Romanos 7

Moisesba b̶ʉd̶a ʉ̃rʉbena Pabloba jaradead̶a

1Ãbarã, Moisesba b̶ʉd̶a kuitaa panuud̶eeba mau ʉ̃rʉbena mʉʉba machimaa berrearuu. ¿Kuitaa panuuwãeka dachi chokae panuumisa Moisesba b̶ʉd̶a ũrid̶ai panuu? 2-3Nau kĩra b̶uu. Mau Moisesba b̶ʉd̶ad̶e jara b̶uu wẽra mukĩra iu b̶uu ichi mukĩra chokae b̶uud̶e ichi ome b̶uai b̶uu. Ichi mukĩra wabid̶a chokae b̶uud̶e mau wẽraba junebena mukĩra adauruubʉrã, Moisesba b̶ʉd̶ad̶e jara b̶uu mau wẽra nebʉra bara b̶uu. Maamina ichi mukĩra biuruubʉrã Moisesba b̶ʉd̶ad̶ebena ena b̶eei. Maud̶e ichiba junebena mukĩra adauruubʉrã, nebʉraswãe b̶uai.

4Ãbarã, ara mau kĩra machi Cristo baara panuud̶eeba ichi biud̶akare, Moisesba b̶ʉd̶ad̶eeba biusid̶au. Jãabae machi Cristod̶erãd̶eeba, Dachi Akõre baita poyaa biꞌia waud̶ai. 5Dachi nau kakuaba wau kʉ̃ria b̶uud̶eeba nibasid̶aud̶e Moisesba b̶ʉd̶ad̶e jara b̶uu kakua kachirua aude wau kʉ̃riasid̶au. Maud̶e kachirua waud̶ai panuu kakua biud̶ai panasid̶au.#7:5 Biud̶ai panasid̶au. Griego bed̶ead̶e naka b̶ʉ kub̶uu: Biud̶ai chau panasid̶au. 6Maamina Moisesba b̶ʉd̶ad̶eeba panad̶a dachi ena paneesid̶au. Maud̶ebena biusiid̶eeba jãabae Dachi Akõre baita biꞌia waud̶ai ichi Jaurid̶eeba. Waya kʉ̃risiad̶aabai Moisesba b̶ʉd̶ad̶eeba maka waud̶ai.#7:6 Griego bed̶ead̶e naka b̶ʉ kub̶uu: jauri wid̶i...karta chõra.

Kachirua wau kʉ̃ria b̶uu ʉ̃rʉbena b̶ʉd̶a

7¿Mau ʉ̃rʉbena saka kʉ̃risia panuma? ¿Moisesba b̶ʉd̶a kachirua b̶uka? ¡Makawãema! Mau Moisesba b̶ʉd̶a wãꞌãe basirã mʉʉba adua b̶uai basii kãare kachirua b̶uu. Moisesba b̶ʉd̶aba «ab̶auba uru b̶uu kʉ̃riarã́bad̶e» ad̶awãe basirã, mʉʉba ãibenaba uru b̶uu kʉ̃riai kachirua b̶uu adua b̶uai basii.#Éxodo 20:17. 8Maamina «kʉ̃riarã́bad̶e» asiid̶eeba kachirua wau kʉ̃ria b̶uud̶eeba mʉʉba ne joma aude kʉ̃riasii. Biawãra Moisesba b̶ʉd̶a wãꞌãe basirã aude kachirua wau kʉ̃riabai basii.#7:8 Biawãra Moisesba b̶ʉd̶a wãꞌãe basirã aude kachirua wau kʉ̃riabai basii. Griego bed̶ead̶e naka b̶ʉ kub̶uu: Moisesba b̶ʉd̶awãe, chi kachirua biu b̶uu. 9Naed̶e mau Moisesba b̶ʉd̶a adua b̶uasiid̶e mʉ jirukaraayuwãe b̶uabachii. Maamina kuitaasiid̶e mʉʉba kachirua wau kʉ̃riasii. Maabae kachirua kakua biui b̶uasii. 10Mau Moisesba b̶ʉd̶a wau b̶uud̶eeba mʉ Dachi Akõre ome chokae b̶uai b̶uasii. Maamina waukaud̶eeba Moisesba b̶ʉd̶aba kuitaabisii mʉ biui b̶uu. 11Moisesba b̶ʉd̶ad̶e jara b̶uu kakua mʉʉba kachirua aude wau kʉ̃riasii. Maabae kachiruaba mʉ setaa kũruasii kʉ̃risiamera Moisesba b̶ʉd̶aba jipa b̶uai. Maamina ũrikaud̶eeba biui b̶uasii.

12Biawãra Moisesba b̶ʉd̶a Dachi Akõred̶ebʉ, maud̶e chi waubi b̶uu bed̶ea Ichid̶ibʉ, jipa b̶uu maud̶e ãrea biꞌia b̶uu. 13Makarã ¿Moisesba b̶ʉd̶a biꞌia b̶uuba mʉ biubiska? ¡Makawãema! Maumaarã kachirua wau b̶uu kakua mʉ maka biui b̶uasii. Mʉʉba kachirua wau b̶uu kakua mau Moisesba b̶ʉd̶a biꞌia b̶uuba jara b̶uu mʉ biui b̶uu. Maka arakʉd̶e unubi b̶uu chi kachirua saka b̶uu. Mʉʉba kachirua wau b̶uu biawãra ãrea kachirua b̶uu.

14Dachiba kuitaa panuu Moisesba b̶ʉd̶a Dachi Akõre Jaurid̶eeba neesii. Maamina mʉ nau kakuad̶e b̶uu. Mʉ nedobʉid̶a kĩra b̶uu kachirua baita bari trajabarii b̶uamera. 15Mʉʉba adua b̶uu sakãe jãka waubarii. Mʉʉba ne biꞌia wau kʉ̃ria b̶uu mau waukau, maumaarã mʉʉba kachirua wau kʉ̃riawẽa b̶uu mau waubarii. 16Maamina mʉʉba kachirua wau b̶uu wau kʉ̃riawẽa b̶uud̶eeba mauba unubi b̶uu Moisesba b̶ʉd̶a mʉʉba biꞌia unu b̶uu. 17Maud̶eeba ara mʉʉba kʉ̃ria b̶uud̶eeba kachirua wau b̶uwãema, maumaarã kachirua mʉ sõd̶e b̶uuba maka waubibarii. 18Mʉʉba kuitaa b̶uu mʉ sõd̶e ne bia wãꞌãema. Biꞌia jaraaruubʉrã, mʉ nau kakuad̶e b̶uud̶eeba ara mʉʉba kʉ̃ria b̶uud̶eeba biꞌia poyaa waukau. Mʉʉba biꞌia wau kʉ̃ria b̶umina poyaa waukau. 19Biawãra mʉʉba biꞌia wau kʉ̃ria b̶uu mau waukau, maumaarã kachirua wau kʉ̃riawẽa b̶uu mau waubarii. 20Mʉʉba kachirua wau kʉ̃riawẽa b̶uu wau b̶umina, ara mʉʉba kʉ̃ria b̶uud̶eeba maka wau b̶uwãema. Maumaarã kachirua mʉ sõd̶e b̶uuba maka waubi b̶uu.

21Maud̶eeba nau kuitaa b̶uu: mʉʉba biꞌia wau kʉ̃ria b̶umina kachirua mʉ sõd̶e b̶uuba kachirua waubibarii. 22Biawãra mʉʉba sõd̶eeba Dachi Akõreba Moisesmaa b̶ʉbid̶a ãrea biꞌia unu b̶uu. 23Maamina june kʉ̃risia sid̶a mʉ sõd̶e b̶uu. Mauba mʉ jʉ̃a uru b̶uu kĩra mʉʉmaa kachirua waubibarii. Chi mʉʉba biꞌia wau kʉ̃ria b̶uu mau kʉ̃risiaba ida waubi kʉ̃riakau, ne bia waui kʉ̃risia ome chĩo b̶uu kĩra.

24¡Mʉ miichuburi! ¿Kaiba mʉ enaima nau chi kakua biui b̶uuba kachirua wau kʉ̃ria b̶uud̶ebena? 25Mau Dachi Akõréburu Dachi Mechiu Jesucristod̶eeba mʉ karibai. Maud̶eeba mʉʉba ichíturu kid̶ibai aaruu. Biawãra mʉ kʉ̃risiad̶e Moisesba b̶ʉd̶a wau kʉ̃ria b̶uu, maamina nau kakuad̶e b̶uud̶eeba kachirua mʉ sõd̶e b̶uuba kachirua waubibarii.

Currently Selected:

Romanos 7: cmi

Highlight

Compare

Copy