ငဝ်ႈၵမ်ႇၽႃႇ 32
32
ယႃႇၵုပ်ႈမႄးႁႅၼ်းႁႂ်ႈလႆႈထူပ်းဢေးသေႃး
1 ယႃႇၵုပ်ႈသမ်ႉၸွမ်းတၢင်းၵႂႃႇလႄႈ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆႁူပ်ႉထူပ်းမၼ်းဢေႃႈ။- 2ယႃႇၵုပ်ႈၼၼ်ႉႁၼ်ၶဝ်ၼၼ်ႉသေယဝ်ႉလၢတ်ႈလႄႈဝႃႈ၊ ဢၼ်ၼႆႉပဵၼ်တပ်ႉၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆလႄႈႁွင်ႉႁဵၵ်ႈၸိုဝ်ႈတီႈၼၼ်ႈ မႁႃႇၼိမ်ႇဢေႃႈ။
3မိူဝ်ႈၼၼ်ႉ ယႃႇၵုပ်ႈပွႆႇၸႂ်ႉၵူၼ်းၵႂႃႇဢွၼ်တၢင်းမၼ်းၸူးၵႃႈတီႈဢေးသေႃးပီႈဢၢႆႈမၼ်းၵႃႈတီႈမိူင်းၸီႉရႃႉ ဢၼ်ပဵၼ်ပၢင်ႇပဵင်းဢေႇတုမ်ႇၼၼ်ႉလႄႈ သင်ႇလၢတ်ႈတီႈၶဝ်ၼၼ်ႉလႄႈဝႃႈၸမ်ႉ၊- 4သူလဝ်ႊလၢတ်ႈတီႈၸဝ်ႈႁဝ်းဢေးသေႃးၼၼ်ႉလႄႈဝႃႈ၊ ၶႃႈၸဝ်ႈႁဝ်းယႃႇၵုပ်ႈလဝ်ႊလၢတ်ႈမႃးလႄႈဝႃႈ၊ ၶႃႈၸဝ်ႈလႆႈသွၼ်ႈပိုင်ႈ ၵႃႈတီႈလႃႇပၢၼ်ႇလႄႈ ယူႇႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉၶႃႈဢေႃႈ။- 5ၶႃႈၸဝ်ႈမီးဝူဝ်းလႂ်၊ လီႈလႂ်၊ သူဝ်းလႂ်၊ ပႄႉလႂ်၊ ဢိၵ်ႇတင်းၶႃႈၵူၼ်းၸၢႆးလႂ်၊ ၶႃႈၵူၼ်းယိင်းလႂ်ယဝ်ႉၶႃႈဢေႃႈ။ ၶႃႈၸဝ်ႈလဝ်ႊလၢတ်ႈၵႂႃႇႁႂ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၶႃႈယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 6ၵူၼ်းၸႂ်ႉၸိူဝ်းၼၼ်ႉၶိုၼ်းမႃး ၵႃႈတီႈယႃႇၵုပ်ႈလႄႈလဝ်ႊလၢတ်ႈလႄႈဝႃႈ၊ ႁဝ်းၶႃႈႁွတ်ႈထိုင်ၵႃႈတီႈပီႈဢၢႆႈၸဝ်ႈႁဝ်းဢေးသေႃးၼၼ်ႉမႃးၶႃႈယဝ်ႉ။ မၼ်းၵေႃႈၶီႇဢဝ်တင်းၵူၼ်းသီႇပၢၵ်ႇမႃးႁႂ်ႈလႆႈထူပ်းႁၼ်ၸဝ်ႈႁဝ်းၶႃႈယဝ်ႉ၊ ဝႃႈၼင်ႇၼႆဢေႃႈ။- 7မိူဝ်ႈၼၼ်ႉယႃႇၵုပ်ႈၵူဝ်ႁႄၼႃႇလူင်လၢင်လႄႈ မီးတၢင်းဢၼ်ယၢပ်ႇၸႂ်ယုင်ႈၸႂ်ယူႇသေလႄႈ ဢဝ်ၵူၼ်းၵႃႈဢၼ်ပႃးတီႈမၼ်းဢိၵ်ႇတင်းၽုင်သူဝ်း၊ ၽုင်ပႄႉ၊ ၽုင်ဝူဝ်း၊ ၵလႃးဢုၵ်ႉၸိူဝ်းၼၼ်ႉ ၽႄႁဵတ်းသွင်မုၵ်ႉဝႆႉဢေႃႈ။- 8လွင်ႈမၼ်းၸမ်ႉ မၼ်းဝႃႈ၊ ပေႃးဢေးသေႃးထူပ်းႁၼ်မုၵ်ႉၼိုင်ႈလႄႈတိုၵ်းတေႃးယႃႉပႅတ်ႈၸိုင်၊ မုၵ်ႉၼိုင်ႈဢၼ်ၵိုတ်းဝႆႉၼၼ်ႉ တၵ်းလွတ်ႈဢေႃႈ၊ ဝႃႈၼင်ႇၼႆဢေႃႈ။
9ၵမ်းၼၼ်ႉ ယႃႇၵုပ်ႈသူးတွင်းလႄႈဝႃႈ၊ ၽြႃးပဵၼ်ၸဝ်ႈပေႃႈၵဝ်ၶႃႈဢႃႇပြႃႇႁၢမ်ႇ၊ ၽြႃးပဵၼ်ၸဝ်ႈပေႃႈၵဝ်ၶႃႈဢီႉၸၢၵ်ႈ၊ ထႃႇဝရႃႉၽြႃး ဢၼ်လၢတ်ႈတီႈၶႃႈၸဝ်ႈလႄႈဝႃႈ၊ ၶိုၼ်းမိူဝ်းၵႂႃႇၸူးၵႃႈတီႈမိူင်းမႂ်း ဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းတႃႉ။ ၵဝ်တၵ်းႁဵတ်းၵျေးၸူးတီႈမႂ်းဢေႃႈ၊ ဝႃႈၼင်ႇၼႆၼၼ်ႉတီႈၶႃႈဢိူၺ်း၊- 10ၼႂ်းၵရူႉၼႃႇတင်းသဵတ်ႈၸႃႇၵႃႈဢၼ်ၸဝ်ႈႁဝ်းၼႄပျႃးတီႈၶႃႈၸဝ်ႈၼၼ်ႉ၊ ၶႃႈၸဝ်ႈဢမ်ႇထိူၵ်ႈလႆႈၶၢမ်ႇဢၼ်လဵၵ်ႉသေပိူၼ်ႈ တီႈၶႃႈ၊ မိူဝ်ႈဢွၼ်ၼႆႉၼၼ်ႉ ၶႃႈၸဝ်ႈလႆႈဢဝ်တင်းၶွၼ်ႉတဝ်ႉၶၢမ်ႈၼမ်ႉႁွင်ႈယေႃးတၢၼ်ႇၼႆႉၵႂႃႇတီႈၶႃႈဢေႃႈ။ တေႃႈလဵဝ်ၼႆႉၸမ်ႉ၊ လႆႈပဵၼ်သွင်မုၵ်ႉသွင်ၸိူဝ်းယူႇတီႈၶႃႈဢေႃႈ။- 11ပိူဝ်ႈၼႆလႄႈ တေႃႈလဵဝ်ၼႆႉ ၶျွတ်ႈဢဝ်ၶႃႈၸဝ်ႈ ၵႃႈၼႂ်းမိုဝ်းပီႈဢၢႆႈၶႃႈၸဝ်ႈဢေးသေႃးၼၼ်ႉသေၵမ်းတီႈၶႃႈ၊ ၶႃႈၸဝ်ႈၵူဝ်ႁႄမၼ်းလႄႈ မႆႈၸႂ်လူၺ်ႈလွင်ႈဢၼ်မၼ်းတၵ်းမႃးတိုၵ်းတေႃးယႃႉပႅတ်ႈၶႃႈၸဝ်ႈ ဢိၵ်ႇတင်းမေးတင်းလုၵ်ႈလၢင်းတင်းလၢႆၼၼ်ႉ ၼႃႇလူင်လၢင်တီႈၶႃႈဢေႃႈ။- 12ၸဝ်ႈႁဝ်းလႆႈဝႃႈ၊ ၵဝ်တၵ်းႁဵတ်းၵျေးၸူးတီႈမႂ်းဢမၢၼ်ႇၶၼ်ပဵၼ်လႄႈ ႁႂ်ႈၸိူဝ်ႉၶိူဝ်းမႂ်းပဵၼ်မိူၼ်ၸိူဝ်ႉၼင်ႇ သၢႆးၼမ်ႉသမ်ႇမုၵ်ႉတြႃႇဢၼ်ၼမ်ၼႃႇထၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉဢေႃႈ၊ ဝႃႈၼင်ႇၼႆယဝ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။
13မၼ်းၼၼ်ႉယူႇၵႃႈတီႈၼၼ်ႈၶိုၼ်းၼၼ်ႉသေယဝ်ႉ၊ ပုၼ်ႈဢၼ်တၵ်းသၢၵ်ႈပၼ်လၢၵ်ႈသွင်ႇတီႈပီႈဢၢႆႈမၼ်း ဢေးသေႃးၼၼ်ႉၸိုင်၊ ဢဝ်ဢွၵ်ႇၵႃႈၼႂ်းဢုၵ်ႉၸႃႇဢၼ်မီးတီႈမိုဝ်းမၼ်းၼၼ်ႉ၊- 14ပႄႉမႄႈသွင်ပၢၵ်ႇ၊ ပႄႉပေႃႈသၢဝ်းၼိုင်ႈ၊ သူဝ်းမႄႈသွင်ပၢၵ်ႇ၊ သူဝ်းပေႃႈသၢဝ်းၼိုင်ႈ၊- 15ၵလႃးဢုၵ်ႉတူဝ်မႄႈဢၼ်မိပ်ႇၼမ်ႉၼူမ်းတင်းလုၵ်ႈဢွၼ်ႇၶဝ် ဢၼ်ၵိၼ်ၼူမ်းသၢမ်သိပ်း၊ ဝူဝ်းမႄႈသီႇသိပ်း၊ ဝူဝ်းပေႃႈသိပ်းၼိုင်ႈ၊ လီႈမႄႈသၢဝ်းၼိုင်ႈ တင်းလီႈ ဢွၼ်ႇသိပ်းၼိုင်ႈလႄႈ၊- 16ဝႆႉၶေႃၶေႃၽုင်လႂ်ၽုင်ၼၼ်ႉလႄႈ ဢၢပ်ႈပၼ်ၵႃႈၼႂ်းမိုဝ်းၶႃႈမၼ်းတင်းလၢႆသေယဝ်ႉ၊ သင်ႇလၢတ်ႈတီႈၶႃႈမၼ်းၸိူဝ်းၼၼ်ႉလႄႈဝႃႈ၊ သူၶၢမ်ႈၵႂႃႇဢွၼ်တၢင်းၵဝ်လႄႈ ႁႂ်ႈၶၢဝ်းတၢင်းၽုင်ၼိုင်ႈလႄႈၽုင်ၼိုင်ႈယၢၼ်ၵၼ်တႃႉ၊ ဝႃႈၼင်ႇၼႆဢေႃႈ။- 17မၼ်းသင်ႇလၢတ်ႈတီႈၵေႃႉဢၼ်ၵႂႃႇဢွၼ်တၢင်းပိူၼ်ႈၼၼ်ႉလႄႈဝႃႈ၊ မိူဝ်ႈဢၼ်ပီႈဢၢႆႈၵဝ်ဢေးသေႃးၼၼ်ႉ ထူပ်းႁၼ်မႂ်းလႄႈထၢမ်ဝႃႈ၊ မႂ်းပဵၼ်ၵူၼ်းၽူႈလႂ်။ တၵ်းၵႂႃႇၵႃႈတီႈလႂ်။ တရိၵ်ႈသၢၼ်ႇဢၼ်မီးၵႃႈတီႈၽၢႆႇၼႃႈမႂ်းၸိူဝ်းၼႆႉ ပဵၼ်ဢုၵ်ႉၸႃႇၶွင်ၽူႈလႂ်၊ ဝႃႈၼင်ႇၼႆၸိုင်၊- 18မႂ်းၶိုၼ်းလဝ်ႊလၢတ်ႈလႄႈဝႃႈ၊ ပဵၼ်ဢုၵ်ႉၸႃႇၶွင်ၶႃႈၸဝ်ႈႁဝ်းယႃႇၵုပ်ႈၶႃႈဢေႃႈ။ ဢၼ်ၼႆႉပဵၼ်လၢၵ်ႈသွင်ႇဢၼ်တၵ်းသၢၵ်ႈပၼ် တီႈၸဝ်ႈႁဝ်းဢေးသေႃးၶႃႈဢေႃႈ။ မၼ်းမီးယူႇၵႃႈတီႈၽၢႆႇလင်ပုၼ်ႉၶႃႈဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 19မိူၼ်ၼင်ႇၼႆမၼ်းသမ်ႉသင်ႇလၢတ်ႈတီႈၸႃႉၸဵမ်ၵေႃႉတူႉတီႉယႃႉ၊ ၵေႃႉတႃႉတီႉယႃႉ ဢိၵ်ႇတင်းၶဝ်ၸိူဝ်းဢၼ်ၸွမ်းမုၵ်ႉလႂ်မုၵ်ႉၼၼ်ႉ တင်းသဵင်ႈတင်းလူင်လႄႈဝႃႈ၊ မိူဝ်ႈဢၼ်သူထူပ်းႁၼ်ဢေးသေႃးၸိုင်၊ လဝ်ႊလၢတ်ႈမိူၼ်ၸိူဝ်ႉၼင်ႇၼၼ်တႃႉ။- 20သမ်ႉလဝ်ႊလၢတ်ႈထႅင်ႈလႄႈဝႃႈ၊ ၶႃႈၸဝ်ႈႁဝ်းယႃႇၵုပ်ႈၵေႃႈမီးယူႇၵႃႈတီႈၽၢႆႇလင်ပုၼ်ႉၶႃႈဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ မၼ်းၵျၢမ်ႇၼႂ်းၸႂ်လႄႈဝႃႈ၊ ၵဝ်တၵ်းဢဝ်တင်းလၢၵ်ႈသွင်ႇဢၼ်ဢွၵ်ႇၵႂႃႇဢွၼ်တၢင်းၵဝ်ယူႇၼၼ်ႉ ႁႂ်ႈမၼ်းပေႇၸႂ်ဢေႃႈ။ လိုၼ်းသေၼၼ်ႉ မိူဝ်ႈဢၼ်ၵဝ်ထူပ်းႁၼ်ၼႃႈမၼ်းၼၼ်ႉၸိုင်၊ မၼ်းၸၢင်ႈၶႄးတၵ်းႁပ်ႉတုင်းဢဝ်ၵဝ်ဢေႃႈ၊ ဝႃႈၼင်ႇၼႆဢေႃႈ။- 21ၼင်ႇၼၼ်လႄႈ လၢၵ်ႈသွင်ႇၼၼ်ႉၶၢမ်ႈၵႂႃႇဢွၼ်တၢင်းမၼ်းလႄႈ ၶိုၼ်းၼၼ်ႉတူဝ်မၼ်းၼွၼ်းယူႇၵႃႈတီႈဢၼ်ၵူၼ်းမၼ်း ၸူႉၵၼ်တုမ်ၵၼ်ၼၼ်ႉဢေႃႈ။
ယႃႇၵုပ်ႈၵၼ်ႉၵၼ်တင်းၵူၼ်းတီႈပေႇၺေႇလႃႉ
22ၸူဝ်ႈဢၼ်ၶိုၼ်းၼၼ်ႉဢမ်ႇပႆႇသဵင်ႈၼၼ်ႉၸိုင်၊ မၼ်းလုၵ်ႉလႄႈဢဝ်မေးမၼ်းသွင်ၵေႃႉ၊ တင်းမႄႈယိင်းၶႃႈမၼ်းသွင်ၵေႃႉ၊တင်းလုၵ်ႈၸၢႆးမၼ်းသိပ်းဢဵတ်းၵေႃႉလႄႈ ၶၢမ်ႈၼမ်ႉႁွင်ႈယပ်ႉပုၵ်ႉ တီႈဢၼ်တိုၼ်ႈၼၼ်ႉဢေႃႈ။- 23ၼင်ႇၼၼ်လႄႈ မၼ်းဢဝ်ၶဝ်ၼၼ်ႉ ဢိၵ်ႇတင်းဢုၵ်ႉၸႃႇၶူဝ်းလဵင်းမၼ်း ၵႃႈမီးတင်းသဵင်ႈတင်းလူင် ႁႂ်ႈၶၢမ်ႈၼမ်ႉႁွင်ႈၼၼ်ႉသေယဝ်ႉ၊- 24ယႃႇၵုပ်ႈၵိုတ်းသဝ်းယူႇၵေႃႉလဵဝ်ၵူၺ်းလႄႈ ၵူၼ်းၵေႃႉၼိုင်ႈၵၼ်ႉၵၼ်တင်းမၼ်းတေႃႇထိုင်ႁွတ်ႈမိူင်းထၼ်ႈပေႃးလႅင်းဢေႃႈ။- 25ၵေႃႉၼၼ်ႉႁူႉႁၼ်လွင်ႈဢၼ်တူဝ်ၸဝ်ႈၵဝ်ႇ ဢမ်ႇပႄႉဢမ်ႇၼႅင်ႇၼၼ်ႉသေယဝ်ႉ၊ တိူဝ်ႉသႂ်ႇႁူဝ်လုပ်ႇငဝ်ႈၶႃ ယႃႇၵုပ်ႈလႄႈ ငဝ်ႈၶႃၵုမ်ႇမၼ်းၸုတ်ႈၵႂႃႇၼႂ်းမိူဝ်ႈဢၼ် ယင်းတိုၵ်ႉၵၼ်ႉၵၼ်ယူႇၼၼ်ႉဢေႃႈ။- 26ၵေႃႉၼၼ်ႉလၢတ်ႈလႄႈဝႃႈ၊ ပွႆႇၵဝ်သေၵမ်း။ မိူင်းၸႃႉႁႃလႅင်းမႃးယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလၢတ်ႈလႄႈဝႃႈ၊ ပေႃးဢမ်ႇပၼ်တၢင်းလီတီႈၵဝ်ၶႃႈၸိုင်၊ ၵဝ်ၶႃႈဢမ်ႇပွႆႇၶႃႈၵူၺ်ႉ၊ ဝႃႈၼင်ႇၼႆဢေႃႈ။- 27ၵေႃႉၼၼ်ႉၵေႃႈ ထၢမ်လႄႈဝႃႈ၊ ၸိုဝ်ႈသဵင်မႂ်းၸမ်ႉ၊ ပဵၼ်ၸိုဝ်ႈသဵင်ၵႃႈသင်၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ပဵၼ်ယႃႇၵုပ်ႈၶႃႈဢေႃႈ၊ ဝႃႈၼင်ႇၼႆဢေႃႈ။- 28ၵေႃႉၼၼ်ႉၵေႃႈလၢတ်ႈလႄႈဝႃႈ၊ ၸိုဝ်ႈသဵင်မႂ်းၸိုင်ၵမ်းလိုၼ်းဢမ်ႇလႆႈႁွင်ႉႁဵၵ်ႈဝႃႈယႃႇၵုပ်ႈ။ တၵ်းလႆႈႁွင်ႉႁဵၵ်ႈၸိုဝ်ႈဝႃႈ ဢီႉသရေႇလႃႉဢေႃႈ။ လွင်ႈမၼ်းၸမ်ႉ မႂ်းၼႆႉၶဵင်ႇၵၼ်တင်းၽြႃးပဵၼ်ၸဝ်ႈ ဢိၵ်ႇတင်းၵူၼ်းလႄႈ ပႄႉၼႅင်ႇမိူၼ်ၸိူဝ်ႉၼင်ႇၶုၼ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။- 29ယႃႇၵုပ်ႈၵေႃႈထၢမ်လႄႈဝႃႈ၊ မွၵ်ႇလၢတ်ႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၵဝ်ၶႃႈသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈလၢတ်ႈလႄႈဝႃႈ၊ ႁဵတ်းသင်လႄႈ ထၢမ်ၼႃႇမႃႉၸိုဝ်ႈသဵင်ၵဝ်ၼင်ႇႁိုဝ်။ ဝႃႈၼင်ႇၼႆလႄႈ ပၼ်တၢင်းလီတီႈမၼ်း ၵႃႈတီႈၼၼ်ႈဢေႃႈ။- 30ၵႃႈတီႈၼၼ်ႈၸိုင် ယႃႇၵုပ်ႈႁွင်ႉႁဵၵ်ႈၸိုဝ်ႈပေႇၺေႇလႃႉဢေႃႈ။ လွင်ႈမၼ်းၸမ်ႉ မၼ်းဝႃႈ၊ ပိၵ်ႉသမ်ႉၵဝ်လႆႈႁူပ်ႉထူပ်းတေႃႇၼႃႈ ၵၼ်တင်းၽြႃးပဵၼ်ၸဝ်ႈသေၵေႃႈ၊ ဢသၢၵ်ႈယင်းၵတ်းယဵၼ်ၶျၢမ်းသႃႇယူႇဢေႃႈ၊ ဝႃႈၼင်ႇၼႆဢေႃႈ။- 31မိူဝ်ႈဢၼ်ယႃႇၵုပ်ႈပူၼ်ႉသေၵႃႈတီႈပေႇၺေႇလႃႉၼၼ်ႉ၊ ပဵၼ်ၶိင်ႇဢၼ်ၵၢင်ဝၼ်းဢွၵ်ႇလႄႈ မၼ်းၵေႃႈပႆၶႄႉယႄႉၶႄႉယႄႉ ၵႂႃႇဢေႃႈ။- 32ပိူဝ်ႈဢၼ်မၼ်းၸဝ်ႈတိူဝ်ႉသႂ်ႇဢဵၼ်လူင်ဢၼ်မီးၵႃႈတီႈႁူဝ်လုပ်ႇငဝ်ႈၶႃယႃႇၵုပ်ႈလႄႈ ၵူၼ်းမဵဝ်းဢီႉသရေႇလႃႉတင်းလၢႆ မီးထုင်းၸၢမ်ႇ ဢၼ်ဢမ်ႇၵိၼ်ဢဵၼ်လူင်ဢၼ်မီးၵႃႈတီႈႁူဝ်လုပ်ႇငဝ်ႈၶႃၼၼ်ႉ ႁၢၼ်ႉတေႃႇဝၼ်းမိူဝ်ႈၼႆႉဢေႃႈ။
Currently Selected:
ငဝ်ႈၵမ်ႇၽႃႇ 32: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
