ငဝ်ႈၵမ်ႇၽႃႇ 31
31
ယႃႇၵုပ်ႈဢွၵ်ႇပၢႆႈသေတီႈလႃႇပၢၼ်ႇ
1မိူဝ်ႈၼၼ်ႉယႃႇၵုပ်ႈငိၼ်းလွင်ႈဢၼ်လုၵ်ႈၸၢႆးလႃႇပၢၼ်ႇတင်းလၢႆလၢတ်ႈလႄႈဝႃႈ၊ ယႃႇၵုပ်ႈဢဝ်ဢုၵ်ႉၸႃႇပေႃႈႁဝ်းၵႃႈမီးတင်းသဵင်ႈတင်းလူင်ၼၼ်ႉၵႂႃႇယဝ်ႉလူင်ပႄႇ။ ၵွပ်ႈပိူဝ်ႈဢုၵ်ႉၸႃႇပေႃႈႁဝ်းၼၼ်ႉလႄႈ၊ တီႈမၼ်းပဵၼ်ၸေးၸိမ်ႇဢၼ်ၸိူဝ်ႉၼင်ႇၼႆ ၵႃႈမီးၼၼ်ႉယဝ်ႉ၊ ဝႃႈၼင်ႇၼႆၼၼ်ႉလႄႈ၊- 2မိူဝ်ႈဢၼ်ယႃႇၵုပ်ႈတူၺ်းၼႃႈလႃႇပၢၼ်ႇၼၼ်ႉၸိုင်၊ မၼ်းလႆႈႁူႉႁၼ်လွင်ႈဢၼ်ဢမ်ႇမိူၼ်ၸိူဝ်ႉၼင်ႇမိူဝ်ႈဢွၼ်ၼႆႉၼၼ်ႉလႄႈပိူင်ႈၵႂႃႇၼၼ်ႉဢေႃႈ။
3ထႃႇဝရႃႉၽြႃးလၢတ်ႈတီႈယႃႇၵုပ်ႈလႄႈဝႃႈ၊ ၶိုၼ်းမိူဝ်းၵႂႃႇၸူးၵႃႈတီႈမိူင်းဢၼ်ပူႇပေႃႈမႂ်းယူႇတီႈဢၼ်ၸိူဝ်ႉၶိူဝ်းမႂ်းယူႇပုၼ်ႉတႃႉ။ ၵဝ်တၵ်းမီးယူႇလူၺ်ႈၵၼ်တင်းမႂ်းဢေႃႈ၊ ဝႃႈၼင်ႇၼႆဢေႃႈ။- 4ယႃႇၵုပ်ႈပွႆႇၸႂ်ႉၵူၼ်းၵႂႃႇႁွင်ႉဢဝ်ရႃႇၶေႇလႃႉဢိၵ်ႇတင်းလေႇဢႃႇမႃးၵႃႈတီႈထိူၼ်ႇ တီႈဢၼ်ၽုင်သူဝ်းမၼ်းမီးၼၼ်ႉသေယဝ်ႉ၊- 5လၢတ်ႈတီႈသွင်ၶႃလႄႈဝႃႈ၊ ၵဝ်ႁူႉႁၼ်လွင်ႈဢၼ်ၼႃႈပေႃႈသူ ဢမ်ႇမိူၼ်ၸိူဝ်ႉၼင်ႇမိူဝ်ႈဢွၼ်ၼႆႉၼၼ်ႉတီႈၵဝ်လႄႈ ပိူင်ႈၵႂႃႇ ၼၼ်ႉဢေႃႈ။ ၵူၺ်းၵႃႈ ၽြႃးပဵၼ်ၸဝ်ႈပေႃႈၵဝ် မီးယူႇလူၺ်ႈၵၼ်တင်းၵဝ်ဢေႃႈ။- 6သူႁူႉလွင်ႈဢၼ်ၵဝ်လႆႈပႂ်ႉဢမူႉ ပေႃႈသူၵႃႈၼင်ႇဢၼ်ၵဝ်တၢတ်ႈၼိူင်ႇၼၼ်ႉယူႇဢေႃႈ။- 7ပေႃႈသူၵေႃႈပႅတ်ႉလႅၼ်ၵဝ်လႄႈ ဢဝ်ၵႃႈၶၼ်ဢၼ်ၵဝ်ထုၵ်ႇလႆႈၼၼ်ႉ လႅၵ်ႈပုတ်ႈသိပ်းပွၵ်ႈယဝ်ႉ။ ၵူၺ်းၵႃႈ ၽြႃးပဵၼ်ၸဝ်ႈဢမ်ႇပၼ်ဢၶႂၢင်ႉဢၼ်လႆႈၼိၵ်ႈၸၢၵ်ႈငႅၼ်းသႄးၵဝ်။- 8ပေႃးမၼ်းလၢတ်ႈလႄႈဝႃႈ၊ ႁႂ်ႈတူဝ်ဢၼ်ပဵၼ်လၢဝ်ဝႆႉၸိူဝ်းၼၼ်ႉပဵၼ်ၵႃႈၶၼ်မႂ်းတႃႉ၊ ဝႃႈၼင်ႇၼႆၸိုင်၊ ၽုင်သူဝ်း၊ ၽုင်ပႄႉ ၵႃႈမီးတင်းသဵင်ႈတင်းလူင် ၵိူတ်ႇလဵင်ႉမႃးတူဝ်ဢၼ်ပဵၼ်လၢဝ်ဝႆႉဢေႃႈ။ ပေႃးမၼ်းလၢတ်ႈလႄႈဝႃႈ၊ ႁႂ်ႈတူဝ်ဢၼ်လၢႆးဢၼ်လဵၼ်း ၸိူဝ်းၼၼ်ႉ ပဵၼ်ၵႃႈၶၼ်မႂ်းတႃႉ၊ ဝႃႈၼင်ႇၼႆၸိုင်၊ ၽုင်သူဝ်း၊ ၽုင်ပႄႉ ၵႃႈမီးတင်းသဵင်ႈတင်းလူင် ၵိူတ်ႇလဵင်ႉမႃးတူဝ်ဢၼ်လၢႆး ဢၼ်လဵၼ်းဢေႃႈ။- 9ၼင်ႇၼၼ်လႄႈ ၽြႃးပဵၼ်ၸဝ်ႈၼုၵ်ႈဢဝ်တရိၵ်ႈသၢၼ်ႇပေႃႈသူသေလႄႈပၼ်တီႈၵဝ်ယဝ်ႉ။- 10မိူဝ်ႈဢၼ်တရိၵ်ႈသၢၼ်ႇၸိူဝ်းၼၼ်ႉဝၢင်ၵၼ်ၼၼ်ႉၸိုင်၊ ၵဝ်လႆႈမုင်ႈတူၺ်းလႄႈႁၼ်လွင်ႈဢၼ်တူဝ်ပေႃႈတင်းလၢႆဢၼ်ၸွမ်းၽွၵ်ႇတူဝ်မႄႈၸိူဝ်းၼၼ်ႉ မီးၵွင်ႉငဝ်းဢၼ်လၢႆးဢၼ်လဵၼ်း၊ ဢၼ်ပဵၼ်လၢဝ်ဝႆႉ၊ ဢၼ်ပဵၼ်ၸုမ်ႈဝႆႉၼၼ်ႉၼႂ်းတၢင်းဢၼ် ၼွၼ်းၽၼ်ႁၼ်ဢေႃႈ။- 11တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၵေႃႈ ႁွင်ႉၵဝ်ၼႂ်းတၢင်းဢၼ်ၼွၼ်းၽၼ်ႁၼ်ၼၼ်ႉလႄႈဝႃႈ၊ ယႃႇၵုပ်ႈဢိူၺ်း၊ ဝႃႈၼင်ႇၼႆသေယဝ်ႉ၊ ၵဝ်ဢိူဝ်လႄႈဝႃႈ၊ ၶႃႈၸဝ်ႈမီးယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 12မၼ်းၸဝ်ႈၵေႃႈလၢတ်ႈလႄႈဝႃႈ၊ မုင်ႈလႄႈတူၺ်းတႃႉ။ တူဝ်ပေႃႈတင်းလၢႆဢၼ်ၸွမ်းၽွၵ်ႇတူဝ်မႄႈၸိူဝ်းၼၼ်ႉ ၵႃႈမီးတင်းသဵင်ႈတင်းလူင် မီးၵွင်ႉငဝ်းဢၼ်လၢႆးဢၼ်လဵၼ်း၊ ဢၼ်ပဵၼ်လၢဝ်ဝႆႉ၊ ဢၼ်ပဵၼ်ၸုမ်ႈဝႆႉဢေႃႈ။ လွင်ႈမၼ်းၸမ်ႉ ၵဝ်ႁၼ်ၵႃႈဢၼ် လႃႇပၢၼ်ႇႁဵတ်းတီႈမႂ်းၼၼ်ႉယဝ်ႉ။- 13ၵဝ်ၸမ်ႉ၊ ပဵၼ်ၽြႃးတီႈပေႇသလႃႉ၊ တီႈဢၼ်မႂ်းဢဝ်ၼမ်ႉမၼ်းထွၵ်ႇသႂ်ႇၵႃႈၼိူဝ်သဝ်တီႈမၢတ်ႈတီႈတွင်းလႄႈ ႁဵတ်းသဵတ်ႈၸႃႇ ၵတီႉၼၼ်ႉဢေႃႈ။ တေႃႈလဵဝ်ၼႆႉ လုၵ်ႉလႄႈ ဢွၵ်ႇသေၵႃႈၼႂ်းမိူင်းၼႆႉ ၶိုၼ်းမိူဝ်းၵႂႃႇၸူးၵႃႈတီႈမိူင်းဢၼ်ၸိူဝ်ႉၶိူဝ်းမႂ်းယူႇပုၼ်ႉတႃႉ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။
14 ရႃႇၶေႇလႃႉတင်းလေႇဢႃႇၶိုၼ်းလၢတ်ႈလႄႈဝႃႈ၊ ႁဝ်းၶႃႈၼႆႉ ၸၢပ်ႈသႅင်ႇၵၼ်တင်း ႁိူၼ်းပေႃႈႁဝ်းၶႃႈၼၼ်ႉ ၸိူဝ်ႉၼင်ႇႁိုဝ်ၶႃႈ။ ႁဝ်းၶႃႈၼႆႉတၵ်းလႆႈၶၢမ်ႇဢမူၺ်ႇၵႃႈသင်လူးၵွၼ်ႇၶႃႈ။- 15မၼ်းၼၼ်ႉၸၢင်ႈမၢတ်ႈႁဝ်းၶႃႈပဵၼ်ၸိူဝ်ႉၼင်ႇၵူၼ်းတၢင်ႇသိုင်ႇတၢင်ႇမိူင်းဢမ်ႇၸႂ်ႈၶႃႈႁိုဝ်။ မၼ်းၶၢႆႁဝ်းၶႃႈပႅတ်ႈယဝ်ႉလူင်ပႄႇ။ ငိုၼ်းႁဝ်းၶႃႈၵေႃႈ မၼ်းၵိၼ်ပႅတ်ႈသဵင်ႈယဝ်ႉလူင်ပႄႇ။- 16ၸေးၸိမ်ႇၵႃႈဢၼ်ၽြႃးပဵၼ်ၸဝ်ႈၼုၵ်ႈဢွၵ်ႇသေၵႃႈတီႈပေႃႈႁဝ်းၶႃႈ တင်းသဵင်ႈတင်းလူင်ၼၼ်ႉ ပဵၼ်ဢုၵ်ႉၸႃႇႁဝ်းၶႃႈ တင်းလုၵ်ႈလၢင်းႁဝ်းၶႃႈၶႃႈဢေႃႈ။ ပိူဝ်ႈၼႆလႄႈ တေႃႈလဵဝ်ၼႆႉႁဵတ်းၸွမ်း ၵႃႈၼင်ႇဢၼ်ၽြႃးပဵၼ်ၸဝ်ႈ သင်ႇလၢတ်ႈဝႆႉတီႈၸဝ်ႈၼၼ်ႉ သေၵမ်းၶႃႈ၊ ဝႃႈၼင်ႇၼႆဢေႃႈ။
17မိူဝ်ႈၼၼ်ႉယႃႇၵုပ်ႈလုၵ်ႉလႄႈဢဝ်လုၵ်ႈလၢင်းမၼ်းဢိၵ်ႇတင်းမေးမၼ်းၸိူဝ်းၼၼ်ႉ ႁႂ်ႈၶီႇၵႃႈၼိူဝ်ၵလႃးဢုၵ်ႉဢေႃႈ။- 18မၼ်းဢဝ်တင်းဢုၵ်ႉၸႃႇၵႃႈဢၼ်မၼ်းမီးတင်းသဵင်ႈတင်းလူင် ဢိၵ်ႇတင်း တရိၵ်ႈသၢၼ်ႇ ၵႃႈဢၼ်မၼ်းမီး တင်းသဵင်ႈတင်းလူင် ဢၼ်ဝႃႈ တရိၵ်ႈသၢၼ်ႇဢၼ်မၼ်းလႆႈဢၼ်မၼ်းဢဝ် ၸူႉဝႆႉသိမ်းဝႆႉၵႃႈတီႈပႃႇတၼ်ႇဢႃႇရမ်ႇၼၼ်ႉလႄႈ ဢွၵ်ႇၵႂႃႇ ႁႂ်ႈလႆႈမိူဝ်းႁွတ်ႈမိူဝ်းထိုင်ၵႃႈတီႈပေႃႈမၼ်း ဢီႉၸၢၵ်ႈ၊ ၵႃႈတီႈမိူင်းၶႃႇၼၢၼ်ႇၼၼ်ႉဢေႃႈ။- 19ၼႂ်းမိူဝ်ႈဢၼ်လႃႇပၢၼ်ႇၵႂႃႇတၢင်ႇတီႈတၢင်ႇလႅၼ် ႁႂ်ႈလႆႈၵႅတ်းႁႆးၶူၼ်သူဝ်းယူႇၼၼ်ႉၸိုင်၊ ရႃႇၶေႇလႃႉလၵ်ႉဢဝ် ရုၵ်ႈထူႉတေႇရၽိမ်ႇပေႃႈမၼ်းၼၼ်ႉၵႂႃႇဢေႃႈ။
20 ယႃႇၵုပ်ႈၼၼ်ႉယင်းဢမ်ႇမွၵ်ႇဢမ်ႇလၢတ်ႈလွင်ႈဢၼ်မၼ်းတၵ်းပၢႆႈၵႂႃႇၼၼ်ႉလႄႈႁဵတ်းတင်းပရီႉယႄႇသေလႄႈ ပႄႉၼႅင်ႇ လႃႇပၢၼ်ႇဢၼ်ပဵၼ်ၵူၼ်းသူႉရီႉၼၼ်ႉဢေႃႈ။- 21ၼင်ႇၼၼ်လႄႈမၼ်းပႃးဢဝ်ၵႃႈဢၼ်မၼ်းမီးတင်းသဵင်ႈတင်းလူင် ဢွၵ်ႇပၢႆႈလႄႈၶၢမ်ႈၼမ်ႉႁွင်ႈၶၼ်ၶၼ်ၽႂ်းၽႂ်းသေယဝ်ႉ၊ ဝၢႆႇၼႃႈ တေႃႇလွႆၵီႉလတ်ႉသေလႄႈ ၵႂႃႇဢေႃႈ။
လႃႇပၢၼ်ႇလမ်းၸွမ်းယႃႇၵုပ်ႈ
22မိူဝ်ႈဢၼ်လႆႈသၢမ်ဝၼ်းယဝ်ႉၸိုင်၊ လႃႇပၢၼ်ႇငိၼ်းပိူၼ်ႈလၢတ်ႈလွင်ႈဢၼ် ယႃႇၵုပ်ႈပၢႆႈၵႂႃႇၼၼ်ႉသေယဝ်ႉ၊- 23ႁွင်ႉဢဝ်ပီႈၼွင်ႉမၼ်းတင်းလၢႆ လိုပ်ႈၸွမ်းၵႂႃႇ ၶၢဝ်းတၢင်းၸဵတ်းဝၼ်းလႄႈ ၶိုတ်းၵႃႈၼိူဝ်လွႆၵီႉလတ်ႉဢေႃႈ။- 24ၽြႃးပဵၼ်ၸဝ်ႈပေႃႇမႃးတီႈလႃႇပၢၼ်ႇၵူၼ်းသူႉရီႉၼၼ်ႉ ၼႂ်းတၢင်းဢၼ်ၼွၼ်းၽၼ်ႁၼ်ၶိင်ႇၵၢင်ၶိုၼ်းလႄႈဝႃႈ၊ ႁဵတ်းသတီႉ လွင်ႈဢၼ် မႂ်းတၵ်းလၢတ်ႈဢၼ်လီ ဢၼ်ဢမ်ႇလီတီႈယႃႇၵုပ်ႈၼၼ်ႉတႃႉ၊ ဝႃႈၼင်ႇၼႆဢေႃႈ။
25မိူဝ်ႈဢၼ်လႃႇပၢၼ်ႇၸွမ်းၶိုတ်းယႃႇၵုပ်ႈယဝ်ႉၼၼ်ႉၸိုင် ယႃႇၵုပ်ႈလႆႈမုင်းမူဝ်းၵႃႇမၼ်း ၵႃႈၼိူဝ်လွႆၼၼ်ႉဢေႃႈ။ လႃႇပၢၼ်ႇဢိၵ်ႇတင်းပီႈၼွင်ႉမၼ်းတင်းလၢႆၵေႃႈ ဢွၼ်ၵၼ်မုင်းမူဝ်းၵႃႇၶဝ် ၵႃႈၼိူဝ်လွႆၵီႉလတ်ႉၼၼ်ႉဢေႃႈ။- 26လႃႇပၢၼ်ႇလၢတ်ႈတီႈယႃႇၵုပ်ႈလႄႈဝႃႈ၊ မႂ်းႁဵတ်းၸိူဝ်ႉၼင်ႇႁိုဝ်။ မႂ်းပႅတ်ႉလႅၼ်ၵဝ်လႄႈသိမ်းဢဝ်လုၵ်ႈယိင်းၵဝ်တင်းလၢႆၵႂႃႇမိူၼ်ၸိူဝ်ႉၼင်ႇဢၼ်သိမ်းဢဝ်ၶဝ်ၸိူဝ်းဢၼ်တီႉလႆႈၼႂ်းတၢင်းဢၼ်တိုၵ်းသိုၵ်းၼၼ်ႉၵႂႃႇၼၼ်ႉလူင်ပႄႇ။- 27ႁဵတ်းသင်လႄႈပႅတ်ႉလႅၼ်ၵဝ်သေလႄႈ တဵတ်ႇတဵတ်ႇဢွၵ်ႇပၢႆႈၼင်ႇႁိုဝ်။ ႁဵတ်းသင်လႄႈဢမ်ႇမွၵ်ႇဢမ်ႇလၢတ်ႈတီႈၵဝ် ႁႂ်ႈၵဝ် လႆႈႁဵတ်းတၢင်းဢၼ်မူၼ်ႈပျေႃႇ၊ တၢင်းဢၼ်ႁဵတ်းၵႂၢမ်း၊ တၢင်းဢၼ်ႁႆႇၵွင်လဵတ်းတိင်ႇသေလႄႈ ပွႆႇမႂ်းၵႂႃႇၼင်ႇႁိုဝ်။- 28ႁဵတ်းသင်လႄႈဢမ်ႇပၼ်ဢၶႂၢင်ႉ ႁႂ်ႈၵဝ်လႆႈၼူမ်လုၵ်ႈၸၢႆးတင်းလုၵ်ႈယိင်းၵဝ်ၸိူဝ်းၼႆႉၼင်ႇႁိုဝ်။ မႂ်းလႆႈႁဵတ်းတၢင်းဢၼ်မိူၵ်ႈယဝ်ႉလူင်ပႄႇ။- 29မိူဝ်ႈလဵဝ်ၼႆႉ ၵဝ်ၼိၵ်ႈၸၢၵ်ႈငႅၼ်းသႄးမႂ်းလႆႈယူႇဢေႃႈ။ ၼႂ်းဝႃႈၼၼ်သေၵေႃႈ မိူဝ်ႈၶမ်ႈဝႃး၊ ၽြႃးပဵၼ်ၸဝ်ႈဢၼ်ပေႃႈမႂ်းၵူဝ်းၵႂၢႆႇၼၼ်ႉလၢတ်ႈတီႈၵဝ်လႄႈဝႃႈ၊ ႁဵတ်းသတီႉလွင်ႈဢၼ်မႂ်းတၵ်းလၢတ်ႈ ဢၼ်လီဢၼ်ဢမ်ႇလီတီႈယႃႇၵုပ်ႈၼၼ်ႉတႃႉ၊ ဝႃႈၼင်ႇၼႆဢေႃႈ။- 30တေႃႈလဵဝ်ၼႆႉ ပိူဝ်ႈဢၼ်မႂ်းၸႂ်ထိုင်ႁိူၼ်းပေႃႈမႂ်းၼႃႇလူင်လၢင်လႄႈ မႂ်းလႆႈၵႂႃႇယဝ်ႉ၊ ႁႂ်ႈၸႂ်ႈသေလူးၵွၼ်ႇတႃႉ။ ၵူၺ်းၵႃႈ ႁဵတ်းသင်လႄႈ မႂ်းလၵ်ႉဢဝ်ၽြႃးၵဝ်ၸိူဝ်းၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 31ယႃႇၵုပ်ႈၵေႃႈၶိုၼ်းလၢတ်ႈတီႈလႃႇပၢၼ်ႇလႄႈဝႃႈ၊ ပိူဝ်ႈဢၼ်ၵူဝ်ၸဝ်ႈ ၸၢင်ႈၶႄးတၵ်းႁဵတ်းပႄႉႁဵတ်းၼႅင်ႇသေလႄႈ ၶိုၼ်းသိမ်းဢဝ် လုၵ်ႈယိင်းၸဝ်ႈၸိူဝ်းၼၼ်ႉလႄႈ၊ ၸင်ႇလႆႈဢွၵ်ႇပၢႆႈၶႃႈဢေႃႈ။- 32ၽြႃးၸဝ်ႈၸိူဝ်းၼၼ်ႉၸမ်ႉ၊ ပေႃးထူပ်းႁၼ်တီႈသေၵေႃႉသေၵူၼ်းၸိုင်၊ ႁႂ်ႈၵေႃႉၼၼ်ႉတၢႆတႃႉ။ ၼႄပျႃးဢုၵ်ႉၸႃႇၸဝ်ႈ ၵႃႈတီႈၽၢႆႇၼႃႈပီႈၼွင်ႉႁဝ်းတင်းလၢႆၼႆႉသေလႄႈ ၶိုၼ်းဢဝ်သေၵမ်းတႃႉ၊ ဝႃႈၼင်ႇၼႆဢေႃႈ။ လွင်ႈဢၼ်ရႃႇၶေႇလႃႉ လႆႈလၵ်ႉဢဝ်ၼၼ်ႉၸိုင်ယႃႇၵုပ်ႈဢမ်ႇႁူႉ။- 33ပိၵ်ႉသမ်ႉလႃႇပၢၼ်ႇၶဝ်ႈလႄႈ ႁႃၵႃႈၼႂ်းမူဝ်းၵႃႇယႃႇၵုပ်ႈ၊ မူဝ်းၵႃႇလေႇဢႃႇ၊ တင်းမူဝ်းၵႃႇမႄႈယိင်းၶႃႈသွင်ၵေႃႉၼၼ်ႉသေၵေႃႈ၊ မၼ်းဢမ်ႇထူပ်းဢမ်ႇႁၼ်။ မၼ်းၸင်ႇဢွၵ်ႇသေၵႃႈၼႂ်းမူဝ်းၵႃႇလေႇဢႃႇလႄႈ ၶဝ်ႈၵႃႈၼႂ်းမူဝ်းၵႃႇရႃႇၶေႇလႃႉဢေႃႈ။- 34ရႃႇၶေႇလႃႉဢဝ်ရုၵ်ႈထူႉတေႇရၽိမ်ႇၸိူဝ်းၼၼ်ႉ သႂ်ႇဝႆႉၵႃႈၼႂ်းၶိူင်ႈၵွပ်း ၵလႃးဢုၵ်ႉသေယဝ်ႉ၊ ၼင်ႈတဵင်ယူႇၵႃႈၼိူဝ်ၶိူင်ႈၼၼ်ႉဢေႃႈ။ လႃႇပၢၼ်ႇလုပ်ႈၵမ်းတူၺ်းမူဝ်းၵႃႇမၼ်း တင်းသဵင်ႈတင်းမူတ်းလႄႈ ဢမ်ႇထူပ်းဢမ်ႇႁၼ်သေယဝ်ႉ၊- 35မၼ်းလၢတ်ႈတီႈပေႃႈမၼ်းလႄႈဝႃႈ၊ ၵွပ်ႈပိူဝ်ႈဢၼ်ၵဝ်ၶႃႈ ဢမ်ႇလုၵ်ႉၵႃႈတီႈၽၢႆႇၼႃႈၸဝ်ႈလႆႈလႄႈ ယႃႇပေမီးၸႂ်သေၵမ်းၶႃႈ။ ၵဝ်ၶႃႈပဵၼ်ၸိူဝ်ႉၼင်ႇထုင်းၸၢမ်ႇဢၼ် ယၢမ်ႈပဵၼ်တီႈၽူႈယိင်းၼၼ်ႉယူႇၶႃႈဢေႃႈ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈလႃႇပၢၼ်ႇ ႁႃလႄႈ ဢမ်ႇထူပ်းဢမ်ႇႁၼ် ရုၵ်ႈထူႉတေႇရၽိမ်ႇၸိူဝ်းၼၼ်ႉ။
36မိူဝ်ႈၼၼ်ႉယႃႇၵုပ်ႈၸႂ်မႆႈၶႆႈၸႃႉလႄႈ သင်ႇသွၼ်လႃႇပၢၼ်ႇဢေႃႈ။ ယႃႇၵုပ်ႈလၢတ်ႈတီႈလႃႇပၢၼ်ႇလႄႈဝႃႈၸမ်ႉ၊ ၼင်ႇႁိုဝ် တၵ်းလႆႈလိုပ်ႈၸွမ်းၵဝ်ၶႃႈထၢၼ်ႇၼႆႉၸိုင်၊ ၵဝ်ၶႃႈၽိတ်းပိူင်ႈၸိူဝ်ႉၼင်ႇႁိုဝ်လႄႈ မီးဢပႅတ်ႈဢၼ်လႂ်ၶႃႈ။- 37ၸဝ်ႈလႆႈလုပ်ႈလႆႈၵမ်းတူၺ်းဢုၵ်ႉၸႃႇၶူဝ်းလဵင်းၵဝ်ၶႃႈၵႃႈမီးတင်းသဵင်ႈတင်းလူင်ၼၼ်ႉလႄႈ ထူပ်းမႅၼ်ႈဢုၵ်ႉၸႃႇၶူဝ်းႁိူၼ်း ၶူဝ်းယေးၸဝ်ႈသေၸိူဝ်ႉသေပိူင်ၶႃႈႁိုဝ်။ ပေႃးထူပ်းယဝ်ႉၸိုင်၊ ဢဝ်ဝႆႉၵႃႈတီႈၽၢႆႇၼႃႈပီႈၼွင်ႉၸဝ်ႈဢိၵ်ႇတင်း ပီႈၼွင်ႉၵဝ်ၶႃႈၸိူဝ်းၼႆႉ ၵႃႈတီႈၼႆႈသေၵမ်းၶႃႈ။ ႁႂ်ႈၶဝ်ၸီႇယၢင်ႇဝူင်ႈၵၢင်ႁႃးသွင်ၵေႃႉသေၵမ်းၶႃႈတႃႉ။- 38ၵဝ်ၶႃႈယူႇလူၺ်ႈၵၼ်တင်းၸဝ်ႈ သၢဝ်းပီႊယဝ်ႉလႄႈ သူဝ်းမႄႈပႄႉမႄႈၸဝ်ႈဢၼ်ႁွမ်းၸိူဝ်းၼၼ်ႉ ဢမ်ႇလူႉဢမ်ႇယွတ်ႇ။ ပႄႉပေႃႈသူဝ်းပေႃႈၸဝ်ႈၵေႃႈၵဝ်ၶႃႈဢမ်ႇၵိၼ်။- 39တူဝ်ဢၼ်တူဝ်ထိူၼ်ႇၶူပ်းတၢႆၼၼ်ႉၵေႃႈ ၵဝ်ၶႃႈဢမ်ႇဢဝ်မႃးၸူးၵႃႈတီႈၸဝ်ႈ။ တူဝ်ၵဝ်ၶႃႈလႆႈၶၢမ်ႇတၢင်းဢၼ်သုမ်းၶႃႈဢေႃႈ။ ပိူၼ်ႈလၵ်ႉၶိင်ႇၵၢင်ဝၼ်းသေဢမ်ႇဝႃႈ၊ လၵ်ႉၶိင်ႇၵၢင်ၶိုၼ်းသေဢမ်ႇဝႃႈ၊ ၸဝ်ႈၸၢင်ႈယွၼ်းဢဝ်ဢၼ်တၢင်တူဝ်မၼ်းတီႈၵဝ်ၶႃႈ ၶႃႈဢေႃႈ။- 40ၼင်ႇၼၼ်လႄႈ ၵဝ်ၶႃႈလႆႈၶၢမ်ႇတၢင်းဢၼ်မႆႈ ဢၼ်ႁွၼ်ႉၶိင်ႇၵၢင်ဝၼ်း၊ တၢင်းဢၼ်ၵတ်းဢၼ်ၼၢဝ်ၶိင်ႇၵၢင်ၶိုၼ်းမႃးယဝ်ႉ။ တၢင်းဢၼ် တႃၼွၼ်းလူႉၵေႃႈ လႆႈၶၢမ်ႇမႃးယဝ်ႉ။- 41ၵဝ်ၶႃႈယူႇၵႃႈတီႈႁိူၼ်းၸဝ်ႈသၢဝ်းပီႊလႄႈ လႆႈၶၢမ်ႇတၢင်းၸႂ်ႉတၢင်းသွႆပုၼ်ႈလုၵ်ႈယိင်းၸဝ်ႈသွင်ၵေႃႉၼၼ်ႉသိပ်းသီႇပီႊ၊ ပုၼ်ႈသူဝ်းပႄႉၸဝ်ႈၸိူဝ်းၼၼ်ႉ ႁူၵ်းပီႊမႃးယဝ်ႉ။ ၵူၺ်းၵႃႈ ၵႃႈၶၼ်ဢၼ်ၵဝ်ၶႃႈ ထုၵ်ႇလႆႈၸိုင်၊ ၸဝ်ႈဢဝ်လႅၵ်ႈပုတ်ႈသိပ်းပွၵ်ႈယဝ်ႉ ၶႃႈယဝ်ႉလူင်ပႄႇ။- 42တေႃႈလဵဝ်ၼႆႉၵေႃႈ၊ သင်ၽြႃးပဵၼ်ၸဝ်ႈပေႃႈၵဝ်ၶႃႈ၊ ၽြႃးပဵၼ်ၸဝ်ႈဢႃႇပြႃႇႁၢမ်ႇ၊ ၽြႃးဢၼ်ပဵၼ်တီႈဢၼ် ဢီႉၸၢၵ်ႈ ၵူဝ်ယမ်ၼၼ်ႉ ဢမ်ႇမီးယူႇလူၺ်ႈၵၼ်တင်းၵဝ်ၶႃႈၸိုင်၊ ၸဝ်ႈတၵ်းပွႆႇၵဝ်ၶႃႈမိူဝ်းၵႂႃႇ တိၼ်လၢႆမိုဝ်းပဝ်ႇဢမၢၼ်ႇၶၼ်ပဵၼ်လူင်ပႄႇ။ ၽြႃးပဵၼ်ၸဝ်ႈႁၼ်တၢင်းဢၼ်ၵဝ်ၶႃႈလႆႈၶၢမ်ႇ တုၵ်ႉၶႃႉတၢင်းၽၢၼ်၊ တၢင်းဢၼ်သၢင်ႈႁဵတ်းဢၼ်ယၢပ်ႇဢၼ်ၽိုတ်ႇၼၼ်ႉလႄႈ သင်ႇသွၼ်သုင်းမႃႉပၼ်တီႈၸဝ်ႈ မိူဝ်ႈၶမ်ႈဝႃးၼၼ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။
ယႃႇၵုပ်ႈတင်းလႃႇပၢၼ်ႇဝႆႉၵတီႉတီႈၵၼ်
43 လႃႇပၢၼ်ႇၵေႃႈ ၶိုၼ်းလၢတ်ႈတီႈယႃႇၵုပ်ႈလႄႈဝႃႈ၊ လုၵ်ႈယိင်းၸိူဝ်းၼႆႉပဵၼ်လုၵ်ႈယိင်းၵဝ်ဢေႃႈ။ လုၵ်ႈဢွၼ်ႇၸိူဝ်းၼႆႉ ပဵၼ်လုၵ်ႈဢွၼ်ႇၵဝ်ဢေႃႈ။ တရိၵ်ႈသၢၼ်ႇၸိူဝ်းၼႆႉၵေႃႈ ပဵၼ်တရိၵ်ႈသၢၼ်ႇၵဝ်ဢေႃႈ။ ဢုၵ်ႉၸႃႇၶူဝ်းလဵင်းၵႃႈဢၼ်မႂ်းႁၼ်ၸိူဝ်းၼႆႉ ပဵၼ်ဢုၵ်ႉၸႃႇၶူဝ်းလဵင်းၵဝ်ဢေႃႈ။ ဝၼ်းမိူဝ်ႈၼႆႉ ၵဝ်တၵ်းႁဵတ်းတီႈလုၵ်ႈယိင်းၵဝ်ၸိူဝ်းၼႆႉ၊ တီႈလုၵ်ႈဢွၼ်ႇၵဝ် ဢၼ်ၶဝ်ၵိူတ်ႇလဵင်ႉမႃးၸိူဝ်းၼႆႉ ၸိူဝ်ႉၼင်ႇႁိုဝ်လႆႈ။- 44ပိူဝ်ႈၼႆလႄႈ တေႃႈလဵဝ်ၼႆႉ မႂ်းတင်းၵဝ်ႁဵတ်းပတီႉၺိၺ်ႇလူၺ်ႈၵၼ်တႃႉႁႃး။ ႁႂ်ႈပဵၼ်သၢၵ်ႈသေႇ ဝူင်ႈၵၢင် မႂ်းတင်းၵဝ်ဝႆႉတႃႉႁႃး၊ ဝႃႈၼင်ႇၼႆဢေႃႈ။- 45ယႃႇၵုပ်ႈၵေႃႈဢဝ်မၢၵ်ႇႁိၼ်သေလႄႈ ပူၵ်းတင်ႈဝႆႉပုၼ်ႈသဝ်တီႈမၢတ်ႈတီႈတွင်းသေယဝ်ႉ၊- 46လၢတ်ႈတီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊ ဢွၼ်ၵၼ်ၵဵပ်းမၢၵ်ႇႁိၼ်ဝႆႉသေၵမ်း၊ ဝႃႈၼင်ႇၼႆလႄႈ၊ ၶဝ်ဢွၼ်ၵၼ်ဢဝ် မၢၵ်ႇႁိၼ်လႄႈ မႄးႁဵတ်းၵွင်မၢၵ်ႇႁိၼ်ဝႆႉသေယဝ်ႉ၊ ႁဵတ်းတၢင်းဢၼ်ၵိၼ်ဢၼ်ၶူပ်း ၵႃႈၼိူဝ်ၵွင်မၢၵ်ႇႁိၼ်ၼၼ်ႉဢေႃႈ။- 47ၵွင်မၢၵ်ႇႁိၼ်ၼၼ်ႉၸိုင်၊ လႃႇပၢၼ်ႇႁွင်ႉႁဵၵ်ႈၸိုဝ်ႈ ယေႇၵႃႇသႁႃႇတူႉသႃႉဢေႃႈ။ ယႃႇၵုပ်ႈၵေႃႈႁွင်ႉႁဵၵ်ႈၸိုဝ်ႈ ၵီႉလတ်ႉဢေႃႈ။
48 လႃႇပၢၼ်ႇလၢတ်ႈလႄႈဝႃႈ၊ ဝၼ်းမိူဝ်ႈၼႆႉ ၵွင်မၢၵ်ႇႁိၼ်ၼႆႉပဵၼ်သၢၵ်ႈသေႇဝူင်ႈၵၢင် ၵဝ်တင်းမႂ်းဢေႃႈ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ႁွင်ႉႁဵၵ်ႈၸိုဝ်ႈၵီႉလတ်ႉဢေႃႈ။- 49မီႉၸပႃႇ ဝႃႈၼႆၵေႃႈယင်းႁွင်ႉႁဵၵ်ႈၸိုဝ်ႈလူးၵွၼ်ႇဢေႃႈ။ လွင်ႈမၼ်းၸမ်ႉ လႃႇပၢၼ်ႇလၢတ်ႈလႄႈဝႃႈ၊ ဝၢႆးသေႁဝ်းၵေႃႉၼိုင်ႈလႄႈၵေႃႉၼိုင်ႈ ၽၢတ်ႇၵၼ်ယၢၼ်ၵၼ်ၵႂႃႇယဝ်ႉၼၼ်ႉ၊ ႁႂ်ႈထႃႇဝရႃႉၽြႃးပႂ်ႉဝူင်ႈၵၢင်ၵဝ်တင်းမႂ်းသေၵမ်းလူၺ်ႈ။- 50ပေႃးမႂ်းၼိၵ်ႈၸၢၵ်ႈငႅၼ်းသႄးလုၵ်ႈယိင်းၵဝ်ၸိူဝ်းၼႆႉ၊ လိူဝ်သေ လုၵ်ႈယိင်းၵဝ်ၸိူဝ်းၼႆႉ ပေႃးမႂ်းသိမ်းဢဝ်မႄႈယိင်း တၢင်ႇၵေႃႉထႅင်ႈၸိုင်၊ ၵႃႈတီႈႁႃးဢမ်ႇမီးသၢၵ်ႈသေႇၵူၼ်း။ ႁႂ်ႈၽြႃးပဵၼ်ၸဝ်ႈပဵၼ်သၢၵ်ႈသေႇဝူင်ႈၵၢင်ၵဝ်တင်းမႂ်းသေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊- 51လႃႇပၢၼ်ႇသမ်ႉလၢတ်ႈတီႈယႃႇၵုပ်ႈထႅင်ႈလႄႈဝႃႈ၊ တူၺ်းၵွင်မၢၵ်ႇႁိၼ်ၼႆႉ ဢိၵ်ႇတင်းသဝ်တီႈမၢတ်ႈတီႈတွင်းၼႆႉ ဢၼ်ၵဝ်မႄးႁဵတ်းဝႆႉဝူင်ႈၵၢင်ၵဝ်တင်းမႂ်းၼႆႉသေၵမ်း။- 52ႁႂ်ႈၵွင်မၢၵ်ႇႁိၼ်ၼႆႉ ဢိၵ်ႇတင်းသဝ် တီႈမၢတ်ႈတီႈတွင်းၼႆႉ ပဵၼ်သၢၵ်ႈသေႇလွင်ႈဢၼ် ၵဝ်ဢမ်ႇလႆႈၶၢမ်ႈပူၼ်ႉ ၵွင်မၢၵ်ႇႁိၼ်ၼႆႉ ဢိၵ်ႇတင်းသဝ်တီႈမၢတ်ႈတီႈတွင်းၼႆႉ ႁႂ်ႈလႆႈႁဵတ်းတၢင်းၽိတ်းသႂ်ႇတီႈမႂ်း။ မႂ်းၵေႃႈဢမ်ႇလႆႈၶၢမ်ႈပူၼ်ႉ ၵွင်မၢၵ်ႇႁိၼ်ၼႆႉ ဢိၵ်ႇတင်းသဝ် တီႈမၢတ်ႈတီႈတွင်းၼႆႉ ႁႂ်ႈလႆႈႁဵတ်းတၢင်းၽိတ်းသႂ်ႇတီႈၵဝ်ၼၼ်ႉ သေၵမ်းလူၺ်ႈ။- 53ႁႂ်ႈၽြႃးပဵၼ်ၸဝ်ႈဢႃႇပြႃႇႁၢမ်ႇ၊ ၽြႃးပဵၼ်ၸဝ်ႈၼႃႇၶေႃႇ၊ ၽြႃးပဵၼ်ၸဝ်ႈပေႃႈၶဝ်ၼၼ်ႉ ၸီႇယၢင်ႇဝူင်ႈၵၢင်ႁႃးသေၵမ်းလူၺ်ႈ၊ ဝႃႈၼင်ႇၼႆဢေႃႈ။ ယႃႇၵုပ်ႈၵေႃႈႁဵတ်းတၢင်းဢၼ်တိူင်ႇၽြႃးဢၼ်ပဵၼ်တီႈဢၼ်ပေႃႈမၼ်းဢီႉၸၢၵ်ႈၵူဝ်ယမ်ၼၼ်ႉဢေႃႈ။- 54မိူဝ်ႈၼၼ်ႉ ယႃႇၵုပ်ႈပုၵ်ႈၸေႃႇယိတ်ႈ ၵႃႈၼိူဝ်လွႆၼၼ်ႉလႄႈ ႁွင်ႉပၢင်းဢဝ် ပီႈၼွင်ႉမၼ်းတင်းလၢႆ ႁႂ်ႈလႆႈၵိၼ်လႆႈၶူပ်းၶဝ်ႈမုၼ်းဢေႃႈ။ ၶဝ်ၼၼ်ႉၵေႃႈ ဢွၼ်ၵၼ်ၵိၼ်ၶူပ်းၶဝ်ႈမုၼ်းလႄႈ ႁႂ်ႈပူၼ်ႉသေၶိုၼ်းၼၼ်ႉ ၵႃႈၼိူဝ်လွႆၼၼ်ႉဢေႃႈ။- 55ၶိင်ႇၵၢင်ၼႂ်ၸဝ်ႉၸဝ်ႉလႃႇပၢၼ်ႇ လုၵ်ႉလႄႈၼူမ်လုၵ်ႈၸၢႆးမၼ်းဢိၵ်ႇတင်းလုၵ်ႈယိင်းမၼ်းတင်းလၢႆသေယဝ်ႉ၊ ပၼ်တၢင်းလီတီႈၶဝ်သေလႄႈ ၶိုၼ်းမိူဝ်းၵႂႃႇၸူး ၵႃႈတီႈမိူင်းဢၼ်မၼ်းယူႇၼၼ်ႉသေဢေႃႈ။
Currently Selected:
ငဝ်ႈၵမ်ႇၽႃႇ 31: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
