1 Peter 4

Kiyaghtek Kiyaghneghmun

1Ikfiqegkaatanganeng Christ‑a yugusimikun elpesillu yataaghqitek ikfiqsaghqaalusi Christ‑atun, qayughllak kina alngunak yugusimikun ikfiqelghii seghleghqesugnaniimaaq. 2Enkaam whaken kenlekluku unguvalleghpesi tagtalngatun malighqutaqegpenasi yugusighpesi piyukellghanun, iwernga atuqiteggu Kiyaghneghem piyukellgha. 3Sivunghani seghletun kiyaghtelqinaghtusi qaatkusigalngughestun Kiyaghneghmun. Whaten pikaagusi: seghleghnapiglluku atuqutkayuguyaghtusi, qiliiqutaqlusi, suumuutaqlusi, qerngughutullusi uglapestaaghet seghleghet atuqaqluki, neqenghaghqellusi, meghuuteghllaglusi enkaam alngunaseghaghllagughtaqusi, maniguqaqasillu iinghutkat kiyaghnengllaqat. 4Kiyaghhnanilghiisi ugpeqaanghilngughestun, liigikigataat sangan ilannaniitsi seghletun kiyaghtaalleghmeggnun, enkaam seghlequughaqiisi. 5Iwernga salleteng ellmeggneng katam apeghyaghqaqiit Kiyaghneghmun, nanqigtiyaqleggiinaghmun unguvalghiinengllu tuqukanengllu. 6Tamaaken apalluqluku Pinilghiit Ungipat ungipaqegkaagut talwa tuqukanun. Tamaakut nanqigtekaagut unguvanguluteng nunami whani. Iwernga Pinilghiit Ungipat ungipaqegkaagut ellngitnun, enkaam taghneghiit kiyaghsaghqaaghllequt katam Kiyaghneghem kiyaghtellghatun.

Kiyaghneghem Tunusii

7Sangwaa qamaglluni kenletghuusaghtughtuq. Tamaaken apalluqluku whateghlluwaaghuluki umyugasi, nuqenneghtulusi yughaghyaghqaalusi yughalleghqaghpesistun. 8Megnunalleghpigaaguq una: piniqutepiiglusi qayughllak piniqellghem seghevutestaqii seghleghqellelghuteghllaget. 9Upughanghulusi qikeghqufqaafsi. 10Tamaghhaghpesi allgeghutkaagusi tunusaneng atughqameng ilagpesinun. Allaaghhiinaat tunusat Kiyaghneghmeng pisi atuqaqiteki pinitun. 11Tunusalget akuzimun akuzilit Kiyaghneghem akuzitanganeng. Tunusalget qepghhaatimun qepghhaatilit iknaqellelighluteng Kiyaghneghem tuunegkaaneng. Enkaam salleghpesigun tamaghhaakun Kiyaghneq usuqellengellequq Jesus Christ‑akun. Ellngan pikaak nighughqelleqlu aghtughyaghqaanghilleqlu quunperugllak kenlengunaan. Amen.

Ugpeqat Ikfiqellghat

12Piniqegkamni ilakumtaamni, quupkaghpenasi seghleliighrukutaaghllaget kaaskangisi nanghiighsaghaghnalusi. Nanghiighsaghallesi allakaayagunghitut. 13Itupill quyatek ilallghiisi Christ‑am ikfiqellghanun quyangaghllagesqellusi nighughqellgha aliightekan. 14Seghlequuqangisi apalluqluku maligsaaghtengumalleghsi Christ‑amun, quyastellelguusi qayughllak Kiyaghneghem Taghneghakek nighughqengngalghiik kiyaghtengnguuk elpesini. 15Ikfiqsaghqaakufsi, ikfiqegpenasi yugtaghtengulusi, teglegniightengulusi, seghletun pistengulusi, nalighmeng yanutqustengulusi. 16Naqamenraq ikfiqsaghqaakufsi Christian‑ngutegpesineng, kaynguyugpenasi iwernga usuqnakesi Kiyaghneq atiqangisi Christ‑am aatghaneng.

17Nanqigtilleghqaq kaatuq, sivukluni piinlighllequq Kiyaghneghem nengllugutangakun. Piinlighnaqngukan whangkutgun, salleqanꞌngam qaatkusigalnguut Kiyaghneghem Pinilghiinun Ungipaanun? 18Akuzitet Igaqegkat pillghistun,

“Elqughutngalghiit pegnem yugulikaakuyeng,

avelghasingwaalghiit Kiyaghneghmeng,

seghleghqestetlu natenꞌngam yugulillengelleqat?”

19Enkaangam tamaakut ikfiqelghiit apalluqluku Kiyaghneghem piyukellgha, elqughulluteng pillequt, neghyukulleqiitlu unguvasiteng ataasiighmelngughmun Ulimaghistemun.

Currently Selected:

1 Peter 4: ess

Highlight

Copy