1 Corinthians 3

Kiyaghneghem Qepghaghtengi

1Ugpeqaalgutemni, elpesinitaqngama aleghqughpagningitkaqamsi aleghqughwaqellemtun ugpeqaghllaget. Yeghlegi aleghquqaqamsi ugpellesi anglillghilngughestun ayuqluki. Ugpeqillesi Christ‑akun taghnughhaghhaghestun ayuqut. 2,3Kukragnangunaan apeghtuqaqamsi. Katam tawaten mamaghhaghmeng meghesleghhiistun pikaqamsi. Neqepigmeng neghestepagningitkaqamsi qayughllak neqepigtughpagningilnguusi salin. Paninang maaten neqepigtughpagningitaqusi, qayughllak ugpeqaanghilngughestun ayuqusi salin. Liigikestengngwaaghsi ugpelleghpesi anglinghitellgha aqinalleghpesigunllu aghivatelleghpesigunllu. Ugpeqaanghilngughestun kiyaghtengnguusi. 4Nalighsi pineghmini, “Whanga Paul‑em maligsaaghtekaanga,” ilasillu pineghmeggni, “Whanga Apollos‑em maligsaaghtekaanga,” ugpeqaanghilngughestun piiqusi.

5Kinangaawa Apollos? Kinanguzinga whanga? Qepghaghtekiinkung Kiyaghneghem, kayusiitkaqamsi ugpeqesqelluku Christ‑a. Qepghaqalestaghhiinaagukung Ataneghem qelghutkaaneng. 6Elpesi Kiyaghneghem piitesighaghvikiisi. Piitesighaghaqunga, Apollos‑em meghqaqaa, iwernga Kiyaghneghem nagustaqaa. 7Enkaangam kina alngunak piitesiighalghiillu meghqilghiillu ukavantuq. Kiyaghneghhiinaq aangeghllagtuq nagustikayuguuq. 8Piitesighaghtallu meghqistallu tawatelkutuk. Kiyaghneghem akileghtughyaghqaqaak qepghallghegkenkun. 9Qepghalgutkutukung Kiyaghneghmun; elpesi Kiyaghneghem piitesighaghvikiisi.

Kiyaghneghem mangteghaqiisi. 10,11Kiyaghneghem nangllegtalleq tagivaqaa atuqluku piinliqaqaqa qepghaqaq elpesini. Peghqinelghiistun tunemiqaqaqa mangteghaq ulimayaghqaq. Jesus Christ‑anginaaguq tunemaq, alla saaghwakun tunemaghqiituq. Ilangita ulimavikngwaat qaayngakun. Qamaglluni piraamsiluni ulimali. 12Ilangita atughlleqaat gold‑a, silver‑a, jewel‑a, ilangita unaghsiq, paliqaq vegaaq, ungagaqlu tunemakun taaggun. 13Sangwaa atuqegkaghput esghaghyaghqaqaghput ataasikaghtaamta qamagtengngwaaghluta aghneghmi tawani Christ‑am nanqigtilleghqaani. Kenghem esghaghtesaghqaqaa qepghaqaghput natetulanga. 14Sangwaa yugem atuqegkaa kumanghilkuni, akileghtusangyaghqaaguq. 15Iwernga ilangan yugem qepghaqaa iflayaghqaaguq kumaquni, akileghtusangnaanghituqlu. Naqamenraq ellnga yugulillengyaghqaaguq, katam tawaten keneghmeng aanelghiistun.

16Liisimakngwaaghaghsi Kiyaghneghem Temple‑kiisi. Agleghnalghiik Taghneghakek kiyaghtengnguuk ilugpesini! 17Kitum alngunak naafqegkagu Kiyaghneghem Temple‑nga, Kiyaghneghem naafqesaghqaqaa ellnga, qayughllak Kiyaghneghem Temple‑nga agleghnalghiinguuq. Elpesi Temple‑kiisi.

18Kina alngunak puughtefqaami ellmineng pili. Nalighsi sumeghtaghaangukumi liitepagllakaaniluni nunam peghqinellghaneng, yeqay maliglligu Christ‑a, ugpeqaanghilnguut temngingunighngaatgu. Tawaten pikuni elngaatall peghqinghughtepiiglleqaa. 19Kiyaghneghmi nunam peghqinellgha temnginguuq. Akuzitni Igaqegkani igaqngaaq, “Peghqinghet yuget nunami whani Kiyaghneghem pipagningiitestaqii ellngita katam peghqinellghitgun.” 20Igaqegkaaguqlu, “Atanghem liisimakaa peghqinghem yugem sumeghtaghallgha sasiinghituq.”

21Enkaangam kitum alngunak qukaayugutkesaghqaqenghitii sangwaat yuget piiqegkangit. Sangwaa qamaglluku Kiyaghneghem pinighqusighqaaghtestekaqaa elpesinun, 22talwa Paul, Apollos, Peter‑llu. Nunallu una, unguvalleqlu, tuqulleqlu, sangwaallu alngunak kiyaghtaalleghmelnguq maaten, sangwaallu alngunak kaasaghqaq, qamagtengngwaaghluki elpesi pikasi. 23Enkaam elpesi Christ‑am pikiisi, Christ‑a Kiyaghneghem pikaa.

Currently Selected:

1 Corinthians 3: ess

Highlight

Copy