1 John 3

Avaqutii Kiyaghneghem

1Esghaqaghtegguqun Atam piniqimalleghllaga whangkunnun, avaqutaqniiqiinkut ellminun, ipa avaqutaqiinkut. Tamaaken apalluquluku nunam yugan nallukiinkut qayughllak nallukegkangat Kiyaghneq. 2Piniqegkamni, taawa avaqutaqegkanginkut Kiyaghneghem, iwernga salin whateghlluwaaq liigikigataghput naten lliilleghqaghput. Iwernga liisimakaghput, Christ‑a aliiqan ellngatun ayuqellequkut qayughllak esghaghlleqaghput legan tawatelluku. 3Taana kitum alngunak ellmineng sighimakegkumigu Christ‑akun pelungighsaghyaghqaaguq, katam Christ‑am pelungitellghatun.

4Kina alngunak seghlleghqegkayuk qaatkusigatuq Kiyaghneghem Liilightuusaanun. Seghleghqellghuuq qaatkunneghitelleq Kiyaghneghem Liilightuusaanun. 5Liisimakaghsi Christ‑a allgeqaaguq iqinnaluki seghleghqelleput, ellnga seghleghqellghituq. 6Kina alngunak Christ‑ami kiyaghlleghhii seghleghqumanginaghnaangituq. Kina alngunak seghleghqumanginaqumi, liigikumangitaallu nallukaqaallu Christ‑a.

7Taghnughhaghhaghni, kitumun alngunak puughtestegpenasi! Kina alngunak elqughulluni pikayuk elqughutngaaq katam Christ‑am elqughutngallghatun. 8Kina alngunak seghleghqumanginalghii Tughneghaam pikaa qayughllak Tughneghaq seghleghqengngulghii ima piinlighyuwhaalleghmeng. Ighnegha Kiyaghneghem allgeqaaguq una apalluqluku, naafqennaluku Tughneghaam qepghaqaa.

9Kina alngunak taghnughhaa Kiyaghneghem seghleghqumanginiigatuq qayughllak Kiyaghneghem nangaghnegha ellnganilnguq; qayughllaklu Kiyaghneq Atakegkanga, enkaam seghleghqumanginaghnaanghituq. 10Whaten liisimaksaghqaqaput Kiyaghneghemllu avaqutii, Tughneghaamllu avaqutii: kina alngunak elqughulluni pingigalnguq nalighmeng ugumikingalghii yulgutmineng Kiyaghneghem avaqutaqenghitaa.

Piniqutullusi

11Ungipaq nagaquqaghsi piinlighyuwhaalleghpesineng unanguuq: piniqutusaghqaagukut. 12Cain‑etun ayuqsaghqaanghitukut. Cain Tughneghaam pikaa enkaam tuqutkaqaa ellmi katam anglegutni. Sangan tuqutagu? Qayughllak sallghi anaggutngalghiit naqam anglegutangan sallghi elqughutngalghiit.

13Ugpeqaalgutemni, saghiighayugpenasi nunam yugan ugumikegkangisi. 14Liisimakukut tuqumeng alpakaagukut unguvalleghmun qayughllak piniqegkeput ugpeqaalguteput. Kina alngunak piniqingigalnguq paninang tuqumetuq. 15Kitum alngunak ugumikegkumigu ugpeqaalgutni yugtaghtenguuq. Liisimakaghsi yugtaghtem ilungani kenlengilnguq unguvalleq kiyaghtengngunghituq. 16Whaten esgha liisimakegkefut piniqelleq sangutanga: Christ‑am tuunellghakun unguvalleni whangkunnun. Enkaam whangkutallu tuunelteki unguvalleput ugpeqaalgutemnnun. 17Kitum alngunak naamaghmi kiyaghtaaghem esghaghluku ugpeqaalgutni aklumalghii nangllekenghilkumigu, natenꞌngam Kiyaghneghem piniqellgha ilunganilleqa?

Tetuwitelleq Sivungani Kiyaghneghem

18Taghnughhaghhaghni! Piniqiyaghqaanghitukut akuziteraaghinaghteggunllu akuzillemteggunllu. Yeghlegi piniqilta ipapighqelluta nangaghnemteggun. 19-20Enkaangam liisimakellequkut Kiyaghneghmun ipapighqelleghmun pikutfut. Seghleghninemtallu Kiyaghneghem sivungani nalluneqsuknaanghitaghput seghevutingallgha qayughllak Kiyaghneq aangataghaghtuq seghleghyugngallemnneng, liisimakegkangallu sangwaa tamaghhaan. 21Piniqegkamni, seghleghninghilkumta tetugnaanghitaghput Kiyaghneq. 22Aapnemtallu sameng alngunak allgeghutaqukut ellnganeng qayughllak qaatkaqegkeput qelghuusii, atuqaqegkeputlu efqughnalghiit ellngani. 23Una esgha qelghusaa: whangkunnun ugpeqesqelluku Ighneghmi aatgha Jesus Christ‑am, piniqutullutallu Christ‑am qelellghatun. 24Kitum alngunak qaatkegkumiki Kiyaghneghem qelghuusii kiyaghtengnguuq Kiyaghneghmi, Kiyaghneq ellngani. Whaten esgha liisimakegkefut Kiyaghneghem whangkunnitellgha: Taghneghagnekun tuunegkamikun whangkunnun.

Currently Selected:

1 John 3: ess

Highlight

Compare

Copy