ငဝ်ႈၵမ်ႇၽႃႇ 33

ယႃႇၵုပ်ႈထူပ်းႁၼ်ဢေးသေႃး

1မိူဝ်ႈၼၼ်ႉယႃႇၵုပ်ႈမုင်ႈတူၺ်းလႄႈႁၼ်ပီႈဢၢႆႈမၼ်းဢေးသေႃး ၶီႇဢဝ်တင်းၵူၼ်းသီႇပၢၵ်ႇမႃးၼၼ်ႉသေယဝ်ႉ၊ ဢဝ်လုၵ်ႈၸၢႆးတင်းလၢႆ ၽႄမႅင်ႇပၼ်တီႈလေႇဢႃႇတင်းရႃႇၶေႇလႃႉ ဢိၵ်ႇတင်းမႄႈယိင်းၶႃႈသွင်ၵေႃႉ ၸိူဝ်းၼၼ်ႉဢေႃႈ။- 2မႄႈယိင်းၶႃႈသွင်ၵေႃႉတင်းလုၵ်ႈလၢင်းၶဝ်ၼၼ်ႉဝႆႉၵႃႈတီႈဢွၼ်တၢင်း၊ လေႇဢႃႇတင်းလုၵ်ႈလၢင်းမၼ်းတင်းလၢႆ ဝႆႉၵႃႈတီႈၶိုင်ႈၵၢင်၊ ရႃႇၶေႇလႃႉတင်းယူဝ်းသႅပ်ႈဝႆႉၵႃႈတီႈလိုၼ်းလင်ဢေႃႈ။- 3တူဝ်မၼ်းပူၼ်ႉၵႂႃႇဢွၼ်တၢင်းၶဝ်ၼၼ်ႉလႄႈ ၵူမ်ႈႁူဝ်ၶုပ်ႉမူပ်ႇတေႃႇထိုင်ႁွတ်ႈၸဵတ်းပွၵ်ႈသေယဝ်ႉ၊ သုတ်ႉၸပ်းသုတ်ႉၸူးၵႃႈတီႈႁိမ်းပီႈဢၢႆႈမၼ်းဢေႃႈ။- 4မိူဝ်ႈၼၼ်ႉ ဢေးသေႃးလႅၼ်ႈမႃးႁႂ်ႈလႆႈႁပ်ႉႁူဝ်တၢင်းမၼ်းလႄႈ ၵွတ်ႇၶေႃးမၼ်းၸုပ်ႇၼူမ်သေယဝ်ႉ၊ သွင်ၶႃႁႆႈတေႃႇၵၼ်ဢေႃႈ။- 5ဝၢႆးၼၼ်ႉမုင်ႈတူၺ်းလႄႈ မိူဝ်ႈဢၼ်ႁၼ်ၽူႈယိင်းတင်းလၢႆ ဢိၵ်ႇတင်းလုၵ်ႈဢွၼ်ႇၶဝ်ၸိူဝ်းၼၼ်ႉသေယဝ်ႉ၊ ထၢမ်လႄႈဝႃႈ၊ ၶဝ်ၸိူဝ်းဢၼ်မီးတီႈမႂ်းၼႆႉပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈၶိုၼ်းလၢတ်ႈလႄႈဝႃႈ၊ ပဵၼ်လုၵ်ႈဢွၼ်ႇဢၼ်ၽြႃးပဵၼ်ၸဝ်ႈ ဢဵတ်းလူပၼ်တီႈၶႃႈၸဝ်ႈႁဝ်းဢေႃႈ၊ ဝႃႈၼင်ႇၼႆသေယဝ်ႉ၊- 6မႄႈယိင်းၶႃႈဢိၵ်ႇတင်းလုၵ်ႈလၢင်းၶဝ်ၸိူဝ်းၼၼ်ႉ သုတ်ႉၸမ်လႄႈၵူမ်ႈၵွမ်းႁူဝ်ဢေႃႈ။- 7ဝၢႆးၼၼ်ႉ လေႇဢႃႇတင်းလုၵ်ႈလၢင်းမၼ်းၸိူဝ်းၼၼ်ႉသုတ်ႉၸမ်လႄႈ ၵူမ်ႈၵွမ်းႁူဝ်ဢေႃႈ။ လိုၼ်းၼၼ်ႉယူဝ်းသႅပ်ႈ တင်းရႃႇၶေႇလႃႉ သုတ်ႉၸမ်လႄႈ ၵူမ်ႈၵွမ်းႁူဝ်ဢေႃႈ။- 8ဢေးသေႃးၵေႃႈထၢမ်လႄႈဝႃႈ၊ ၽုင်တရိၵ်ႈသၢၼ်ႇဢၼ်ၵဝ်လႆႈထူပ်းႁၼ်ယဝ်ႉတင်းသဵင်ႈတင်းလူင်ၼၼ်ႉၸမ်ႉ၊ ပဵၼ်လွင်ႈတၢင်း ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈၶိုၼ်းလၢတ်ႈလႄႈဝႃႈ၊ ပဵၼ်ပုၼ်ႈဢၼ်တၵ်းထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းဢေႃႈ၊ ဝႃႈၼင်ႇၼႆဢေႃႈ။- 9ဢေးသေႃးလၢတ်ႈလႄႈဝႃႈ၊ ၼွင်ႉၸၢႆးၵဝ်ဢိူၺ်း၊ တီႈၵဝ်မီးၵုမ်ႇၵုမ်ႇလုမ်ႇလုမ်ႇယူႇဢေႃႈ။ ဢုၵ်ႉၸႃႇမႂ်းၸိုင်၊ ဢဝ်ဝႆႉလူးၵွၼ်ႇတႃႉ၊ ဝႃႈၼင်ႇၼႆဢေႃႈ။- 10ယႃႇၵုပ်ႈၵေႃႈလၢတ်ႈလႄႈဝႃႈ၊ ယႃႇပေဝႃႈၸိူဝ်ႉၼင်ႇၼၼ်သေၵမ်းၶႃႈ။ ပေႃးၶႃႈၸဝ်ႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်း ၸိုင်၊ ၶၢမ်ႇဢဝ်လၢၵ်ႈသွင်ႇဢၼ်ၵဝ်ၶႃႈသၢၵ်ႈၼႆႉသေၵမ်းၶႃႈ။ လႆႈႁၼ်ၼႃႈၸဝ်ႈႁဝ်း မိူၼ်ၸိူဝ်ႉၼင်ႇလႆႈႁၼ် ၼႃႈၽြႃးပဵၼ်ၸဝ်ႈၼၼ်ႉ ၶႃႈဢေႃႈ။ ၸႂ်ၸဝ်ႈႁဝ်းၵေႃႈ ဢူၼ်ႈဢွၼ်ႇတီႈၶႃႈၸဝ်ႈယူႇၶႃႈဢေႃႈ။- 11ၶၢမ်ႇဢဝ်မင်ႇၵလႃႇၶႃႈၸဝ်ႈဢၼ်ႁွတ်ႈထိုင် ၵႃႈတီႈၸဝ်ႈႁဝ်းၼၼ်ႉသေၵမ်းၶႃႈ။ ၽြႃးပဵၼ်ၸဝ်ႈႁဵတ်းၵျေးၸူးၼမ်ၼႃႇလူင်လၢင်တီႈၶႃႈၸဝ်ႈယဝ်ႉၶႃႈယဝ်ႉ။ တီႈၶႃႈၸဝ်ႈမီးၵုမ်ႇၵုမ်ႇလုမ်ႇလုမ်ႇယူႇၶႃႈဢေႃႈ၊ ဝႃႈၼင်ႇၼႆလႄႈ ၵွပ်ႈပိူဝ်ႈဢၼ် တိုၵ်းယူင်းမၼ်းၼႃႇလူင်လၢင်ၼၼ်ႉလႄႈမၼ်းၸင်ႇလႆႈၶၢမ်ႇဢဝ်ဢေႃႈ။

12မၼ်းၵေႃႈလၢတ်ႈလႄႈဝႃႈ၊ ပႆတၢင်းလႄႈၵႂႃႇလူၺ်ႈၵၼ်တႃႉႁဝ်း။ ၵဝ်တၵ်းၵႂႃႇပႃႈၼႃႈမႂ်းဢေႃႈ၊ ဝႃႈၼင်ႇၼႆသေယဝ်ႉ၊- 13ယႃႇၵုပ်ႈၵေႃႈလဝ်ႊလၢတ်ႈလႄႈဝႃႈ၊ ၵႃႈၼင်ႇဢၼ်ၸဝ်ႈႁဝ်းႁူႉယူႇၼၼ်ႉ၊ လုၵ်ႈဢွၼ်ႇၸိူဝ်းၼႆႉယင်းလဵၵ်ႉယင်းၼုမ်ႇၼႃႇၶႃႈဢေႃႈ။ ၽုင်သူဝ်း၊ ၽုင်ပႄႉ၊ ၽုင်ဝူဝ်းဢၼ်ပႃးတင်းလုၵ်ႈဢွၼ်ႇၸိူဝ်းၼႆႉၵေႃႈ ပႃးမႃးတီႈၶႃႈၸဝ်ႈဢေႃႈ။ ပေႃးႁေႃႈႁိပ်ႈႁေႃႈၼႅတ်ႈၼႃႇ ဝၼ်းၼိုင်ႈၸိုင်၊ ၵႃႈမီးတင်းသဵင်ႈတင်းလူင်တၵ်းတၢႆၶႃႈဢေႃႈ။- 14ပိူဝ်ႈၼႆလႄႈ ၸဝ်ႈႁဝ်းၶႅၼ်းတေႃႈၵႂႃႇဢွၼ်တၢင်းၶႃႈၸဝ်ႈႁဝ်းသေၵမ်းၶႃႈ။ ၶႃႈၸဝ်ႈၸမ်ႉ၊ ၵႃႈၼင်ႇဢၼ်တရိၵ်ႈသၢၼ်ႇဢၼ်ပႃးလူၺ်ႈၵၼ်တင်းၶႃႈၸဝ်ႈ ဢိၵ်ႇတင်းလုၵ်ႈဢွၼ်ႇၸိူဝ်းၼႆႉတၢတ်ႈၼိူင်ႇလႆႈၼၼ်ႉ တၵ်းဢဝ်သူင်ႇၵႂႃႇလွႆးလွႆးႁႂ်ႈႁွတ်ႈထိုင်ၵႃႈတီႈ မိူင်းၸီႉရႃႉ တီႈဢၼ်ၸဝ်ႈႁဝ်းယူႇပုၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။- 15ဢေးသေႃးၵေႃႈလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ႁႂ်ႈၵူၼ်းဢၼ်ပႃးတီႈၵဝ်ၼႆႉ ၵမ်ႈၽွင်ႈၵိုတ်းယူႇတီႈမႂ်းတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ယႃႇၵုပ်ႈၵေႃႈၶိုၼ်းလၢတ်ႈလႄႈဝႃႈ၊ မီးလွင်ႈၼင်ႇႁိုဝ်ၶႃႈ။ ႁႂ်ႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်း သေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊- 16ၼႂ်းဝၼ်းၼၼ်ႉဢေးသေႃးၸွမ်းသဵၼ်ႈတၢင်းလႄႈၶိုၼ်းမိူဝ်းၵႂႃႇၸူးၵႃႈတီႈမိူင်းၸီႉရႃႉသေဢေႃႈ။

17 ယႃႇၵုပ်ႈၵေႃႈ ၸွမ်းတၢင်းၵႂႃႇ ၵႃႈတီႈသူႉၵုတ်ႉလႄႈ ႁဵတ်းႁိူၼ်းပုၼ်ႈဢၼ်မၼ်းတၵ်းယူႇဢိၵ်ႇတင်းသုမ်ႉပုၼ်ႈဢၼ် တရိၵ်ႈသၢၼ်ႇတၵ်းယူႇၼမ်ၼႃႇဢေႃႈ။ ပိူဝ်ႈၼႆလႄႈ မၼ်းႁွင်ႉႁဵၵ်ႈၸိုဝ်ႈတီႈၼၼ်ႉ သူႉၵုတ်ႉဢေႃႈ။

18လိုၼ်းၼၼ်ႉ ယႃႇၵုပ်ႈၵၢင်းလွတ်ႈတၢင်းၽေးသေလႄႈ ႁွတ်ႈထိုင်ၵႃႈတီႈဝဵင်းသေႇၶိမ်ႇ ဢၼ်မီးၵႃႈၼႂ်းမိူင်းၶႃႇၼၢၼ်ႇ ၼႂ်းၶိင်ႇမိူဝ်ႈဢၼ် မၼ်းလုၵ်ႉသေ ၵႃႈတီႈမိူင်းပႃႇတၼ်ႇဢႃႇရမ်ႇၶိုၼ်းမႃးၼၼ်ႉဢေႃႈ။ မၼ်းမုင်းမူဝ်းၵႃႇမၼ်း ၵႃႈတီႈၽၢႆႇၼႃႈ ဝဵင်းၼၼ်ႉဢေႃႈ။- 19ၵႂၢၵ်ႈလိၼ်ဢၼ်မၼ်းမုင်းမူဝ်းၵႃႇၼၼ်ႉၸိုင် မၼ်းလႆႈဢဝ်တင်းငိုၼ်းၸွႆႉၼိုင်ႈ သိုဝ်ႉဢဝ်တီႈလုၵ်ႈၸၢႆးႁႃႇမေႃႇ ဢၼ်ပဵၼ်ပေႃႈသေႇၶိမ်ႇၼၼ်ႉတင်းလၢႆၼၼ်ႉဢေႃႈ။- 20ၵႃႈတီႈၼၼ်ႈၵေႃႈ မၼ်းႁဵတ်းယိတ်ႈပလၢင်ႇသေယဝ်ႉ၊ ႁွင်ႉႁဵၵ်ႈၸိုဝ်ႈဢေးလေးလေႃႇႁီႉဢီႉသရေႇလႃႉဢေႃႈ။

Currently Selected:

ငဝ်ႈၵမ်ႇၽႃႇ 33: CBMS

Highlight

Copy