Hebreos 5

1Dachi Akõreba paare mechiu b̶uuruucha ẽbẽra ab̶a jʉrʉ adauped̶a mau b̶ubarii. Maud̶eeba ẽbẽrarãba kachirua wauped̶aad̶a kakua mauba Dachi Akõremaa ne kaebea deabarii maud̶e ãnimara baa deabarii.#Levítico 1:1-6,7. 2Ẽbẽrarãba adua panuud̶eeba kachirua wauped̶aad̶a paare mechiuba poyaa kuitaa b̶uu kĩra chuburiai baita, ichia bid̶a arab̶aud̶e waubariid̶eeba. 3Ẽbẽrarãba kachirua wauped̶aad̶a kakua ãnimara baa deaduud̶e ara ichiba waud̶a kakua bid̶a ãnimara baa deai b̶uu. 4Ab̶au bid̶a ara ichi du ab̶a paare mechiu b̶eekau, maumaarã Dachi Akõréburu ab̶a b̶ubarii Aarón b̶ud̶a kĩra. 5Ara mau kĩra Cristo ara ichi du ab̶a Paare Mechiu b̶eebasii, maumaarã Dachi Akõréburu ichi maka b̶usii. Dachi Akõreba ichimaa naka jarasii:

«Bichi mʉ warrbʉ. Id̶i bichi mʉ Warr aaruu».#5:5 Salmos 2:7. Id̶i bichi mʉ Warr aaruu. Griego bed̶ead̶e naka b̶ʉ kub̶uu: Id̶i mʉʉba bichi wausii maebʉrã Id̶i mʉ bichi akõre basii.

6Maud̶e naka jarasii:

«Bichi ewaricha paare b̶uai Melquisedec b̶uad̶a kĩra».#Salmos 110:4; Génesis 14:18.

7Cristo nau kakuad̶e b̶uasiid̶e jẽa b̶uuba Dachi Akõremaa jĩwa chi chuburia id̶isii, Dachi Akõreba ichi biuid̶ebena poyaa karibai b̶uasiid̶eeba. Maud̶e Dachi Akõreba kʉ̃ria b̶uu kĩra waui asiid̶eeba, Dachi Akõreba ichiba ʉtaa id̶id̶a biꞌia ũrisii.#Marcos 14:32-36. 8Cristo Dachi Akõre Warrmina ichi ãrea biꞌiwãe b̶uud̶eeba saka ũribaba b̶uai kuitaasii. 9Ne jomad̶e biꞌia wausiid̶eeba, joma chi ũribaba ũriiduu poyaa karibai b̶uu ewaricha chokae nuread̶amera. 10Maud̶e Dachi Akõreba ichi Paare Mechiu b̶usii Melquisedec b̶uad̶a kĩra.

Chi biawãra bed̶ea ida b̶urã́sturu

11Mau ʉ̃rʉbena daiba ãrea jaradea kʉ̃ria panuu. Maamina chaarea b̶uu arakʉd̶e jaradead̶ai, machiba kauwa ũrid̶akaud̶eeba. 12Machiba Jesusd̶e ijãaped̶aad̶a ãrea baaruu. Maud̶eeba id̶i machi Dachi Akõre bed̶ea jaradeabadau nuread̶ai panasid̶au. Maamina Dachi Akõre bed̶ea biꞌia adua panuud̶eeba poyaa biꞌia jaradead̶akau. Ab̶auba machimaa chi Dachi Akõre bed̶ea ʉ̃rʉbena naa jaradead̶a waya jaradeai b̶uu, ju dobiiruu kĩra. Machi warrarã kĩra nureed̶eeba, kiuru kod̶ai bad̶amaarã ju b̶aa dod̶ai panuu. 13Chi ju b̶aa do nuree wabid̶a chuburi nureed̶eeba saka jipa waui adua nuree. 14Maamina chiko chaarea b̶uu chõrarã baita b̶uu. Ãchiba Dachi Akõre bed̶ea kauwa kʉ̃risia panuud̶eeba kuitaa panuu kãare chi bia maud̶e kãare kachirua b̶uu.

Currently Selected:

Hebreos 5: cmi

Highlight

Copy

Compare