1 John 2

Christ‑a Kayutfut

1Taghnughhaghhamni, whaten latangwaamsi seghleghqefqaafsi pisqellusi. Iwernga kina alngunak seghleghqegkan Jesus Christ‑am elqughutngalghiim maniguututaqiinkut Atamun. 2Ellnganguuq iqitusiq seghleghqellemnnun, whangkunginaamta seghleghqellemnnun pingunghituq, iwernga tamaghaghllagan yugem seghleghqellghanun ayuquq.

3Esgha whaten ipapighqutkesaghqaghput liisimakilleghput Kiyaghneghmeng, qaatkellemteggun qelghusii. 4Kina whaten pilghii, “Liisimakaqa Kiyaghneq,” naqam qaatkegpenaki qelghusii, iqlengiqestenguuq, nallukaallu ipapighqelleq. 5Iwernga kitum alngunak qaatkegkumiki Kiyaghneghem akuzitangi, piniqillgha Kiyaghneghmun ipapestaaq iighwiqaaguq, tawaten ipapighqutkesaghqaqaghput ellnganitulvut. 6Kina alngunak pilghii kiyaghtengnguniluni ellngani, kiyaghsaghqaaguq Jesus Christ‑am pillghatun.

Nutaghaq Qelghusaq

7Piniqegkamni, una qelghusaq latatkegkegka elpesinun nutaghaanghituq. Taananguuq neghightaq qelghusaq nagatkayugsi ima piinlighyuwhaalleghmeng, taana ungipaaguq nagatkayugsi. 8Iwernga una qelghusaq latatkegkegka elpesinun nutaghaaguq. Taam ipapighqellgha esghaghluni ayuquq Christ‑akunllu elpesigunllu qayughllak mamlek aga naghughtengnguuq, nighupik kuukgutnguuq.

9Kina alngunak pilghii nighugmenniluni naqam ugumikluku ugpeqaalgutni, paninang mamlegmelnguuguq. 10Kitum alngunak piniqegkumigu ugpeqaalgutni nighugmi kiyaghtengnguuq, nighugmetutmineng naagtusighqiituq. 11Iwernga kitum alngunak ugumikegkumigu ugpeqaalgutni, mamlegmetuq. Igleghtengnguuq mamlegmi, talwa nallukuq navek pingutni qayughllak mamlegem ayaastekaqaa.

12Taghnughhaghhamni,

lataaqamsi qayughllak seghleghqellesi seghevutellengegkaagut apalluqluku Christ‑a.

13Atani, lataaqamsi qayughllak liisimakegkesi ellnga piinlighyuwhaalleghmeng ayuqelghii.

Nukalpigani, lataaqamsi qayughllak kayaalqegkaqegkesi Tughneghaq.

Taghnughhaghni, lataaqamsi qayughllak liisimakegkesi Ata.

14Atani, lataaqamsi qayughllak liisimakegkesi ellnga ima piinlighyuwhaalleghmeng ayuqelghii.

Nukalpigani,

lataaqamsi qayughllak iknaqelghiisi,

akuzitangillu Kiyaghneghem ilugpesinilnguut,

kayaalqegkaqegkesillu Tughneghaq.

15Piniqegpenaan nuna talwa sangwaa alngunak nunam pinga. Kitum alngunak piniqegkumigu nuna, piniqellghituq Atamun. 16Ukut esgha qamaglluki nunam pingi: sangwaa yugusim piyukellgha seghleghqusiqaqelghii, iyem qiliightestellgha, sangwaatlu yuget qukaayugutkaqegkangit nunami whani. Taakut Atameng pingunghitut, nunameng pinguut. 17Nuna aviighutnguuq, tamaakutlu seghleghqusiiwaqelghiit yugem piyukaqegkangi; iwernga kitum atuqegkumigu Kiyaghneghem piyukellgha kiyaghsaghqaaguq quunperugllak kenlengunaan.

Anguyakilghiit Christ‑ameng

18Taghnughhamni, kenla qantaghalliighaghtuq! Ungipaatkaagusi Anguyakilghii Christ‑ameng tagilleqniluku, whaa maaten uglapiglleghiit anguyakilghiit Christ‑ameng allgeghtuutngwaaghluteng ayuqut, enkaam liisimakaghput kenla qantaghalliighaghtuq. 19Tamaakut whangkunnisaghtut iwernga unitkaqiinkut qayughllak ilatngwaaghumangilnguut whangkunnun. Ilatngwaaqaayaqumeng uninnayanghitiinkut. Unitelleghmegteggun liigikestengngwaaghaat ilatngwaaghumangitelleghteng whangkunnun.

20Iwernga elpesi, Christ‑am kuuvegkaqiisi Agleghnalghiigneng Taghneghagneng enkaam qamagllusi liisimakaghsi ipapighqelleq. 21Latangustemsii‑i ipapighqelleq nallukutegpesineng? Nakaa, latangwaamsi liisimakutegpesineng. Liisimakegkesillu iqlengiqelleq ipapighqelleghmeng pingunghilnguq.

22Kina iqlengiqestengwaa? Iqlengiqestenguuq whaten pilghii, “Jesus, Christ‑angunghituq.” Taananguq anguyakilghii Christ‑ameng qayughllak ighsakegkek Atankuk Ighneghenkuk. 23Kitum alngunak ighsakegkumigu Ighneq, Atallu ighsaksaghqaqaa; kitum alngunak tugukliqumigu Ighneq, Atallu tuguklighyaghqaqa.

24Enkaangam iiwleng neqamikluku apeghtuusaq, apeghtuusaqegkaq elpesinun ugpeghyuwhaalleghpesineng ima. Atuqumanginaqufsigu nagaquqaghsi taawa iiwleng Ighneghmellequsillu Atamellequsillu. 25Unanguuq akequsaqegkaa tuunelleqniluku whangkunnun, kenlengilnguq unguvalleq.

26Latasiqanka elpesinun tamaakut puughtinaqutkelghiit elpesineng apalluqluki. 27Iwernga elpesi Christ‑am kuuvikegkaqiisi Taghneghagmineng. Taghneghakek ilugpesinitutmegneng alla kina alngunak Apeghtughisteksugnaanghitaghsi, qayughllak Taghneghagkenka apeghtughaqiisi sameng tamaghhaaneng. Apeghtuusii ipanguut, temngingunghitut enkaam Taghnegham apeghtulghatun Christ‑ametekestaghtek.

28Taghnughhamni, Christ‑ametekestaghtek enkaam uka aliiqan ilutuyaghqaaluta, iighnaqefqaamta kaynguyugem ellnganeng pilghaakut tawani Aghneghmi tagillghani. 29Liisimakegkesi Christ‑a elqughutngalghii. Enkaam liisimaksaghqaqasi kinkut alngunak elqughutngaan pikayuget Kiyaghneghem taghnughhaqii.

Currently Selected:

1 John 2: ess

Highlight

Compare

Copy