1 Corinthians 2
2
Paul‑em Ungipaqillgha Corinth‑eghmiinun
1Ugpeqaalgutemni, ungipaqiyaghtughaqngama elpesinun, atuqumangitanka akuzitet liigikepagningilkesi. Peghqilleghllamkun ungipaqiyunghitunga Kiyaghneghem ungipaaneng elpesinun. 2Pakikaqanka tamaakut qayughllak ungipaqiyulghiinga Jesus Christ‑anginaghhaghmeng tuqullghanengllu qaquurakun. 3Elpesinitaqngama tetugaataqaagunga, alingruuqaagunga, ungelegtekaagungallu. 4Kukragnalghiimeng akuzitkumangitunga peghqineghllagem akuzitanganeng. Iwernga Agleghnalghiim Taghnegham aghtughyaghqaanghillghan ipapighqegkaqii apeghtughillghenka ipangutangi. 5Enkaangam ugpeghtusi apalluqluku Kiyaghneghem aghtughyaghqaanghillgha, nakaan apalluqluku yugem peghqinellgha.
Kiyaghneghem Peghqinellgha
6Angtaniitkanun ugpeqanun apeghtuusaqaqa Kiyaghneghem peghqinellgha. Iwernga taana peghqinelleq nunameng pingunghituq, talwa igleghutistenganeng. Qantaghaqun aviighusaghqaagut. 7Peghqinelleq apeghtuusaqa Kiyaghneghem peghqinelqaa, nallukaat yuget. Yuget nallukngwaaghyaqangat taana peghqinelleq kenlanga Kiyaghneghem liitestellghanun. Talwa nunangllaamangilluni Kiyaghneghem usuqsaghqaaluta pikaqiinkut peghqinelleghmikun. 8Nalighhiiniita nunam igleghutistengita liigikumangitaat taana peghqinelleq. Liigikegkaqsaqumegteggu, qaquuraghnayanghitaat Atangha nighughqellghem. 9Igaqegkani Akuzitni igaqegkaaguq,
“Tamaakut iyem esghamangilkangi,
tamaakut sigutem nagaquumangilkangi,
tamaakut umyugam sumeghtaghaatkumangilkangi.
Kiyaghneghem yataaghqegkaqii piniqisteminun.”
10Iwernga Kiyaghneghem liigikestekaqii whangkunnun Agleghnalghiignekun Taghneghagmikun. Taghnegham yuvghiighaqaa sangwaa tamaghhaan, talwa Kiyaghneghem qaamnarugllaganilnguut. 11Yugem sumeghtaghallgha kitum alngunak nallukaa iwerngaqun ellngan katam taghneghagkenka. Tawateghpigaq Kiyaghneghem sumeghtaghallgha kitum alngunak nallukaa iwerngaqun ellngan katam Taghneghagkenka. 12Nunam taghneghaaneng allgeghusimangitukut. Yeghlegi, allgeghtekaqagput Taghneghak Kiyaghneghmeng pik, liigiknaluki qamaglluki Kiyaghneghem tuunegkii whangkunnun. 13Enkaam akuzingigatukut yugem peghqinellghakun, iwernga atuqaqaput akuzitet Agleghnalghiim Taghnegham apeghtuutkii. Tawaten piiqukut apeghtuusaqnemteki Taghnegham ipapillghi tamaakunun allgeghutkanun Agleghnaliigneng Taghneghagneng. 14Iwernga kina alngunak allgeghusimangilnguq Agleghnalghiigneng Taghneghagneng, tuguklighingigatuq tunusaneng Taghneghagneng pineng. Tamaakut tunusat temngitwhanguut ellngani. Liigikepagningitii qayughllak Agleghnalghiim Taghnegham kayusillghiinaakun liigiksaghqaaguq. 15Yugem allgeghutkam Agleghnalghiigneng Taghneghagneng nanqigtaqaa sangwaa qamaglluku. Iwernga kitum alngunak nanqigsaghqaqenghitaa ellnga. 16Akuzitet Igaqegkat pillghistun,
“Kitum alngunak nallukaa Atanghem sumeghtaghallgha.
Enkaam kitum alngunak liilightughnaanghitaa.”
Iwernga whangkuta ugpeqani sumeghtaghaghaqukut Christ‑am sumeghtaghallghatun.
Currently Selected:
1 Corinthians 2: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
