1 Peter 3

Nulighqullghiitlu Ugikullghiitlu

1Elpesi ugiiqani, kiyaghtek qaatkullusi ugigpesinun. Ilangi nuliilget ugpeqingigalnguugut Kiyaghneghem akuzitanganeng. Iwernga tawaten kiyaghtelleghpesigun ugpeqaaghhnayukata sameng pinghiteghngaaghpesiki, 2qayughllak esghapakangat pelungitun kiyaghtaalleghsi, alikilleghsillu Kiyaghneghmun. 3Nuyaqegsallghem, ullngaqellghem gold‑meng, aarrallghem pinighnaghsiigatii ilusi. 4Itupill pinighnaghtek ilugpesigun qusevegllelighlusi, nekeggmellelighlusillu. Tawatelnguq pinighnalleq quunpekaghqaaguq, megnunaghllagtuq Kiyaghneghmun. 5Sivunghani agani, aghnat maniguutkayuget Kiyaghneghmun pinighnaghsaqayuguut ilumegteggun, qusevegllelighluteng, nekeggmellelighlutengllu. Neghyukegkaqaat Kiyaghneq, qaatkegkaqiitlu ugiteng. 6Sarah tawatetkaaguq! Qaatkegkaqaa Abraham, atanqennikaqaallu. Enkaam elpesi panikiisi pinitun pimakufsi, alingigalkufsillu sameng alngunak.

7Elpesillu nulightuqani kiyaghuteki nuliisi liigikluki natetulangi qayughllak kayaataghaghtut elpesineng. Quulvaghluki nuliisi qayughllak atunem allgeghsaghqaqaghsi Kiyaghneghem tunusaa kenlengilnguq unguvalleq. Tawaten pikufsi saam alngunak pillgilliqnaanghitii yughallesi.

Ikfiqelleq Pinitun Pilleghmun

8Taaqnighnaqanka sameng pillghenka whaten: qamagllusi ataasistun sumeghnelgutek, aqniqututek, piniqutek anglegutkullghiistun, nangllekututek, qusevgututek. 9Yuget seghletun pikangisi akitegpenaki seghletun, nalighmeng seghlequuqangisi akitegpenaki seghlequughmeng. Itupill akiteki quyastelleghmeng, qayughllak Kiyaghneghem nakmikegkaqiisi tawaten pisqellusi elpesinun allgeghtesqelluku quyastilleni. 10Akuzitet Igaqegkat pillghistun,

“Kina alngunak quyangalghiimeng unguvallelguyukumi,

quyamalghiinengllu aghnelguyukumi,

seghletun akuzineghmeng taaqli, iqlengiqnanighlillu.

11Seghletun pinanighluni, pinitun pili.

Nekeggmennaqlunillu kiyaghlli,

12qayughllak Atanghem esghapawii elqughutngalghiit,

nagataqiillu yughallghit.

Iwernga Atanghem tengvimun ayuqii seghletun pilghiit.”

13Kitumngam aqnighlleqisi sagiqngukufsi pinitun pilleghmun? 14Iwernga ikfiqeghngaaghpesi pinitun pilleghmun quyastellengellequsi. Alikegpenaki yuget, talwa sumeghyaligpenasi. 15Iwernga ilugpesigun manigughaqiteggu Christ‑a Atanghuluku. Kitum alngunak aaptekangisi sighimalleghmeng ilugpesinilngughmeng quunpeng liigiknatun kiimsighyaqleggiinaawaqiteki. 16Iwernga kiimsighaqiteki qusevegllelighlusi, siivakillelighlusi. Seghleghqenghilkufsi umyugasi seghleghninaanghitut. Enkaam yuget seghlequuqangisi pinitun kiyaghtelleghpesineng Christ‑akun, kaynguyugllequt tawaten akuzilleghmeggneng. 17Iwernga Kiyaghneghem piyukelqengngukagu ikfiqesqellusi pinitun pilleghmun, taana itagnaghataghaghtuq ikfiqelleghqaghpesineng seghletun pilleghmun. 18Christ‑a tuqukaaguq ataasighhaghmeng apalluqluki yuget seghleghqellghit. Seghleghqumangituq, iwernga tuqumatkegkaqii seghleghqestet taginnaluki Kiyaghneghmun. Yugusii tuqutkaaguq iwernga taghneghakek unguvaghtekaaguk. 19Enkaam taghneghaaluni ungipaghyaghtuqaaguq taghneghanun anusimingllaghvigmelngughnun. 20Taakunguut qaatkusimangilnguut Kiyaghneghmun neghighluku Noah kiyaghtengnguluku. Noah ark‑engllaaluku Kiyaghneq qelaneghpenani utaqiikaaguq qaatkusimangilngughnun avuteghqesqelluki. Pingayuneng inglullgiinaat yuget iteghluteng ark‑mun yugulikaagut meghqun. 21Taananguuq meq usputaq paaptaayelleghmun yugulighilghii elpesineng maaten unguvaghtellghakun Jesus Christ. Paaptaayelleq iqangiisiinghituq yugusimun. Itupill paaptaayelleghqun akeqiikut Kiyaghneghmun umyugamnneng seghleghningilngughmeng. 22Jesus Christ‑a qilagmun mayughluni aghenqigneghanituq Kiyaghneghem. Enkaam igleghutngwii qamaglluki yaqulget, qilagem igleghutistengi, aghtughyaghqaanghillghetlu.

Currently Selected:

1 Peter 3: ess

Highlight

Copy