ငဝ်ႈၵမ်ႇၽႃႇ 30
30
1 ရႃႇၶေႇလႃႉၼၼ်ႉ မိူဝ်ႈဢၼ်ႁူႉႁၼ်လွင်ႈဢၼ်မၼ်းဢမ်ႇၵိူတ်ႇလဵင်ႉလုၵ်ႈလဵင်ႉလၢင်းပၼ်တီႈယႃႇၵုပ်ႈၼၼ်ႉၸိုင်၊ မီးၸႂ်ဢၼ်သီႈၵေႉႁေႈတႃ ပီႈၼၢင်းမၼ်းလႄႈလၢတ်ႈတီႈယႃႇၵုပ်ႈလႄႈဝႃႈ၊ ပၼ်လုၵ်ႈတီႈၵဝ်သေၵမ်း။ ပေႃးဢမ်ႇၼၼ် ၵဝ်တၵ်းတၢႆယဝ်ႉ၊ ဝႃႈၼင်ႇၼႆဢေႃႈ။- 2ယႃႇၵုပ်ႈၵေႃႈ တေႃးသႃႉတင်းၸႂ်မႆႈဢွၵ်ႇတီႈရႃႇၶေႇလႃႉလႄႈလၢတ်ႈဝႃႈ၊ ၵဝ်ပဵၼ်တၢင်တူဝ်ၽြႃးပဵၼ်ၸဝ်ႈဢၼ်ဢမ်ႇပၼ်ဢၶႂၢင်ႉ တၢင်းဢၼ်မႂ်းၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉႁိုဝ်။ ဝႃႈၼင်ႇၼႆဢေႃႈ။- 3ရႃႇၶေႇလႃႉၵေႃႈလၢတ်ႈလႄႈဝႃႈ၊ ၵဝ်ၶႃႈမီးမႄႈယိင်းၶႃႈၵဝ်ၶႃႈပီႉလႁႃႇၶႃႈဢေႃႈ။ ၶဝ်ႈၸူးၵႃႈတီႈမၼ်းၼၼ်ႉသေၵမ်း။ မၼ်းတၵ်းၵိူတ်ႇလဵင်ႉလုၵ်ႈလဵင်ႉလၢင်းၵႃႈၼိူဝ်ႁူဝ်ၶဝ်ႇၵဝ်ၶႃႈလႄႈ၊ ၵဝ်ၶႃႈတၵ်းလႆႈလုၵ်ႈလႆႈလၢင်းၵႃႈတီႈၼၼ်ႈၶႃႈဢေႃႈ၊ ဝႃႈၼင်ႇၼႆလႄႈ၊- 4ဢဝ်မႄႈယိင်းၶႃႈမၼ်းပီႉလႁႃႇၼၼ်ႉ ဢၢပ်ႈပၼ် ႁႂ်ႈပဵၼ်မေးယႃႇၵုပ်ႈလႄႈ ယႃႇၵုပ်ႈၵေႃႈၶဝ်ႈၸူးၵႃႈတီႈမၼ်းၼၼ်ႉဢေႃႈ။- 5ပီႉလႁႃႇၼၼ်ႉပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးတီႈယႃႇၵုပ်ႈသေယဝ်ႉ၊- 6ရႃႇၶေႇလႃႉလၢတ်ႈလႄႈဝႃႈ၊ ၽြႃးပဵၼ်ၸဝ်ႈၸီႇယၢင်ႇတြႃးၽၢႆႇၵဝ်ယဝ်ႉ။ မၼ်းၸဝ်ႈထွမ်ႇဢဝ်ၵႂၢမ်းၵဝ်လႄႈပၼ်လုၵ်ႈၸၢႆးတီႈၵဝ်ယဝ်ႉ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉတၢၼ်ႇဢေႃႈ။- 7ၵမ်းၼၼ်ႉ ပီႉလႁႃႇမႄႈယိင်းၶႃႈရႃႇၶေႇလႃႉၼၼ်ႉ၊ သမ်ႉပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးတီႈယႃႇၵုပ်ႈထူၼ်ႈထိုင် သွင်ပွၵ်ႈသေယဝ်ႉ၊- 8ရႃႇၶေႇလႃႉလၢတ်ႈလႄႈဝႃႈ၊ ၵဝ်ၵၼ်ႉၵၼ်ၶဵင်ႇၵၼ်တင်းပီႈၼၢင်းၵဝ်လႄႈပႄႉၼႅင်ႇယဝ်ႉ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉ ၼပ်ႉထလီႉဢေႃႈ။
9 လေႇဢႃႇၼၼ်ႉ မိူဝ်ႈဢၼ်ႁူႉႁၼ်လွင်ႈဢၼ်လုၵ်ႈမၼ်းထၢတ်ႇၵႂႃႇလႄႈ ဢမ်ႇၵိူတ်ႇလဵင်ႉထႅင်ႈၼၼ်ႉၸိုင်၊ ဢဝ်မႄႈယိင်းၶႃႈမၼ်း ၸီႉလပႃႉဢၢပ်ႈပၼ်ႁႂ်ႈပဵၼ်မေးယႃႇၵုပ်ႈဢေႃႈ။- 10မႄႈယိင်းၶႃႈလေႇဢႃႇၼၼ်ႉၵိူတ်ႇလဵင်ႉလုၵ်ႈၸၢႆးမႃးတီႈယႃႇၵုပ်ႈသေယဝ်ႉ၊- 11လေႇဢႃႇလၢတ်ႈလႄႈဝႃႈ၊ ဢၼ်လီဢၼ်ငၢမ်းမႃးယဝ်ႉ၊ ဝႃႈၼင်ႇၼႆလႄႈ၊ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉၵၢတ်ႉဢေႃႈ။- 12ၸီႉလပႃႉမႄႈယိင်းၶႃႈလေႇဢႃႇၼၼ်ႉသမ်ႉၵိူတ်ႇလဵင်ႉလုၵ်ႈၸၢႆးမႃးတီႈယႃႇၵုပ်ႈထူၼ်ႈထိုင်သွင်ပွၵ်ႈသေယဝ်ႉ၊- 13လေႇဢႃႇလၢတ်ႈလႄႈဝႃႈ၊ မင်ႇၵလႃႇမီးတီႈၵဝ်ဢေႃႈ။ လွင်ႈမၼ်းၸမ်ႉ လုၵ်ႈယိင်းၵူၼ်းတင်းလၢႆ တၵ်းႁွင်ႉႁဵၵ်ႈၵဝ်လႄႈဝႃႈ၊ ၵေႃႉဢၼ်မီးမင်ႇၵလႃႇဢေႃႈ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉ ဢႃႇသႃႇဢေႃႈ။
14လိုၼ်းၼၼ်ႉၶိင်ႇၵႃႇလႃႉမိူဝ်ႈဢၼ်ၸူႉသိမ်းၶဝ်ႈၵျုင်ႇၼၼ်ႉရူႉပိၼ်ႇဢွၵ်ႇၵႂႃႇလႄႈထူပ်းႁၼ်မၢၵ်ႇယႃႈ ဢၶျူဝ်ႇၵႃႈတီႈတူင်ႈၼႃးသေယဝ်ႉ၊ ဢဝ်ပႃးမႃးၸူးၵႃႈတီႈမႄႈမၼ်းလေႇဢႃႇဢေႃႈ။ ရႃႇၶေႇလႃႉယွၼ်းတီႈလေႇဢႃႇလႄႈဝႃႈ၊ ပၼ်မၢၵ်ႇယႃႈဢၶျူဝ်ႇဢၼ်လုၵ်ႈၸၢႆးမႂ်းလႆႈမႃးၼၼ်ႉတီႈၵဝ် ၵမ်ႈၽွင်ႈသေၵမ်း၊ ဝႃႈၼင်ႇၼႆသေယဝ်ႉ၊- 15လေႇဢႃႇၵေႃႈလၢတ်ႈလႄႈဝႃႈ၊ မႂ်းထၢင်ႇမႂ်းဢဝ်ၽူဝ်ၵဝ်လႄႈ၊ ဢမ်ႇမီးဢတႂၢၵ်ႈၵႃႈသင်ႁိုဝ်။ မၢၵ်ႇယႃႈဢၶျူဝ်ႇလုၵ်ႈၸၢႆးၵဝ်ၵေႃႈ မႂ်းတၵ်းဢဝ်လူင်ပႄႇ၊ မိူဝ်ႈဢၼ်ဝႃႈၼင်ႇၼႆၸိုင်၊ ရႃႇၶေႇလႃႉၵေႃႈလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၵွပ်ႈပိူဝ်ႈ မၢၵ်ႇယႃႈဢၶျူဝ်ႇလုၵ်ႈၸၢႆးမႂ်းၼၼ်ႉလႄႈ၊ ၽူဝ်ႁဝ်းတၵ်းလႆႈၼွၼ်းလူၺ်ႈၵၼ်တင်းမႂ်းၶိုၼ်းၼႆႉဢေႃႈ၊ ဝႃႈၼင်ႇၼႆဢေႃႈ။- 16ၶိင်ႇႁူဝ်ၶမ်ႈ၊ မိူဝ်ႈဢၼ်ယႃႇၵုပ်ႈလုၵ်ႉသေၵႃႈတီႈတူင်ႈၼႃးမႃးၼၼ်ႉၸိုင်၊ လေႇဢႃႇဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းမၼ်းလႄႈလၢတ်ႈဝႃႈ၊ ၸဝ်ႈတၵ်းလႆႈၶဝ်ႈၸူးၵႃႈတီႈၵဝ်ၶႃႈဢေႃႈ။ ၵဝ်ၶႃႈဢဝ်တင်းမၢၵ်ႇယႃႈဢၶျူဝ်ႇဢၼ်လုၵ်ႈၸၢႆးၵဝ်ၶႃႈလႆႈမႃးၼၼ်ႉၸၢင်ႈငႃဢဝ်ၸဝ်ႈၶႃႈဢေႃႈ၊ ဝႃႈၼင်ႇၼႆလႄႈ ၶိုၼ်းၼၼ်ႉလႆႈၼွၼ်းလူၺ်ႈၵၼ်တင်းမၼ်းၼၼ်ႉဢေႃႈ။- 17ၽြႃးပဵၼ်ၸဝ်ႈထွမ်ႇဢဝ်ၵႂၢမ်းလေႇဢႃႇလႄႈ မၼ်းပႃးပတိၵ်ႉသၼ်ႇထေႇသေယဝ်ႉ၊ မိူဝ်ႈဢၼ်ၵိူတ်ႇလဵင်ႉလုၵ်ႈၸၢႆးမႃးတီႈယႃႇၵုပ်ႈထူၼ်ႈထိုင်ႁႃႈပွၵ်ႈၼၼ်ႉၸိုင်၊- 18လေႇဢႃႇလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ၵဝ်ဢဝ်မႄႈယိင်းၶႃႈၵဝ်ဢၢပ်ႈပၼ်တီႈၽူဝ်ၵဝ်လႄႈ၊ ၽြႃးပဵၼ်ၸဝ်ႈပၼ်ၵႃႈမၼ်းၶၼ်မၼ်းတီႈၵဝ်ယဝ်ႉ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဢီႉသၶႃႇဢေႃႈ။- 19ၵမ်းၼၼ်ႉ လေႇဢႃႇသမ်ႉပႃးပတိၵ်ႉသၼ်ႇထေႇထႅင်ႈလႄႈ၊ မိူဝ်ႈဢၼ်ၵိူတ်ႇလဵင်ႉလုၵ်ႈၸၢႆးမႃးတီႈယႃႇၵုပ်ႈထူၼ်ႈထိုင်ႁူၵ်းပွၵ်ႈၼၼ်ႉၸိုင်၊- 20လေႇဢႃႇလၢတ်ႈလႄႈဝႃႈ၊ ၽြႃးပဵၼ်ၸဝ်ႈပၼ်လၢၵ်ႈသွင်ႇဢၼ်သွင်ႇမင်ႇၵလႃႇဢၼ်လီဢၼ်ငၢမ်းယဝ်ႉ။ ၵွပ်ႈပိူဝ်ႈဢၼ်ၵဝ်လႆႈၵိူတ်ႇလဵင်ႉလုၵ်ႈၸၢႆးႁူၵ်းၵေႃႉတီႈၽူဝ်ၵဝ်လႄႈ တေႃႈလဵဝ်ၼႆႉမၼ်းတၵ်းယူႇလူၺ်ႈၵၼ်တင်းၵဝ်သေႇသေႇဢေႃႈ၊ ဝႃႈၼင်ႇၼႆလႄႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉ ၸေႇပူႉလုၼ်ႇဢေႃႈ။- 21လိုၼ်းၼၼ်ႉမၼ်းၵိူတ်ႇလဵင်ႉလုၵ်ႈယိင်းမႃးလႄႈ ႁွင်ႉႁဵၵ်ႈၸိုဝ်ႈ တီႉၼႃႉဢေႃႈ။
22မိူဝ်ႈၼၼ်ႉၽြႃးပဵၼ်ၸဝ်ႈၶုၵ်းၸႂ်လႆႈၶႆႈၸႂ်ထူပ်း ရႃႇၶေႇလႃႉဢေႃႈ။ မၼ်းၸဝ်ႈထွမ်ႇဢဝ်ၵႂၢမ်းမၼ်းလႄႈပၼ်ဢၶႂၢင်ႉဢၼ်ၵိူတ်ႇလဵင်ႉလုၵ်ႈလဵင်ႉလၢင်းတီႈမၼ်းဢေႃႈ။- 23မၼ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးသေယဝ်ႉ၊ လၢတ်ႈလႄႈဝႃႈ၊ ၽြႃးပဵၼ်ၸဝ်ႈပႄႇပႅတ်ႈ လွင်ႈတၢင်းဢၼ်သႄႉဢၼ်သွမ်းဢၼ်ၵဝ်လႆႈၶၢမ်ႇၼၼ်ႉသေၵႃႈတီႈၵဝ်ယဝ်ႉ၊ ဝႃႈၼင်ႇၼႆသေယဝ်ႉ၊- 24ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉယူဝ်းသႅပ်ႈလႄႈသမ်ႉဝႃႈ၊ ထႃႇဝရႃႉၽြႃးတၵ်းထၢပ်ႈထႅင်ႈလႄႈပၼ်လုၵ်ႈၸၢႆးတၢင်ႇၵေႃႉ တီႈၵဝ် လူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။
ယႃႇၵုပ်ႈယွၼ်းဢမူၺ်ႇတီႈလႃႇပၢၼ်ႇ
25ဝၢႆးသေရႃႇၶေႇလႃႉၵိူတ်ႇလဵင်ႉယူဝ်းသႅပ်ႈယဝ်ႉၼၼ်ႉ၊ ယႃႇၵုပ်ႈလၢတ်ႈတီႈလႃႇပၢၼ်ႇလႄႈဝႃႈ၊ ပွႆႇၵဝ်ၶႃႈႁႂ်ႈၵဝ်ၶႃႈလႆႈၶိုၼ်းမိူဝ်းၸူးၵႃႈတီႈမိူင်း တီႈယူႇၵဝ်ႇ ၵဝ်ၶႃႈၼၼ်ႉသေၵမ်း။- 26ပၼ်ဢၶႂၢင်ႉဢၼ်လႆႈဢဝ်မေးၵဝ်ၶႃႈ ဢိၵ်ႇတင်းလုၵ်ႈလၢင်းၵဝ်ၶႃႈ ဢၼ်ၵဝ်ၶႃႈ ၶၢမ်ႇတၢင်းၸႂ်ႉတၢင်းသွႆလႄႈ လႆႈၸိူဝ်းၼၼ်ႉၵႂႃႇသေၵမ်း။ ၸဝ်ႈႁူႉလွင်ႈတၢင်းၸႂ်ႉတၢင်းသွႆဢၼ်ၵဝ်ၶႃႈလႆႈၶၢမ်ႇ တီႈၸဝ်ႈၼၼ်ႉယူႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊- 27လႃႇပၢၼ်ႇၵေႃႈလၢတ်ႈတီႈမၼ်းလႄႈဝႃႈ၊ ပေႃးၵဝ်ထူပ်းၵျေးၸူးသိုဝ်ႈၼႃႈတႂ်ႈတႃမႂ်းၸိုင် ယူႇလူးၵွၼ်ႇသေၵမ်း။ ၵဝ်ႁူႉသၢႆငၢႆလွင်ႈဢၼ်ထႃႇဝရႃႉၽြႃးပၼ်တၢင်းလီတီႈၵဝ်ၵွပ်ႈပိူဝ်ႈမႂ်းၼၼ်ႉယဝ်ႉ၊- 28ဝႃႈၼင်ႇၼႆလႄႈသမ်ႉလၢတ်ႈလႄႈဝႃႈ၊ မွၵ်ႇလၢတ်ႈၵႃႈၶၼ် ဢၼ်ၵဝ်တၵ်းလႆႈပၼ်ၼၼ်ႉသေၵမ်း။ ၵဝ်တၵ်းပၼ်ဢေႃႈ၊ ဝႃႈၼင်ႇၼႆသေယဝ်ႉ၊- 29ယႃႇၵုပ်ႈလၢတ်ႈလႄႈဝႃႈ၊ ၸဝ်ႈႁူႉလွင်ႈဢၼ်ၵဝ်ၶႃႈၶၢမ်ႇတၢင်းၸႂ်ႉတၢင်းသွႆၸဝ်ႈ ၸိူဝ်ႉၼင်ႇႁိုဝ်ဢိၵ်ႇတင်းလွင်ႈဢၼ် တရိၵ်ႈသၢၼ်ႇၸဝ်ႈမီးယူႇၵႃႈတီႈၵဝ်ၶႃႈ ၸိူဝ်ႉၼင်ႇႁိုဝ်ၼၼ်ႉယူႇၶႃႈဢေႃႈ။- 30ၸူဝ်ႈဢၼ်ၵဝ်ၶႃႈဢမ်ႇပႆႇႁွတ်ႈမႃးၼၼ်ႉၸိုင်၊ ဢုၵ်ႉၸႃႇၸဝ်ႈၵေႇၼႃႇၶႃႈဢေႃႈ။ ၵမ်းၼႆႉ ယႂ်ႇၽႄၼမ်ၵိုၼ်းမႃးထၼ်ႈပေႃးပဵၼ် ဢၼ်ၼမ်ၼႃႇလူင်လၢင်ဢေႃႈ။ ထႃႇဝရႃႉၽြႃးပၼ်တၢင်းလီတီႈၸဝ်ႈၼႂ်းတီႈၵႃႈဢၼ်ၵဝ်ၶႃႈၵႂႃႇမႃးသၢင်ႈႁဵတ်းၼၼ်ႉၶႃႈယဝ်ႉ။ တေႃႈလဵဝ်ၼႆႉ ၵဝ်ၶႃႈတၵ်းလႆႈလုမ်းလႃးၵူၼ်းႁိူၼ်းၵူၼ်းယေးတူဝ်ၸဝ်ႈၵဝ်ႇမိူဝ်ႈလႂ်ၶႃႈ၊ ဝႃႈၼင်ႇၼႆဢေႃႈ။- 31မၼ်းၵေႃႈၶိုၼ်းထၢမ်လႄႈဝႃႈ၊ ၵဝ်တၵ်းလႆႈပၼ်ၵႃႈသင်တီႈမႂ်း၊ ဝႃႈၼင်ႇၼႆသေယဝ်ႉ၊ ယႃႇၵုပ်ႈလၢတ်ႈလႄႈဝႃႈ၊ ဢမ်ႇလႆႈပၼ် ၵႃႈသင်လႃးလႃး။ ပေႃးၸဝ်ႈၶႂ်ႈႁဵတ်းၵျေးၸူးသေၸိူဝ်ႉသေပိူင်တီႈၵဝ်ၶႃႈၸိုင်၊ ၵဝ်ၶႃႈတၵ်းၶိုၼ်းလဵင်ႉလူပႂ်ႉထိင်းၽုင်သူဝ်း ၽုင်ပႄႉၸဝ်ႈတင်းလၢႆထႅင်ႈလူးၵွၼ်ႇၶႃႈဢေႃႈ။- 32ဝၼ်းမိူဝ်ႈၼႆႉၵဝ်ၶႃႈတၵ်းၵႂႃႇၵႃႈတီႈၼႂ်းၽုင်သူဝ်းၽုင်ပႄႉၸဝ်ႈ ၵူႈတီႈၵူႈလႅၼ်လႄႈ ၽႄဢဝ်သူဝ်းဢၼ်လၢႆးဢၼ်လဵၼ်းလႂ် ဢၼ်ပဵၼ်လၢဝ်ဝႆႉလႂ် သူဝ်းဢၼ်ၵမ်ႇလႂ်ၵူႈတူဝ် ဢွၵ်ႇသေၵႃႈၼႂ်းၽုင်သူဝ်း၊ ပႄႉဢၼ်လၢႆးဢၼ်လဵၼ်းလႂ် ဢၼ်ပဵၼ်လၢဝ်ဝႆႉလႂ် ၵူႈတူဝ် ဢွၵ်ႇသေၵႃႈၼႂ်းၽုင်ပႄႉလႄႈဝႆႉဢေႃႈ။ ႁႂ်ႈတူဝ်ၸိူဝ်ႉၼင်ႇၼၼ်ၼၼ်ႉ ပဵၼ်ၵႃႈၶၼ်ၵဝ်ၶႃႈတႃႉ။- 33ပိူဝ်ႈၼႆလႄႈၶိင်ႇၵႃႇလႃႉၵမ်းလိုၼ်းပုၼ်ႉၼၼ်ႉ၊ မိူဝ်ႈဢၼ်ၵႃႈၶၼ်ၵဝ်ၶႃႈႁွတ်ႈထိုင်ၵႃႈတီႈၽၢႆႇၼႃႈၸဝ်ႈၼၼ်ႉၸိုင်၊ တၢင်းသိုဝ်ႈတေႃႇၵဝ်ၶႃႈ တၵ်းပႂ်ႉၸွႆႈပႂ်ႉထႅမ်ၵဝ်ၶႃႈဢေႃႈ။ ႁႂ်ႈမၢတ်ႈပႄႉၵႃႈဢၼ်ဢမ်ႇလၢႆးဢမ်ႇလဵၼ်းလႂ် ဢၼ်ဢမ်ႇပဵၼ်လၢဝ်ဝႆႉလႂ်ဢိၵ်ႇတင်း သူဝ်း ၵႃႈဢၼ်ဢမ်ႇၵမ်ႇလႂ် ဢၼ်ပႃးတီႈၵဝ်ၶႃႈၼၼ်ႉပဵၼ်ၸိူဝ်ႉၼင်ႇတူဝ်ဢၼ်ၵဝ်ၶႃႈ လၵ်ႉဢဝ်လိူတ်ႈဢဝ်ၵူႈတူဝ်တႃႉ၊ ဝႃႈၼင်ႇၼႆဢေႃႈ။- 34လႃႇပၢၼ်ႇၵေႃႈႁပ်ႉတုင်းဢဝ်လႄႈဝႃႈ၊ ႁႂ်ႈပဵၼ်ၵႃႈၼင်ႇဢၼ်မႂ်းဝႃႈၼၼ်ႉတႃႉ၊ ဝႃႈၼင်ႇၼႆလႄႈ၊- 35ၼႂ်းဝၼ်းၼၼ်ႉ မၼ်းၽႄဢဝ်ပႄႉပေႃႈ ၵႃႈဢၼ်လၢႆးဢၼ်လဵၼ်းလႂ်၊ ပႄႉမႄႈ ၵႃႈဢၼ်လၢႆးဢၼ်လဵၼ်းလႂ်၊ ပႄႉၵႃႈဢၼ်ပႃးဢၼ်ၽိူၵ်ႇလႂ်၊ သူဝ်းၵႃႈဢၼ်ၵမ်ႇလႂ်၊ ဢွၵ်ႇသေလႄႈဢၢပ်ႈပၼ်ၵႃႈၼႂ်းမိုဝ်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။- 36မၼ်းၸီႇယၢင်ႇတီႈဢၼ်မၼ်းယူႇ ဢိၵ်ႇတင်းတီႈဢၼ်ယႃႇၵုပ်ႈယူႇၼၼ်ႉႁႂ်ႈယၢၼ်ၵၼ်ၶၢဝ်းတၢင်းသၢမ်ဝၼ်းဢေႃႈ။ ယႃႇၵုပ်ႈ လဵင်ႉသူဝ်းတင်းပႄႉလႃႇပၢၼ်ႇဢၼ်ၵိုတ်းၵျၢၼ်ႇဝႆႉၸိူဝ်းၼၼ်ႉလႄႈယူႇဢေႃႈ။
37မိူဝ်ႈၼၼ်ႉယႃႇၵုပ်ႈဢဝ်ၶွၼ်ႉၵွမ်းၵိင်ႇတူၼ်ႈလီႉပၼႃႉဢၼ်လိပ်းလႂ်၊ တူၼ်ႈလူႉၸႃႉလႂ်၊ တင်းတူၼ်ႈဢႃႇရမုၼ်ႇလႂ် သေလႄႈ ထိူဝ်ၶွၵ်းပႅတ်ႈပိူၵ်ႇမၼ်းႁႂ်ႈဢၼ်ၽိူၵ်ႇဢၼ်ၶဵဝ်ဢွၵ်ႇပဵၼ်ၶၼ်ႇပဵၼ်ပွင်ႈဝႆႉသေယဝ်ႉ၊- 38မီးတၢင်းၵျၢမ်ႇတၢင်းပွင်ဢၼ်ဝႃႈ၊ သူဝ်းပႄႉဢၼ်မႃးၵိၼ်ၼမ်ႉၵႃႈတီႈၼၼ်ႈၸိူဝ်းၼၼ်ႉ တၵ်းဝၢင်ၵၼ်လႄႈလႆႈလုၵ်ႈလႆႈလၢင်း ၼႂ်းမိူဝ်ႈဢၼ်မႃးၵိၼ်ၼမ်ႉၼၼ်ႉဢေႃႈ၊ ဝႃႈၼင်ႇၼႆယူႇသေလႄႈ ဢဝ်ၶွၼ်ႉဢၼ်ၶွၵ်းပိူၵ်ႇယဝ်ႉၸိူဝ်းၼၼ်ႉပၵ်းဝႆႉ ၵႃႈတီႈၽၢႆႇၼႃႈ သူဝ်းပႄႉၸိူဝ်းၼၼ်ႉၵႃႈတီႈႁိမ်းႁၢင်းၵိၼ်ၼမ်ႉတင်းၵွၵ်းၵိၼ်ၼမ်ႉတင်းလၢႆ တီႈဢၼ်ၽုင်သူဝ်းၽုင်ပႄႉၵိၼ်ၼၼ်ႉဢေႃႈ။- 39သူဝ်းပႄႉၸိူဝ်းၼၼ်ႉဝၢင်ၵၼ်လႆႈလုၵ်ႈလႆႈလၢင်း ၵႃႈတီႈၽၢႆႇၼႃႈၶွၼ်ႉၵွမ်းၸိူဝ်းၼၼ်ႉလႄႈ ၵိူတ်ႇလဵင်ႉတူဝ်ဢၼ်လၢႆးဢၼ် လဵၼ်းလႂ်ဢၼ်ပဵၼ်လၢဝ်ဝႆႉလႂ်မႃးဢေႃႈ။- 40ယႃႇၵုပ်ႈၽႄဢဝ်သူဝ်းဢွၼ်ႇတင်းပႄႉဢွၼ်ႇတင်းလၢႆဢွၵ်ႇဝႆႉတီႈၼိုင်ႈလႄႈ ႁႂ်ႈသူဝ်းပႄႉတင်းလၢႆဝၢႆႇၼႃႈၸူးတူဝ်ဢၼ်လၢႆးဢၼ်လဵၼ်းလႂ်၊ တူဝ်ဢၼ်ၵမ်ႇလႂ်၊ ဢၼ်မီးၵႃႈၼႂ်းၽုင်သူဝ်းၽုင်ပႄႉလႃႇပၢၼ်ႇၼၼ်ႉဢေႃႈ။ ၽုင်တရိၵ်ႈသၢၼ်ႇမၼ်းတင်း ၽုင်တရိၵ်ႈသၢၼ်ႇလႃႇပၢၼ်ႇၵေႃႈ၊ ဢမ်ႇပၼ်လေႃးလႄးလူၺ်ႈၵၼ်လႄႈ ၽႄဝႆႉၽုင်လႂ်ၽုင်ၼၼ်ႉဢေႃႈ။- 41ယၢမ်းမိူဝ်ႈဢၼ်တူဝ်ဢၼ်ႁႅင်းယႂ်ႇဝၢင်ၵၼ်ၼၼ်ႉၸိုင်၊ ယႃႇၵုပ်ႈၸင်ႇဢဝ်ၶွၼ်ႉၵွမ်းၸိူဝ်းၼၼ်ႉဝႆႉၵႃႈတီႈႁိမ်းႁၢင်းၵိၼ်ၼမ်ႉၵႃႈတီႈ သိုဝ်ႈၼႃႈတႂ်ႈတႃၶဝ်ႁႂ်ႈၶဝ်ဝၢင်ၵၼ်လႄႈ လႆႈလုၵ်ႈလႆႈလၢင်းၵႃႈတီႈၶွၼ်ႉၵွမ်းၸိူဝ်းၼၼ်ႉဢေႃႈ။- 42ၵႃႈတီႈၽၢႆႇၼႃႈ တူဝ်ဢၼ်ႁႅင်းလဵၵ်ႉၸိုင်၊ မၼ်းဢမ်ႇပၵ်းဢမ်ႇဝႆႉ။ ပိူဝ်ႈၼႆလႄႈ တူဝ်ဢၼ်ႁႅင်းလဵၵ်ႉၸိူဝ်းၼၼ်ႉ ပဵၼ်ဢုၵ်ႉၸႃႇ လႃႇပၢၼ်ႇဢေႃႈ။ တူဝ်ဢၼ်ႁႅင်းယႂ်ႇတင်းလၢႆၸမ်ႉ၊ ပဵၼ်ဢုၵ်ႉၸႃႇယႃႇၵုပ်ႈဢေႃႈ။- 43ၼင်ႇၼၼ်လႄႈ တီႈယႃႇၵုပ်ႈၼၼ်ႉၸေးၸိမ်ႇယႂ်ႇၽႄႈၼမ်ၵိုၼ်းမႃးလႄႈ မီးသူဝ်းပႄႉ၊ ၶႃႈၵူၼ်းယိင်း၊ ၶႃႈၵူၼ်းၸၢႆး၊ ၵလႃးဢုၵ်ႉ၊လီႈၼမ်ၼႃႇဢေႃႈ။
Currently Selected:
ငဝ်ႈၵမ်ႇၽႃႇ 30: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
