1 Corinthians 15
15
Christ‑am Unguvaghtellgha
1Ugpeqaalgutemni, neqangughsugamsi Pinilghiineng Ungipaneng ungipaqegkamneng elpesinun. Tugukliqaqasi enkaam ugpellesi taaggun nekegngaat ayuwilluteng. 2Yugulillengegkaagusi ugpeqaqngafsiki Pinilghiit Ungipat, enkaam ugpequmanginaghteki aapqanka. Iwernga ugpeqnaniqufsiki, ugpellesi sasiinaanghitut.
3Apeghtuqaqamsi apeghtuusaqegkameng whangamnun. Taakut ugpeqsaghqaqasi: Christ‑am tuqutkegkaqii seghleghqelleput, katam Akuzitet Igaqegkat pinaqnillghistun. 4Taagken lliifqaqaat, enkaam pingayaani aghneghem unguvaqaaguq Akuzitni Igaqegkani pinaqnillghistun. 5Peter‑em esghaqaqaa, taagken kingunganeng qamaglluteng qula maalghuk siipneqluku apostle‑et esghaqaqaat. 6Kingungitneng 500‑neng uglalghiim maligsaaghtengita qerngaghllagmeng esghaqaqaat. Kiyang taakut unguvaat, ilangi tuqukaaghngaaghmeng. 7Taagken James‑em esghaqaqaa, enkaam kinguvaqun qamaglluteng apostle‑et esghaqaqaat. 8Kinguliilunga esghaqaqaqa, ugpeghyaghqaghpagningitkaaghngaaghma kitumi alngunak.
9Ukalighpigaagunga apostle‑eni, talwa atighyaghqaanghisaghtunga apostle‑meng, qayughllak amyuqetaatqegkaqanka Kiyaghneghem yugi. 10Iwernga Kiyaghneghem nangllegtallghakun apostle‑nguunga. Nangllegtallgha whangamnun avanginneghituq. Qepghaghataghaghtunga tamaghhiitneng apostle‑et, iwernga whangamneng pingunghitaqa, Kiyaghneghem nangllegtallghakun piiqunga. 11Qepghaghataghalleghput ilamnneng megnuniituq. Megnunalghiita taana qamaglluta ungipaqegkaqaput elpesinun taakut ataasit Pinilghiit Ungipat, enkaam ugpeqegkaqasi.
Whangkuta Unguvalleghqaghput
12Ugpeqngukesi Ungipaq ungipaqegkaghput: Christ‑am unguvaghtellgha tuqulleghmeng. Sangamengam ilasi piiqat, “Tuqukat unguvaghnaanghitut?” 13Kina alngunak unguvaghtesimangilkan, Christ‑a paninang tuqunganayaghtuq. 14Paninang tuqungakan ungipaghqiitukut, enkaam ugpeqsaghqiitusi. 15Tuqukat unguvaghtesimangilkata tuqulleghmeng, Kiyaghneghem unguvaghtesimangitaa Christ‑a. Enkaangam whangkuta apostle‑eni qamaglluta iqlengiqestenguukut qayughllak pikaagukut, “Kiyaghneghem Christ‑a unguvaghtestekaqaa tuqulleghmeng.” 16Tuqukat unguvaghtesimangilkata, Christ‑allu unguvaghtesimangituq. 17Christ‑a paninang tuqungakan ugpellesi sasiinghitut enkaam aghyullengellequsi seghleghqelleghpesinun. 18Ugpeqistet Christ‑akun tuqulaghaatkat qamaglluteng iflanayaghtut. 19Neghyukilleghput Christ‑akun whaninginaghhaq kiyaghtaallemnni atuukan, nangllegnalleghpigaayaghqaagukut yugni kitumeng alngunak.
20Ipanguuq Christ‑a unguvaqaaguq tuqulleghmeng, tamaaken apalluqluku liisimakngwaaghaghput whangkutallu unguvaghtesaghqaagukut ilangani aghneghem. 21Tuqulleq allgeqaaguq ataasikun yugkun, Adam‑kun. Tawateghpigaq unguvaghtestelleq tuqulleghmeng allgeqaaguq ilangakun yugkun, Christ‑akun. 22Adam‑kun qamaglluni tuquyaghqaaguq, iwernga qamaglluteng Christ‑amelnguut unguvaghtesaghqaagut tuqulleghmeng. 23Qamaglluteng tuqulaghaatkat pilleghqateng kaanneghata unguvaghaqnaaghtut: Christ‑a sivulighpigaaluni unguvaqaaguq. Taagken taginqigtekan tamaakut ellngan pingi unguvaghyaghqaagut. 24-28Christ‑a umiilguyaghqaaguq kenlanga kayaalqelleghminun qamagtengngwaaghluki aghtughyaghqaanghillghet qaatkusugigalnguut Kiyaghneghmun, tughneghaatlu igleghutistet, yugetlu igleghutistet ilalluki. Christ‑a umiilguyaghqaaguq kenlanga Kiyaghneghem kayaalqellghanun qamagtengngwaaghluki Christ‑am anguyagi. Kingulighpigaq anguyak tuqullghuuq Kiyaghneghem kayaalqesaghqaa. Christ‑am tuunegkagu Ataneghpagulleq Kiyaghneghmun Atamun taagken kenla kaallequq.
Igaqngaaq Akuzitni Igaqegkani, “Kiyaghneghem sangwaa tamaghhaan itegaan asinganun lliightesaghqaqaa.” Whaten pisiiguq, Kiyaghneghem samun tamaghhaanun qaatkestesaghqaqaa Christ‑a. Iwernga Kiyaghneghem qaatkusaghqaaghtestekumigu sangwaa tamaghhaan Christ‑amun, qaatkusaghqaaghsaghqaanghituq, ellmineng katam. Tawaten pikan, taagken Ighneq ellmineng katam asiliighsaghqaaguq Kiyaghneghmeng. Elngaatall Kiyaghneghem sangwaa tamaghhaan igleghulleqaa.
29Ilangi yuget paaptaayestaqut tuqukat apalluqluki. Tuqukat unguvaghsaghqaanghilkata tuqulleghmeng, sangamengam ilangi paaptaayestaqat tuqukat apalluqluki? 30Liisimakaput tuqukat unguvaqaagut tuqulleghmeng. Enkaangam ungipaqinguukut Pinilghiineng Ungipaneng tuqunnaqsaghngiinkut aghhutanga tamaghhaan. 31Ipanguuq tuqusaqleggiinaq ayuqaatnga aghhutanga tamaghhaan. Katam liisimakelleghpesistun quyakelqa ugpelleghsi anglilghii Christ Jesus‑kun Atanemteggun. Tawateghpigaq ipapighqutkesaghqaqaghsi tuqusaqleggiinaq ayuqegkangatnga aghhutanga tamaghhaan. 32Yuget Ephesus‑melnguut pilluwaqanka teghikusastun ayuqut. Allgeghunnalunga whani kiyaghtellemni pilluwaqumki, sameng allgeghunnaanghitunga. Tuqullemta kingunganeng unguvaghyaghqaanghilkumta, “Neghelta, meghelta, qayughllak unaami tuqullequkut.”
33Kitumun alngunak puughtestegpenasi ilakumtaangumakufsi seghletun pikayugmeng, atuqsagulleqaghsi sangwaa piiqegkangat. 34Sumeghtaghaghaqlusi pinitun, seghleghqennanightek, ilasi akulegpesinilnguut apeghtuumangilnguugut Kiyaghneghmeng. Qayughllak elpesi ugpeqani kaynguyugyaghqaagusi.
Yugusighqat Unguvaghtestellghem Kingunganeng
35Kina alngunak whaten pikan: “Naten tuqukat unguvaghtestaqat tuqulleghmeng? Natelngughmeng yugusilguyaghqaawat?” 36Uyuq nalluuqaq! Piituta nunakun peghukuvgu tuquyaghqaaguq sivungani piitelleghqami. 37Piitutmeng allanguluni angliiquq. Piitesighaneghpeni, piitutesquvegaghhaq peghwaaqan nunakun, wheat‑kaghqaq nalighmeng sanguyaghqaq. 38Piitutesquvegaghhaq taana Kiyaghneghem nakmikegkamineng yugusilitaqaa. Allakullghiit piitutet allakullghiimeng yugusighqalguut.
39Tawatelkutngwaaghunghitut yugusit. Yuget, teghikusat, qawaaget, iqalluget allakutut yugusiit.
40Qilak yugusightuuq, nuna yugusightuuq. Yugusit qilagmelnguut ellmegestun pinighnaghtut. Yugusitlu nunamelnguut ellmegestun pinighnaghtut. 41Siqineq, tanqiq, ighaleqetaaghetlu allakutut pinighnallghit. Talwa ighaleqetaaghet allakaqaghtaghmeng allakutut pinighnallghit.
42Tawatesaghqaagut tuqukat unguvaghtestekata tuqulleghmeng: nunami yugusiput tuqaaqut, aghwaaqut, iwernga yugusighraghaput tuqunaanghitngwaaghtut. 43Lliifqumeng nunamelnguut yugusiput seghleghughsaghqat kayaaliyaghqat, iwernga yugusiq unguvaghtestekumi pinighnaghyaghqaqlu iknaqsaghqaqlu. 44Lliveneghmini yugusiq yugem pikaa. Iwernga yugusiq unguvaghtestekumi taghneghamnnun yugusiiyaghqaaguq. Yugusilgukata yuget yugusighqalguutlu taghneghaput. 45Enkaam Akuzitni Igaqegkani igaqegkaaguq, “Yuksuwhaaq Adam unguvalghiingughtekaaguq.” Iwernga kinguliq Adam unguvallelitikayuguuq taghneghaq, Christ‑anguuq. 46Sivukluta yugem yugusiineng yugusingaqukut, taagken taakwaningani Kiyaghneghem yugusilitaqii taghneghaput. 47Yuksuwhaaq nunameng pinguuq, pagulanganeng nunam ulimaaghuuq, iwernga tuunglighhaa yuuk Christ‑a, qilagmeng pinguuq. 48Yuget kiyaghtekumeng nunami whani, yugusilguut Adam‑em yugusiitun ayuqelghiimeng. Iwernga tamaakut qilagmi kiyaghsaghqat Christ‑atun yugusilguyaghqaagut. 49Adam‑etun yugusilgullemtestun, ilangani aghneghem Christ‑atun yugusilguyaghqaagukut. 50Ugpeqaalgutemni, liitesugamsi yugusiput ukut kemekragmeng, aawmeng ulimaaghet, iteghnaanghitut Ataneghpagullghanun Kiyaghneghem. Ilangani aghneghem ukut yugusiput tuquyaghqaagut. Unguvanaanghitut quunperugllak.
51Ungipaataghllamsi qayvighsimangilngughmeng: qamaglluta tuqunaanghitukut, iwernga qamaglluta allangughsaghqaagukut, 52sukatepiglluta qunqallellghestun kingulighpigaq qalghightaq nagaququmteggu. Tawani qalghightalleghmi ugpeqat qamaglluteng tuqulaghaatkat unguvaghtuusaghqaagut nutaghameng yugusilighluteng tuquyaghqaanghilngughmeng. Taagken whangkutallu paninang unguvalghiini nutaghameng yugusingaghaghtaallequkut. 53Yugusiput pagulameng ulimaaghet allangughsaghqapestaaghuut naafqesaghqaanghilngughmeng. Ukut yugusiput tuqukayuget simighyaghqaagut yugusimeng tuquyaghqaanghilngughmeng. 54Enkaam Akuzitni Igaqegkani igaqegkaq apeghiighllequq: “Tuqulleq naafquq; kayaalqiilleq iighwightuq!”
55“Tuqu, kayaalqiillghen naagu?
Tuqu, aghtughyaghqaanghillghen aqnighquusin whangkunnun naagu?”
56Tuqullghem aghtughyaghqaanghilleni allgeghtaqaa seghleghqelleghmeng aqnighhnaluta, enkaam seghleghqellghem Liilightuusat aghtughyaghqaanghilqii. 57Enkaangam iqamsiqayugvikaqaghput Kiyaghneq qayughllak kayaalqiistekaqiinkut Atanemteggun Jesus Christ‑akun.
58Enkaangam, piniqegkamni ugpeqaalgutemni, kayaalqiilleghqaghput ipapestaghutanganeng, ugpellesi aghuliitesluki, nuuggaghtafqaafsi, quunpeng qepghaghteggu Atanghem qepghaqaa. Liisimakaghsi Ataneghqun qepghalleghsi avanginneghituq.
Currently Selected:
1 Corinthians 15: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
