Hebreos 6

1-2Maud̶eeba Cristod̶e kuitaa wari kãri bad̶ai panuu. Dachiba ichi ʉ̃rʉbena naed̶e kuitaaped̶aad̶a akabichia aramáturu jaradearã́duru. Waya jaradead̶aabai chi kachirua wau panuu kakua biud̶ai panuu, kachirua ida b̶ud̶aped̶a Dachi Akõremaa need̶ai panuu, Dachi Akõred̶e ijãad̶ai ʉ̃rʉbena, boro ead̶ai ʉ̃rʉbena, ãbarã ʉ̃rʉ jua kub̶uud̶ai ʉ̃rʉbena, biud̶arã chokae jiradud̶ai ʉ̃rʉbena maud̶e Dachi Akõreba kastikaped̶a ewaricha ãrea biꞌiwãe panad̶ai ʉ̃rʉbena sid̶a. 3Dachi Akõreba kʉ̃ria b̶uubʉrã, joma mau ʉ̃rʉbena waya jaradead̶ai bad̶amaarã dachi Cristod̶e wari kãri bad̶ai.

4Waabenarã chi nureeba chi bed̶ea biawãra kuitaaped̶aad̶akaud̶e,#6:4 Chi bed̶ea biawãra kuitaaped̶aad̶akaud̶e. Griego bed̶ead̶e naka b̶ʉ kub̶uu: ʉ̃d̶aabiad̶akare. Dachi Akõreba dea b̶uu kuitaaped̶aad̶akaud̶e, ichi Jaurid̶eeba ne adauped̶aad̶akaud̶e, 5ichi bed̶ea biꞌia b̶uu ũriped̶aad̶akaud̶e maud̶e chi kaad̶ebena iujãa neei poyaabariiba ẽbẽrarãba ne poyaa waud̶akau unuped̶aad̶akaud̶e 6ab̶auba Dachi Akõre warr Cristo ida b̶uuruubʉrã, waya ichimaa poyaa neebai. Makaa basirã, maarãba jomaurãmaa Cristo ʉ̃rʉbena kachirua berreabiad̶ai basii waya cruzd̶e nub̶uuduu kĩra.

7Kui cheeruucha ioroba sõbarii. Maud̶e ioro biad̶e uud̶a, chi uud̶a baita biꞌia chaubarii. Dachi Akõreba mau iujãa biꞌia jarabarii.#6:7 Chi Cristo ida b̶uwẽa nuree mau ioro kĩra nuree. Mateo 13:18-23. 8Maamina kui ched̶akare ʉri tonooruubʉrã maud̶e sirua kachirua tonooruubʉrã, mau ioro biꞌiwãe b̶uu. Dachi Akõreba mau iujãa ʉ̃rʉbena kachirua jaraped̶a joma baabʉʉi.#6:8 Chi Cristo ida b̶ubadau mau iujãa kachirua kĩra nuree. Mateo 13:24-29.

9Ãbarã, dachi maka berrea duanumina kuitaa panuu Dachi Akõreba machi karibasii o biad̶e wãaduud̶eeba. 10Dachi Akõre jipa niid̶eeba machiba biꞌia wau panuu maud̶e ichi kʉ̃ria panuu kʉde uru b̶uu ida b̶uubai. Ẽbẽrarã ichid̶irã aid̶a panuud̶eeba machiba unubisid̶au ichi#6:10 Ichi. Griego bed̶ead̶e naka b̶ʉ kub̶uu: ichi trʉ̃. kʉ̃ria panuu. Maud̶e wabid̶a maarã aid̶a panuu. 11Daiba kʉ̃ria panuu machicha maka wau panad̶ai ab̶a biuduud̶aa. Maka b̶uubʉrã machiba Dachi Akõred̶eeba adaud̶ai esed̶au panuu joma adaud̶ai. 12Daiba kʉ̃riad̶awẽe machi koꞌoa nuread̶ai, maumaarã kʉ̃ria panuu machi waabenarã ãbarã kĩra nuread̶ai. Ãchiba Cristod̶e ijãa panuud̶eeba maud̶e joma jãadua panuud̶eeba, Dachi Akõreba deai jarad̶a joma adaud̶ai.

Dachi Akõreba bed̶ea dead̶a biawãra waui

13Dachi Akõre audeara chi mechiu nii wãꞌãe. Maud̶eeba Abraham ome bed̶ea deasiid̶e ara ichi trʉ̃d̶eeba biawãra karibai asii. 14Naka jarasii: «Biawãra mʉʉba bichi karibai maud̶e bichid̶ebena ãrea imibiai».#Génesis 22:17. 15Abraham joma jãadua esed̶au b̶uud̶eeba, Dachi Akõreba warr deai jarad̶a unusii.

16Ẽbẽrarãba biawãrad̶eeba ne jaraaduud̶e ãchi audeara chi mechiu nii trʉ̃d̶eeba maka jarabadau. Maud̶e ab̶au bid̶a poyaa seta ad̶akau. 17Ara mau kĩra Dachi Akõreba arakʉd̶e kuitaabiai kʉ̃riasii chi ichiba deai jarad̶a ẽbẽrarãba mau biawãra adaud̶ai maud̶e ichiba kʉ̃risia b̶uu kĩra biawãra waubarii. Maud̶eeba ara ichi trʉ̃d̶eeba deai asii. 18Dachi Akõreba setaa jarakaud̶eeba ichiba deai jarad̶a biawãra deai maud̶e ichi trʉ̃d̶eeba jarad̶a ãyaa waubai. Mau bed̶ea ome maka jara b̶uud̶eeba Dachi Akõre dachiba jʉrʉbadau dai karibamera maud̶e kʉ̃riamera. Ichiba jarad̶a biawãra waui kuitaa panuud̶eeba dachiba poyaa perad̶awẽa ijãa panad̶ai. Maud̶e chi Jesusd̶eeba adaud̶ai esed̶au panuu ida b̶ud̶aabai. 19-20Mauba dachi aid̶a b̶uu ãrea ijãa panad̶amera anclaba jãba jãaduabarii kĩra. Dachiba adaud̶ai panuu biawãra kuitaa panuu Jesús bajãad̶aa dachi naa wãsiid̶eeba. Ichi Dachi Akõre de ed̶are paru eab̶ari jira b̶uare wãyaa wãsii dachi karibai baita. Aria ichi dachi Paare mechiu b̶eesii Melquisedec nibad̶a kĩra. Ewaricha maka nii.

Currently Selected:

Hebreos 6: cmi

Highlight

Copy

Compare