Popular Bible Verses from 1 Corinthians 15

Share

Enkaangam, piniqegkamni ugpeqaalgutemni, kayaalqiilleghqaghput ipapestaghutanganeng, ugpellesi aghuliitesluki, nuuggaghtafqaafsi, quunpeng qepghaghteggu Atanghem qepghaqaa. Liisimakaghsi Ataneghqun qepghalleghsi avanginneghituq.

Enkaangam iqamsiqayugvikaqaghput Kiyaghneq qayughllak kayaalqiistekaqiinkut Atanemteggun Jesus Christ‑akun.

Kitumun alngunak puughtestegpenasi ilakumtaangumakufsi seghletun pikayugmeng, atuqsagulleqaghsi sangwaa piiqegkangat.

Iwernga Kiyaghneghem nangllegtallghakun apostle‑nguunga. Nangllegtallgha whangamnun avanginneghituq. Qepghaghataghaghtunga tamaghhiitneng apostle‑et, iwernga whangamneng pingunghitaqa, Kiyaghneghem nangllegtallghakun piiqunga.

“Tuqu, kayaalqiillghen naagu? Tuqu, aghtughyaghqaanghillghen aqnighquusin whangkunnun naagu?” Tuqullghem aghtughyaghqaanghilleni allgeghtaqaa seghleghqelleghmeng aqnighhnaluta, enkaam seghleghqellghem Liilightuusat aghtughyaghqaanghilqii.

Ungipaataghllamsi qayvighsimangilngughmeng: qamaglluta tuqunaanghitukut, iwernga qamaglluta allangughsaghqaagukut, sukatepiglluta qunqallellghestun kingulighpigaq qalghightaq nagaququmteggu. Tawani qalghightalleghmi ugpeqat qamaglluteng tuqulaghaatkat unguvaghtuusaghqaagut nutaghameng yugusilighluteng tuquyaghqaanghilngughmeng. Taagken whangkutallu paninang unguvalghiini nutaghameng yugusingaghaghtaallequkut.

Tuqulleq allgeqaaguq ataasikun yugkun, Adam‑kun. Tawateghpigaq unguvaghtestelleq tuqulleghmeng allgeqaaguq ilangakun yugkun, Christ‑akun. Adam‑kun qamaglluni tuquyaghqaaguq, iwernga qamaglluteng Christ‑amelnguut unguvaghtesaghqaagut tuqulleghmeng.

Yugusiput pagulameng ulimaaghet allangughsaghqapestaaghuut naafqesaghqaanghilngughmeng. Ukut yugusiput tuqukayuget simighyaghqaagut yugusimeng tuquyaghqaanghilngughmeng.

Christ‑a umiilguyaghqaaguq kenlanga kayaalqelleghminun qamagtengngwaaghluki aghtughyaghqaanghillghet qaatkusugigalnguut Kiyaghneghmun, tughneghaatlu igleghutistet, yugetlu igleghutistet ilalluki. Christ‑a umiilguyaghqaaguq kenlanga Kiyaghneghem kayaalqellghanun qamagtengngwaaghluki Christ‑am anguyagi. Kingulighpigaq anguyak tuqullghuuq Kiyaghneghem kayaalqesaghqaa. Christ‑am tuunegkagu Ataneghpagulleq Kiyaghneghmun Atamun taagken kenla kaallequq. Igaqngaaq Akuzitni Igaqegkani, “Kiyaghneghem sangwaa tamaghhaan itegaan asinganun lliightesaghqaqaa.” Whaten pisiiguq, Kiyaghneghem samun tamaghhaanun qaatkestesaghqaqaa Christ‑a. Iwernga Kiyaghneghem qaatkusaghqaaghtestekumigu sangwaa tamaghhaan Christ‑amun, qaatkusaghqaaghsaghqaanghituq, ellmineng katam. Tawaten pikan, taagken Ighneq ellmineng katam asiliighsaghqaaguq Kiyaghneghmeng. Elngaatall Kiyaghneghem sangwaa tamaghhaan igleghulleqaa.