1 Corinthians 1
1
1Ukut latat Paul‑meng pinguut, Kiyaghneghem nakmikegkaaneng Jesus Christ‑amun apostle‑nguluku. Ugpeqaalgutfut Sosthenes whangamnituq. 2Lataaqunga Kiyaghneghem ugpeghtengitnun Corinth‑melngughnun, Kiyaghneghem aaftekaanun yuknalusi Christ Jesus‑kun. Nakmikegkaqiisillu pelungitesqellusi maligullusi yulghuteghllagnun tamanganilngughnun, yughaqayugnun Atanemnnun Jesus Christ‑amun, qamagtengngwaaghluta Atanqaghput. 3Kiyaghneghem Atamta, Atanemtallu Jesus Christ‑am nanglleklisillu nekeggmellelguslilsillu.
Quyastellghet Christ‑akun
4Iqamsiqayugvikaqaqa Kiyaghneq qayughllak nangllekegkaqiisi Christ Jesus‑kun. 5Enkaam ellngakun aklungighikaagusi liigikelleghmengllu akuzilleghmengllu. Enkaam maaten liigikataghaghlleqaghsi Christ‑a, akuzitkataghaghlleqaghsillu Ataneq. 6Allangughtekamllu kiyaghtaalleghpesi ipapighqaa ungipaqegkaghput Christ‑a. 7Agleghnalghiigneng Taghneghagneng tunusalguusi sameng tamaghhaaneng, utaqiingulusi Atanemta Jesus Christ‑am taginqigtelleghqaaneng. 8Kiyaghneghem ugpellesi iknaqughsaamanginaghnaaghii kenlanga kingulighpigaghmun aghneghmun. Inqun anaggutellghitesqellusi Ataneghput Jesus Christ‑a nanqigtikan yugneng. 9Ataasiighmelnguum Kiyaghneghem nakmikegkaqiisi ilatesqellusi Ighneghminun Jesus Christ‑amun Atanemnnun.
Corinth‑eghmiit Ugpeqiit Aaghtiiraaghullghiit
10Ugpeqaalgutemni, Atanemta Jesus Christ‑am aatghakun piimsi taaqesqellusi aaghtiiraaghunneghmeng. Aafquutegpenasi. Sumeghtaghallesillu sanaqellesillu ataasiighhnaqluki. 11Ugpeqaalgutemni, ilangita Chloe‑em nengllugutangan ungipaatkaqaatnga aaghtiiraaghutaqnilusi. 12Ilasinguq piiqut, “Whanga Paul‑em maligsaaghtekaanga.” Ilasi, “Whanga Apollos‑em.” Ilasi “Whanga Peter‑em.” Paninang ilasinguq piiqut, “Whanga Christ‑am maligsaaghtekaanga.” 13Enkaangam qafsinaghqaghsi Jesus Christ‑a. Paul‑em qaquraatkegkaqisii? Paaptaayekaatsii Paul‑em aatghakun?
14Iqamsiqayugvikaqaqa Kiyaghneq paaptaayemangilkegka nalighhiinaghsi iwerngaqun Crispus‑enkuk Gaius‑enkuk. 15Enkaangam kina alngunak pinaanghituq paaptaayemaniluni atemkun. 16(Atwhay paaptaayekaqankallu Stephanas‑enkut nengllugutkullghiit. Iwernga neqamikenghitaqa kina alla alngunak paaptaayematka).
Christ‑am Aghtughyaghqaanghillghallu Kiyaghneghemllu Peghqinellgha
17Christ‑am paaptaayeliisqumangitaanga, iwernga kayagtekaqaanga ungipaqisqellunga Pinilghiineng Ungipaneng. Ungipaqingigatunga atuqluki yugem peghqinellghi, luuraq aghtughyaghqaanghillghiitesnayukamkun qaquuraa Christ‑am. 18Ungipaq Christ‑am tuqullgha qaquurakun temnginguuq iflanaqelghiinun. Iwernga yugulillengelghiini whangkuta liisimakaghput Kiyaghneghem aghtughyaghqaanghilqaa. 19Akuzitni Igaqegkani igaqngaaq,
“Peghqinghet peghqinellghat atuunanightesleqaqa.
Liitkaghllagetlu liitellghat sasiinanightesleqaqa.”
20Enkaam sanaqanꞌngam nunam peghqinelghiingi? Sanaqanꞌngam apeghtughistengi Liilightuusat? Sanaqanꞌngam aaghtiiraaghtet? Qamagtengngwaaghluni liitelleghllallghat sasiinghituq qayughllak Kiyaghneghem temngitwhangllaqaqaa peghqinellgha nunam.
21Peghqinelleghmikun Kiyaghneq pikaaguq nunam yuganun nallukelleqniluni peghqinellghitgun. Enkaam Kiyaghneghem nakmikii yugulinaluki qamaglluki ugpelghiit Christ‑ameng ungipaqegkamnneng. Ugpeqaanghilnguut sumeghtaghaatkaqaat taana ungipaqegkaghput temnginguniluku. 22Jews‑et esghaasugaqut allaaghlluwhaghtilleghneng ugpeqnaluku Kiyaghneghem ungipaa; Gentile‑et peghqinellengyugaqut ugpeqnaluku ungipaq ipangutanga. 23Iwernga paninang ungipaqnaqngwaaghput Christ‑amun tuqutkegkaqniluki qaquurakun. Una ungipaq Jews‑eni piyaqnapigtuq ugpeqsaghqaaluni, Gentile‑eni temngiinguuq. 24Iwernga whangkunnun Kiyaghneghem nakmikegkaanun Jews‑ngughngaamta, Gentile‑ngughngaamta tawatenneghituq. Christ‑am tuqullghan qaquurakun liitestekaqiinkut Kiyaghneghem aghtughyaghqaanghillghanengllu peghqinellghanengllu. 25Kiyaghneghem temngitwhallgha peghqinghataghaghtuq yugem peghqinellghaneng. Kiyaghneghem kayaatellgha iknaqataghaghtuq yugem iknaqellghaneng. 26Ugpeqaalgutemni, neqamikluku natesaatsi Kiyaghneghem tuqlughaqngisi. Qafsinkuuraghhaghni peghqinghuyaghtusi nunam yugan sumeghtaghaatkellghitni. Qafsinkuuraghhaghni aghtiigasaghtusi igleghutistet, nalighmeng aklungilngughneng nengllugutneng pinguyaghtusi. 27Iwernga Kiyaghneghem nakmikegkaqii tamaakut nalluuqat nunami kayngusaaknaluki peghqinelghiit, Kiyaghneghem nakmikegkaqii kayaalnguut nunami kayngusaaknaluki tamaakut iknaqelghiit. 28Kiyaghneghem nakmikegkaqii ukavanlenguutlu asitnginaaqiitlu nunami. Tamaakunguut Kiyaghneghem nakmikegkii, yugnun liigikesqelluki sumeghtaghaatkegkiit aangwaaghuluki iwernga Kiyaghneghmi aangwaaghunghitut. 29Enkaangam kina alngunak aangaayuggnaanghituq nekevegkuni sivungani Kiyaghneghem. 30Kiyaghneghuuq tuunistesi unguvalleghmeng Christ Jesus‑kun. Kiyaghneghem Christ Jesus‑mun tuunestiinkut peghqinelleghmeng, elqughutestiinkutlu Kiyaghneghmi, agleghnaghtestiinkutlu, itemutestiinkutlu seghleghqellemnneng. 31Enkaangam atuqelteggu, Akuzitni Igaqegkani igaqngalghii,
“Kina alngunak aangaayugsukuni,
aangaayugutkelliki Atanghem apeghiiqii ellminun.”
Currently Selected:
1 Corinthians 1: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
