Moa Tïïc Nyïïatwieli 6

Kanya Jier Jiy Abïriiø

1'Ba yïth nïrögø kanya ö bääŋi na meetge rege, jø Juuth moa näk odhoom na jø Gïrïïk gena tïmö ni ge ŋurö ki nyeŋ jø Ibaru, kiper määr thuunhnhi moge atïmö ni di kääŋö ki jammi mo wø pääŋŋi ki yïth nïne bëët. 2'Ba nyïïatwieli na näk apaar kurriiø bääŋi bëët acwølge kanya ciel, ni köge, ni «Ennø, ba beer jïwa ki man wecwa køp luum Jwøk, ni tïïcwa tïï pääŋ jammi. 3Kiper manøgønø, nyïïmera, jëëtu dïïu ki jiy abïriiø mo ŋäyu ni beyø, mo cwïnyge päŋ ki Jwïëc Jwøk, mo wïthge leer, kiper nee tïïögø wëëkwa geni. 4'Ba waani dëëtwa ocïpwa køør lam cooth ki køp luum Jwøk.» 5'Ba luumma caange, lwaak bäre yïthge amïnnö ki gø. Ni jierge Ectipen, ŋat mo ŋäädhe mare dwøŋ døc, ni cwïnye päŋ ki Jwïëc Jwøk na en kur keere, ki Pilip, ki Parököra, ki Nikanör, ki Timøn, ki Parmena, ki Nikööla nyï Antïëk, ŋata løk dëëre dïkwøŋ cøøn na ŋat Juuth. 6Jøøgø akïthge nyïm nyïïatwieli. Ni ö geni ni cïpge ceŋge bäätge ni lämge.

7'Ba luum Jwøk anyaay. Ni ö bääŋi ni thöönhge døc yi Jerucalem. Ni ö dïlämme møøk mo thööth ni jïëcge luum ŋäädhe manøgø.

Luum Ectipen

8'Ba Ectipen na cwïnye päŋ ki met yi Jwøk ki teek Jwøk, gïï mo døøŋŋø døc mo rëëma ec ki ŋïïce atïïe dï jiy. 9'Ba kanyøgø, jø møøk mo ena dëët jø øt acooŋ lam mana cwøl ni mar jøøa näk opädö, ki jø øt acooŋ lam mar jø Cayriin, ki mar Alekdhandaria, ki jø møøk mo käla Cilicia ki Eecia, rege athïïŋge ni pïëmge ki Ectipen. 10'Ba kär løny jïge ki man maarge dwøk baŋe ki luubö, kiper leec wïc ki Jwïëc Jwøk na cääne ki gø. 11'Ba køøre yïth jø møøk acoonge. Ni kö jøøgø, ni «Nyenøgø ajootwa ni cäänö ki luup mo reyø dëër Modhe ki Jwøk.»

12Kanyøgø jiy, ki jaae, ki dïpööye mo ciik Jwøk awëëkge niïïk. Ni öge baŋ Ectipen, ni makge gø, ni kïthge gø nyïm kwääc løøe. 13Ni kïthge jiy nyïm mo cäänö ki luup tööt, ni köge, ni «Nyenøgø wø cäänö ki luup mo reyø dëër Øtø man ni en kur keere na mar Jwøk en, ki ciik Jwøk, ni ba maar wec. 14Kiper mare awïnywa ni eni cäänö ni Jecu nyï Nadhareth manøgø, kany raanynye raanynyø, ni wiil kööŋŋe moa wëëk Modhe øøni.» 15'Ba kwääc løøe bëët na näk opï piny kar løøk na neenge jïre, täärnyïme ajootge ni caala täärnyïm nyïïatwiel maal.

Currently Selected:

Moa Tïïc Nyïïatwieli 6: AnyuB

Highlight

Copy

Compare