1 ထိတ်ႉသႃႇလေႃးၼိၵ်ႈ 5
5
မႄးႁႅၼ်းဝႆႉပုၼ်ႈၸဝ်ႈၽြႃးတၵ်းမႃး
1ပီႈၼွင်ႉၶဝ်ဢိူၺ်း၊ လွင်ႈၶိင်ႇၵႃႇလႃႉတင်းလၢႆၸိုင်၊ ဢမ်ႇမီးတီႈဢၼ်တၵ်းတႅမ်ႈပၼ်ၵႂႃႇတီႈသူ။- 2ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ သူႁူႉလွင်ႈဢၼ်ဝၼ်းၸဝ်ႈၽြႃးတၵ်းမႃးၸိူဝ်ႉၼင်ႇဢၼ်ၽူႈလၵ်ႉမႃး ၶိင်ႇၵၢင်ၶိုၼ်းၼၼ်ႉယူႇသေႇၶျႃႇလီငၢမ်းဢေႃႈ။- 3ၼႂ်းမိူဝ်ႈဢၼ်ၶဝ်ယင်းတိုၵ်ႉလၢတ်ႈလႄႈဝႃႈ၊ မီးတၢင်းၼိမ်ယူႇဢေႃႈ။ လွတ်ႈတင်းၽေးယူႇဢေႃႈ၊ ဝႃႈၼင်ႇၼႆယူႇၼၼ်ႉၸိုင်၊ တၢင်းလူႉတၢင်းလႅဝ်တၵ်းႁွတ်ႈထိုင်ၵႃႈၼိူဝ်ၶဝ် ၶၼ်ၶၼ်ၽႂ်းၽႂ်း မိူၼ်ၸိူဝ်ႉၼင်ႇဢၼ်ဝူၺ်ႇတၼႃႇ တၢင်းဢၼ်ၵိူတ်ႇလဵင်ႉလုၵ်ႈႁွတ်ႈထိုင် ၵႃႈၼိူဝ်မႄႈယိင်း ဢၼ်ပႃးပတိၵ်ႉသၼ်ႇထေႇၼၼ်ႉလႄႈ ဢမ်ႇလႆႈမီးဢၶႂၢင်ႉတၢင်းဢၼ်လႆႈၵၢင်းလွတ်ႈ။
4ၵူၺ်းၵႃႈ၊ပီႈၼွင်ႉၶဝ်ဢိူၺ်း၊ လွင်ႈၼင်ႇႁိုဝ်ဝၼ်းၼၼ်ႉ တၵ်းလႆႈႁွတ်ႈမႃးၵႃႈၼိူဝ်သူၸိူဝ်ႉၼင်ႇၽူႈလၵ်ႉၼၼ်ႉၸိုင်၊ သူယူႇၼႂ်းဢၼ်လပ်းသိင်ႇဢမ်ႇၸႂ်ႈ။- 5သူၵႃႈမီးတင်းသဵင်ႈတင်းလူင် ပဵၼ်လုၵ်ႈဢၼ်လႅင်း၊ ပဵၼ်လုၵ်ႈၵၢင်ဝၼ်းဢေႃႈ။ ပဵၼ်လုၵ်ႈၵၢင်ၶိုၼ်း၊ ပဵၼ်လုၵ်ႈဢၼ်လပ်းသိင်ႇဢမ်ႇၸႂ်ႈ။- 6ပိူဝ်ႈဢၼ်ပဵၼ်ၼင်ႇၼႆလႄႈ ႁဝ်းယင်းဢမ်ႇၼွၼ်းလပ်းမိူၼ်ၸိူဝ်ႉၼင်ႇဢၼ် ၵူၼ်းတၢင်ႇတီႈတၢင်ႇလႅၼ် တင်းလၢႆၼွၼ်းလပ်း ယူႇၼၼ်ႉလႄႈ၊ မီးသမ်ႇမႃႇသတီႉယူႇသေလႄႈပႂ်ႉယူႇတႃႉႁဝ်း။- 7လွင်ႈမၼ်းၸမ်ႉ ၶဝ်ၸိူဝ်းဢၼ်ၼွၼ်းလပ်းယူႇၼၼ်ႉ ၸၢင်ႈၼွၼ်းလပ်းၶိင်ႇၵၢင်ၶိုၼ်းဢေႃႈ။ ၶဝ်ၸိူဝ်းဢၼ်မဝ်းလဝ်ႈမဝ်းၵမ်ၼၼ်ႉၵေႃႈ ၸၢင်ႈမဝ်းလဝ်ႈမဝ်းၵမ်ၶိင်ႇၵၢင်ၶိုၼ်းဢေႃႈ။- 8ႁဝ်းၸိူဝ်းဢၼ်ပဵၼ်လုၵ်ႈၵၢင်ဝၼ်းၸမ်ႉ၊ မီးသမ်ႇမႃႇသတီႉယူႇတႃႉႁဝ်း။ ဢဝ်ၶိူင်ႈပိူင်ဢၼ်ႁႄႉႁူဝ်ဢူၵ်းဢၼ်ဝႃႈ တၢင်းယုမ်ႇမၢတ်ႈ တင်းတၢင်းႁၵ်ႉၼၼ်ႉ ဢိၵ်ႇတင်းမွၵ်ႇႁူဝ်လဵၵ်းဢၼ်ဝႃႈ တၢင်းဢၼ်မုင်ႈထႃႈမွင်းထႃႈလူၺ်ႈလွင်ႈဢၼ် တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉတိုဝ်းယူႇတႃႉႁဝ်း။- 9ၽြႃးပဵၼ်ၸဝ်ႈၶၢၼ်းႁဝ်းဝႆႉ ႁႂ်ႈလႆႈၶၢမ်ႇတၢင်းၸႂ်မႆႈၶႆႈၸႃႉမၼ်းၸဝ်ႈဢမ်ႇၸႂ်ႈ၊ ၶၢၼ်းႁဝ်းဝႆႉႁႂ်ႈလႆႈ တၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈ ၸဝ်ႈႁဝ်း ယေႇသူႉၶရိၸ်ႈ၊- 10ဢၼ်ၶၢမ်ႇတၢင်းတၢႆပုၼ်ႈႁဝ်း ႁႂ်ႈႁဝ်း ပိၵ်ႉသမ်ႉတိုၼ်ႇယူႇသေဢမ်ႇဝႃႈ၊ ၼွၼ်းလပ်းယူႇသေဢမ်ႇဝႃႈ၊ လႆႈဢသၢၵ်ႈလိပ်းလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။- 11ပိူဝ်ႈၼႆလႄႈၵႃႈၼင်ႇဢၼ်သူႁဵတ်းယူႇတေႃႈလဵဝ်ၼႆႉၼၼ်ႉ၊ ၼင်ႇၵၼ်ၵၼ်တိုၵ်းယူင်းၵၼ်လႄႈ ၵေႃႉၼိုင်ႈလႄႈၵေႃႉၼိုင်ႈတႄႇ ႁဵတ်းၵၼ်ယူႇတႃႉ။
ၵႂၢမ်းသင်ႇသွၼ်လႄႈၵႂၢမ်းတူင်ႉတၵ်ႉလိုၼ်းသုတ်း
12လိူဝ်သေၼၼ်ႉ၊ ပီႈၼွင်ႉၶဝ်ဢိူၺ်း၊ ႁဝ်းတွင်းပၢၼ်ႇသူႁႂ်ႈသူႁူႉၸၵ်း ၶဝ်ၸိူဝ်းဢၼ်ႁဵတ်းတၢင်းဢၼ်ပွင်ဢမူႉၸဝ်ႈ ၵႃႈတီႈၼႂ်းသူ၊ တၢင်းဢၼ် ဢုပ်ႉပိူင်ႇသူၼႂ်းၸဝ်ႈၽြႃး၊ တၢင်းဢၼ်ပၼ်သတီႉတီႈသူၸိူဝ်းၼၼ်ႉလႄႈ၊- 13မီးတင်းၸႂ်ၸေႇတၼႃႇရူဝ်ႇသေႇၵူဝ်ယမ် ႁၵ်ႉပႅင်းၶဝ်ၼႃႇလူင်လၢင် ၵွပ်ႈပိူဝ်ႈလွင်ႈတၢင်းဢၼ်ၶဝ်ႁဵတ်းၼၼ်ႉဢေႃႈ။ ၵေႃႉၼိုင်ႈလႄႈၵေႃႉၼိုင်ႈ ယူႇထုၵ်ႇထုၵ်ႇမေႃမေႃၵၼ်တႃႉ။
14ပီႈၼွင်ႉၶဝ်ဢိူၺ်း၊ ၵႂၢမ်းဢၼ်ႁဝ်းတိုၵ်းယူင်းၸူဝ်းဢဝ်သူၸမ်ႉ၊ ပၼ်သတီႉတီႈၶဝ်ၸိူဝ်းဢၼ် ႁဵတ်းဢမ်ႇတြႃးၼၼ်ႉတႃႉ။ ပၼ်ႁႅင်းတီႈၶဝ်ၸိူဝ်းဢၼ်ၸႂ်လဵၵ်ႉၸႂ်ဢူၼ်ႈၼၼ်ႉတႃႉ။ ထွၵ်ႈၵမ်ႉၶဝ်ၸိူဝ်းဢၼ်ႁႅင်းလဵၵ်ႉႁႅင်းၵေႇၼၼ်ႉတႃႉ။ ႁႂ်ႈမီးၸႂ်ဢၼ်ယႂ်ႇဢၼ်ယၢဝ်း တီႈၵူၼ်းတင်းသဵင်ႈတင်းလူင်တႃႉ။- 15လွင်ႈၼင်ႇႁိုဝ်ၽူႈလႂ်တၵ်းဢမ်ႇၶိုၼ်းတွပ်ႇၶိုၼ်းတႅၼ်း တၢင်းဢၼ်ၽိတ်းပိူင်ႈၼၼ်ႉၵႃႈတီႈပိူၼ်ႈတၢင်ႇၵေႃႉၼၼ်ႉၸိုင် ႁဵတ်းသတီႉလႄႈ ၵျူဝ်းၸႃးႁဵတ်းၵျေးၸူးတီႈၵေႃႉၼိုင်ႈလႄႈၵေႃႉၼိုင်ႈဢိၵ်ႇတင်းတီႈၵူၼ်းတင်းသဵင်ႈတင်းလူင်ယူႇ ၵူႈၶိင်ႇၵူႈၶႃႇတႃႉ။
16မီးတၢင်းဢၼ်သိူဝ်းပျေႃႇယူႇသေႇသေႇတႃႉ။- 17ႁဵတ်းသူးတွင်းပထၼႃႇယူႇတႃႇသေႇတႃႉ။- 18ၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉယွင်ႈယေႃးၵျေးၸူးၸဝ်ႈတႃႉ။ လွင်ႈမၼ်းၸမ်ႉ ၼင်ႇႁိုဝ်သူတၵ်းၵမ်ၵျၢင်ႉၸိူဝ်ႉၼင်ႇၼၼ်ၸိုင်၊ ၽြႃးပဵၼ်ၸဝ်ႈမီးဢလူဝ်ႇၼႂ်းယေႇသူႉၶရိၸ်ႈဢေႃႈ။
19ယႃႇပေႁႂ်ႈဢႁုင်ႇဝီႉၺိၺ်ႇၸဝ်ႈလႆႈထၢတ်ႇလႆႈယဵၼ်။- 20ယႃႇပေမၢတ်ႈတၢင်းဢၼ်ႁဵတ်းပရေႃးၽႅတ်ႈၼၼ်ႉ ပဵၼ်ဢၼ်ဢမ်ႇပွင်ႇလွင်ႈၵႃႈသင်။- 21ၸၢမ်းတူၺ်းလွင်ႈတၢင်းၵႃႈမီးတင်းသဵင်ႈတင်းလူင်သေလႄႈ ယိပ်းၵမ်ဢဝ်ဢၼ်လီဢၼ်ငၢမ်းယူႇသေႇသေႇတႃႉ။- 22ဝႄႈပႅတ်ႈလွင်ႈတၢင်းဢၼ်ဢမ်ႇလီဢမ်ႇငၢမ်းၵူႈၸိူဝ်ႉၵူႈမဵဝ်းတႃႉ။- 23ႁႂ်ႈၽြႃးပဵၼ်ၸဝ်ႈ၊ ၸဝ်ႈတၢင်းၼိမ်တူဝ်ၸဝ်ႈၵဝ်ႇၼၼ်ႉ ႁႂ်ႈသူမူတ်းၸၢင်ႇတင်းသဵင်ႈတင်းမူတ်းသေၵမ်းလူၺ်ႈ။ ၼင်ႇႁိုဝ်ဝီႉၺိၺ်ႇသူ တင်းၸႂ်သူ တင်းတူဝ်ၶၼ်ႇထႃႇသူတင်းသဵင်ႈတင်းမူတ်း တၵ်းၵၢင်းလွတ်ႈတင်းဢၶႂၢင်ႉ တီႈဢၼ်တၵ်းတၢင်ႇဢပႅတ်ႈၼႂ်းမိူဝ်ႈဢၼ်ၸဝ်ႈႁဝ်းယေႇသူႉၶရိၸ်ႈမႃးၼၼ်ႉၸိုင်၊ ႁႂ်ႈမၼ်းၸဝ်ႈပႂ်ႉၸွႆႈပႂ်ႉထႅမ်ယူႇသေၵမ်းလူၺ်ႈ။- 24ၵေႃႉဢၼ်ႁွင်ႉဢဝ်သူၼၼ်ႉ ပျေႉၸုမ်ႇတင်းသဵတ်ႈၸႃႇလႄႈ တၵ်းႁဵတ်းၸိူဝ်ႉၼင်ႇၼၼ်ႉဢေႃႈ။
25ပီႈၼွင်ႉၶဝ်ဢိူၺ်း၊ သူးတွင်းပုၼ်ႈႁဝ်းတႃႉ။
26ဢဝ်တင်းတၢင်းၼူမ်ဢၼ်မူတ်းၸၢင်ႇ တၵ်ႉလၢတ်ႈပီႈၼွင်ႉတင်းသဵင်ႈတင်းလူင်တႃႉ။
27ၼင်ႇႁိုဝ်တၵ်းႁႂ်ႈၽတ်းလိၵ်ႈၼႆႉ တီႈပီႈၼွင်ႉဢၼ်မူတ်းၸၢင်ႇတင်းလၢႆၼၼ်ႉၸိုင်၊ ၵဝ်တိူင်ႇၸဝ်ႈၽြႃးလႄႈ တိၵ်ႈထၢၼ်ႇပၼ်သဵတ်ႈၸႃႇတီႈသူဢေႃႈ။
28ႁႂ်ႈၵျေးၸူးၸဝ်ႈႁဝ်းယေႇသူႉၶရိၸ်ႈမီးၼိူဝ်သူသေၵမ်းလူၺ်ႈ။ ဢႃႇမိၼ်ႇ။
လိၵ်ႈဢေႃးဝႃႇတႃႉထိတ်ႉသႃႇလေႃးၼိၵ်ႈၽိုၼ်ပထမႃႉယဝ်ႉယဝ်ႉဢေႃႈ။
Currently Selected:
1 ထိတ်ႉသႃႇလေႃးၼိၵ်ႈ 5: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
