9Liisimakaput Liilightuusat ulimaaghunghitut pinilghiinun yugnun. Ulimaaghuut liilightuusaneng naafqiikayugnun, qaatkusigalngughnunllu. Ulimaaghuut Kiyaghneghyugigalngughnun, seghleghqestenunllu. Ulimaaghuut waakigalngughnun Kiyaghneghmeng, legasiighwaatkilghiinunllu agleghnalghiinun. Ulimaaghuut tuqutikayugnun atameggneng nalighmeng naameggneng, yugtaghtenunllu. 10Ulimaaghuut sex‑kun seghleghqestenun, yugnun yulgutmeggneng atuqikayugnun, yugnun akikikayugnun yugmeng qepghaghtelaaghuluki, iqlengiqestenun, iqlengalghiinun liisimakistenun, kipullginaalghiinunllu Kiyaghneghem apeghtuusiitnun ipapighqengngalghiinun. 11Taakut apeghtuusat piniipiglleghhiineng Pinilghiineng Ungipaneng pinguut. Aapghwaat usuqnalghii Kiyaghneq, neghyukutkaqii whangamnun aapghesqelluki.
Iqamsiqayulleq Kiyaghneghem Nangllegtallghanun
12Iqamsiqayugvikaqa Christ Jesus Ataneghput, iknaqughsaqaqaanga qepghaqamnun. Iqamsiqayugvikaqa esghaqaqaanga ataasiighmellunga nakmiklunga qepghaatesqelluni. 13Sivunghani seghlepestaatun akuzitkegkaqaqa Christ‑a, seghlepestaatunllu pikaqaqa. Amyuqetaatkaqngamki maligsaaghtengi tawateteftuq amyuqetaatkengnguftaqa ellnga. Tawalliima Kiyaghneghem nangllekegkaqegkanganga qayughllak salin ugpeqigalkegka Christ‑a, liigikumangilkegka saaqutka. 14Iwernga Atanemta nangllekeghllakaqaanga! Ugpeqillelitkaqaanga, piniqellelitkaqaangallu Christ Jesus‑melngughmeng. 15Sameng pilleghqaqa ipanguuq enkaam qamaglluni ugpeqsaghqaaguq, “Christ Jesus tagikaaguq nunamun yugulinaluki seghleghqestet.” Whanga seghlelleghpigaagunga seghleghqesteneng. 16Naqamllu Kiyaghneghem nangllegyagutkaqaanga. Enkaam usputaagunga naten tagkaan Christ Jesus‑em utaqiilleghqaaneng seghleghqesteneng ugpeqesqelluni. Taana usputaq tamaakunun ayuquq ugpeqiyaghqanun ellnganeng unguvallengesqelluki kenlengilngughmeng. 17Umiilegmun kenlengilngughmun, tuqupagningilngughmun, aliinneghilngughmun, ellnginaa Kiyaghneghuuq; ellnga quulvallenglillu usuqellenglillu quunperugllak kenlengunaan! Amen.
18Timothy‑mi ighnemni, qavngaq ilangita uuknaliqistet akuzitkegkaqaaten. Enkaam maaten qelghamken akuzitangit guututkiki pilluwamun. Tawaten pinitun pilluwaghllequten Christ‑amun. 19Ugpeqikestaa Christ‑akun atuqluku liisimakegkan elqughutngalghii. Ilangita yuget atuqigatiit liisimakegkateng elqughutngalghiit enkaam naafqaqiit ugpeqilleteng katam angyaghpagiillghiistun. 20Hymenaeus‑enkuk Alexander‑enkuk tamaakut akulngitnituk. Tuunegkaqagka Tughneghaghmun liitesqellukek seghlepestaatun akuzitkefqaan Kiyaghneq pisqelluku.
Currently Selected:
1 Timothy 1: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
