ငဝ်ႈၵမ်ႇၽႃႇ 37
37
ယူဝ်းသႅပ်ႈတင်းပီႈဢၢႆႈမၼ်းတင်းလၢႆ
1 ယႃႇၵုပ်ႈယူႇၵႃႈၼႂ်းမိူင်းၶႃႇၼၢၼ်ႇ တီႈဢၼ်ပေႃႈမၼ်းသွၼ်ႈပိုင်ႈယူႇၼၼ်ႉဢေႃႈ။- 2ဢထုၵ်ႉပတ်ႈတီႉၸိူဝ်ႉၶိူဝ်းယႃႇၵုပ်ႈၸမ်ႉ၊ ယူဝ်းသႅပ်ႈဢသၢၵ်ႈလႆႈ သိပ်းပၢႆၸဵတ်းပီႊလႄႈ လဵင်ႉထိင်းၽုင်သူဝ်းၽုင်ပႄႉလူၺ်ႈၵၼ်တင်းပီႈဢၢႆႈမၼ်းတင်းလၢႆဢေႃႈ။ မိူဝ်ႈဢၼ်မၼ်းယင်းပဵၼ်မၢဝ်ႇႁၢႆးဢွၼ်ႇယူႇၼၼ်ႉ မၼ်းယူႇလူၺ်ႈၵၼ်တင်းလုၵ်ႈၸၢႆးပီႉလႁႃႇ တင်းၸီႉလပႃႉ မေးပေႃႈမၼ်းၸိူဝ်းၼၼ်ႉလႄႈ ၸၢင်ႈမွၵ်ႇလၢတ်ႈဢပႅတ်ႈၶဝ်ၼၼ်ႉတီႈပေႃႈၶဝ်ဢေႃႈ။- 3ဢီႉသရေႇလႃႉၼၼ်ႉၵွပ်ႈပိူဝ်ႈဢၼ်လႆႈလုၵ်ႈၸၢႆးမၼ်းယူဝ်းသႅပ်ႈၼၼ်ႉ ၼႂ်းမိူဝ်ႈဢၼ်ဢသၢၵ်ႈယႂ်ႇလႄႈ ယဵင်ႈၶႅၼ်းႁၵ်ႉယူဝ်းသႅပ်ႈ ၼႃႇသေလုၵ်ႈၸၢႆးတၢင်ႇၵေႃႉတင်းသဵင်ႈတင်းလူင်ဢေႃႈ။ သိူဝ်ႈၼုင်ႈဢၼ်ယၢဝ်းလီၵေႃႈယဵပ်ႉလႄႈပၼ်တီႈမၼ်းဢေႃႈ။- 4ပီႈဢၢႆႈမၼ်းၸိူဝ်းၼၼ်ႉ၊ မိူဝ်ႈဢၼ်ႁူႉႁၼ်လွင်ႈဢၼ်ပေႃႈၶဝ်ႁၵ်ႉမၼ်းၼႃႇသေပီႈဢၢႆႈမၼ်း တင်းသဵင်ႈတင်းလူင်ၼၼ်ႉၸိုင်၊ ဢွၼ်ၵၼ်ၸင်းမၼ်းလႄႈ ဢမ်ႇလၢတ်ႈၵႂၢမ်းမႅတ်ႈတႃႇတီႈမၼ်းလႆႈ။
5 ယူဝ်းသႅပ်ႈၼၼ်ႉ ၼွၼ်းၽၼ်ႁၼ်လႄႈ ၶိုၼ်းမွၵ်ႇလၢတ်ႈ လွင်ႈမၼ်းတၢင်းမၼ်းတီႈပီႈဢၢႆႈမၼ်းၸိူဝ်းၼၼ်ႉဢေႃႈ။ ၶဝ်ၼၼ်ႉယဵင်ႈၶႅၼ်း ဢွၼ်ၵၼ်ၸင်းမၼ်းဢေႃႈ။- 6မၼ်းၶိုၼ်းမွၵ်ႇလၢတ်ႈ လွင်ႈတၢင်းဢၼ်မၼ်းၽၼ်ႁၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ထွမ်ႇငိၼ်းတၢင်းဢၼ်ၼွၼ်းၽၼ်ဢၼ် ၵဝ်ၶႃႈလႆႈၽၼ်ႁၼ်ၼၼ်ႉသေၵမ်း။- 7ၼႂ်းမိူဝ်ႈဢၼ်ၵဝ်ၶႃႈမတ်ႉလိုၼ်ႈၶဝ်ႈယူႇၵႃႈၼႂ်းတူင်ႈၼႃးၼၼ်ႉ၊ လိုၼ်ႈၶဝ်ႈၵဝ်ၶႃႈလုၵ်ႉၸုၵ်းလႄႈ လိုၼ်ႈၶဝ်ႈသူၸဝ်ႈၵေႃႈဢွၼ်ၵၼ်ၸုၵ်းလွမ်ႉႁွပ်ႈယူႇသေလႄႈ ဝႆႈလိုၼ်ႈၶဝ်ႈၵဝ်ၶႃႈယူႇဢေႃႈ၊ ဝႃႈၼင်ႇၼႆဢေႃႈ။- 8ပီႈဢၢႆႈမၼ်းၸိူဝ်းၼၼ်ႉၵေႃႈ ၶိုၼ်းလၢတ်ႈလႄႈဝႃႈ၊ မႂ်းတၵ်းလႆႈႁဵတ်းၶုၼ်ၵႃႈၼိူဝ်ႁဝ်းႁိုဝ်။ တၵ်းလႆႈဢုပ်ႉပိူင်ႇႁဝ်းႁိုဝ်။ ဝႃႈၼင်ႇၼႆလႄႈ ၵွပ်ႈပိူဝ်ႈတၢင်းဢၼ် မၼ်းၽၼ်ႁၼ်ဢိၵ်ႇတင်း ၵႂၢမ်းမၼ်းၼၼ်ႉလႄႈ၊ ယဵင်ႈၶႅၼ်း ဢွၼ်ၵၼ်ၸင်းမၼ်းဢေႃႈ။
9လိုၼ်းၼၼ်ႉမၼ်းသမ်ႉၼွၼ်းၽၼ်ႁၼ်ထႅင်ႈလႄႈ မွၵ်ႇလၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊ ၵဝ်ၶႃႈၽၼ်ႁၼ်တၢင်ႇၸိူဝ်ႉတၢင်ႇပိူင်ထႅင်ႈၶႃႈယဝ်ႉ။ ၸႃႉၸဵမ်ၵၢင်ဝၼ်းတင်းလိူၼ်လႄႈ လၢဝ်သိပ်းဢဵတ်းလုၵ်ႈၸိူဝ်းၼၼ်ႉ ဢွၼ်ၵၼ်ဝႆႈၵဝ်ၶႃႈယူႇၶႃႈဢေႃႈ၊ ဝႃႈၼင်ႇၼႆဢေႃႈ။- 10မိူဝ်ႈဢၼ်မွၵ်ႇလၢတ်ႈတီႈပေႃႈမၼ်း ဢိၵ်ႇတင်းပီႈဢၢႆႈမၼ်းတင်းလၢႆၸိူဝ်ႉၼင်ႇၼၼ်ၼၼ်ႉၸိုင်၊ ပေႃႈမၼ်းသင်ႇသွၼ်တီႈမၼ်းလႄႈဝႃႈ၊ တၢင်းဢၼ်မႂ်းၽၼ်ႁၼ်ၼႆႉ ပဵၼ်ၸိူဝ်ႉၼင်ႇႁိုဝ်။ ၵဝ်ဢိၵ်ႇတင်းမႄႈမႂ်းတင်းပီႈဢၢႆႈမႂ်းတင်းလၢႆ တၵ်းလႆႈဢွၼ်ၵၼ် မႃးၵူမ်ႈႁူဝ် ၵွမ်းႁူဝ်ၵႃႈၼိူဝ်လိၼ် ၵႃႈတီႈၽၢႆႇၼႃႈမႂ်းႁိုဝ်။ ဝႃႈၼင်ႇၼႆဢေႃႈ။- 11ပီႈဢၢႆႈမၼ်းၸိူဝ်းၼၼ်ႉ ဢွၼ်ၵၼ်သီႈၵေႉႁေႈတႃမၼ်းဢေႃႈ။ ပေႃႈမၼ်းၵေႃႈမၢတ်ႈတွင်းလွင်ႈမၼ်းတၢင်းမၼ်းၼၼ်ႉဝႆႉဢေႃႈ။
ယူဝ်းသႅပ်ႈလႆႈၶၢမ်ႇၶၢႆပႅတ်ႈၵႂႃႇမိူင်းဢေႇၵိပ်ႉတူႉ
12ပီႈဢၢႆႈမၼ်းၸိူဝ်းၼၼ်ႉ ဢွၼ်ၵၼ်ၵႂႃႇၵႃႈတီႈ ဝဵင်းသေႇၶိမ်ႇ ႁႂ်ႈလႆႈလဵင်ႉထိင်းၽုင်သူဝ်းၽုင်ပႄႉပေႃႈၶဝ်ဢေႃႈ။- 13ဢီႉသရေႇလႃႉလၢတ်ႈတီႈယူဝ်းသႅပ်ႈလႄႈဝႃႈ၊ ပီႈဢၢႆႈမႂ်းၸိူဝ်းၼၼ်ႉလဵင်ႉထိင်းၽုင်သူဝ်းၽုင်ပႄႉယူႇၵႃႈတီႈဝဵင်းသေႇၶိမ်ႇပုၼ်ႉ ဢမ်ႇၸႂ်ႈႁိုဝ်။ မႃးလူး၊ ၵဝ်တၵ်းပွႆႇၸႂ်ႉမႂ်းၵႂႃႇၵႃႈတီႈဢၼ်ၶဝ်မီးပုၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၵေႃႈလၢတ်ႈလႄႈဝႃႈ၊ ၵဝ်ၶႃႈမီးယူႇၶႃႈဢေႃႈ၊ ဝႃႈၼင်ႇၼႆဢေႃႈ။- 14ပေႃႈမၼ်းသင်ႇလၢတ်ႈတီႈမၼ်းလႄႈဝႃႈ၊ ၵႂႃႇတႃႉ။ လူတူၺ်းလွင်ႈဢၼ်ပီႈဢၢႆႈမႂ်းၸိူဝ်းၼၼ်ႉ ယူႇလီၵိၼ်ဝၢၼ်ယူႇႁိုဝ်။ ၽုင်သူဝ်း ၽုင်ပႄႉမီးယူႇလီလီငၢမ်းငၢမ်းႁိုဝ်ၼၼ်ႉသေယဝ်ႉ၊ ၶိုၼ်းမွၵ်ႇလၢတ်ႈသတၢင်းသဵင်ၶၢဝ်ႇမႃးတီႈၵဝ်တႃႉ၊ ဝႃႈၼင်ႇၼႆလႄႈ ပွႆႇမၼ်းဢွၵ်ႇသေ ၵႃႈၼႂ်းပၢင်ႇႁူၺ်ႈႁေႇပြုၼ်ႇၼၼ်ႉၵႂႃႇလႄႈ မၼ်းၵေႃႈႁွတ်ႈထိုင် ၵႃႈတီႈဝဵင်းသေႇၶိမ်ႇဢေႃႈ။- 15ၵူၼ်းၵေႃႉၼိုင်ႈထူပ်းႁၼ်မၼ်းၼႂ်းမိူဝ်ႈဢၼ်မၼ်းယင်းတိုၵ်ႉလႄႇလဵပ်ႈယူႇၵႃႈၼႂ်းထိူၼ်ႇၼၼ်ႉလႄႈ ထၢမ်တီႈမၼ်းလႄႈဝႃႈ၊ မႂ်းႁႃၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊- 16မၼ်းၵေႃႈၶိုၼ်းလၢတ်ႈလႄႈဝႃႈ၊ ၵဝ်ၶႃႈႁႃပီႈဢၢႆႈၵဝ်ၶႃႈတင်းလၢႆၶႃႈဢေႃႈ။ ၶႅၼ်းတေႃႈမွၵ်ႇလၢတ်ႈလွင်ႈဢၼ်ၶဝ် လဵင်ႉယူႇ ထိင်းယူႇၵႃႈတီႈလႂ်ၼၼ်ႉ တီႈၵဝ်ၶႃႈသေၵမ်း၊ ဝႃႈၼင်ႇၼႆသေယဝ်ႉ၊- 17ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ၶဝ်ဢွၵ်ႇသေၵႃႈတီႈၼႆႈၵႂႃႇယဝ်ႉ။ ၵဝ်လႆႈငိၼ်းၶဝ်လၢတ်ႈၵၼ်လႄႈဝႃႈ၊ ၵႂႃႇၵႃႈတီႈဝဵင်းတေႃႇသၼ်ႇပုၼ်ႉတႃႉႁဝ်း၊ ဝႃႈၼင်ႇၼႆၼၼ်ႉယဝ်ႉ၊ ဝႃႈၼင်ႇၼႆဢေႃႈ။ ယူဝ်းသႅပ်ႈၸွမ်းႁႃပီႈဢၢႆႈမၼ်းၸိူဝ်းၼၼ်ႉလႄႈ ထူပ်းႁၼ်ၶဝ်ၵႃႈတီႈဝဵင်းတေႃႇသၼ်ႇဢေႃႈ။
18ပီႈဢၢႆႈမၼ်းၸိူဝ်းၼၼ်ႉ ႁၼ်မၼ်းၸဵမ်မိူဝ်ႈဢၼ်မၼ်းယင်းမီးယူႇၵႃႈတီႈဢၼ်ၵႆၼၼ်ႉသေယဝ်ႉ၊ ၸူဝ်ႈဢၼ်မၼ်းဢမ်ႇပႆႇႁွတ်ႈထိုင်ၵႃႈတီႈၸမ်ၼၼ်ႉၸိုင်၊ ၵေႃႉၼိုင်ႈလႄႈၵေႃႉၼိုင်ႈ တိူင်ႇပၢင်ႇလၢတ်ႈၸႃၵၼ် ႁႂ်ႈလႆႈဢဝ်မၼ်းတၢႆလႄႈဝႃႈ၊- 19တူၺ်းလူး၊ သြႃႇတၢင်းဢၼ်ၼွၼ်းၽၼ်ႁၼ်ၼၼ်ႉမႃးယဝ်ႉ။- 20မႃးဢိူၺ်း၊ ဢဝ်မၼ်းတၢႆလႄႈၶျႃးတူၵ်းသႂ်ႇဝႆႉၵႃႈၼႂ်းၶုမ်သေဢၼ်ဢၼ်တႃႉႁဝ်း။ ဢွၼ်ၵၼ်လၢတ်ႈလႄႈဝႃႈ၊ တူဝ်ထိူၼ်ႇဢၼ်ႁၢႆႉ သေၸိူဝ်ႉသေမဵဝ်းၶူပ်းၵိၼ်မၼ်းယဝ်ႉ၊ ဝႃႈၼင်ႇၼႆတႃႉႁဝ်း။ ပေႃးႁဵတ်းၸိူဝ်ႉၼင်ႇၼၼ်ယဝ်ႉၸိုင်၊ ဢွၼ်ၵၼ်တူၺ်းလွင်ႈဢၼ်တၢင်းဢၼ်မၼ်းၼွၼ်းၽၼ်ႁၼ်ၸိူဝ်းၼၼ်ႉ တၵ်းတူၵ်းတီႈၸိူဝ်ႉၼင်ႇႁိုဝ်ၼၼ်ႉတႃႉႁဝ်း၊ ဝႃႈၼင်ႇၼႆဢေႃႈ။- 21ရူႉပိၼ်ႇလႆႈငိၼ်းၵႂၢမ်းၼၼ်ႉသေယဝ်ႉ၊ ၼုၵ်ႈဢဝ်မၼ်းၵႃႈၼႂ်းမိုဝ်းၶဝ်ၼၼ်ႉလႄႈဝႃႈ၊ ယင်းဢမ်ႇဢဝ်မၼ်းတၢႆလႄႈ ဢွၼ်ၵၼ် ယူႇတႃႉႁဝ်း၊ ဝႃႈၼင်ႇၼႆဢေႃႈ။- 22ၵမ်းၼၼ်ႉ ရူႉပိၼ်ႇသမ်ႉလၢတ်ႈထႅင်ႈလႄႈဝႃႈ၊ ယႃႇပေထွၵ်ႇလိူတ်ႈမၼ်းပႅတ်ႈ။ ယင်းဢမ်ႇဢဝ်တင်းမိုဝ်းႁဵတ်းလႄႈ ဢဝ်မၼ်းၶျႃးတူၵ်းသႂ်ႇဝႆႉ ၵႃႈၼႂ်းၶုမ်ဢၼ်မီးၵႃႈၼႂ်းထိူၼ်ႇၼႆႉတႃႉႁဝ်း၊ ဝႃႈၼင်ႇၼႆလႄႈမီးတၢင်းၵျၢမ်ႇတၢင်းပွင် ဢၢင်ႈတၵ်းၼုၵ်ႈဢဝ်မၼ်းလွတ်ႈသေ ၵႃႈၼႂ်းမိုဝ်းၶဝ်လႄႈ ၶိုၼ်းဢၢပ်ႈပၼ်တီႈပေႃႈမၼ်းဢေႃႈ။
23မိူဝ်ႈဢၼ်ယူဝ်းသႅပ်ႈႁွတ်ႈထိုင် ၵႃႈတီႈပီႈၼွင်ႉမၼ်းၸိူဝ်းၼၼ်ႉၸိုင်၊ ၶဝ်ၼၼ်ႉဢွၼ်ၵၼ်ဢဝ်ယူဝ်းသႅပ်ႈထွတ်ႇသိူဝ်ႈၼုင်ႈမၼ်းဢၼ်ဝႃႈ သိူဝ်ႈၼုင်ႈဢၼ်ယၢဝ်းလီၼၼ်ႉသေယဝ်ႉ၊- 24ယိပ်းၵမ်ဢဝ်မၼ်းလႄႈၶျႃးတူၵ်းသႂ်ႇဝႆႉၵႃႈၼႂ်းၶုမ်သေဢေႃႈ။ ၵႃႈၼႂ်းၶုမ်ၼၼ်ႉ ဢမ်ႇမီးၼမ်ႉ၊ ပဵၼ်ၶုမ်ဢၼ် ႁႅင်ႈႁွင်ဝႆႉဢေႃႈ။
25လိုၼ်းၼၼ်ႉ ၼႂ်းမိူဝ်ႈဢၼ်ၶဝ်ၼင်ႈယူႇႁႂ်ႈလႆႈၵိၼ်ၶဝ်ႈမုၼ်းၼၼ်ႉၸိုင်၊ ၶဝ်မုင်ႈတူၺ်းလႄႈ ႁၼ်မုၵ်ႉၽုင်ၵူၼ်းမဵဝ်းဢီႉသမေႇလႃႉလုၵ်ႉသေၵႃႈတီႈမိူင်းၵီႉလတ်ႉမႃးလႄႈ ပႃးဢဝ်တင်းၼၢမ်ႇသႃႇ ယၢင်ပႃႇလၸမ်ႇ တင်းယၢင်မူႉရၼ်ႇတၢင်ႇၵႃႈၼိူဝ်ၵလႃးဢုၵ်ႉသေလႄႈ ၸွမ်းသဵၼ်ႈတၢင်းလူင်ၵႂႃႇၸူး ၵႃႈတီႈမိူင်းဢေႇၵိပ်ႉတူႉဢေႃႈ။- 26ၵမ်းၼၼ်ႉ ယူႉတႃႉၵေႃႈ လၢတ်ႈတီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊ ပေႃးႁဝ်းဢဝ်ၼွင်ႉၸၢႆးႁဝ်းတၢႆလႄႈ ႁူမ်ႇသိူင်ႇလိူတ်ႈမၼ်းဝႆႉၸိုင် တၵ်းမီးဢၵျူဝ်းၵႃႈသင်။- 27မႃးဢိူၺ်း၊ ႁဝ်းယင်းဢမ်ႇဢဝ်မိုဝ်းႁဵတ်းလႄႈ ဢဝ်မၼ်းၶၢႆတေႃႇၵူၼ်းမဵဝ်းဢီႉသမေႇလႃႉၸိူဝ်းၼၼ်ႉတႃႉႁဝ်း။ လွင်ႈမၼ်းၸမ်ႉ မၼ်းပဵၼ်ၼွင်ႉၸၢႆးႁဝ်း ၼိူဝ်ႉႁဝ်းလိူတ်ႈႁဝ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ပီႈၼွင်ႉမၼ်းၸိူဝ်းၼၼ်ႉဢွၼ်ၵၼ်ႁပ်ႉတုင်းဢဝ်ၵႂၢမ်းမၼ်းဢေႃႈ။- 28မိူဝ်ႈၼၼ်ႉ ၼႂ်းမိူဝ်ႈဢၼ်ၵူၼ်းၵႃႉၵူၼ်းၶၢႆ ၵူၼ်းမဵဝ်းမီႉတျၼ်ႇတင်းလၢႆ ၸွမ်းသဵၼ်ႈတၢင်းၵႂႃႇ ၵႃႈတီႈႁိမ်းၼၼ်ႉယူႇၼၼ်ႉၸိုင်၊ ပီႈဢၢႆႈမၼ်းၸိူဝ်းၼၼ်ႉဢွၼ်ၵၼ်တိုတ်ႉၸၼ်ဢဝ်ယူဝ်းသႅပ်ႈ ဢွၵ်ႇသေၵႃႈၼႂ်းၶုမ်သေယဝ်ႉ၊ ဢဝ်ယူဝ်းသႅပ်ႈၼၼ်ႉ ၶၢႆတေႃႇၵူၼ်းဢီႉသမေႇလႃႉၸိူဝ်းၼၼ်ႉ လႆႈၵႃႈမၼ်းၶၼ်မၼ်းငိုၼ်းသၢဝ်းၵျၢပ်ႈလႄႈ၊ ၶဝ်ၼၼ်ႉၵေႃႈပႃးဢဝ်ယူဝ်းသႅပ်ႈၵႂႃႇ ၵႃႈတီႈမိူင်းဢေႇၵိပ်ႉတူႉ သေဢေႃႈ။
29 ရူႉပိၼ်ႇၼၼ်ႉ ၶိုၼ်းၵႂႃႇၸူး ၵႃႈတီႈၶုမ်ၼၼ်ႉလႄႈ ႁၼ်လွင်ႈဢၼ် ယူဝ်းသႅပ်ႈဢမ်ႇမီးၵႃႈၼႂ်းၶုမ်ၼၼ်ႉသေယဝ်ႉ၊ တိုတ်ႉသိၵ်ႇၶူဝ်းၼုင်ႈမၼ်းလႄႈ၊- 30ၶိုၼ်းၵႂႃႇၸူးၵႃႈတီႈဢၼ်ၼွင်ႉၸၢႆးမၼ်းတင်းလၢႆမီးၼၼ်ႉလႄႈ လၢတ်ႈလႄႈဝႃႈ၊ လုၵ်ႈဢွၼ်ႇၼၼ်ႉဢမ်ႇမီးယဝ်ႉလူင်ပႄႇ။ ၵဝ်တၵ်းလႆႈၵႂႃႇၵႃႈတီႈလႂ်၊ ဝႃႈၼင်ႇၼႆဢေႃႈ။
31ၶဝ်ၼၼ်ႉဢွၼ်ၵၼ် ဢဝ်သိူဝ်ႈၼုင်ႈယူဝ်းသႅပ်ႈလႄႈ ဢဝ်ပႄႉဢွၼ်ႇတူဝ်ၼိုင်ႈတၢႆသေယဝ်ႉ၊ ဢဝ်သိူဝ်ႈၼုင်ႈၼၼ်ႉ ၸုပ်ႉသႂ်ႇၵႃႈၼႂ်းလိူတ်ႈၼၼ်ႉဢေႃႈ။- 32လိုၼ်းၼၼ်ႉ ၶဝ်ဢဝ်သိူဝ်ႈၼုင်ႈဢၼ်ယၢဝ်းလီၼၼ်ႉ ပၼ်ၵႂႃႇလႄႈ ဢဝ်မိူဝ်းၵႂႃႇၸူးၵႃႈတီႈပေႃႈၶဝ်လႄႈလၢတ်ႈဝႃႈ၊ ႁဝ်းၶႃႈထူပ်းႁၼ်သိူဝ်ႈၼုင်ႈၼႆႉၶႃႈယဝ်ႉ။ ပဵၼ်သိူဝ်ႈလုၵ်ႈၸၢႆးၸဝ်ႈႁဝ်း ၸႂ်ႈႁိုဝ်ဢမ်ႇၸႂ်ႈႁိုဝ်ၸိုင်၊ တူၺ်းသေၵမ်း၊ ဝႃႈၼင်ႇၼႆသေယဝ်ႉ၊- 33မၼ်းတွင်းသိူဝ်ႈၼုင်ႈၼၼ်ႉဝႆႉလႄႈလၢတ်ႈဝႃႈ၊ သိူဝ်ႈၼုင်ႈလုၵ်ႈၸၢႆးၵဝ်ၸႂ်ႈတႄႉတႄႉယဝ်ႉ။ တူဝ်ထိူၼ်ႇဢၼ်ႁၢႆႉ ၶူပ်းၵိၼ်မၼ်းယဝ်ႉ။ ယူဝ်းသႅပ်ႈလႆႈၶၢမ်ႇတၢင်းဢၼ် ၶူပ်းယွၵ်းၶူပ်းယွႆႈပႅတ်ႈယဝ်ႉ လူင်ပႄႇ၊ ဝႃႈၼင်ႇၼႆလႄႈ၊- 34ယႃႇၵုပ်ႈတိုတ်ႉသိၵ်ႇၶူဝ်းၼုင်ႈမၼ်းလႄႈ ဢဝ်ၼင်ပေႃၼုင်ႈႁတ်ႉဢႅဝ်သေယဝ်ႉ၊ ၸႂ်ဢမ်ႇသႃႇၶၢင်းၶီၶၢင်းၽၢၼ် ၵွပ်ႈပိူဝ်ႈလုၵ်ႈၸၢႆး မၼ်းလႄႈ ယူႇမိုဝ်ႉဝၼ်းၼမ်ၼႃႇဢေႃႈ။- 35ပိၵ်ႉသမ်ႉလုၵ်ႈၸၢႆးမၼ်း တင်းလုၵ်ႈယိင်းမၼ်းတင်းသဵင်ႈတင်းလူင်ဢွၼ်ၵၼ်လုၵ်ႉလႄႈ ၵႆႉၵျူဝ်းၸႃးႁဵတ်းႁႂ်ႈပေႃႈၶဝ် ပေႇၸႂ် သေၵေႃႈ၊ မၼ်းယင်းဢမ်ႇထွမ်ႇဢမ်ႇဢဝ်ၵႂၢမ်းဢၼ်ႁႂ်ႈပေႇၸႂ်ၼၼ်ႉလႄႈလၢတ်ႈဝႃႈ၊ ၵဝ်တၵ်းမီးတင်းႁူဝ်ၸႂ်ဢၼ်ဢမ်ႇသႃႇ ၶၢင်းၶီၶၢင်းၽၢၼ်ယူႇသေလႄႈ လူင်းၵႂႃႇၸူးမိူင်းမရၼႃႉ ၵႃႈတီႈဢၼ်လုၵ်ႈၸၢႆးၵဝ်မီးပုၼ်ႉယဝ်ႉ၊ ဝႃႈၼင်ႇၼႆဢေႃႈ။ ပေႃႈယူဝ်းသႅပ်ႈၼၼ်ႉ ႁွင်ႉႁွင်ႉႁႆႈႁႆႈ ၵွပ်ႈပိူဝ်ႈလုၵ်ႈၸၢႆးမၼ်းၸိူဝ်ႉၼင်ႇၼၼ်လႄႈယူႇဢေႃႈ။- 36ယူဝ်းသႅပ်ႈၸမ်ႉ၊ ၵူၼ်းမီႉတျၼ်ႇၸိူဝ်းၼၼ်ႉ ပႃးဢဝ်ၵႂႃႇၵႃႈတီႈ မိူင်းဢေႇၵိပ်ႉတူႉလႄႈ ၶၢႆတေႃႇ ပေႃးတီႉၽႃႇ ၵူဝ်ႇရမ်ႇတေႃႇမူး#37:36 ၵူဝ်ႇရမ်ႇတေႃႇမူး ၶႂ်ႈဝႃႈ ၽူႈၵႅတ်ႇၶႄပၼ်ၶုၼ်ႁေႃၶမ်း ဢၼ်ပဵၼ်ဢမၢတ်ႈ ၶုၼ်ႁေႃၶမ်း ၽႃႇရေႃးၼၼ်ႉဢေႃႈ။
Currently Selected:
ငဝ်ႈၵမ်ႇၽႃႇ 37: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
