1 Peter 2
2
Ataneq Unguvalghiinguuq Uyghak
1Enkaam taaqiteggu allaaghhiinaq seghleq atuqegkaghsi. Iqlengiqnanightek, piniiyuggnanightek, aqinananightek, seghlequughunnanighteklu. 2Allgenghhaghhaat quunpeng mamaghyugaqut. Ellngistun quunpeng mamaghyugtek pelungilngughmeng taghnegham mamaaneng. Angtaniitesleqaa yugulilleghsi, 3qayughllak naasiighaghsi Atanghem nangllegtallgha.
4Tagitek Ataneghmun, ellnga unguvalghiinguuq uyghak. Yuget ighsakegkaat sasiinghilngughestun, iwernga Kiyaghneghem nakmikegkaqaa megnunaghluku. 5Elpesillu unguvalghiistun uyghagestun ayuqusi, enkaam Agleghnalghiim Taghnegham nekeftusiqlisi Kiyaghneghem mangteghaanun. Qepghaalleqaghsi aaftekaalusi priest‑et tuunilghiit aghqutmeng Kiyaghneghmun. Ellngan tuguklighlleqii aghqutet Jesus Christ‑akun. 6Igaqegkaalghii Akuzitni Igaqegkani whaten,
“Zion‑mi nekegtaqaqa megnunalghii uyghak;
kangigham uyghakaa nakmikegkaqa.
Kina alngunak ugpeqilghii ellnganeng kayngumiqnaanghituq.”
7Taana uyghak megnunapigtuq elpesinun ugpeqilghiinun. Iwernga ugpeqingigalngughnun whatelnguuguq,
“Taana uyghak mangteghangllaghtet ighsakegkaat,
kangigham uyghakaaghsimakanga.”
8Amalleqa,
“Taam uyghagem yuget naagtestaqii, iqustaqiillu.”
Naagtaqut qayughllak qaatkusigalnguut Kiyaghneghem akuzitanganun. Tawaten Kiyaghneghem uspeqegkaqii.
9Iwernga elpesi yugni nakmikegkaagusi, umiilgem priest‑ekiisi, aaftekaagusi yugni, Kiyaghneghem ellngan katam yukiisi. Nakmikegkaagusi aapghesqelluki allaaghlluwhaat aneghneghqillghi Kiyaghneghem, tagsighikaq elpesineng mamlegllagmeng ellmi katam allaaghlluwhaghmun nighugminun. 10Sivunghani Kiyaghneghem yukenghisaghiisi, iwernga maaten yuliisimiisi. Sivunghani nalluksaghaghsi Kiyaghneghem nangllegtallgha, iwernga maaten allgeghsimaaghsi nangllegtallgha.
Kiyaghneghem Qepghaghtekiisi
11Ilakumtaamni, nunataagusillu allaneghtaagusillu nunami whani. Enkaam kayemamsi ilapgategpenasi yugusighpesi piyukellghanun, qayughllak yugusim piyukellghan pilluwaangwaa unguvasighsi. 12Pinitun kiyaghtek akulngitni ugpeqaanghilnguut, luuraq ellngita seghletun pistenguninayukangisi. Esghaqumegteki aneghneghqillesi usuqelleqaat Kiyaghneq Aghneghani Christ‑am tagillghan.
13Ataneq apalluqluku malighqutaqlusi kiyaghtek tamaghhiitnun kavemem igleghutistengitnun. Qaatkullusi umiilegmun; ellnganguuq angelleghpigaq igleghutista. 14Qaatkellukillu igleghutistet; umiilgem aghyuughiyaqlegughtestaqii seghletun pistenun, usuqiyaqleghughtestekaqiillu pinitun pistenun. 15Kiyaghneghem piyukelqaa pinitun pilleghpesigun nepiightesqelluki nalluuqat temngitwhameng akuzillghiit. 16Kiyaghtek itemngalghiistun iwernga itemngalleghsi atuqefqaan seghleghmun. Kiyaghtek qepghaghtelaaghulusi Kiyaghneghmun. 17Quulvaghluku tamaghhaa yuuk, piniqluki ugpeqaalgutesi, alikluku Kiyaghneq, quulvaghlukullu umiilek.
Christ‑am Ikfiqellgha Usputaqaghput
18Elpesi qepghaghtelaaghni qaatkutek piliitestegpesinun siivakellelighlusi. Qaatkegpenaki nangllegtaghhiinaatlu, umyugaqegtaghhiinaatlu, iwernga qaatkaqitekillu amyuqetalghiit. 19Kiyaghneghem efquqaqiisi sumeghmikneghpesigu ellnga ikfiqngulusi sameng sapiglleghhiistun. 20Iwernga suflughsimakufsiki qevutqullesi, seghletun pillesi apalluqluki, kitum alngunak usuqnaanghitiisi. Naqamenraq suflughsimakufsigu ikfiqelleq pinitun pilleghpesinun, taawa Kiyaghneghem efquqelleqiisi. 21Kiyaghneghem nakmikegkaqiisi suflughtesqelluki ikfiqellghet qayughllak Christ‑am ikfiqutkegkaqiisi. Ikfiqellgha usputaaguq elpesinun maligtesqelluku. 22Ellnga seghleghqigatuq, iqlengiqigatuq. 23Seghlequullengaqngami akisimangitii. Ikfiqaqngami akeqsagsimangitii. Itupill neghyukutkaaguq ellmineng nanqigtikayugmun elqughaghlluku. 24Christ‑am ellmineng katam aglaatkaqii seghleghqelleput yugusighmikluki qaquuramun. Tawaten pikaaguq tuqungasqelluta seghleghqelleghmun unguvasqelluta elqughutngalleghmun. Kiitiqullghakun naallghutkaagusi. 25Penniighestun aghulaqaatalghiistun ayuqsaghtusi. Iwernga maaten uteghniimaasi Penniighniightemun Kelengakistenganun unguvasighpesi.
Currently Selected:
1 Peter 2: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
