Romanos 6

Kachiruad̶ebena ãyaa wãped̶aad̶a

1¿Mau ʉ̃rʉbena saka kʉ̃risia panuma? ¿Dachi wabid̶a kachiruad̶e nibad̶ai panuka Dachi Akõreba ichi sõbiad̶eeba aude kĩra chuburiamera? 2¡Biawãra maka waud̶aabai panuu! Dachi kachiruad̶eeba biusid̶au.#6:2 Dachi kachiruad̶eeba biusid̶au. Dachiba biud̶amaa poyaa ne waubiibai b̶uu kĩra, kachiruaba dachimaa kachirua waubiabai. Maud̶eeba ¿saka kachiruad̶e nibad̶aima? 3-4Machiba kuitaa panuu boro easid̶aud̶e unubiasid̶au Cristo baara ãbua panuu. Maka unubiasid̶au ichi ome biuped̶aad̶a maud̶e jau b̶uped̶aad̶a. Maabae Dachi Bajãad̶ebena Akõreba ichi ãrea poyaa niid̶eeba Cristo chokae jiradubid̶a kĩra dachi sid̶a chokae jiradubiasii chokae b̶uai chiwid̶id̶e nibad̶amera.

5Dachi Cristo baara biusid̶aud̶eeba ichi chokae jiradud̶a kĩra, chokae b̶uai chiwid̶id̶e nibad̶ai. 6Dachiba kuitaa panuu dachi kʉ̃risia chõra biusii Cristo baara cruzd̶e jirab̶uped̶aad̶a kĩra. Maka dachi kʉ̃risia chõraba nau kakuaba kachirua wau kʉ̃ria b̶uu waa poyaa waubiibai. Dachi waa kachirua baita bari trajabadaurãwãema. 7Biawãra ab̶a Cristo ome biud̶abʉrã, kachiruad̶ebena ena b̶eesii.#6:7 Kachiruad̶ebena ena b̶eesii. Griego bed̶ead̶e mau jara b̶uu «kachirua wau b̶uu ʉ̃rʉbena Dachi Akõreba nebʉraswãe nuree asii».

8Dachi Cristo ome biuped̶aad̶ad̶eeba ijãa panuu ichi ome chokae panad̶ai. 9Dachiba kuitaa panuu Cristo biu b̶uad̶a chokae jiradusiid̶eeba waya biubai. Biumiaba ichi ome waya poyaabai. 10Cristo b̶es ab̶a biud̶aba kachirua joma poyaasii. Ichi waya biubai maumaarã Dachi Akõre baita chokae b̶uu. 11Ara mau kĩra kuitaad̶ai panuu machi kachiruad̶eeba biusid̶au maud̶e Dachi Mechiu Jesucristod̶eeba Dachi Akõre baita chokae panuu.#6:11 Dachi Mechiu. Waabena kartad̶e mau wãꞌãe.

12Maud̶eeba chi kachiruamaa ida machi chibari babirã́sturu. Maka machi chi kakua biui b̶uuba kachirua wau kʉ̃ria b̶uu waud̶aabai. 13Machi kakuamaa ida kachirua waubirã́sturu. Maumaarã ara machi Dachi Akõremaa deásturu. Machi kachiruad̶e biu panad̶a Dachi Akõre baita chokae paneesid̶au. Maud̶eeba machi chi kakua Dachi Akõremaa deásturu jipa waud̶ai baita. 14Dachi Akõreba ichi sõbiad̶eeba machi karibasiid̶eeba maud̶e Moisesba b̶ʉd̶ad̶e duanuuwãed̶eeba, chi kachirua waa machi chibari b̶uabai.

Jipa waud̶ai ʉ̃rʉbena

15¿Mau ʉ̃rʉbena saka kʉ̃risia panuma? Dachi Akõreba ichi sõbiad̶eeba dachi karibasiid̶eeba maud̶e Moisesba b̶ʉd̶ad̶e dachi duanuuwãed̶eeba ¿kachirua waud̶ai panuka? ¡Makawãema! 16Machiba kuitaa panuu ara machi du ab̶a ab̶aumaa bari trajabadaurã nuread̶ai baita deaduubʉrã, chi chibariba jaraaruu joma waud̶ai panuu. Ara mau kĩra machiba chi kachirua machi chibari kĩra b̶uuduubʉrã, kachirua waud̶aped̶a biud̶ai. Maamina Dachi Akõre machi chibari b̶uuduubʉrã, ichi bed̶ea wauduud̶e jipa nibad̶ai. 17Naed̶e machi kachirua baita bari trajabadaurã basii. Maamina joma Dachi Akõre ʉ̃rʉbena jaradeaped̶aad̶a sõd̶eeba wau panuud̶eeba mʉʉba Dachi Akõremaa ichíturu kid̶ibai abarii. 18Machi kachiruad̶ebena ena paneed̶aped̶a Dachi Akõre baita bari trajabadaurã paneesid̶au jipa waud̶ai baita. 19Mʉʉba maka berrea b̶uu nau kʉ̃risia jaradeai baita. Maka jaradea b̶uu machiba ãi kʉ̃risiarãad̶amera. Biawãra naed̶e ara machi du ab̶a deasid̶au kachirua baita bari trajabadaurã nuread̶ai baita. Maka machiba mia pera wausid̶aud̶e joma kachirua ewaricha aude wau panabachid̶au. Maamina jãabae Dachi Akõre baita bari trajabadaurãd̶eeba, ara machi du ab̶a deásturu jipa waud̶ai baita. Maka Dachi Akõre baita biꞌia nuread̶ai.

20Machi kachirua baita bari trajabadaurã basiid̶e jipa waud̶ai kʉ̃risiad̶aka basii. 21Maamina kachirua wau panuud̶eeba ¿kãare biꞌia adausid̶ama? ¿Maka wau panad̶a kakua, kĩra nejasia panuuwãeka? Kachirua wau panuu kakua ẽbẽrarã biud̶ai. 22Jãabae machi kachiruad̶ebena ena wãsid̶aud̶eeba Dachi Akõre baita bari trajabadaurã paneesid̶au. Maka Dachi Akõre baita biꞌia paneesid̶au. Maud̶eeba ichi baara ewaricha chokae panad̶ai. 23Biawãra kachirua wau panuu kakua ẽbẽrarã biud̶ai. Maamina Dachi Mechiu Jesucristod̶eeba Dachi Akõreba ewaricha chokae b̶uabiai, ne kaebea bari dea b̶uu kĩra.

Currently Selected:

Romanos 6: cmi

Highlight

Compare

Copy