ငဝ်ႈၵမ်ႇၽႃႇ 46
46
ၵူၼ်းႁိူၼ်းၵူၼ်းယေးယႃႇၵုပ်ႈၵႂႃႇမိူင်းဢေႇၵိပ်ႉတူႉ
1မိူဝ်ႈၼၼ်ႉ ဢီႉသရေႇလႃႉပႃးဢဝ်ၵႃႈဢၼ်မၼ်းမီးတင်းသဵင်ႈတင်းလူင် ၸွမ်းတၢင်းၵႂႃႇလႄႈ ႁွတ်ႈထိုင်ၵႃႈတီႈ ပေႇရသေႇၽႃႉ သေယဝ်ႉ၊ ႁဵတ်းတၢင်းဢၼ်ပုၵ်ႈၸေႃႇယိတ်ႈတီႈၽြႃးပဵၼ်ၸဝ်ႈပေႃႈမၼ်း ဢီႉၸၢၵ်ႈၼၼ်ႉဢေႃႈ။- 2ၶိင်ႇၵၢင်ၶိုၼ်း ၽြႃးပဵၼ်ၸဝ်ႈဢဝ်တင်းပျႃႇတိၵ်ႈၸဝ်ႈလႄႈ ႁွင်ႉဢီႉသရေႇလႃႉလႄႈဝႃႈ၊ ယႃႇၵုပ်ႈဢိူၺ်း၊ ယႃႇၵုပ်ႈဢိူၺ်း၊ ဝႃႈၼင်ႇၼႆသေယဝ်ႉ၊ မၼ်းၵေႃႈဢိူဝ်လႄႈဝႃႈ၊ ၶႃႈၸဝ်ႈမီးယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 3မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်ပဵၼ်ၽြႃးပဵၼ်ၸဝ်ႈ၊ ၽြႃးပဵၼ်ၸဝ်ႈပေႃႈမႂ်းၼၼ်ႉဢေႃႈ။ ယႃႇပေၵူဝ်လွင်ႈဢၼ်တၵ်းလႆႈလူင်းၵႂႃႇၵႃႈတီႈမိူင်းဢေႇၵိပ်ႉတူႉပုၼ်ႉၼၼ်ႉ။ ၵဝ်တၵ်းႁႂ်ႈမႂ်းပဵၼ်ၵူၼ်းမဵဝ်းဢၼ်ယႂ်ႇၼႃႇ ၵႃႈတီႈၼၼ်ႈဢေႃႈ။- 4ၵဝ်တၵ်းလူင်းၵႂႃႇလူၺ်ႈၵၼ်တင်းမႂ်းၵႃႈတီႈမိူင်းဢေႇၵိပ်ႉတူႉပုၼ်ႉဢေႃႈ။ ၵမ်းလိုၼ်းၵဝ်သမ်ႉတၵ်းဢဝ်မႂ်းၶိုၼ်းၶိုၼ်ႈမႃးလူးၵွၼ်ႇဢေႃႈ။ ယူဝ်းသႅပ်ႈတၵ်းလႆႈဢဝ်မိုဝ်းမၼ်းတၢင်ႇသႂ်ႇ ၵႃႈၼိူဝ်မၢၵ်ႇတႃမႂ်းဢေႃႈ၊ ဝႃႈၼင်ႇၼႆဢေႃႈ။
5ၵမ်းၼၼ်ႉ ယႃႇၵုပ်ႈသမ်ႉလုၵ်ႉဢွၵ်ႇသေၵႃႈတီႈပေႇရသေႇၽႃႉၼၼ်ႉလႄႈ လုၵ်ႈၸၢႆးဢီႉသရေႇလႃႉၸိူဝ်းၼၼ်ႉဢွၼ်ၵၼ်ဢဝ်ၸႃႉၸဵမ်ပေႃႈၶဝ်ယႃႇၵုပ်ႈလႄႈလုၵ်ႈဢွၼ်ႇလႂ်တင်းၽူႈယိင်းလႂ် တၢင်ႇသႂ်ႇၵႃႈၼႂ်းလေႃႉရထႃးဢၼ်ၶုၼ်ႁေႃၶမ်းၽႃႇရေႃးပၼ်မႃးပုၼ်ႈဢၼ်မၼ်းတၵ်းၶီႇၼၼ်ႉၵႂႃႇလႄႈ၊- 6ယႃႇၵုပ်ႈဢိၵ်ႇတင်းၸိူဝ်ႉၶိူဝ်းမၼ်းတင်းသဵင်ႈတင်းလူင် ဢွၼ်ၵၼ်ဢဝ်တရိၵ်ႈသၢၼ်ႇၶဝ် ဢိၵ်ႇတင်းဢုၵ်ႉၸႃႇၶူဝ်းလဵင်းၶဝ်၊ ဢၼ်ၶဝ်လႆႈ ၵႃႈတီႈမိူင်းၶႃႇၼၢၼ်ႇၼၼ်ႉသေလႄႈ ပႃးၵႂႃႇၵႃႈတီႈမိူင်းဢေႇၵိပ်ႉတူႉဢေႃႈ။- 7မၼ်းၼၼ်ႉ ပႃးဢဝ်ၸႃႉၸဵမ်တူဝ်မၼ်းလႄႈ လုၵ်ႈၸၢႆးမၼ်းလႂ်၊ လၢၼ်ၸၢႆးမၼ်းလႂ်၊ လုၵ်ႈယိင်းမၼ်းလႂ်၊ လၢၼ်ယိင်းမၼ်းလႂ် ဢၼ်ဝႃႈ ၸိူဝ်ႉၶိူဝ်းမၼ်းတင်းသဵင်ႈတင်းလူင်ၼၼ်ႉသေလႄႈ ၵႂႃႇၵႃႈတီႈမိူင်းဢေႇၵိပ်ႉတူႉဢေႃႈ။- 8ၸိုဝ်ႈသဵင်လုၵ်ႈလၢင်း ဢီႉသရေႇလႃႉဢၼ်ႁွတ်ႈထိုင်ၵႃႈတီႈမိူင်းဢေႇၵိပ်ႉတူႉၸိူဝ်းၼၼ်ႉၸမ်ႉ၊ ယႃႇၵုပ်ႈဢိၵ်ႇတင်း လုၵ်ႈလၢင်းမၼ်းတင်းလၢႆၼၼ်ႉ၊ လုၵ်ႈၸၢႆးတူၼ်ႈမၼ်းရူႉပိၼ်ႇ၊- 9လုၵ်ႈၸၢႆးရူႉပိၼ်ႇ၊ ႁႃႇၼုတ်ႉ၊ ၽႃႇလူႉ၊ ႁေႇၸရုၼ်ႇ တင်းၵႃႇမီႉ။- 10လုၵ်ႈၸၢႆးသီႉမုၼ်ႇ၊ ယေႇမူၺ်ႇလႃႉ၊ ယႃႇမိၼ်ႇ၊ ဢေႃးႁတ်ႉ၊ ယႃႇၶိၼ်ႇ၊ ၸေႃးႁႃႇ၊ ဢိၵ်ႇတင်းသေႃးလႃႉ၊ လုၵ်ႈၸၢႆးမႄႈယိင်းၸိူဝ်ႉၶိူဝ်းၵူၼ်းၶႃႇၼၢၼ်ႇၼၼ်ႉ။- 11လုၵ်ႈၸၢႆးလေႇဝီႉ၊ ၵေႇရသုၼ်ႇ၊ ၵေႃႇႁတ်ႉ၊ မေႇရႃႇရီႉ။- 12လုၵ်ႈၸၢႆးယူႉတႃႉ၊ ဢေးရႃႉ၊ ဢေႃးၼၼ်ႇ၊ သေးလႃႉ၊ ၽေးရိတ်ႉ၊ ၸႃႇရႃႉ၊ ၼႂ်းၶဝ်ၸိူဝ်းၼၼ်ႉ ဢေးရႃႉတင်းဢေႃးၼၼ်ႇ တၢႆၵႃႈတီႈ ၼႂ်းမိူင်းၶႃႇၼၢၼ်ႇသေဢေႃႈ။ လုၵ်ႈၸၢႆးၽေးရိတ်ႉ၊ ႁေႇၸရုၼ်ႇတင်းႁႃႇမူႉလႃႉ။- 13လုၵ်ႈၸၢႆးဢီႉသၶႃႇ၊ တေႃးလႃႉ၊ ၽူႉဝႃႇ၊ ယေႃးၽႃႉ၊ သီႉမရုၼ်ႇ။- 14လုၵ်ႈၸၢႆးၸေႇပူႉလုၼ်ႇ၊ သရိတ်ႉ၊ ဢေႇလုၼ်ႇ၊ ယႃႇလေးလႃႉဢေႃႈ။- 15ၶဝ်ၸိူဝ်းၼႆႉၸမ်ႉ၊ ပဵၼ်လုၵ်ႈၸၢႆး ဢၼ်လေႇဢႃႇ ၵိူတ်ႇလဵင်ႉဢိၵ်ႇလူၺ်ႈၵၼ်တင်း လုၵ်ႈယိင်းမၼ်းတီႉၼႃႉၼၼ်ႉမႃးတီႈ ယႃႇၵုပ်ႈ ၵႃႈၼႂ်းမိူင်းပႃႇတၼ်ႇဢႃႇရမ်ႇဢေႃႈ။ လုၵ်ႈၸၢႆးမၼ်းတင်းလုၵ်ႈယိင်းမၼ်း တင်းသဵင်ႈတင်းလူင်ပွင်းၵၼ် မီးသၢမ်သိပ်းပၢႆသၢမ်ၵေႃႉ ဢေႃႈ။
16လုၵ်ႈၸၢႆးၵၢတ်ႉ၊ ၸီႉၽျုၼ်ႇ၊ ႁၵ်ႉၵီႉ၊ သူႉၼီႉ၊ ဢေးၸပုၼ်ႇ၊ ဢေးရီႉ၊ ဢရေႃးတီႉ၊ ဢရေးလီႉ။- 17လုၵ်ႈၸၢႆးဢႃႇသႃႇ၊ ယီႉမၼႃႉ၊ ဢီႉသႂႃႇ၊ ဢီႉသဝီႇ၊ ပေႇရီႉယႃႉ၊ ဢိၵ်ႇတင်းၸေးရႃႉဢၼ်ပဵၼ်ၼွင်ႉယိင်းၶဝ်ၼၼ်ႉဢေႃႈ။ လုၵ်ႈၸၢႆးပေႇရီႉယႃႉ၊ ႁေႇပႃႇတင်းမႃႇလၶျေးလႃႉဢေႃႈ။- 18ၶဝ်ၸိူဝ်းၼႆႉၸမ်ႉ၊ ပဵၼ်လုၵ်ႈၸၢႆး ဢၼ်ၸီႉလပႃႉဢၼ်လႃႇပၢၼ်ႇပၼ်တီႈလုၵ်ႈယိင်းမၼ်းလေႇဢႃႇၼၼ်ႉ ၵိူတ်ႇလဵင်ႉမႃးၵႃႈတီႈ ယႃႇၵုပ်ႈဢေႃႈ။ ၶဝ်ၼၼ်ႉမီးသိပ်းႁူၵ်းၵေႃႉဢေႃႈ။
19လုၵ်ႈၸၢႆးရႃႇၶေႇလႃႉမေးယႃႇၵုပ်ႈၼၼ်ႉ၊ ယူဝ်းသႅပ်ႈတင်းပိၼ်ႇယႃႇမိၼ်ႇ။- 20လုၵ်ႈၸၢႆးဢၼ်ယူဝ်းသႅပ်ႈလႆႈၵႃႈၼႂ်းမိူင်းဢေႇၵိပ်ႉတူႉ ဢၼ်ဢႃႇသၼတ်ႉ လုၵ်ႈယိင်းပေႃးတီႉၽေးရႃႉ ယိတ်ႈပရေႃးႁဵၵ်ႈ ဝဵင်းဢေႃးၼႃႉ ၵိူတ်ႇလဵင်ႉမႃးတီႈမၼ်းၼၼ်ႉ မၼႃႇသေႇတင်းဢေႇၽရိမ်ႇ။- 21လုၵ်ႈၸၢႆးပိၼ်ႇယႃႇမိၼ်ႇ၊ ပေႇလႃႉ၊ ပေႇၶႃႇ၊ ဢႃႇသႃႉပေးလႃႉ၊ ၵေးရႃႉ၊ ၼေႇမၢၼ်ႇ၊ ဢေးႁီႉ၊ ရေႃးသႃႉ၊ မူႉပိမ်ႇ၊ ႁူႉပိမ်ႇ၊ ဢႃႇရတႃႉဢေႃႈ။- 22ၶဝ်ၸိူဝ်းၼႆႉၸမ်ႉ၊ ပဵၼ်လုၵ်ႈၸၢႆးဢၼ် ရႃႇၶေႇလႃႉ ၵိူတ်ႇလဵင်ႉမႃးတီႈယႃႇၵုပ်ႈဢေႃႈ။ ၶဝ်မီးသိပ်းသီႇၵေႃႉဢေႃႈ။- 23လုၵ်ႈၸၢႆးတၢၼ်ႇ၊ ႁူႉသိမ်း။- 24လုၵ်ႈၸၢႆးၼပ်ႉထလီႉ၊ ယႃႇၸေးလႃႉ၊ ၵူႉၼီႉ၊ ယေႇၸႃႉ၊ သီႉလိမ်ႇဢေႃႈ။- 25ၶဝ်ၸိူဝ်းၼႆႉၸမ်ႉ၊ ပဵၼ်လုၵ်ႈၸၢႆး ဢၼ်ပီႉလႁႃႇ ဢၼ်လႃႇပၢၼ်ႇပၼ်တီႈလုၵ်ႈယိင်းမၼ်း ရႃႇၶေႇလႃႉၼၼ်ႉ ၵိူတ်ႇလဵင်ႉမႃးတီႈယႃႇၵုပ်ႈဢေႃႈ။ ၶဝ်မီးၸဵတ်းၵေႃႉဢေႃႈ။- 26လုၵ်ႈပႂ်ႉယႃႇၵုပ်ႈ ဢမ်ႇပႆႇဝႃႈပႆႇပႃး၊ ၶဝ်ၸိူဝ်းဢၼ်သိုပ်ႇဢွၵ်ႇမႃးၵႃႈတီႈယႃႇၵုပ်ႈလႄႈၵႂႃႇလူၺ်ႈၵၼ်တင်းမၼ်းၵႃႈတီႈ မိူင်းဢေႇၵိပ်ႉတူႉၼၼ်ႉ မီးႁူၵ်းသိပ်းပၢႆႁူၵ်းၵေႃႉဢေႃႈ။- 27လုၵ်ႈၸၢႆးဢၼ်ယူဝ်းသႅပ်ႈလႆႈၵႃႈၼႂ်းမိူင်းဢေႇၵိပ်ႉတူႉဝႆႉၼၼ်ႉ မီးသွင်ၵေႃႉဢေႃႈ။ ပိူဝ်ႈၼႆလႄႈ ၵူၼ်းၸိူဝ်ႉၶိူဝ်းယႃႇၵုပ်ႈဢၼ်ႁွတ်ႈထိုင်ၵႃႈတီႈမိူင်းဢေႇၵိပ်ႉတူႉတင်းသဵင်ႈတင်းလူင်ၼၼ်ႉၸမ်ႉ၊ မီးၸဵတ်းသိပ်းၵေႃႉတဵမ်တဵမ်ဢေႃႈ။
28မၼ်းပွႆႇၸႂ်ႉယူႉတႃႉ ၵႂႃႇဢွၼ်တၢင်းမၼ်းၸူးၵႃႈတီႈယူဝ်းသႅပ်ႈႁႂ်ႈလႆႈဢွၼ်ဢဝ်မၼ်းၵႂႃႇသူင်ႇၵႃႈတီႈမိူင်းၵေႃးသိၼ်ႇသေယဝ်ႉ၊ ၶဝ်ၼၼ်ႉ ဢွၼ်ၵၼ်ႁွတ်ႈထိုင်ၵႃႈတီႈမိူင်းၵေႃးသိၼ်ႇဢေႃႈ။- 29ယူဝ်းသႅပ်ႈၵေႃႈ ႁၢင်ႈလေႃႉရထႃးသေလႄႈ ၵႂႃႇၸူးၵႃႈတီႈမိူင်းၵေႃးသိၼ်ႇ ႁႂ်ႈလႆႈႁပ်ႉႁူဝ်တၢင်းပေႃႈမၼ်း ဢီႉသရေႇလႃႉလႄႈ ႁွတ်ႈထိုင်ၵႃႈတီႈမၼ်းၼၼ်ႉသေယဝ်ႉ၊ ၵွတ်ႇၶေႃးမၼ်းသေလႄႈ ႁွင်ႉႁႆႈယူႇၵႃႈၼိူဝ်ၶေႃးမၼ်းၼၼ်ႉႁိုင်ၼႃႇလူင်လၢင်ဢေႃႈ။- 30ဢီႉသရေႇလႃႉၵေႃႈလၢတ်ႈတီႈယူဝ်းသႅပ်ႈလႄႈဝႃႈ၊ ၵမ်းၼႆႉၸိုင်ၵဝ်တၢႆၵေႃႈယႃႇတႃႉ။ ၵဝ်လႆႈႁၼ်ၼႃႈမႂ်းယဝ်ႉယဝ်ႉ။ မႂ်းၼႆႉဢသၢၵ်ႈယင်းလိပ်းယူႇဢေႃႈ၊ ဝႃႈၼင်ႇၼႆဢေႃႈ။- 31ယူဝ်းသႅပ်ႈၵေႃႈလၢတ်ႈတီႈပီႈဢၢႆႈမၼ်းတင်းလၢႆ ဢိၵ်ႇတင်းၵူၼ်းႁိူၼ်းၵူၼ်းယေးပေႃႈမၼ်းၸိူဝ်းၼၼ်ႉလႄႈဝႃႈ၊ ၵဝ်ၶႃႈတၵ်းၵႂႃႇၸူးၵႃႈတီႈၶုၼ်ႁေႃၶမ်းၽႃႇရေႃးလႄႈ လဝ်ႊလၢတ်ႈတီႈမၼ်းၸဝ်ႈလႄႈဝႃႈ၊ ပီႈဢၢႆႈၶႃႈၸဝ်ႈတင်းလၢႆဢိၵ်ႇတင်း ၵူၼ်းႁိူၼ်းၵူၼ်းယေးပေႃႈၶႃႈၸဝ်ႈ ဢၼ်ယူႇၵႃႈတီႈမိူင်းၶႃႇၼၢၼ်ႇပုၼ်ႉၸိူဝ်းၼၼ်ႉ ႁွတ်ႈမႃးၵႃႈတီႈၶႃႈၸဝ်ႈၼႆႉယဝ်ႉတီႈၶႃႈယဝ်ႉ။- 32ၶဝ်ၼၼ်ႉပဵၼ်ၵူၼ်းဢၼ်လဵင်ႉသူဝ်းထိင်းသူဝ်းတီႈၶႃႈဢေႃႈ။ ပဵၼ်ၵူၼ်းဢၼ်ၸၢင်ႈလဵင်ႉတရိၵ်ႈသၢၼ်ႇတီႈၶႃႈဢေႃႈ။ ၶဝ်ဢဝ် ၸႃႉၸဵမ်ၽုင်သူဝ်းၽုင်ဝူဝ်းလႄႈ ၵႃႈဢၼ်ၶဝ်မီးတင်းသဵင်ႈတင်းလူင်ၸိူဝ်းၼၼ်ႉ ပႃးမႃးယဝ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။- 33ၵမ်းလိုၼ်း ပေႃးၶုၼ်ႁေႃၶမ်းၽႃႇရေႃး ႁွင်ႉသူလႄႈထၢမ်ဝႃႈ၊ သူၸၢင်ႈသၢင်ႈႁဵတ်းၵၢၼ်ငၢၼ်းၵႃႈသင်၊ ဝႃႈၼင်ႇၼႆၸိုင်၊- 34သူတၵ်းလႆႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ဢိၵ်ႇတင်းပူႇမွၼ်ႇၶႃႈၸဝ်ႈႁဝ်းၸိူဝ်းၼႆႉၼၼ်ႉ ပဵၼ်ၵူၼ်းဢၼ်လဵင်ႉတရိၵ်ႈသၢၼ်ႇ ၸႃႉၸဵမ်မိူဝ်ႈလဵၵ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။ ပေႃးႁဵတ်းၸိူဝ်ႉၼင်ႇၼႆၸိုင်၊ တၵ်းလႆႈဢၶႂၢင်ႉဢၼ်ယူႇၵႃႈတီႈမိူင်းၵေႃးသိၼ်ႇၼႆႉဢေႃႈ။ ၵူၼ်းဢၼ်လဵင်ႉသူဝ်းထိင်းသူဝ်းၼၼ်ႉ ပဵၼ်တီႈဢၼ်လီႁင်ႈဢဵတ်ႇသဵတ်ႇ တီႈၵူၼ်းဢေႇၵိပ်ႉတူႉတင်းလၢႆဢေႃႈ။
Currently Selected:
ငဝ်ႈၵမ်ႇၽႃႇ 46: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
