Moa Tïïc Nyïïatwieli 5

Luum Ananaya Ki Cïïe Ma Capaayra

1'Ba da dhaanhø mør mo nyeŋŋe cwøl ni Ananaya ki cïïe ma Capaayra. Eni ŋøøpe adwøk pwödhö. 2'Ba gwel møøk akan paac ni ŋäc cïïe, ni käl thäŋ gwel keerge ni peeth ge nyïm nyïïatwieli. 3'Ba Piter aköö, na «?Ananaya, aŋø ni ö Ceethanni ni pääŋ cwïnyï en, ki man cäänï ki tööt jï Jwïëc Jwøk na en kur keere, ni kanï thäŋ gwet pwödhö en? 4?Aŋø, kanya poot pwödhö ni kärï dwøk pwödhö, ba bëëdö na marï? ?'Ba køøre na nø dwøgï gø pwödhö, paa wïïï ki mana diï tïïö ki gwete? ?Aŋø na tïïyï gïn en ki cwïnyï? Ï ba cään jiy ki tööt, 'ba ï cäänna Jwøk.» 5'Ba kanya ö Ananaya na wïny luupögøøni, ena pädhö ni thøøe. Ni ö lwärri mo päl ni ö bäät jøøa wïny gïnögø bëët. 6'Ba jak ma wøpe aö maal ni bøønyge gø, ni bielge gø wøk, ni koonyge gø.

7'Ba na ruue ki kany mo jïtö ki kar caae adäk, cïïe aläm køøre ni gïna tägö kuue. 8Ni kö Piterri jïre, «Caanï jïra. ?Beege japa ŋeewu pwödhö ki gø ii?»

Ni kö nyijøøgø, «Yaa, bee geni.»

9'Ba Piter aköö jïre, na «?Aŋø ni jïëyu ki man päänynyu Jwïëc Wuuö? Neen, jøøa koony cwørï karge cään ki duuö ennø; 'ba ïïno bielge wøk thuwø.» 10Ni put dhaaŋŋøgø päth tiete ni thøøe. Ni ö jaga näk wøpe ni dunyge ni jootge gø no othøw, ni bielge gø wøk, ni koonyge gø buut cwøre. 11Ni ö lwärri mo päl bäät acooŋ Jwøk bäre, ki bäät jøøa wïny gïïögø bëët.

Luum Ŋïïce Ki Gïï Mo Rëëma Ec Mo Thööth Moa Tïïc Ki Røk Nyïïatwieli

12'Ba kanyøgø da ŋïïce mo thööth ki gïï mo rëëma ec ma atïïc dï jiy ki røk nyïïatwieli. 'Ba jøøa jïëy ki Jecu bëët, dëëtge wø cooŋge ya agööl Cølöman. 13Ni bäŋe ŋat mo omaar cwïnye mak røk jiy møga ki man dwäte ki geni. 'Ba geno wøør jiyi døøc. 14'Ba jiy mo thööth ajïëy ki Wuuö ni dwätge ki geni ni kaala moa dïkwøŋ, ni gena jiy mo thööth døc na cwøw ki mään. 15Ni tïm jiyi ni ge kïtha wøk ki jø täwe uutjïëthe, ni pïëlge geni bäät pëëmme ki pëëne, kiper nee kany wäro ö Piterri ki buutge, nee tïmme pööth bäät møøk dïge. 16'Ba jiy moa käl yïth mïëya en ŋää Jerucalem, dëëtge acooŋge kanya ciel thuwø, ni ge käla jø täwe ki jøøa dëëtge da juu mo reyø. Ni dwøk dëëtge karge bëët.

Kanya Kïth Nyïïatwieli Øt Twöc

17'Ba Kwääy Lam Mana Dwøŋ ree athïïŋe ki jøøa en buute, na näk jø Cajucith. 'Ba kiper mana näk geno këëyö døc, 18nyïïatwieli amakge ni kïthge ge øt twöc. 19'Ba na tïme na wäär, nyïïatwiel maal mør mar Wuuö odhuuth øt twöc ajabe ni käl geni wøgø, ni kööe, 20ni «Cou ni cuŋŋu yi kal mar Øt Jwøk Mana Dwøŋ ni caannu luum kwøwøgø bäre jï jiy.» 21'Ba na nø wïnyge gïnögø, gena døny yi kal mar Øt Jwøk Mana Dwøŋ ni cäŋ tuulö, ni pööge.

'Ba kanyøgøøni, Kwääy Lam Mana Dwøŋ aöö ki jøøa en buute, ni cooŋ kwääc løøe ki jaae mo Icriel, ni jääk baŋ jøøa twöc nee ge käli. 22'Ba kanya ci dïkuye mo Øt Jwøk, ge kärge joodø øt twöc. Ni døøkge ni caange gø, 23ni «Øt twöc ajootwa ni poot no odëëdö kare, ni jøøa kurö cuŋŋa dhøk odhuule. 'Ba na japwa gø, bäŋ dhaanhø mo ewa joodø yie.»

24'Ba na ö kwäärö mar dïkuye mo Øt Jwøk Mana Dwøŋ ki kwääc laam na wïnyge luummögø, yïthge athäŋŋö, ni köge, ni «?Cuŋ gïn otïme na ŋø?»

25'Ba kanyøgø, ŋat mør aöö ni caan gø jïge, ni «Raŋŋu, jøøa kïthu øt twöc, ge cuŋŋö Øt Jwøk Mana Dwøŋ, ni ge pöö ki jiy.»

26Køøre kwääc dïkuye ki jiye gena put cøø ni kälge geni. 'Ba bäŋ gïn mo raac mo ege tïïö dëëtge, kiper na lwäcge ni ge këër jiyi këërö ki kïte.

27'Ba na nø kälge ge, gena kïthge nyïm kwääc løøe. Ni ö Kwääy Lammi Mana Dwøŋ ni pëëny geni, 28ni kööe, na «?Aŋø, u kärwa mänö ki man pööu ki nyeŋŋøgø? 'Ba kawaane Jerucalem apääŋŋu ki pwöc maru, nou manynya man kälu rem ŋatøgø bäätwa.»

29'Ba adwøk Piterri ki nyïïatwieli møga, ni «Beerra man lwäärwa Jwøk ki man lwäärwa jiy. 30Kiper Jwø kwäyø, Jecu atïŋ maal, ŋata ŋaabu bäät jaath ni 'nägu gø. 31'Ba ena cuum Jwøki bäät cwïïe ni tïïc gø na Kwäärö ni näk Pïëmi, kiper nee jø Icriel wëëk løk cwïnyge, ni wec raay moge. 32'Ba waana lïŋŋe kiper gïïögø, këël Jwïëc Jwøk thuwø na en kur keere na cïp Jwøki jï jø wø leŋ dwøre.»

33'Ba kanya wïnyge gïnögø, cwïnyge aränynyö døc, ni tïmge ni ge manynya man 'näkge geni. 34'Ba ŋat Paricith aciel røk kwääc løøe, mo nyeŋŋe cwøl ni Gameeliel, ŋat ma dïpööy mar ciik Jwøk mo owøør jiyi bëët, ree athïïŋe, ni cïpe ki dwøl nee jøøgø kïth wøk ki kany mo thiinh. 35Ni kööe jïge, ni «U na jø Icriel, gwøgu røgu ki gïno tïïyu dëët jøøgø. 36Kiper nïr acääŋŋe Thuda ree athïïŋe ni døøc dëëre mo dwøŋ. Ni ö jiyi mo jïtö ki kar dïpe aŋween ni cige dëëre. 'Ba ena 'näk, ni ö jøøa cäädhö køøre ni keethge, ni tïm gïnöca ni bäŋgø. 37Køør ŋatøgø, yïth nïr wø kwaan jiy yie, Juudac nyï Galili ree athïïŋe, ni kän dëëre ki jiy mo cäädhi køøre. 'Ba nyenøgø thuwø athøw, ni ö jøøa cäädhö køøre ni keethge. 38Kiper manøgønø, ri luummi en, aani, a cäänna uuni, ni bëëdu ni karu bäär ki jøøgø ni weyu ge. Kiper ni näk luummögø ki gïno ni tïïcge enø käla baŋ jiy, oränynyi. 39'Ba ni näk marge käla baŋ Jwøk, ge ba maaru böötö. Kanymør tïmö nou gëëmö ka Jwøk.»

40Kanyøgø dwøre aleŋge. Ba na nø cwølge nyïïatwieli yi øtø, gena pwötge ni cemge ge nee nyeŋ Jecu ba caange këët, ni wëëkge ge wääth. 41Kanyøgøøni gena put ö wøk ki nyïm kwääc løøe ni aacge, ni yïthge met kiper gïna wëëk Jwøki geni nee jwørge kiper nyeŋŋøgø. 42'Ba yïth nïne bëët yi kal mar Øt Jwøk Mana Dwøŋ ki yïth mïëcge, pwöc kärge wiiø ki man køpge luumma nyään na met ni Jecu beeye Krictø.

Currently Selected:

Moa Tïïc Nyïïatwieli 5: AnyuB

Highlight

Copy

Compare