Efesios 4

Dachi Akõre Jaurid̶eeba ãbarã chi kakua ab̶a nii kĩra nuree

1Mʉ Dachi Mechiu kakua jʉ̃a uru panuu. Mʉʉba machimaa chi chuburia id̶iiruu jipa nibad̶amera. Dachi Akõreba machi iusii maka nibad̶amera. 2Machi waabenarã audeara biꞌia nuree kʉ̃risiarã́sturu. Kʉ̃riad̶eeba chiya dauchia jãadua nureásturu. 3Dachi Akõre Jauriba machi jirukaraayuwãe nureabiai b̶uud̶eeba, ne joma biꞌia wáusturu biawãra ãbua nuread̶amera. 4Dachi kakua ara ab̶aburu b̶uu. Dachi Akõre Jauri ara ab̶aburu inid̶au. Dachi Akõreba machi iusii ara mau esed̶au panad̶amera. 5Dachi Mechiu Jesús ara ab̶aburu nii. Dachiba arab̶au Jesusd̶e ijãa panuu. Maud̶e arab̶au trʉ̃d̶eeba boro easid̶au. 6Dachi Akõre ara ab̶aburu nii. Ichi jomaurã Akõrebʉ, jomaurã Mechiubʉ. Jomaurã sõd̶e b̶uu maud̶e jomaurãd̶eeba ichiba wau kʉ̃ria b̶uu waubarii.

7Maamina Cristoba ne waubiabarii dea kʉ̃ria b̶uad̶a kĩra ichi sõbiad̶eeba dachicha ichi baita ne bia waud̶amera aꞌawaraa dead̶akasii. 8Dachi Akõre bed̶ead̶e naka b̶ʉ kub̶uu:

«Ichi ʉtaa wãsiid̶e ichiba ichi kĩramaabadaurã poyaad̶a adoesii jʉ̃ʉka ua b̶uai baita. Maabae ẽbẽrarãmaa ne bia dead̶akasii».#Salmos 68:18.

9Chi ʉtaa wãsii a b̶uuba ¿kãare jara b̶uma? Jara b̶uu ʉtaa wãi naed̶e ʉtʉʉba ichi nau iujãad̶e chi aude id̶ud̶aa neesii. 10Chi ʉtʉʉba ed̶aa need̶a waya bajãa chi aude ʉtʉ b̶uumaa wãsii ne joma ichi juad̶e ua b̶uamera. 11Ara ichiba chi nuree b̶usii ichiba bʉid̶arã nuread̶amera, waabenarã b̶usii Dachi Akõre baita berreabadaurã nuread̶amera, waabenarã b̶usii chi bed̶ea bia Cristo ʉ̃rʉbena jarad̶e nibad̶amera, maud̶e waabenarã b̶usii chi ijãabadaurã nubadaurã maud̶e jaradeabadaurã nuread̶amera. 12Ichiba maka b̶usii ẽbẽrarã Dachi Akõred̶erã aid̶ad̶amera, ãchia bid̶a Dachi Akõre baita poyaa biꞌia waud̶amera. Maka joma Cristo ẽbẽrarã ichi kakua abadau chaarea warimaa panuu, 13ab̶a jomaurã Dachi Akõre Warrd̶e ijãa panuud̶eeba maud̶e kuitaa panuud̶eeba ãbua biꞌia paneeduud̶aa. Maud̶e dachi ne jomad̶e Cristo kĩra nuread̶ai. 14Makarã waa wãwa kĩra nuread̶aabai. Wãwaba barikia bed̶ea ijãabarii. Mau awara ẽbẽrarã setaa kũruad̶ai kuitaa nureeba jaradea panuud̶eeba, setaa ijãabiabadau pũatuba jãba ãyaa adoeruu kĩra. Maamina dachi mau jãba kĩra nuread̶aabai. 15Maumaarã kʉ̃riad̶eeba chi biawãra bed̶ea ijãad̶ai panuu ne jomad̶e Dachi Mechiu Cristo kĩra nuread̶ai baita. 16Ichid̶eeba joma dachi ichi kakuabʉ. Chi dachi kakuad̶e jid̶iu kara b̶eeba chiya aid̶ad̶ai. Dachicha waud̶ai panuu kĩra wauduud̶e jomaurã kʉ̃riad̶eeba biꞌia wari kãri bad̶ai.

Cristod̶eeba chokae b̶uai wid̶i uru nuree saka nibad̶ai panuu

17Machiba biawãra waud̶amera, mʉʉba Dachi Mechiu trʉ̃d̶eeba nau jaraaruu: waa Dachi Akõre adua nuree kĩra nibarã́sturu.#4:17 Dachi Akõre adua nuree kĩra. Griego bed̶ead̶e b̶ʉ kub̶uu: judiowãerã nibabadau kĩra. Ãchi kʉ̃risia biꞌiwãe nureed̶eeba nibabadau. 18Ãchi kʉ̃risia pãriud̶e duanuud̶eeba Dachi Akõre ʉ̃rʉbena kuitaad̶akau. Ãchi sõ chaareaba Dachi Akõre adua nureed̶eeba, chi ichiba chokae duanubiai b̶uu wãꞌãe nuree. 19Ãchi kakuaba barikiu kachirua wauduu kakua perad̶akau. Ab̶a kachirua waud̶áituru kʉ̃riabadau. Chi kĩra nejasia joma wau panuu ʉ̃rʉbena, kakua ãkaad̶akau.

20Maamina machiba Cristod̶e ijãasid̶aud̶e kuitaasid̶au maka nuread̶aabai panuu. 21Ãbarãba chi biawãra bed̶ea Cristo ʉ̃rʉbena biꞌia jaradeasid̶au maud̶e biawãra machiba ichi ʉ̃rʉbena ũrid̶aped̶a ijãasid̶au. 22Ãchimaa jaradeaped̶aad̶a naubʉ: naed̶e machiba wau panad̶a kĩra waa maka nibarã́sturu. Chi kakua kachirua wau kʉ̃ria b̶uuba setad̶eeba biꞌiwãe paneebiabarii. Mau ida b̶ústuru, paru sore ẽebadau kĩra. 23Maumaarã Dachi Akõremaa machi kʉ̃risia wid̶i ida waubiásturu. 24Mau kʉ̃risia wid̶i Dachi Akõreba wausii machi ichi kĩra nuread̶amera. Maud̶eeba paru wid̶i jʉ̃ panuu kĩra, kʉ̃risia wid̶id̶eeba nibásturu. Maka machi Dachi Akõre daad̶e jipa, biꞌia nibad̶ai chi biawãra bed̶eaba jara b̶uu kĩra.

25Maud̶eeba setaa ida b̶ústuru. Ab̶aburu biawãráturu waabenarã ome berreásturu, joma dachi arab̶au kakuad̶ebenad̶eeba.

26Kĩruuduubʉrã kachirua waurã́sturu. Machi kĩru panuumisa, ewari araa b̶aebirã́sturu.#Salmos 4:4. 27Jʉbawãe niimaa ida setaa kũruabiarã́sturu.

28Nechirua badaad̶a waa nechiruabai b̶uu, maumaarã ichi juaba trajai b̶uu ne uru b̶uai baita. Maka ichiba uru b̶uai chi nejarr barauwãe nuree aid̶ai baita.

29Bed̶ea kachirua berrearã́sturu. Maumaarã bed̶ea biáturu berreásturu waabenarã aid̶ad̶ai baita. Maka machi bed̶ea ũri nuree biꞌia panad̶ai. 30Kachirua wauduuba Dachi Akõre Jauri kĩra nomaabirã́sturu. Dachi Akõreba mau machimaa deasii ichid̶irã kuitaa panad̶amera. Ichi Jauri machi baara b̶uai ab̶a Dachi Akõreba ichi ẽbẽrarã joma biꞌia b̶ui ewarid̶aa. 31Machiba joma ab̶au ʉ̃rʉbena sõd̶e kachirua kʉ̃risiabadau, sõd̶eeba kĩrubadau, oa kachirua berreabadau, kĩrud̶eeba berreabadau, waabenarã ʉ̃rʉbena setaa jarabadau maud̶e waabenarã kachirua waud̶ai kʉ̃risiabadau joma ida b̶ústuru. 32Sõbiad̶eeba nureásturu. Kĩra chuburia baraa nureásturu. Chi machiba kachirua wauped̶aad̶a kʉde uru b̶ee ida b̶ústuru, Dachi Akõreba machi kachirua Cristod̶eeba ida b̶ud̶a kĩra.

Currently Selected:

Efesios 4: cmi

Highlight

Copy

Compare