Moa Tïïc Nyïïatwieli 4

Kanya Kïth Piter Ki Jøøn Nyïm Jø Løøk

1'Ba kanya poot Piterri ki Jøøn ni ge cäänna jiy, kwääc laam ki kwääy lwaak mar jø wø koor Øt Jwøk Mana Dwøŋ, ki jø Cajucith, gena ö baŋge. 2Ni geno gootø ki ge kiper na pwönyge jiy, ni køpge gø ni jiy duua wøk ki yi thøø ki ri Jecu. 3Ni ö geni ni makge ge ni kïthge geni øt twöc gøøc amöölla, kiper piny onø tïmö na wäär. 4'Ba jiy mo thööth moa wïny luum Jwøk gena jïëy ni ŋääthge. 'Ba jøøka jïtö ki kume abïïc.

5'Ba na tïme na amöölla kwääri, ki jaae, ki dïpööye mo ciik Jwøk gena cuuŋö yi Jerucalem, 6ki Anna na näk Kwääy Lam Mana Dwøŋ, ki Keepa, ki Jøøn, ki Alekdhander, ki tuuŋ Kwääy Lam Mana Dwøŋ bëët. 7'Ba na nø cïpge Piter ki Jøøn piny dïge, gena pëënyge, na «?A teeŋ teega ŋø wala a nyeŋŋa ŋø na tïïyu gïn ki gø?»

8'Ba kanyøgø Piter na cwïnye päŋ ki Jwïëc Jwøk na en kur keere, aköö jïge, ni «U na kwääc jiy ki u na jaae, 9nee u löö ka wa dïcäŋi kiper gïna beer na tïïc dëër ŋata näk puuth, kiper tier køny mana køny ŋatøgø ki gø, 10wär ŋäyu bëët, u ki jø Icriel bëët, ni beeye nyeŋ Jecu Krictø nyï Nadhareth, na 'nägu bäät jaadha no odëëdö na tïŋ Jwøki maal ki yi thøø, na wëëk dëër ŋatøgø ni cuŋŋi nyïmmu enø døø kare. 11Ni beeye ‹kïnna kwierru, u na dïgëëte, na tïmö na cöödhi mar gøøt.›#Dut Pwøc 118:22 12Kiper bäŋ dhaanhø mør mo doo piem jiy. Kiper bäŋ nyeŋ mør bäät piny bäre mo ocïbö dï jiy mo ø doo piemø ki køøre.»

13'Ba na neenge Piter ki Jøøn ni cwïnyge da cer, ni ŋäcge ni jøøgø kär pwönynyö ni gena jiy jaak, yïthge athäŋŋö, ni ŋecge gø ni gena jøøa bëëdö ki Jecu. 14'Ba na neenge ŋata køny ni cuŋŋö buutge, gena tïmö ni bäŋ gïn mo maarge caan. 15'Ba na nø köömge geni ni daakge rege nyïm kwääc løøe, gena cäänö keerge, 16ni köge, na «?Agïnaŋø noo tïïø ki jøøi? Kiper ŋïï mo dwøŋ atïïc ki røkge, ni ŋäc jø Jerucalemmi bëët, ni ba løny jïïø ki man mooŋø gø. 17'Ba kiper luummögø nee ba nyaae këët dï jiy, beerra man köömmø ge, nee nyeŋŋøgø ba caange jï dhaanhø mør këët.» 18Kanyøgø nø, gena cwølge ni cemge ge nee ge ba cäänge wala ge pöö ki nyeŋ Jecu këët na bäre bäre.

19'Ba adwøk Piterri ki Jøøn jïge, ni köge, ni «Nee beer jï Jwøk ki man wïnywa luummu ni kaala mare, ŋølu piny. 20Kiper waani mana jootwa ki mana wïnywa ba maarwa wec ki caan.» 21'Ba na nø ŋwönyge ge døøc, gena wëëkge wääth, ni bäŋ jöö mo ege joodø ki man pwötge ge, kiper gïno caan jiyi. Kiper jiy bëët Jwøk apwøcge kiper gïna tägö. 22Kiper ŋatøgø na køny ki jöö mo rëëma ec enø, cwiiye jïtö ki pïëraŋween ki wïthge.

Luum Lam Mar Jøøa Jïëy

23'Ba Piter ki Jøøn kanya pät geni, gena døø baŋ nyïïawäätge ni caange gïïa caan kwääc laammi ki jaae jïge. 24'Ba na wïnyge gø, döötge atïŋge maal karge bëët jï Jwøk, ni köge, ni «Wuuö Jwøk na näk Kwäärö, ï na cwääc maal ki piny ki näm ki jammi bëët moa en yïthge, 25ïïna kwøŋ cäänö ki dhi kwarwa ma Deebit na näk dhaanhnhï na caanï ki ri Jwïëyï na en kur keere, na kööï,

«na ‹?Aŋø na wëër juurre,

ni cät jiyi ki gïï ma baal jaak en?

26Nyec piny dëëtge ege thïïŋö

ni ö kwääri ni dwätge kanya ciel

ni nywääkge dëër Wuuö Jwøk, ki dhaanhnhe na näk ee jierø.›#Dut Pwøc 2:1-2

27Kiper ka adïëri møn, yi paani en, Eerat ki Pøntia Paylat, ki juurre ki jø Icriel, gena dwätö ni nywääkge dëër Dhaanhnhï ma Jecu na en kur keere, na näk iï jierø. 28Ni ge tïïya gïna näk iï cooŋø ki cwïnyï ki teek marï cøøn ni doo tïmö. 29'Ba kawaane, ï na Wuuö, neen luupa reyø na caange, ni wëëgï laagï caan luummï ni cwïnyge da cer ni bäŋ lwär, 30kany bëëdï ni cerï iï rwääö baŋ køny en, ni ö ŋïïce ki gïï mo rëëma ec ni tïïi ki køør nyeŋ Dhaanhnhï ma Jecu na en kur keere.»

31'Ba kanyøgøøni na lønyge ki lam, kanya näk dëëtge ege cooŋ yie ree ajäŋe, ni pääŋ cwïnyge bëët ki Jwïëc Jwøk na en kur keere. Ni køpge luum Jwøk ni cwïnyge da cer.

Luum Nywaak Jammi

32'Ba kanyøgø jøøa näk ojïëy cwïnyge aciel ni jwïëcge aciel, ni bäŋ dhaanhø aciel dïge mo köö ni japa en jïre moe keere. 'Ba geni japge anywaakge na aciel bëët. 33'Ba nyïïatwieli gïr duun Kwäärö ma Jecu wøk ki yi thøø akøpge ni ge teek døc, ni met ec mo päl ena bäätge. 34Ni bäŋ dhaanhø mo bëëdö ni can dïge, kiper jøøa jïge da ŋøøm ki uudi, gïïögø adwøkge pwöth, ni kälge japa jootge ri gïïa dwøkge pwöth, 35ni peethge ge nyïm nyïïatwieli, ni pääŋge ge jï jøøa näk ceŋge orëëm. 36Kaawat manøgø thuwø, da dhaanhø ma nyï tuuŋ Libay mo käla Caypara, mo cwøl ni Jocep, mo nyeŋŋe ocak nyïïatwieli ni Barnaba, na näk tiere beeye O Cøm-cwïny. 37Eni pwötha en jïre adwøk pwödhö, ni käl jap gø ni peeth gø nyïm nyïïatwieli.

Currently Selected:

Moa Tïïc Nyïïatwieli 4: AnyuB

Highlight

Copy

Compare