Hebreos 7

Melquisedec

1Mau Melquisedec Salem puurud̶ebena chi rey basii maud̶e Dachi Akõre chi Mechiu nii paare basii. Mau ewarid̶e Abraham chi nuree puurud̶ebena reyrã ome chĩoped̶a joma poyaasii. Abraham waya neeruud̶e ara chi Melquisedecba irsibid̶e wãped̶a ichimaa biꞌia jarasii Dachi Akõreba karibamera. 2Maabae Abrahamba chi maarã juakaa adaud̶ad̶ebena Melquisedecmaa deasii. 10 juasiiruud̶ebena ab̶a deasii. Melquisedec trʉ̃ jara b̶uu «ẽbẽrarã rey jipa nii». Maud̶e ichi «Salemd̶ebena rey» abachid̶au. Mau trʉ̃ jara b̶uu «jirukaraayuwãe b̶uai rey». 3Melquisedec akõre, chi nawe maud̶e ichi ẽbẽrarã nabẽraed̶ebenarã ʉ̃rʉbena Dachi Akõre bed̶ead̶e b̶ʉ kub̶uuwãe. Maud̶e ichi chi naweba adaud̶a maud̶e biud̶a ʉ̃rʉbena b̶ʉ kub̶uuwãe. Maka ichi Dachi Akõre Warr kĩra ewaricha paarebʉ.

4¡Melquisedec ʉ̃rʉbena ãrea kʉ̃risiásturu! Mau biawãra chi mechiu basii. Dachi nabẽraed̶ebena chi mechiu Abrahamba chĩo b̶uaped̶a juakaa adaud̶ad̶ebena ichimaa deasii. 10 juasiiruud̶ebena ab̶a deasii. 5Moisesba b̶ʉd̶ad̶e jarasii joma israeld̶ebenarãba adoeduud̶ebena Levid̶ebena imiped̶aad̶a paarerãmaa dead̶ai panuu. 10 adoeduucha ab̶a dead̶ai panuu. Israeld̶ebenarã mau paarerã ãbarãmina maud̶e arab̶au Abrahamd̶ebena imiped̶aad̶amina, maka dead̶ai panuu. 6Maumaarã Melquisedec Levid̶ebena need̶awãe basmina Abrahamba juakaa adaud̶ad̶ebena maumaa deasii. 10 juasiiruud̶ebena ab̶a deasii. Maud̶e Melquisedecba Abraham biꞌia jarasii Dachi Akõreba aid̶amera. Mau Dachi Akõreba Abrahammaa naed̶e biawãra aid̶ai a b̶uasii.#Génesis 12:1-3. 7Jomaurãba kuitaa panuu chi mechiu niiba chi kaebeu niimaa biꞌia jarabarii Dachi Akõreba aid̶amera.

8Israeld̶ebenarãba adoeduud̶ebena Levid̶ebena imiiduurã paarerãmaa deabadau. Mau paarerã biud̶aimina 10 adoeduucha ãchimaa ab̶a deabadau. Maamina Dachi Akõre bed̶ead̶e jara b̶uu Melquisedec waa chokae b̶uu. Maka Abrahamba juakaa adaud̶ad̶ebena mau biukau paaremaa deasii. 10 juasiiruucha ab̶a deasii. 9-10Israeld̶ebenarãba 10 adoeduud̶ebena Levid̶ebena imiiduurã paarerãmaa ab̶a deabadau. Maamina Melquisedecba Abraham irsibisiid̶e Abrahamd̶ebena need̶a Leví wabid̶a wãꞌãe basii. Maud̶eeba dachiba naka jarad̶ai panuu: Abrahamba 10 juasiiruucha Melquisedecmaa ab̶a deasiid̶e chi ichid̶ebena need̶a Levid̶ebena imiiduurã bid̶a mau deasid̶au.

11Dachi Akõreba ichi Moisesba b̶ʉd̶a Israeld̶ebenarãmaa deasiid̶e Levid̶ebena imiiduurã b̶usii paarerã bad̶amera. Mau paarerãba wau panuud̶eeba ẽbẽrarã poyaa Dachi Akõremaa wãbiad̶ai b̶uasiibʉrã, ¿sakãe Aarón ãyaa paare Melquisedec kĩra nii neei b̶uasma? 12Mau paare june kĩra ãyarebena need̶ad̶eeba, chi ley b̶ʉd̶a sid̶a june ãyaa b̶eei basii. 13Joma mauba Dachi Mechiu Jesús ʉ̃rʉbena berrea b̶uu. Ichi Levid̶ebena imiped̶aad̶awãe basii, maumaarã Judad̶ebena need̶a basii. Mau naed̶e ab̶a bid̶a maud̶ebena need̶a paare nuread̶aabasii. 14Moisesba jaraka basii paarerã mau ẽbẽrarãd̶ebena need̶ayu. Jomaurãba kuitaa panuu Dachi Mechiu Jesús Judad̶ebena need̶a basii.

15Joma mʉʉba jarad̶a arakʉd̶e b̶uu nau kuitaaduubʉrã: Jesús june kĩra ãyarebena need̶ad̶eeba, ichi paare b̶eesii Melquisedec b̶uad̶a kĩra. 16Ichi paare b̶eebasii, chi Moisesba b̶ʉd̶a kĩra b̶eesiid̶eeba. Moisesba b̶ʉd̶aba ab̶aburu Levid̶ebena imiiduurã b̶ubarii. Maumaarã Jesús paare b̶eesii ichi poyaabariid̶eeba biukaud̶eeba. 17Ichi ʉ̃rʉbena Dachi Akõre bed̶ead̶e naka jara b̶uu:

«Bichi ewaricha paare b̶uai Melquisedec b̶uad̶a kĩra».#Salmos 110:4.

18Chi naa b̶ʉd̶a Dachi Akõreba wãꞌãebisii ab̶a bid̶a aid̶akaud̶eeba, 19maud̶e mau Moisesba b̶ʉd̶aba ab̶a bid̶a jipa nibabiabasii. Mau Moisesba b̶ʉd̶a audeara Dachi Akõreba ne bia deasii dachi karibai baita. Maud̶eeba dachi Dachi Akõremaa ara kaita wãbadau.

20-21Dachi Akõreba chi nabena paarerã b̶usiid̶e ewaricha nuread̶ai jaraabasii. Maamina Dachi Akõreba Jesús paare b̶usiid̶e biawãrad̶eeba jarasii ewaricha maka b̶uai. Dachi Akõre bed̶ead̶e naka b̶ʉ kub̶uu:

«Dachi Mechiuba biawãrad̶eeba jarasii bichi ewaricha paare b̶uai Melquisedec b̶uad̶a kĩra.#7:20-21 Melquisedec b̶uad̶a kĩra. Griego bed̶ead̶e chi b̶ee kartad̶e mau wãꞌãe. Mauba chi jarad̶a ãyaa waubai».

22Mau Dachi Akõreba biawãrad̶eeba jarasiid̶eeba, dachiba kuitaa panuu Dachi Akõreba Jesusd̶eeba dachi ome bed̶ea chiwid̶i dead̶a#7:22 Bed̶ea chiwid̶i dead̶a. Jeremías 31:31-34. biawãra makai. Mau bed̶ea naa dead̶a Moisesba b̶ʉd̶a audeara biꞌia b̶uu.

23Chi nabenarã paarerã ãrea basii. Ab̶a biuruud̶e june ab̶a b̶eebachii. Chi biud̶aba wau badaad̶a waa poyaa waud̶aka basii. 24Maamina Jesús biukaud̶eeba ewaricha paare bai. 25Maud̶eeba chi ichid̶eeba Dachi Akõremaa needuu joma poyaa karibai ewaricha chokae nuread̶amera. Biukaud̶eeba ewaricha dachi baita Dachi Akõremaa chi chuburia id̶ibarii.

26Dachi Paare Mechiu Jesusba ne jomad̶e dachi poyaa aid̶ai. Kachirua waukau, ne jomad̶e jipa nii. Dachi Akõreba mau biꞌia unu b̶uu. Kachirua waubadaurã tãed̶ebena awara b̶uped̶a bajãad̶e chi mechiu b̶usii. 27Ichiba waukau waabenarã paare mechiurãba ewaricha waubadau kĩra. Maarãba ara ãchiba kachirua wauped̶aad̶a kakua naa Dachi Akõremaa ãnimara baa deabachid̶au. Maad̶akare waabena ãnimara baa deabachid̶au waabenarã ẽbẽrarãba kachirua wauped̶aad̶a kakua. Maamina Jesusba ãnimara baa dearuu kĩra ara ichi ida beabisii ẽbẽrarãba kachirua waubadau kakua. B̶es ab̶a maka waud̶aba kachirua joma jeraasii. 28Moisesba b̶ʉd̶aba ẽbẽrarã ne jomad̶e jipawãe nuree b̶ubarii paare mechiurã nuread̶amera. Maamina mau Moisesba b̶ʉd̶a deasiid̶e Dachi Akõreba biawãra jarasii ichi Warr ewaricha Paarerã Mechiu nibai. Maka ichi Warr b̶usii dachi kakua paare arakʉd̶e nibamera.

Currently Selected:

Hebreos 7: cmi

Highlight

Copy

Compare