ငဝ်ႈၵမ်ႇၽႃႇ 45
45
ယူဝ်းသႅပ်ႈၽုၺ်ႇၼႄလွင်ႈမၼ်း
1မိူဝ်ႈၼၼ်ႉယူဝ်းသႅပ်ႈၼၼ်ႉ ဢမ်ႇၶျုၵ်ႈဢိင်ႇတရေႇၵႃႈတီႈၽၢႆႇၼႃႈၵူၼ်း ၵႃႈဢၼ်မီးတီႈမၼ်းၸိူဝ်းၼၼ်ႉလႆႈလႄႈ ႁွင်ႉသႅၼ်ႇလႄႈဝႃႈ၊ ႁႂ်ႈၵူၼ်းတင်းသဵင်ႈတင်းလူင်ဢွၼ်ၵၼ် ဢွၵ်ႇၵႂႃႇသေၵႃႈတီႈၵဝ်ၼႆႉသေၵမ်းတႃႉ၊ ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းၼႄပျႃးၸႃႇတီႉမၼ်းတီႈပီႈဢၢႆႈမၼ်းၸိူဝ်းၼၼ်ႉၸိုင်၊ ၵူၼ်းတၢင်ႇတီႈသီႇလႅၼ်ဢမ်ႇမီးသေၵေႃႉသေၵူၼ်း။- 2မၼ်းၵေႃႈႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈဢေႃႈ။ ၵူၼ်းဢေႇၵိပ်ႉတူႉတင်းလၢႆဢိၵ်ႇတင်းၵူၼ်းႁိူၼ်းၵူၼ်းယေး ၶုၼ်ႁေႃၶမ်းၽႃႇရေႃးၸိူဝ်းၼၼ်ႉလႆႈငိၼ်းဢေႃႈ။- 3ယူဝ်းသႅပ်ႈလၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊ ၵဝ်ၶႃႈၼႆႉပဵၼ်ယူဝ်းသႅပ်ႈဢေႃႈ။ ပေႃႈၵဝ်ၶႃႈၼၼ်ႉ ဢသၢၵ်ႈယင်းလိပ်းယူႇႁိုဝ်။ ဝႃႈၼင်ႇၼႆဢေႃႈ။ ပီႈဢၢႆႈမၼ်းၸိူဝ်းၼၼ်ႉၵႂင်ၸႂ်ယုင်ႈၸႂ်တေႃႇထိုင်ႁွတ်ႈထၼ်ႈပေႃး ဢမ်ႇၶိုၼ်းလၢတ်ႈၵႂၢမ်းတေႃႇမၼ်းလႆႈလႄႈယူႇဢေႃႈ။- 4ယူဝ်းသႅပ်ႈၵေႃႈလၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊ သုတ်ႉမႃးၵႃႈတီႈၵဝ်ၶႃႈၼႆႉၸမ်ၸမ်တႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ဢွၼ်ၵၼ်သုတ်ႉၸူးၸမ်ၸမ်ဢေႃႈ။ မၼ်းၵေႃႈလၢတ်ႈလႄႈဝႃႈ၊ ၵဝ်ၶႃႈၼႆႉပဵၼ်ယူဝ်းသႅပ်ႈ၊ ၼွင်ႉၸၢႆးသူ ဢၼ်သူၶၢႆတေႃႇ ၵႃႈတီႈမိူင်းဢေႇၵိပ်ႉတူႉၼႆႉမႃးၼၼ်ႉဢေႃႈ။- 5တေႃႈလဵဝ်ၼႆႉ ယႃႇပေမီးၸႂ်ဢၼ်လဵၵ်ႉဢၼ်ဢူၼ်ႈလႄႈ ၸႂ်မႆႈၶႆႈၸႃႉတီႈတူဝ်ၸဝ်ႈၵဝ်ႇ ၵွပ်ႈပိူဝ်ႈဢၼ်သူလႆႈၶၢႆၵဝ်ၶႃႈမႃး ၵႃႈတီႈၼႆႈမႅၼ်ႈၼၼ်ႉသေၵမ်း။ လွင်ႈမၼ်းၸမ်ႉ ၽြႃးပဵၼ်ၸဝ်ႈလႆႈပွႆႇၸႂ်ႉၵဝ်ၶႃႈမႃးဢွၼ်တၢင်းသူ ႁႂ်ႈလႆႈၸွႆႈထႅမ်ဢသၢၵ်ႈၵူၼ်းဢေႃႈ။- 6တၢင်းဢၼ်ပဵၼ်ၶဝ်ႈၵႃႈမၢၵ်ႇပႅင်းၵႃႈၼိူဝ်လိၼ်မိူင်းၼႆႉ လႆႈသွင်ပီႊယဝ်ႉ။ ပီႊဢၼ်ဢမ်ႇလႆႈႁဵတ်းၼႃး၊ ဢမ်ႇလႆႈပၢတ်ႇၶဝ်ႈၼၼ်ႉ ယင်းမီးယူႇႁႃႈပီႈလူးၵွၼ်ႇဢေႃႈ။- 7ၽြႃးပဵၼ်ၸဝ်ႈလႆႈပွႆႇၸႂ်ႉၵဝ်ၶႃႈမႃးဢွၼ်တၢင်းသူ ႁႂ်ႈသူလႆႈၵိုတ်းၵျၢၼ်ႇၵႃႈၼိူဝ်လိၼ်မိူင်းၼႆႉ ဢိၵ်ႇတင်းႁႂ်ႈလႆႈဢဝ်တင်း တၢင်းဢၼ်ၵႄႇၶျွတ်ႈဢၼ်ယႂ်ႇၼႃႇ ႁႂ်ႈဢသၢၵ်ႈသူ ၵတ်းယဵၼ်ၶျၢမ်းသႃႇဢေႃႈ။- 8ပိူဝ်ႈၼႆလႄႈ သူပွႆႇၸႂ်ႉၵဝ်ၶႃႈမႃးၵႃႈတီႈၼႆႈဢမ်ႇၸႂ်ႈ။ ၽြႃးပဵၼ်ၸဝ်ႈပွႆႇၸႂ်ႉၵဝ်ၶႃႈမႃးဢေႃႈ။ မၼ်းၸဝ်ႈၶၢၼ်းၵဝ်ၶႃႈဝႆႉၼႂ်းဢရႃႇပေႃႈၶုၼ်ႁေႃၶမ်းၽႃႇရေႃး၊ ၼႂ်းဢရႃႇၵေႃႉဢၼ်ဢုပ်ႉၵႃႈၼိူဝ်ႁေႃၶမ်း၊ ၼႂ်းဢရႃႇၸဝ်ႈဢၼ်ဢုပ်ႉပိူင်ႇမိူင်းဢေႇၵိပ်ႉတူႉၵႃႈမီးတင်းသဵင်ႈတင်းလူင်ၼႆႉယဝ်ႉ။- 9ဢွၼ်ၵၼ်ႁဵတ်းၶၼ်ၶၼ်ၽႂ်းၽႂ်းလႄႈ ၶိုၼ်းမိူဝ်းၵႂႃႇၵႃႈတီႈပေႃႈႁဝ်းၼၼ်ႉလႄႈလၢတ်ႈတီႈမၼ်းလႄႈဝႃႈ၊ လုၵ်ႈၸၢႆးပေႃႈႁဝ်းယူဝ်းသႅပ်ႈၼၼ်ႉလၢတ်ႈလႄႈဝႃႈ၊ ၽြႃးပဵၼ်ၸဝ်ႈႁႂ်ႈၵဝ်ၶႃႈပဵၼ်ၸဝ်ႈမိူင်းဢေႇၵိပ်ႉတူႉၵႃႈမီးတင်းသဵင်ႈတင်းလူင်ၶႃႈယဝ်ႉ။ လူင်းမႃးၵႃႈတီႈၵဝ်ၶႃႈၼႆႉသေၵမ်း။ ယႃႇပေႁဵတ်းၵွႆႈႁဵတ်းထိူင်းယူႇသေၵမ်း။- 10ပေႃႈႁဝ်းတၵ်းလႆႈယူႇၵႃႈတီႈမိူင်းၵေႃးသိၼ်ႇဢေႃႈ။ ၸႃႉၸဵမ်ပေႃႈႁဝ်းလႄႈလုၵ်ႈလၢၼ်ပေႃႈႁဝ်း ၽုင်သူဝ်း ၽုင်ဝူဝ်းပေႃႈႁဝ်းတင်းလၢႆဢိၵ်ႇတင်းၵႃႈဢၼ်မီးတီႈပေႃႈႁဝ်းတင်းသဵင်ႈတင်းလူင်ၼၼ်ႉတၵ်းလႆႈမီးၵႃႈတီႈဢၼ်ၸမ်ၵဝ်ၶႃႈဢေႃႈ။- 11ၵဝ်ၶႃႈတၵ်းလႆႈလဵင်ႉလူပေႃႈႁဝ်းၵႃႈတီႈၼၼ်ႈဢေႃႈ။ လွင်ႈမၼ်းၸမ်ႉ တၢင်းဢၼ်ၶဝ်ႈတၵ်းၵႃႈ မၢၵ်ႇတၵ်းပႅင်းၼၼ်ႉယင်း ၵိုတ်းၵျၢၼ်ႇယူႇႁႃႈပီႊလူးၵွၼ်ႇဢေႃႈ။ ၵူဝ်ၸႃႉၸဵမ်ပေႃႈႁဝ်းလႄႈ ၵူၼ်းႁိူၼ်းၵူၼ်းယေး ဢိၵ်ႇတင်းၵႃႈဢၼ်မီးတီႈပေႃႈႁဝ်းတင်းသဵင်ႈတင်းလူင်တၵ်းႁွတ်ႈထိုင် တၢင်းဢၼ်ယၢၵ်ႈဢၼ်ၽၢၼ်ဢေႃႈ၊ ဝႃႈၼင်ႇၼႆတႃႉ။- 12တူၺ်းလူး၊ မၢၵ်ႇတႃသူ ဢိၵ်ႇတင်းမၢၵ်ႇတႃၼွင်ႉၸၢႆးၵဝ်ၶႃႈပိၼ်ႇယႃႇမိၼ်ႇလႆႈႁၼ်လွင်ႈဢၼ်ၵဝ်ၶႃႈ ဢဝ်သူပ်းၵဝ်ၶႃႈ လၢတ်ႈတေႃႇသူၼၼ်ႉယူႇဢေႃႈ။- 13သူတၵ်းလႆႈမွၵ်ႇလၢတ်ႈလွင်ႈၸႃႉၸဵမ်မုၼ်ၸေးၸိမ်ႇဢၼ်ၵဝ်ၶႃႈလႆႈ ၵႃႈတီႈမိူင်းဢေႇၵိပ်ႉတူႉၼႆႉလႄႈ ၵႃႈဢၼ်သူလႆႈႁၼ်တင်းသဵင်ႈတင်းလူင်ယဝ်ႉၼၼ်ႉ တီႈပေႃႈႁဝ်းဢေႃႈ။ သူတၵ်းလႆႈႁဵတ်းၶၼ်ၶၼ်ၽႂ်းၽႂ်းလႄႈ ပႃးဢဝ်ပေႃႈႁဝ်းလူင်းမႃးၵႃႈတီႈ မိူင်းၼႆႉဢေႃႈ၊ ဝႃႈၼင်ႇၼႆသေယဝ်ႉ၊- 14မၼ်းၵွတ်ႇၶေႃးၼွင်ႉၸၢႆးမၼ်းပိၼ်ႇယႃႇမိၼ်ႇလႄႈႁွင်ႉႁႆႈဢေႃႈ။ ပိၼ်ႇယႃႇမိၼ်ႇၵေႃႈၵွတ်ႇၶေႃးမၼ်းလႄႈႁွင်ႉႁႆႈဢေႃႈ။- 15လိုၼ်းသေၼူမ်ပီႈဢၢႆႈမၼ်းတင်းသဵင်ႈတင်းလူင်လႄႈ ႁွင်ႉႁႆႈတေႃႇၵၼ်တင်းၶဝ်ယဝ်ႉၼၼ်ႉ၊ ပီႈဢၢႆႈမၼ်းၸိူဝ်းၼၼ်ႉ ဢွၼ်ၵၼ်လၢတ်ႈၵႂၢမ်းတေႃႇၵၼ်တင်းမၼ်းဢေႃႈ။
16ၵႃႈတီႈႁေႃၶမ်းငိၼ်းသတၢင်းသဵင်ၶၢဝ်ႇလွင်ႈဢၼ်ပီႈဢၢႆႈယူဝ်းသႅပ်ႈၸိူဝ်းၼၼ်ႉႁွတ်ႈမႃးယဝ်ႉၼၼ်ႉလႄႈ ၸႃႉၸဵမ်ၶုၼ်ႁေႃၶမ်းၽႃႇရေႃးလႄႈ ၶႃႈမၼ်းၵူၼ်းမၼ်းတင်းလၢႆထုၵ်ႇၸႂ်ၵျိူၵ်ႈၸႂ်ဢေႃႈ။- 17ၶုၼ်ႁေႃၶမ်းၽႃႇရေႃးၵေႃႈ မီးဢမိင်ႉလၢတ်ႈတီႈယူဝ်းသႅပ်ႈလႄႈဝႃႈ၊ မႂ်းတၵ်းလႆႈလၢတ်ႈတီႈပီႈဢၢႆႈမႂ်းၸိူဝ်းၼၼ်ႉၸိူဝ်ႉၼင်ႇႁိုဝ် ဝႃႈၼႆၸမ်ႉ၊ သူႁဵတ်းၸိူဝ်ႉၼင်ႇၼႆတႃႉ။ ဢွၼ်ၵၼ်ဢဝ်ၶူဝ်းဢဝ်လဵင်းတၢင်ႇၵႃႈၼိူဝ်တရိၵ်ႈသၢၼ်ႇသူတင်းလၢႆသေလႄႈ ၶိုၼ်းၶိုၼ်ႈမိူဝ်းၵႂႃႇၵႃႈတီႈမိူင်းၶႃႇၼၢၼ်ႇပုၼ်ႉလူးၵွၼ်ႇတႃႉ။- 18ဢဝ်ပေႃႈသူဢိၵ်ႇတင်းၵူၼ်းႁိူၼ်းၵူၼ်းယေးသူတင်းလၢႆလႄႈ မႃးၵႃႈတီႈၵဝ်တႃႉ။ ၵဝ်တၵ်းဢဝ်ၸေးၸိမ်ႇမိူင်းဢေႇၵိပ်ႉတူႉပၼ်လႄႈသူၵေႃႈ တၵ်းလႆႈၵိၼ်ၶွၼ်ႇၼမ်ႉမၼ်းလိၼ်ဢေႃႈ။- 19ပိူဝ်ႈဢၼ်ဢမိင်ႉၸဝ်ႈမီးလႄႈ ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ။ ပုၼ်ႈမႄႈယိင်းသူဢိၵ်ႇတင်းလုၵ်ႈဢွၼ်ႇသူတင်းလၢႆၸိုင်၊ ဢဝ်လေႃႉရထႃးၵႃႈၼႂ်းမိူင်းဢေႇၵိပ်ႉတူႉၼႆႉၵႂႃႇသေယဝ်ႉ၊ ပႃးဢဝ်ပေႃႈသူလႄႈမႃးတႃႉ။- 20ယႃႇပေသေလၢႆဢုၵ်ႉၸႃႇၶူဝ်းလဵင်းသူ။ ၸႃႉၸဵမ်မိူင်းဢေႇၵိပ်ႉတူႉၵႃႈမီးတင်းသဵင်ႈတင်းလူင် ပဵၼ်ဢုၵ်ႉၸႃႇသူယဝ်ႉ၊ ဝႃႈၼင်ႇၼႆသေယဝ်ႉ၊- 21လုၵ်ႈၸၢႆးဢီႉသရေႇလႃႉၸိူဝ်းၼၼ်ႉ ဢွၼ်ၵၼ်ႁဵတ်းၸိူဝ်ႉၼင်ႇၼၼ်လႄႈ ယူဝ်းသႅပ်ႈၵေႃႈ၊ ဢဝ်လေႃႉရထႃးလႂ် ဢိၵ်ႇတင်းၸရိပ်ႈတၢင်းၵိၼ်ပုၼ်ႈဢၼ်ၶဝ်တၵ်းၵိၼ် ၵႃႈတႃႈၵႃႈတၢင်းလႂ်ပၼ်တီႈၶဝ် ၵႃႈၼင်ႇဢၼ်ၶုၼ်ႁေႃၶမ်းၽႃႇရေႃးမီးဢမိင်ႉၼၼ်ႉဢေႃႈ။- 22တီႈၶဝ်တင်းသဵင်ႈတင်းလူင်ၼၼ်ႉၵေႃႈ၊ မၼ်းဢဝ်ၶူဝ်းၼုင်ႈပုၼ်ႈဢၼ်တၵ်းပုတ်ႈတၵ်းလၢႆႈပၼ်ဢေႃႈ။ တီႈပိၼ်ႇယႃႇမိၼ်ႇၵေႃႈ မၼ်းထၢပ်ႈထႅင်ႈလႄႈပၼ်ငိုၼ်းသၢမ်ပၢၵ်ႇၵျၢပ်ႈ တင်းၶူဝ်းၼုင်ႈပုၼ်ႈဢၼ်တၵ်းပုတ်ႈတၵ်းလၢႆႈႁႃႈၸုမ်ႇဢေႃႈ။- 23တီႈပေႃႈမၼ်းၵေႃႈ၊ မၼ်းဢဝ်လီႈ ဢၼ်တၢင်ႇသႂ်ႇၶိူင်ႈပိူင်ဢၼ်လီဢၼ်ငၢမ်း ၵႃႈတီႈမိူင်းဢေႇၵိပ်ႉတူႉၼၼ်ႉ သိပ်းၼိုင်ႈ၊ လီႈမႄႈ ဢၼ်တၢင်ႇသႂ်ႇၶဝ်ႈၵျုင်ႇ၊ ၶဝ်ႈမုၼ်း၊ တၢင်းၵိၼ်တၢင်းၶူပ်း၊ ပုၼ်ႈဢၼ်ပေႃႈမၼ်းတၵ်းၵိၼ်ၵႃႈတႃႈၵႃႈတၢင်းၼၼ်ႉသိပ်းၼိုင်ႈပၼ်ၵႂႃႇ ဢေႃႈ။- 24မၼ်းသင်ႇလၢတ်ႈတီႈၶဝ်လႄႈဝႃႈ၊ သူယႃႇပေၽိတ်းၵၼ်ၵႃႈတႃႈၵႃႈတၢင်း၊ ဝႃႈၼင်ႇၼႆသေယဝ်ႉ၊ ပွႆႇပီႈဢၢႆႈမၼ်းၸိူဝ်းၼၼ်ႉလႄႈၶဝ်ၵေႃႈၶိုၼ်းမိူဝ်းၵႂႃႇဢေႃႈ။
25ၼင်ႇၼၼ်လႄႈ ၶဝ်ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉၵႂႃႇလႄႈ ႁွတ်ႈထိုင်ၵႃႈတီႈပေႃႈၶဝ်ယႃႇၵုပ်ႈ ၵႃႈၼႂ်းမိူင်းၶႃႇၼၢၼ်ႇၼၼ်ႉသေယဝ်ႉ၊- 26ဢွၼ်ၵၼ်မွၵ်ႇလၢတ်ႈတီႈမၼ်းလႄႈဝႃႈ၊ ယူဝ်းသႅပ်ႈဢသၢၵ်ႈ ယင်းလိပ်းယူႇဢေႃႈ။ မၼ်းပဵၼ်ၵေႃႉဢၼ်ဢုပ်ႉ ၵႃႈၼိူဝ်မိူင်းဢေႇၵိပ်ႉတူႉတင်းသဵင်ႈတင်းလူင်ၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ယႃႇၵုပ်ႈၼၼ်ႉႁူဝ်ၸႂ်ၵတ်းၵႂႃႇ မူၺ်ႈၵႂႃႇလႄႈ မၼ်းဢမ်ႇယုမ်ႇၵႂၢမ်းၶဝ်ၼၼ်ႉလႆႈ။- 27ၶဝ်ၵေႃႈဢွၼ်ၵၼ်ၶိုၼ်းမွၵ်ႇလၢတ်ႈ ၵႂၢမ်းဢၼ်ယူဝ်းသႅပ်ႈသင်ႇလၢတ်ႈမႃးတင်းသဵင်ႈတင်းလူင်ၸိူဝ်းၼၼ်ႉဢေႃႈ။ ပေႃႈၶဝ် ယႃႇၵုပ်ႈၼၼ်ႉ မိူဝ်ႈဢၼ်ႁၼ်လေႃႉရထႃး ဢၼ်ယူဝ်းသႅပ်ႈပၼ်မႃးပုၼ်ႈဢၼ်မၼ်းတၵ်းၶီႇၸိူဝ်းၼၼ်ႉၸိုင်၊ ႁူဝ်ၸႂ်မၼ်း သမ်ႉၶိုၼ်းဢုၼ်ႇ ၶိုၼ်းလီမႃးဢေႃႈ။- 28ဢီႉသရေႇလႃႉၵေႃႈလၢတ်ႈလႄႈဝႃႈ၊ ပေႃးလူးၵွၼ်ႇတႃႉ။ ယူဝ်းသႅပ်ႈလုၵ်ႈၸၢႆးၵဝ်ၼၼ်ႉ ဢသၢၵ်ႈယင်းလိပ်းယူႇဢေႃႈ။ ၸူဝ်ႈဢၼ် ၵဝ်ဢမ်ႇပႆႇတၢႆၼႆႉၸိုင်၊ ၵဝ်တၵ်းၵႂႃႇလႄႈတူၺ်းမၼ်းလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။
Currently Selected:
ငဝ်ႈၵမ်ႇၽႃႇ 45: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
