ငဝ်ႈၵမ်ႇၽႃႇ 29

ယႃႇၵုပ်ႈႁွတ်ႈထိုင်ႁိူၼ်းလႃႇပၢၼ်ႇ

1ၵမ်းၼၼ်ႉယႃႇၵုပ်ႈသမ်ႉၸွမ်းတၢင်းၵႂႃႇလႄႈႁွတ်ႈထိုင်ၵႃႈတီႈဢၼ်ၵူၼ်းမိူင်းတၢင်းဢွၵ်ႇၸိူဝ်းၼၼ်ႉယူႇၼၼ်ႉသေယဝ်ႉ၊- 2မုင်ႈတူၺ်းလႄႈႁၼ်ၼမ်ႉမေႃႇဢၼ်ၼိုင်ႈၵႃႈတီႈထိူၼ်ႇၼၼ်ႉဢေႃႈ။ ပိူဝ်ႈဢၼ်ယၢမ်ႈဢဝ်ၼမ်ႉၵႃႈတီႈၼမ်ႉမေႃႇၼၼ်ႉတိုၵ်းပၼ်ၽုင်သူဝ်းတင်းလၢႆလႄႈ ၽုင်သူဝ်းသၢမ်ၽုင်ၼွၼ်းယူႇၵႃႈတီႈႁိမ်းၼမ်ႉမေႃႇၼၼ်ႉဢေႃႈ။ မၢၵ်ႇႁိၼ်ဢၼ်ယႂ်ႇၼႃႇ မီးၵႃႈၼိူဝ်ပၢၵ်ႇၼမ်ႉမေႃႇ ၼၼ်ႉဢေႃႈ။- 3မိူဝ်ႈဢၼ်ၽုင်သူဝ်းတင်းလၢႆ ၸူႉၵၼ်တုမ်ၵၼ်ၵႃႈတီႈၼၼ်ႈၸိုင်၊ ၶဝ်ယၢမ်ႈဢဝ်မၢၵ်ႇႁိၼ်ၼၼ်ႉ ၵိင်ႈပႅတ်ႈသေၵႃႈၼိူဝ်ပၢၵ်ႇ ၼမ်ႉမေႃႇၼၼ်ႉသေလႄႈ တိုၵ်းၼမ်ႉပၼ်တီႈသူဝ်းယဝ်ႉၸင်ႇ သမ်ႉဢဝ်မၢၵ်ႇႁိၼ်ၼၼ်ႉ ၶိုၼ်းႁူမ်ႇဝႆႉၵႃႈၼိူဝ်ပၢၵ်ႇၼမ်ႉမေႃႇ တီႈၵဝ်ႇမၼ်းၼၼ်ႉဢေႃႈ။- 4ယႃႇၵုပ်ႈၵေႃႈထၢမ်တီႈၶဝ်လႄႈဝႃႈ၊ ပီႈၼွင်ႉၵဝ်တင်းလၢႆၶဝ်ဢိူၺ်း၊ သူၸဝ်ႈလုၵ်ႉသေၵႃႈတီႈလႂ်မႃး၊ မိူဝ်ႈဢၼ်ဝႃႈၼင်ႇၼႆၸိုင် ၶဝ်ၶိုၼ်းလၢတ်ႈလႄႈဝႃႈ၊ ႁဝ်းလုၵ်ႉသေၵႃႈတီႈဝဵင်းၶႃႇရၢၼ်ႇပုၼ်ႉမႃးဢေႃႈ၊ ဝႃႈၼင်ႇၼႆဢေႃႈ။- 5မၼ်းသမ်ႉထၢမ်တီႈၶဝ်လႄႈဝႃႈ၊ ႁူႉၸၵ်းလႃႇပၢၼ်ႇလုၵ်ႈၸၢႆးၼႃႇၶေႃႇၼၼ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်သမ်ႉၶိုၼ်းလၢတ်ႈလႄႈဝႃႈ၊ ႁူႉဢိူဝ်ႈ၊ ဝႃႈၼင်ႇၼႆသေယဝ်ႉ၊- 6မၼ်းသမ်ႉထၢမ်တီႈၶဝ်ထႅင်ႈလႄႈဝႃႈ၊ မၼ်းယူႇလီယူႇၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်သမ်ႉလၢတ်ႈလႄႈဝႃႈ၊ ယူႇလီယူႇၶႃႈဢေႃႈ။ တူၺ်းလူး၊ လုၵ်ႈယိင်းမၼ်းရႃႇၶေႇလႃႉယင်းမႃးယူႇလူၺ်ႈၵၼ်တင်းၽုင်သူဝ်းၵႃႈတီႈပုၼ်ႉဢေႃႈ၊ ဝႃႈၼင်ႇၼႆဢေႃႈ။- 7မၼ်းၵေႃႈလၢတ်ႈလႄႈဝႃႈ၊ ၶိင်ႇၵၢင်ဝၼ်းယင်းမီးယူႇၼမ်ၼႃႇဢေႃႈ။ ၶိင်ႇဢၼ်တၵ်းလႆႈႁႂ်ႈၽုင်သူဝ်းတင်းလၢႆ ၸူႉၵၼ်တုမ်ၵၼ် ၼၼ်ႉဢမ်ႇပႆႇၸႂ်ႈ။ တိုၵ်းၼမ်ႉပၼ်သေယဝ်ႉ၊ ဢဝ်ၵႂႃႇလဵင်ႉထႅင်ႈလူးၵွၼ်ႇတႃႉ၊ ဝႃႈၼင်ႇၼႆဢေႃႈ။- 8ၶဝ်ၵေႃႈလၢတ်ႈလႄႈဝႃႈ၊ ၸူဝ်ႈဢၼ်ဢမ်ႇပႆႇႁႂ်ႈၽုင်သူဝ်းတင်းသဵင်ႈတင်းလူင် ၸူႉၵၼ်တုမ်ၵၼ်သေလႄႈ ဢဝ်မၢၵ်ႇႁိၼ် ဢၼ်မီး ၵႃႈၼိူဝ်ပၢၵ်ႇၼမ်ႉမေႃႇၵိင်ႈပႅတ်ႈလႄႈ တိုၵ်းၼမ်ႉပၼ်ၼၼ်ႉၸိုင်၊ ဢမ်ႇလႆႈတိုၵ်းပၼ်ၵူၺ်ႉ၊ ဝႃႈၼင်ႇၼႆဢေႃႈ။

9ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈၵႂၢမ်းတေႃႇၵၼ်တင်းၶဝ်ယူႇၼၼ်ႉၸိုင်၊ ရႃႇၶေႇလႃႉၼၼ်ႉ၊ ပိူဝ်ႈဢၼ်လႆႈလဵင်ႉလႆႈထိင်း သူဝ်းပေႃႈမၼ်းတင်းလၢႆလႄႈ ပႃးလူၺ်ႈၵၼ်တင်းသူဝ်းတင်းလၢႆႁွတ်ႈမႃးဢေႃႈ။- 10မိူဝ်ႈဢၼ်ယႃႇၵုပ်ႈႁၼ်ရႃႇၶေႇလႃႉ၊ လုၵ်ႈယိင်းလႃႇပၢၼ်ႇ၊ ပီႈၸၢႆးမႄႈမၼ်းဢိၵ်ႇတင်းသူဝ်းလႃႇပၢၼ်ႇပီႈၸၢႆးမႄႈမၼ်းၼၼ်ႉၸိုင်၊ မၼ်းသုတ်ႉၸမ်လႄႈ ဢဝ်မၢၵ်ႇႁိၼ်ၵိင်ႈပႅတ်ႈသေၵႃႈၼိူဝ်ပၢၵ်ႇၼမ်ႉမေႃႇၼၼ်ႉသေယဝ်ႉ၊ တိုၵ်းၼမ်ႉပၼ်တီႈသူဝ်းလႃႇပၢၼ်ႇ ပီႈၸၢႆးမႄႈ မၼ်းၼၼ်ႉဢေႃႈ။- 11ၵမ်းၼၼ်ႉယႃႇၵုပ်ႈၼၼ်ႉၼူမ်ရႃႇၶေႇလႃႉလႄႈႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈဢေႃႈ။- 12ယႃႇၵုပ်ႈမွၵ်ႇလၢတ်ႈလွင်ႈဢၼ်မၼ်းပဵၼ်လၢၼ်ပေႃႈရႃႇၶေႇလႃႉ ဢိၵ်ႇတင်းလွင်ႈဢၼ်မၼ်းပဵၼ်လုၵ်ႈၸၢႆး ရေႇပႅၵ်ႉၵႃႉၼၼ်ႉ သေယဝ်ႉ၊ ရႃႇၶေႇလႃႉလႅၼ်ႈမိူဝ်းၵႂႃႇလႄႈ မွၵ်ႇလၢတ်ႈတီႈပေႃႈမၼ်းဢေႃႈ။- 13မိူဝ်ႈဢၼ်လႃႇပၢၼ်ႇ လႆႈငိၼ်းၵႂၢမ်းသတၢင်းသဵင်ၶၢဝ်ႇလွင်ႈလၢၼ်ၸၢႆးမၼ်းယႃႇၵုပ်ႈၼၼ်ႉၸိုင်၊ မၼ်းၼႅတ်ႈၵႂႃႇၶၼ်ၶၼ်ၽႂ်းၽႂ်းႁႂ်ႈလႆႈႁပ်ႉႁူဝ်တၢင်းသေယဝ်ႉ၊ ၵွတ်ႇဢုမ်ႈၸုပ်ႇၼူမ်လႄႈ ပႃးမိူဝ်းၵႂႃႇၵႃႈတီႈႁိူၼ်းမၼ်းဢေႃႈ။ ယႃႇၵုပ်ႈမွၵ်ႇလၢတ်ႈလွင်ႈတၢင်းတူဝ်ၸဝ်ႈၵဝ်ႇၵႃႈမီးတင်းသဵင်ႈတင်းလူင်တီႈလႃႇပၢၼ်ႇသေယဝ်ႉ၊- 14လႃႇပၢၼ်ႇၵေႃႈလၢတ်ႈတီႈမၼ်းလႄႈဝႃႈ၊ မႂ်းၼႆႉပဵၼ်ၼိူဝ်ႉၵဝ်လုပ်ႇၵဝ်ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။ ယႃႇၵုပ်ႈ ယူႇလူၺ်ႈၵၼ်တင်းမၼ်းၼၼ်ႉသေ လိူၼ်ၼိုင်ႈၸမ်ၸမ်ဢေႃႈ။

ယႃႇၵုပ်ႈၶၢမ်ႇႁဵတ်းၵၢၼ်တီႈလႃႇပၢၼ်ႇႁႂ်ႈလႆႈရႃႇၶေႇလႃႉတင်းလေႇဢႃႇ

15ၵမ်းၼၼ်ႉလႃႇပၢၼ်ႇလၢတ်ႈတီႈယႃႇၵုပ်ႈလႄႈဝႃႈ၊ ပိူဝ်ႈဢၼ်မႂ်းပဵၼ်လၢၼ်ၸၢႆးၵဝ်လႄႈ၊ ယင်းဢမ်ႇမီးဢၵျူဝ်းၵႃႈသင်လႄႈ တၵ်းလႆႈၶၢမ်ႇတၢင်းၸႂ်ႉတၢင်းသွႆယူႇႁိုဝ်။ လၢတ်ႈၵႃႈမၼ်းၶၼ်မၼ်း ၵႃႈၼင်ႇဢၼ်မႂ်းၶႂ်ႈလႆႈၼၼ်ႉတီႈၵဝ်တႃႉ၊ ဝႃႈၼင်ႇၼႆဢေႃႈ။- 16မိူဝ်ႈၼၼ်ႉတီႈလႃႇပၢၼ်ႇၼၼ်ႉမီးလုၵ်ႈယိင်းသွင်ၵေႃႉဢေႃႈ။ ၵေႃႉယႂ်ႇၸမ်ႉ၊ လႆႈၸိုဝ်ႈလေႇဢႃႇဢေႃႈ။ ၵေႃႉလဵၵ်ႉၸမ်ႉ၊ လႆႈၸိုဝ်ႈရႃႇၶေႇလႃႉဢေႃႈ။- 17လေႇဢႃႇၸမ်ႉ၊ သၢႆတႃမၼ်းဢူၼ်ႈဢေႃႈ။ ရႃႇၶေႇလႃႉၸမ်ႉ၊ ႁၢင်ႈၽၢင်ယဵၼ်ႇလႄႈၼိူဝ်ႉၼင်ၵေႃႈႁၢင်ႈလီဢေႃႈ။- 18ပိူဝ်ႈဢၼ်ယႃႇၵုပ်ႈငိၼ်းႁၵ်ႉငိၼ်းပႅင်းရႃႇၶေႇလႃႉလႄႈ မၼ်းလၢတ်ႈလႄႈဝႃႈ၊ ၵဝ်ၶႃႈတၵ်းၶၢမ်ႇတၢင်းၸႂ်ႉတၢင်းသွႆ ၸဵတ်းပီႊႁႂ်ႈလႆႈ ရႃႇၶေႇလႃႉလုၵ်ႈယိင်းလုင်းႁဝ်းၵေႃႉလဵၵ်ႉၶႃႈဢေႃႈ၊ ဝႃႈၼင်ႇၼႆသေယဝ်ႉ၊ လႃႇပၢၼ်ႇၵေႃႈလၢတ်ႈလႄႈဝႃႈ၊- 19ၽိူဝ်ႇပၼ်တီႈပိူၼ်ႈတၢင်ႇၵေႃႉၼၼ်ႉ၊ ပၼ်တီႈမႂ်းၸိုင်၊ ယဵင်ႈၶႅၼ်းတၵ်းလီလႄႈ ယူႇလူၺ်ႈၵၼ်တင်းၵဝ်တႃႉ၊ ဝႃႈၼင်ႇၼႆဢေႃႈ။- 20ယႃႇၵုပ်ႈၵေႃႈၶၢမ်ႇတၢင်းၸႂ်ႉတၢင်းသွႆ ၸဵတ်းပီႊႁႂ်ႈလႆႈရႃႇၶေႇလႃႉဢေႃႈ။ ပိူဝ်ႈဢၼ်မၼ်းငိၼ်းႁၵ်ႉငိၼ်းပႅင်းရႃႇၶေႇလႃႉလႄႈ၊ မၼ်းထၢင်ႇ ၸဵတ်းပီႊၼၼ်ႉ ပဵၼ်ၸိူဝ်ႉၼင်ႇမိုဝ်ႉဝၼ်းဢၼ်ၵေႇၼႃႇဢေႃႈ။

21 ယႃႇၵုပ်ႈၵေႃႈလၢတ်ႈတီႈလႃႇပၢၼ်ႇလႄႈဝႃႈ၊ ၶိင်ႇဝၼ်းဢၼ်မၵ်းၶၢၼ်းဝႆႉၼၼ်ႉၸေးၶႃႈယဝ်ႉ။ ဢဝ်မေးၵဝ်ၶႃႈဢၢပ်ႈပၼ်တီႈၵဝ်ၶႃႈႁႂ်ႈၵဝ်ၶႃႈလႆႈၶဝ်ႈၸူးတီႈမၼ်းသေၵမ်း၊ ဝႃႈၼင်ႇၼႆသေယဝ်ႉ၊- 22လႃႇပၢၼ်ႇႁႂ်ႈၵူၼ်းဢၼ်ယူႇၵႃႈတီႈၼၼ်ႈတင်းသဵင်ႈတင်းလူင် ၸူႉၵၼ်တုမ်ၵၼ်သေလႄႈႁဵတ်းပွႆးဢေႃႈ။- 23မိူဝ်ႈဢၼ်ထိုင်ႁွတ်ႈၶိင်ႇႁူဝ်ၶမ်ႈၸိုင်၊ မၼ်းပႃးဢဝ်လုၵ်ႈယိင်းမၼ်းလေႇဢႃႇ ၵႂႃႇသႂၢင်းၶဝ်ႈပၼ်လႄႈ ယႃႇၵုပ်ႈယူႇလူၺ်ႈၼွၼ်းလူၺ်ႈၵၼ်တင်းမၼ်းၼၼ်ႉဢေႃႈ။- 24လႃႇပၢၼ်ႇဢဝ်မႄႈယိင်းၶႃႈမၼ်း ၸီႉလပႃႉဢၢပ်ႈပၼ်တီႈလုၵ်ႈယိင်းမၼ်းလေႇဢႃႇၼၼ်ႉ ပုၼ်ႈဢၼ်တၵ်းပဵၼ်မႄႈယိင်းၶႃႈဢေႃႈ။- 25ထိုင်ႁွတ်ႈၶိင်ႇၵၢင်ၼႂ်သေယဝ်ႉ မိူဝ်ႈဢၼ်ယႃႇၵုပ်ႈတူၺ်းလႄႈ ႁူႉႁၼ်လွင်ႈဢၼ်ပဵၼ်လေႇဢႃႇၼၼ်ႉၸိုင်၊ မၼ်းလၢတ်ႈတီႈလႃႇပၢၼ်ႇလႄႈဝႃႈ၊ လွင်ႈတၢင်းဢၼ်လုင်းႁဝ်းႁဵတ်းတီႈၵဝ်ၶႃႈၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ ၵဝ်ၶႃႈၶၢမ်ႇတၢင်းၸႂ်ႉတၢင်းသွႆႁႂ်ႈလႆႈ ရႃႇၶေႇလႃႉၼၼ်ႉယဝ်ႉ၊ ဢမ်ႇၸႂ်ႈၶႃႈႁိုဝ်။ ႁဵတ်းသင်လႄႈပႅတ်ႉလႅၼ်ၵဝ်ၶႃႈၼင်ႇႁိုဝ်။ ဝႃႈၼင်ႇၼႆသေယဝ်ႉ၊- 26လႃႇပၢၼ်ႇၵေႃႈလၢတ်ႈလႄႈဝႃႈ၊ ၵႃႈတီႈမိူင်းႁဝ်းၼႆႉ ၸူဝ်ႈဢၼ်ဢမ်ႇပႆႇလႆႈပၼ်လုၵ်ႈယိင်းၵေႃႉယႂ်ႇယဝ်ႉၼၼ်ႉၸိုင်၊ ဢမ်ႇလႆႈပၼ်ၵေႃႉလဵၵ်ႉၵူၺ်ႉ။- 27ပႂ်ႉႁႂ်ႈတဵမ်ၸဵတ်းဝၼ်းမၼ်းၼၼ်ႉထႅင်ႈလူးၵွၼ်ႇတႃႉ။ ၵမ်းလိုၼ်းၵွပ်ႈပိူဝ်ႈတၢင်းဢၼ်မႂ်းလႆႈၶၢမ်ႇတၢင်းၸႂ်ႉတၢင်းသွႆတီႈၵဝ် ၸဵတ်းပီႊထႅင်ႈၼၼ်ႉလႄႈ ၵဝ်တၵ်းဢဝ်ၵေႃႉၼၼ်ႉဢၢပ်ႈပၼ်တီႈမႂ်းထႅင်ႈလူးၵွၼ်ႇဢေႃႈ၊ ဝႃႈၼင်ႇၼႆလႄႈ၊- 28ယႃႇၵုပ်ႈႁပ်ႉတုင်းဢဝ်လႄႈတဵမ်ၸဵတ်းဝၼ်းသေယဝ်ႉ၊ လႃႇပၢၼ်ႇဢဝ်လုၵ်ႈယိင်းမၼ်း ရႃႇၶေႇလႃႉၼၼ်ႉ ဢၢပ်ႈပၼ်ဢေႃႈ။- 29လႃႇပၢၼ်ႇဢဝ်မႄႈယိင်းၶႃႈမၼ်းပီႉလႁႃႇ ဢၢပ်ႈပၼ်တီႈလုၵ်ႈယိင်းမၼ်းရႃႇၶေႇလႃႉၼၼ်ႉပုၼ်ႈဢၼ်တၵ်းပဵၼ်မႄႈယိင်းၶႃႈဢေႃႈ။- 30ယႃႇၵုပ်ႈလႆႈၶဝ်ႈၸူးတီႈရႃႇၶေႇလႃႉလႄႈ ယဵင်ႈၶႅၼ်းႁၵ်ႉရႃႇၶေႇလႃႉၼႃႇသေလေႇဢႃႇဢေႃႈ။ ၵမ်းၼၼ်ႉသမ်ႉ ၶၢမ်ႇတၢင်းၸႂ်ႉတၢင်းသွႆတီႈမၼ်းၼၼ်ႉထႅင်ႈၸဵတ်းပီႊဢေႃႈ။

လုၵ်ႈလၢင်းယႃႇၵုပ်ႈ

31ထႃႇဝရႃႉၽြႃးႁူႉႁၼ်လွင်ႈဢၼ်လေႇဢႃႇလႆႈၶၢမ်ႇတၢင်းဢၼ်ၸင်းၼၼ်ႉလႄႈ ပၼ်ဢၶႂၢင်ႉတၢင်းဢၼ်ၵိူတ်ႇလဵင်ႉလုၵ်ႈ လဵင်ႉလၢင်းတီႈမၼ်းဢေႃႈ။ ရႃႇၶေႇလႃႉၸမ်ႉ၊ ပဵၼ်မႄႈမၼ်လႄႈ ဢမ်ႇမီးလုၵ်ႈမီးလၢင်း။- 32လေႇဢႃႇပႃးပတိၵ်ႉသၼ်ႇထေႇသေယဝ်ႉ၊ ၵိူတ်ႇလဵင်ႉလုၵ်ႈၸၢႆးမႃးလႄႈ ႁွင်ႉႁဵၵ်ႈၸိုဝ်ႈရူႉပိၼ်ႇဢေႃႈ။ လွင်ႈမၼ်းၸမ်ႉ မၼ်းဝႃႈ၊ ထႃႇဝရႃႉၽြႃး တူၺ်းႁၼ်တုၵ်ႉၶႃႉတၢင်းၽၢၼ်ၵဝ်ယဝ်ႉ။ ပိူဝ်ႈၼႆလႄႈ တေႃႈလဵဝ်ၼႆႉၽူဝ်ၵဝ်တၵ်းႁၵ်ႉၵဝ်ဢေႃႈ၊ ဝႃႈၼင်ႇၼႆဢေႃႈ။- 33ၵမ်းၼၼ်ႉ မၼ်းသမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉ၊ သမ်ႉဝႃႈ၊ ၵွပ်ႈပိူဝ်ႈဢၼ်ထႃႇဝရႃႉၽြႃးငိၼ်းလွင်ႈဢၼ်ၵဝ်လႆႈၶၢမ်ႇတၢင်းဢၼ်ၸင်းၼၼ်ႉလႄႈ မၼ်းၸဝ်ႈဢဵတ်းလူပၼ်လုၵ်ႈၸၢႆးၼႆႉတီႈၵဝ်ယဝ်ႉ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉသီႉမုၼ်ႇဢေႃႈ။- 34ၵမ်းၼၼ်ႉ မၼ်းသမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉ၊ သမ်ႉဝႃႈ၊ ၵွပ်ႈပိူဝ်ႈဢၼ် ၵဝ်လႆႈ ၵိူတ်ႇလဵင်ႉလုၵ်ႈၸၢႆးသၢမ်ၵေႃႉ တီႈၽူဝ်ၵဝ်လႄႈ၊ တေႃႈလဵဝ်ၼႆႉမၼ်းတၵ်းႁူမ်ႈၸႂ်ၵၼ်တင်းၵဝ်ဢေႃႈ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉလေႇဝီႉဢေႃႈ။- 35ၵမ်းၼၼ်ႉ မၼ်းသမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉ၊ သမ်ႉဝႃႈ၊ တေႃႈလဵဝ်ၼႆႉၵဝ်တၵ်း ယွင်ႈယေႃးထႃႇဝရႃႉၽြႃးဢေႃႈ၊ ဝႃႈၼင်ႇၼႆလႄႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉယူႉတႃႉဢေႃႈ။ ဝၢႆးၼၼ်ႉလုၵ်ႈမၼ်းထၢတ်ႇၵႂႃႇလႄႈ မၼ်းယင်းဢမ်ႇၵိူတ်ႇလဵင်ႉလုၵ်ႈလဵင်ႉလၢင်းလႄႈယူႇဢေႃႈ။

Currently Selected:

ငဝ်ႈၵမ်ႇၽႃႇ 29: CBMS

Highlight

Copy