1 Corinthians 16
16
Mani Tuunyaghqaq Ugpeqanun Judea‑melngughnun
1Ukut esgha elpesinun qelghusanka manimeng tuunyaghqaghpesineng ugpeqanun Judea‑melngughnun. Ungipaatellemtun Galatia‑ghmiit ugpeqiit, elpesillu ellngistun pitek. 2Sivulighpigaghmi Santillghem aghneghani qamagllusi aaftiiqitek manimeng allgeghneghpesineng. Tuunyaghqaghpesi angtalanga allgeghneghpesi angtalanganeng iikluku tuunyaghqaaguq. Enkaam elpesinun pikuma qerngughtifqaafsi manimeng pilghaasi. 3Kaaskuma kayaglleqanka tamaakut nakmikegkasi latatgun aglaatesqelluku tunusaghsi Jerusalem‑emun. 4Sumeghtaghallemni whangallu pilleghqaqa pinighyaghqaakan, maliggnakangatnga.
Paul Laalighsulghii Corinth‑mun
5Elpesinun laalighhnaqegkuma sivuklunga Macedonia‑kun aagllequnga. 6Entaqun elpesinitaghaqaghllequnga walluumllu uksulqusiq. Taagken navek pinaqegkuma yataaghqelgusiqaghnakefsinga. 7Atanghem piyukelqegkagu maaten pikuma elpesinitaghaghyugaqunga, aagvikaghesnaghyunghitamsi.
8Iwernga Ephesus‑mellequnga kenlanga Pentecost‑em aghneghanun, 9qayughllak megnunalghii, aangelghii qepghalleghqaqa Ataneghmun piiqeftuq. Maanllequnga qaywa uglapiglleghhiim anguyaksaghngaatnga.
10Timothy elpesinun pikan, elngaatall upughannakesi, qayughllak qepghaaguq Ataneghmun whangamtun. 11Qamagllusi asitnginaaghpenaan, enkaam quyangaan kayaggnakesi whangamnun. Utaqaaqaqa maligulluku ugpeqaalgutnun.
12Ungipaataghllamsi ugpeqaalgutemnneng Apollos‑meng. Elngaatall qelqaqsaghaqa laalighfikesqellusi maliglluki ilangi ugpeqaalgutet. Iwernga maaten piyunghituq. Laalighfiknaaghiisi pilleghqangegkumi.
13Kelengatek, ugpeqilleghpesini aghuliitek, ilututek, iknaqitek. 14Piniqelleghqun piiqiteggu sangwaa tamaghhaan.
15Ugpeqaalgutemni, liisimakasi Stephanas‑enkut nengllugutkullghiit, ugpeqaqsuwhaaghulghiit Achaia‑mi. Ataneghmun tuunegkaagut ellmeggneng, ugpeqat ilangi kayusiinnaluki. 16Qelghamsi qaatkumanginiisqelluki liilightullghit tawatelnguut yuget, ilangillu qepghalgutangit.
17Quyaanga Stephanas‑enkut, Fortunatus‑enkut, Achaicus‑enkut kaallghiit qayughllak kayusiitngwaatnga aviilleghpesini. 18Quyastengngwaatnga quyastelleghmegestun elpesi. Kayusiitillghitnun iqamsiqayugvikelleghpesineng liisimakestengngwaaghnakesi.
19Ugpeqat Asia‑melnguut suumqaqiisinguq. Aquila‑nkuk Priscilla‑nkuk suumqeghllagiisinguq Ataneghqun, qamagllutengllu ugpeqat qerngughutkayuget elkegkenka mangteghiitni. 20Qamaglluteng ugpeqaalgutet whangamnilnguut suumqaqiisinguq. Quyakutaqitek naaghluki Kiyaghneghem piniqellghakun.
21Whanga katam iiggemneng una igaqaqa: Suumqamsi. Paul.
22Kitum alngunak piniqenghilkumigu Ataneq, naafqellelguuq. “Maranatha,” whaten pisiiguq, Ataneghput, tagi!
23Nangllegtallgha Atanghem Jesus‑em elpesinilli.
24Piniqamsi qamagllusi Christ Jesus‑kun. Amen.
Currently Selected:
1 Corinthians 16: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
