1 Corinthians 14

Paul‑em Apeghtuutkataghaqangi Agleghnalghiim Taghnegham Tunusii

1Piniqellengyugataghaghyaghqaagusi pakiggulluku sameng tamaghhaaneng. Iwernga piyukitekillu Agleghnalghiim Taghnegham tunusii, wata piyuksaghqaqaghsi ungipaqilleq Kiyaghneghem ungipaaneng. 2Yuuk akuzineghmini allastun ulustun aleghqughaqaa Kiyaghneq. Yuget aleghqiigatii qayughllak liigiknaaghitaat. Akuziiquq aghtughyaghqaanghillghakun Agleghnalghiim Taghnegham yugem nallukegkaaneng. 3Iwernga yuuk tunusalek ungipaqilleghmeng Kiyaghneghem ungipaaneng akuzikayuguuq yugnun. Akuzitangi kayusighikayuguut, kayemikayuguut, ilutughsaghikayuguut yugnun. 4Yuuk akuzikayuk allastun ulustun kayusiitkayuguuq ellmineng katam, iwernga yuuk ungipaqikayuk Kiyaghneghem ungipaaneng kayusighikayuguuq ugpeqaneng.

5Qamagllusi piyukaqsaghamsi akuzisqellusi allastun ulustun, iwernga wataqaaghaqtuq tunusalgulghiisi ungipaqsaghqaaluki Kiyaghneghem ungipii. Tamaakut ungipaqikayuget aangataghaghtut akuzikayugneng allastun ulustun. Akuzikayuget allastun ulustun mumighqughtelguyaghqaagut kayusiitesqelluki ugpeqat. 6Ugpeqaalgutemni, elpesinun pilunga aleghqughyaqumsi allastun ulustun liigiksaghqaqenghilkegpesigun natenꞌngam kayusiinnayaghestemsi? Iwernga apeghtughyaqumsi Kiyaghneghem kelgutkaaneng whangamnun, nalighmeng ungipaasaqumsi sameng liitkamneng, nalighmeng uuknaliqutkesaqumkun Kiyaghneghem salleghqaa, nalighmeng apeghtughyaqumsi ipapighqelleghmeng elngaatall kayusiinnayaghamsi.

7Flute‑allu harp‑allu seghletun qalghightekayek kitum alngunak liigiknaangitaa sangwaa ilagaan atughaqutanga. 8Pilluwaghtem bugle‑a qalghightekagu seghletun ilangita pilluwaghtet nallukelleqaat pilluwalleghqaghteng. 9Tawateghpigaq akuzikufsi allastun ulustun, kitum alngunak liigiknaanghitiisi sameng piiqutsi. Akuzinghilngughestun piyaghqaagusi. 10Uglapigtuq allaghhiinaq akuzilleq, atuqistengita liigikaqiit. 11Iwernga liigikenghilkumkun yuuk akuzilghii allakun akuzilleghqun nakumiinguuq whangamni, enkaam whangallu nakumiingunga ellngani. 12Enkaangam elpesi, tunusangyupigtekufsi Agleghnalghiim Taghnegham tunusaaneng, tungsightek kayutkaghqameng ugpeqanun.

13Tamaaken apalluqluku yuuk akuzikayuk allastun ulustun, yughaghli mumighqughyaghqaaluku sameng pilleni. 14Yughaghyaquma allastun ulustun, taghneghagka yughaghllequk, iwernga umyugagma liigiknaanghitaak. 15Sanaqsingangam? Yughaghllequnga taghneghamkun, yughaghllequngallu umyugamkun. Tawateghpigaq ilagaghllequnga taghneghamkun, ilagaghllequngallu umyugamkun. 16Qayughllak taghneghagpegun usuqegkuvgu Kiyaghneq allastun ulustun, natenꞌngam liigikigalnguum usuqilgusighlleqaten Kiyaghneghmun iqamsiqayulleghpeneng? Nallukaa sameng piiquten. 17Yughallghen piniipigsaghngaan ilanga yugem kayusillengnaanghituq.

18Iqamsiqayugvikaqaqa Kiyaghneq akuziiqelghiinga allastun ulustun uglaghataghaghluku elpesineng. 19Iwernga yughaghvigmennemni apeghtughiyugaqunga. Tamaaken apalluqluku apeghtughiiqunga qafsinkuuraghhaat akuzitet atuqluki liigiksaghqasi, akuzinaanghitunga allastun ulustun uglapiglluku liigiksaghqaqenghilkegpesineng. 20Ugpeqaalgutemni, sumeghtaghaghpenasi taghnughhaghhaghestun. Sumeghtaghaghaqitek anglikastun, iwernga seghleghqesulleghsi taghnughhaghhaghestun ayuquq. 21Liilightuusani igaqngaaq: “Kiyaghneq piiq,

‘Kayaglleqanka yuget allaneng nunaneng aleghqughyaghtiisqellusi ellngita katam ulungistun.

Aleghqughlleqamsi qaanghitgun iwernga paninang nagannaanghitaghpesinga.’”

22Enkaam tunusaa akuzillghem allastun ulustun ipapighqusiiguq ugpeqingigalngughnun, nakaan ugpeqikayugnun. Ungipaqilleq ugpeqilghiinun ayuquq, nakaan ugpeqingigalngughnun.

23Enkaangam yughaghvigpesini ugpeqat qamaglluteng akuzisaqumeng allastun ulustun, ilangi yugem nalighmeng ugpeqaanghilnguut iitqumeng nallungughhnilleqiisi. 24Iwernga ugpeqaanghilnguq nalighmeng liigikigalnguq yughaghvigpesinun iteghluni nagaskumisi ungipalghiisi Kiyaghneghem ungipaaneng, nagalluni nanqigtengngwaaghllequq seghleghqestenguniluni. 25Qamanlliqegkii aksaqngalghiit qayvighqellequt. Enkaam qungughlluni manigughlleqaa Kiyaghneq. Whaten pillequq, “Ipapestaaq, Kiyaghneq whaantuq elpesini.”

Naten Atuqelleghqii Agleghnalghiim Taghnegham Tunusii Yughaghvigmi

26Ugpeqaalgutemni, unata apeghtuusaqnaqutkaqegkegka. Qerngughunneghpesini maniguunnalusi ilasi ilagaghaqnaaghtut, kina apeghtughiiqellequq, nalighmeng nalighsi ungipaghllequq Kiyaghneghem ungipaqesqegkaaneng, nalighmeng nalighsi akuzillequq allastun ulustun, nalighpesi mumighqughlleqii. Ugpeqat ugpellghitnun iknaqughusiilit qamaglluteng. 27Yughaghvigmi kina akuzinaqngukumi allastun ulustun, maalghuk nalighmeng pingayut pilghaat, utaqaluki ilateng taaqelleghqiit. Kitumllu mumighqughnakangi sameng pillghit. 28Iwernga mumighqughtengiskan akuzilghiimun allastun ulustun, akuzifqaami pilghaaq. Allastun ulustun akuziyukumi kavyuguutegpenani akuzilghaaq ellminunllu Kiyaghneghmunllu. 29Uuknaliqistek maalghuk nalighmeng pingayut ungipangelghiit Kiyaghneghmeng akuzilit. Qamaglluteng nagallit, liigiklitgu ungipaq Kiyaghneghmeng pingutanga. 30Iwernga kina ungipangegkan Kiyaghneghmeng, akuzilghii nepiighli, ungipangelghii akuzisqelluku. 31Tawaten pikufsi qamaglluteng ungipaqiyaghqat Kiyaghneghem ungipaaneng akuziiqellequt. Enkaam qamaglluni nagallghii, liilli, taagavenginaallenglillu. 32Neqamikluki ungipaqikayuget Kiyaghneghem ungipaaneng, aghtughyaghqaanghillelitkaagut akuzisighqameng, taaqusighqamengllu. Iiwleng aghtughyaghqaanghillelguut akuzisighqameng nalighmeng taaqusighqameng. 33Kiyaghneghem alngunak pisugigatiinkut. Qerngughutelleput nekeggmetesugaqii.

Kiyaghneghem yugi qerngughunneghata, 34aghnat akuzistenguyaghqaanghitut yughaghvigni. Akuziyaghqaanghitutlu igleghutistenguyaghqaanghitutlu qerngughutngalghiini, qayughllak Liilightusanillu igaqngaaq tawaten. 35Aapqughaghyukumeng, ugiteng nemeggni aaplitki. Yughaghvigni aghnat akuzilleghqaat anaggutngaaq.

36Elpesi Corinth‑eghmiit ugpeqat aangaayugneghuusi. Sumeghpesinii Kiyaghneghem akuzitangi elpesineng pingwaat? Ellnginaghhaghpesinun apeghtuutkaawaat? 37Kina alngunak sumeghmini uuknaliqistenguniluni pikumi, nalighmeng ugpeghllagumaniluni, liigikliki latatkegkanka elpesinun Ataneghem qelghusaqii. 38Tuguklinghilkagu una apeghtuusaq, tuguklighpenaan ellnga.

39Enkaangam ugpeqaalgutemni, ungipaghtenguyugaqitek Kiyaghneghem ungipaaneng, iwernga taaqestegpenaki akuzilghiit allastun ulustun. 40Yughaghvigni sangwaa qamaglluku pinitungwaaq, tawatengwaaq piiqiteggu.

Currently Selected:

1 Corinthians 14: ess

Highlight

Copy