1 ထိတ်ႉသႃႇလေႃးၼိၵ်ႈ 4
4
ဢသၢၵ်ႈတၢၼ်းဢၼ်ထုၵ်ႇၸႂ်ၽြႃးပဵၼ်ၸဝ်ႈ
1ၵႂၢမ်းဢၼ်ယင်းၵိုတ်းယင်းၵျၢၼ်ႇၸမ်ႉ၊ ပီႈၼွင်ႉၶဝ်ဢိူၺ်း၊ ၵႃႈၼင်ႇဢၼ်သူလႆႈၶၢမ်ႇဢဝ်လွင်ႈဢၼ်သူ တၵ်းလႆႈၵမ်ၵျၢင်ႉၸိူဝ်ႉၼင်ႇႁိုဝ်။ တၵ်းလႆႈထုၵ်ႇၸႂ်ၽြႃးပဵၼ်ၸဝ်ႈၸိူဝ်ႉၼင်ႇႁိုဝ်ၼၼ်ႉတီႈႁဝ်းယဝ်ႉလႄႈ တေႃႈလဵဝ်ၵေႃႈၵမ်ၵျၢင်ႉယူႇၼၼ်ႉ၊ ၼင်ႇႁိုဝ်သူတၵ်းပျေႉၸုမ်ႇလိူင်ႇၸႂ်ၼမ်ၵိုၼ်းထႅင်ႈၸိုင်၊ ႁဝ်းဢိင်ၸဝ်ႈယေႇသူႉလႄႈ တွင်းပၢၼ်ႇတိုၵ်းယူင်းၸူဝ်းဢဝ်သူဢေႃႈ။- 2သူႁူႉလွင်ႈဢၼ်ႁဝ်းဢဝ်တင်းဢၶႂၢင်ႉၸဝ်ႈယေႇသူႉ ဢၢပ်ႈပၼ်ပိင်းၺၢပ်ႈၸိူဝ်ႉၼင်ႇႁိုဝ်တီႈသူၼၼ်ႉယူႇဢေႃႈ။- 3ဢလူဝ်ႇၽြႃးပဵၼ်ၸဝ်ႈၸမ်ႉ၊ ပဵၼ်လွင်ႈၼင်ႇႁိုဝ် သူတၵ်းဝႄႈပႅတ်ႈ မေႇထုင်ႇဢၼ်ဢမ်ႇတြႃးလႄႈမူတ်းၸၢင်ႇယူႇ၊- 4ၼင်ႇႁိုဝ်သူၵႃႈမီးတင်းသဵင်ႈတင်းလူင်တၵ်းဢမ်ႇမီး ၵီႉလေႇသႃႇတၢင်းဢၼ်ၸပ်းဢၼ်ၸွႆး၊- 5မိူၼ်ၸိူဝ်ႉၼင်ႇဢၼ်ၵူၼ်းသႃႇသၼႃႇပႃႉတင်းလၢႆ ဢၼ်ဢမ်ႇႁူႉၽြႃးပဵၼ်ၸဝ်ႈၼၼ်ႉလႄႈ မီးတၢင်းဢၼ်မူတ်းၸၢင်ႇ ဢိၵ်ႇတင်း တၢင်းဢၼ်သရေႇသၢင်ႇထုၵ်ႇလီငၢမ်း တူဝ်ၸဝ်ႈၵဝ်ႇၸၢင်ႈပႂ်ႉတူဝ်ၸဝ်ႈၵဝ်ႇယူႇ၊- 6လွင်ႈၼင်ႇႁိုဝ်တၵ်းဢမ်ႇလႆႈပူၼ်ႉလိူဝ်လႄႈ ဢဝ်တင်းပရီႉယႄႇၽိတ်းပိူင်ႈပီႈၼွင်ႉၼႂ်းလွင်ႈတီႈႁဵင်းၼႆႉ ယူႇၼၼ်ႉဢေႃႈ။ လွင်ႈမၼ်းၸမ်ႉ ၸဝ်ႈၽြႃးတၵ်းၸီႇယၢင်ႇတြႃးၽၢႆႇၶဝ်ၸိူဝ်းဢၼ် ၶၢမ်ႇတၢင်းဢၼ်ၽိတ်းပိူင်ႈ ၸိူဝ်ႉၼင်ႇၼၼ်တင်းသဵင်ႈတင်းလူင် မႅၼ်ႈၵႃႈၼင်ႇဢၼ်ႁဝ်းႁေႃးလၢတ်ႈမိူဝ်ႈဢွၼ်ၼႆႉၼၼ်ႉလႄႈ ပၼ်သတီႉၼၼ်ႉဢေႃႈ။- 7ၽြႃးပဵၼ်ၸဝ်ႈႁွင်ႉဢဝ်ႁဝ်းႁႂ်ႈလႆႈၵူဝ်ႈၵိူၵ်ႇဢမ်ႇၸႂ်ႈ။ မၼ်းၸဝ်ႈႁွင်ႉဢဝ်ႁဝ်းႁႂ်ႈလႆႈမူတ်းၸၢင်ႇဢေႃႈ။- 8ပိူဝ်ႈၼႆလႄႈၵေႃႉဢၼ်ထဵင်ပႅတ်ႈၼၼ်ႉ၊ ထဵင်ပႅတ်ႈၵူၼ်းဢမ်ႇၸႂ်ႈ။ ထဵင်ပႅတ်ႈၽြႃးပဵၼ်ၸဝ်ႈဢၼ်ပၼ်ဝီႉၺိၺ်ႇဢၼ်မူတ်းၸၢင်ႇမၼ်းၸဝ်ႈတီႈသူၼၼ်ႉဢေႃႈ။
9လွင်ႈတၢင်းဢၼ်ပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်ႁၵ်ႉၵၼ်ၼၼ်ႉၸိုင်၊ ဢမ်ႇမီးလွင်ႈဢၼ်တၵ်းလႆႈတႅမ်ႈပၼ်ၵႂႃႇတီႈသူ။ ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ သူပဵၼ်ၵေႃႉဢၼ်ၽြႃးပဵၼ်ၸဝ်ႈ သင်ႇသွၼ်ပၼ်ႁႂ်ႈၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ႁၵ်ႉၵၼ်ဢေႃႈ။- 10လိူဝ်သေၼၼ်ႉဢမ်ႇၵႃး၊ တီႈပီႈၼွင်ႉၵႃႈဢၼ်မီးယူႇၵႃႈၼႂ်းမိူင်းမႃႇၵေႇတေႃးၼီႉ ၵူႈတီႈၵူႈလႅၼ်ၼၼ်ႉၵေႃႈ၊ သူႁဵတ်းၸိူဝ်ႉၼင်ႇၼၼ်ယူႇဢေႃႈ။ ၼႂ်းဝႃႈၼၼ်သေၵေႃႈ ပီႈၼွင်ႉၶဝ်ဢိူၺ်း၊ လွင်ႈၼင်ႇႁိုဝ်သူတၵ်းပျေႉၸုမ်ႇလိူင်ႇၸႂ်ၼမ်ၵိုၼ်းထႅင်ႈ၊- 11ဢိၵ်ႇတင်းလွင်ႈၼင်ႇႁိုဝ် သူတၵ်းဢဝ်တင်းၸႂ်ၸေႇတၼႃႇၵႆႉၵျူဝ်းၸႃးယူႇၼိမ်ၼိမ်လႄႈ ပွင်ႁဵတ်းဢမူႉတူဝ်ၸဝ်ႈၵဝ်ႇယူႇ သေလႄႈ ဢဝ်တင်းမိုဝ်းတူဝ်ၸဝ်ႈၵဝ်ႇသၢင်ႈႁဵတ်းၸွမ်း ၵႃႈၼင်ႇဢၼ်ႁဝ်းသင်ႇလၢတ်ႈဝႆႉ ၵႃႈတီႈသူမိူဝ်ႈဢွၼ်ၼႆႉၼၼ်ႉ၊- 12ႁႂ်ႈသူလႆႈၵမ်ၵျၢင်ႉဢၼ်သၢင်ႇထုၵ်ႇလီငၢမ်း ၵႃႈတီႈၽၢႆႇၼႃႈၵူၼ်းၵႃႈၼွၵ်ႈတင်းလၢႆလႄႈ ဢမ်ႇလူဝ်ႇထႅင်ႈသေၸိူဝ်ႉသေပိူင်ၸိုင်၊ ႁဝ်းတိုၵ်းယူင်းၸူဝ်းဢဝ်သူဢေႃႈ။
လွင်ႈၸဝ်ႈၽြႃးတၵ်းၶိုၼ်းမႃး
13ပီႈၼွင်ႉၶဝ်ဢိူၺ်း၊ လွင်ႈၼင်ႇႁိုဝ်သူ တၵ်းဢမ်ႇၸႂ်လဵၵ်ႉၸိူဝ်ႉၼင်ႇဢၼ် ၵူၼ်းတၢင်ႇတီႈတၢင်ႇလႅၼ် ဢၼ်ဢမ်ႇမီးတၢင်းဢၼ် မုင်ႈထႃႈမွင်းထႃႈတင်းလၢႆၼၼ်ႉ ၸႂ်လဵၵ်ႉၼၼ်ႉၸိုင်၊ ႁဝ်းဢမ်ႇမီးဢလူဝ်ႇၶႂ်ႈႁႂ်ႈသူယင်းဢမ်ႇႁူႉလွင်ႈတၢင်း ၶဝ်ၸိူဝ်းဢၼ်ၼွၼ်းလပ်းယဝ်ႉၼၼ်ႉလႄႈယူႇ။- 14ပေႃးႁဝ်းယုမ်ႇလွင်ႈဢၼ်ယေႇသူႉတၢႆယဝ်ႉၸင်ႇ သမ်ႉလုၵ်ႉၶိုၼ်းၼၼ်ႉၸိုင်၊ မိူၼ်ၸိူဝ်ႉၼင်ႇၼၼ်၊ ၶဝ်ၸိူဝ်းဢၼ်ၼွၼ်းလပ်းၼႂ်းယေႇသူႉယဝ်ႉၼၼ်ႉၵေႃႈ ၽြႃးပဵၼ်ၸဝ်ႈ တၵ်းဢဝ်မႃးသူင်ႇလူၺ်ႈၵၼ်တင်းၸဝ်ႈၼၼ်ႉဢေႃႈ။
15ႁဝ်းသမ်ႉဢဝ်တင်းပျႃႇတိၵ်ႈၸဝ်ႈၽြႃးဝႃႈထႅင်ႈၸမ်ႉ၊ မိူဝ်ႈဢၼ်ၸဝ်ႈၽြႃးမႃးၼၼ်ႉၸိုင်၊ ႁဝ်းၸိူဝ်းဢၼ်ဢသၢၵ်ႈယင်းလိပ်းလႄႈ ၵိုတ်းၵျၢၼ်ႇယူႇၼႆႉ တၵ်းလႆႈတူၵ်းတီႈတူၵ်းလႅၼ် ဢွၼ်တၢင်းၶဝ်ၸိူဝ်းဢၼ်ၼွၼ်းလပ်းယဝ်ႉၼၼ်ႉဢမ်ႇၸႂ်ႈ။- 16တူဝ်ၸဝ်ႈၽြႃးတၵ်းပႃးဢဝ်တင်းတၢင်းဢၼ်ႁွင်ႉသႅၼ်ႇ၊ တၢင်းဢၼ်ၶုၼ်တမၢၼ်ႇၵၢင်ႁၢဝ်ပၼ်သဵင်၊ တၢင်းဢၼ်ပဝ်ႇၶရႃႇၽြႃးပဵၼ်ၸဝ်ႈၸိူဝ်းၼၼ်ႉ လုၵ်ႉသေၵႃႈၼိူဝ်မိူင်းၵၢင်ႁၢဝ်လူင်းမႃးလႄႈ ၶဝ်ၸိူဝ်းဢၼ်တၢႆၼႂ်းၸဝ်ႈၶရိၸ်ႈယဝ်ႉၼၼ်ႉ တၵ်းလႆႈလုၵ်ႉၶိုၼ်းဢွၼ်တၢင်းဢေႃႈ။- 17မိူဝ်ႈၼၼ်ႉ ႁဝ်းၸိူဝ်းဢၼ်ဢသၢၵ်ႈယင်းလိပ်းလႄႈ ၵိုတ်းၵျၢၼ်ႇယူႇၼႆႉ တၵ်းလႆႈၶၢမ်ႇတၢင်းဢၼ်ယွင်ႈဢုမ်ႈၶိုၼ်ႈၵႂႃႇ ၵႃႈၼိူဝ်မွၵ်ႇၵုမ်ႈႁႂ်ႈလႆႈႁွတ်ႈထိုင် ၵႃႈတီႈၸဝ်ႈၽြႃးၼႂ်းဢႃႇၵႃႇသႃႉ ၵၢင်ႁၢဝ်ၼၼ်ႉလႄႈ ယူႇလူၺ်ႈၵၼ်တင်းၸဝ်ႈၽြႃးယူႇတႃႇသေႇဢမ်ႇထၢတ်ႇဢေႃႈ။- 18ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈ ၵေႃႉၼိုင်ႈလႄႈၵေႃႉၼိုင်ႈ ဢဝ်ၵႂၢမ်းၼႆႉႁႂ်ႈၵၼ်သၢၵ်ႈသႃႇတႃႉ။
Currently Selected:
1 ထိတ်ႉသႃႇလေႃးၼိၵ်ႈ 4: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
