ROMA 3
3
Ir Yahudi mende Ar Allah nen bagarek dogir taga wene
1Eta kalok, Yahudi mende akuni etarurak eti enggen mende nena? Nen sunat ekwi awene mutok ekwi kalok, wene enggen mende nena? 2Eta ake wene enggen mende ambigar werek o. Alep ir ap Yahudi inoba nggwe tu, Ar Allah Ane wurabi wagage o. 3Ir ap Yahudi mende amberak nen wene inoba wurabi wagage eti, dambe kugwi dalok. Ar Allah nen ir inebe dambe dagin a? 4#Mzm. 51:6Eterogon erigin dek o! Akuni obogar inenggal yogwa arar o. Nen Ar Allah ebebar mende arar o, ma Alkitab mbalek paga yegerogo yirige,
“Kar kwak eti kane paga ebebar mende arar andagwi,
nen Kar kuwak dolku dogolir kalok, ndak dek mende erogo bagagun mondok dek arar o.”
5Ar Allah nen nir maduk ekugu paga ninuwak dolkanem, nir wene onggo nenggerogon yurak? Allah nir ugun ar anggin mende ninoba bigin a? Wene ya akuni nen kinok yumo, yu ndak-ndak ar o. 6Eta ndak-ndak dek arar! Ar Allah wene ndak-ndak ar ma nggedok eritagodek kalok, nenggerogon Allah nen akuni yoma inuwak dolurak?
7Inobabur maduk ekwi paga, Allah obabur ebe mende nggok wigak yega kalok, bi wakwi o. Nenaluk akuni wene maduk ekwi mende eti, kir maduk mende o yiluk inuwak denogo bagwi paga arar o. 8“Wene pano mende kenam aruwak nen, nir maduk eruwok o,” yiluk nir nen yurak ndak dek a? Ir akuni amberak nen, an wene maduk noba buru dogolir, etegerogon yege o, yiluk yonugwi o. Ma ir akuni etegerogon yonugwi mende etoma, Allah nen inoba hukuman bigin kalok, ndak negen ar o.
Ir akuni obogar eti maduk ekwa arar o
9Yogo, nir akuni Yahudi mende yi pano a, ir akuni yahudi dek mende pano a? Eta ndak-ndak dek o. An alep nen yokeraga dogolir, akuni Yahudi mende inom, akuni Yahudi dek mende inom, maduk nen tebelogo balok welagage o, yiluk yorkeragi o. 10#Mzm. 14:1-3, 53:1-3Alkitab mbalek paga nen yega dogolir,
“Ap ambi nen ebebar mende dek arar o,
11Akuni ambi nen ogwe akla nggagalek dek ar o,
Nen ir akuni Ar Allah apma tebe yiluk wogok bega dek ar o.
12Ir akuni nen Ar Allah monogo mbo biluk, tuan adik paga lagugwa mende,
Ir obogar bulagugwama o, Ap ambi nen pano ebebar mende erudek ar o, ar ambi kwak nen ogwe dek ar o!
13 #
Mzm. 5:10, 140:4 Ir inenggedobak kuburan ande kurik ndak-ndak,
inakda paga wene inenggal tam warir nugwi,
wado mende bisa#3:13: Bisa: Wado ap inakwa eti inaik mo etoma endaga bisa eti dogitaga o. Nen ir wado nen akuni inaik mbalinaku dogolir, bisa amburu eti bagetek mende eti ibar yamak damo perak iniluk arurak o. kwak inandema nen akuni inabok mbalir nugwi.
14 #
Mzm. 10:7
Inandema nen akuni puduk padak yiluk, nggamo bagwi.
15Akuni maduk erogo baurak paga inom, nen inebe inarurak paga inom, iniyok anggin dek ibar-ibar lagwi o.
16Miyak denggak etaru paga inom nen anggin panggin kodau paga inom, ai ndulir nugwi.
17Pano adeknggen dogorakma nggwe, ir inil mbuk aga,
18 #
Mzm. 36:2
nen Allah keyagwi waru inom inonggokdek agagemo o.”
19Yogondak ir akuni agama Yahudi wene kindirik paga, ir inendaga mbalek werek mende, inebe obogar wene kindirik apma agarikma, Ar Allah nen wene yeganem, akuni amberak nen wene onggo yurak mondok dek o. 20#Mzm. 143:2; Gal. 2:16Agama wene kindirik mende erir lagunem, Ar Allah inom pano dambulurak dek o. Ogwe wene kindirik eti nen, akuni kinebe maduk akuni mende arar yiluk yoraga agarik o.
Akuni ebebar andagwi paga, Ar Allah nen ebebar erogo bagin wene
21Nen, yogondak Ar Allah nen akuni ninom pano dambulik dogowak nen yiluk, tuan kwarkige o. Tuan kwarkige eti agama Yahudi wene kindirik paga degar o. Buku Musa wene mbalek paga inom, nen nabi-nabi wene yirugwa paga inom, telekma erogo birugwa o. 22#Gal. 2:16Allah nen ir akuni Yesus Kristus oba ebebar andagwi paga, Allah inom pano dambulugun o. Allah nen akuni obogar Yesus oba ebebar andagwi mende inelokte medaligin dek o 23Akuni obogar maduk ekugwa paga, Ar Allah nen ndilinaburak paga, walegar ari lagage o. 24Ar Allah akuni ninakba nen, ninom pano dambuluwok nen yiluk, we onggo dek wedek ar wokninakige eti, ebe Ar Yesus Kristus nen, akuni kede warek mende pigalogo binagagin eti arar o. 25Ar Allah nen Kristus Yesus watarumo, ar amep paga, nen akuni ar oba ebebar yiluk andamo, inomaduk inoba nggorigin o. Ar Allah nen, wene arkma dirogon eka inilu eruwak yiluk ekige. O pagane etoma, akuni maduk ekwi dagik, warinakikdek, yanggorogo togorek welagage. 26Yogondak ar nen maduk nggarelka paga, arkma nggedok eka ninilu aruwak yiluk, erir taga o. Eta eka paga, ar ebe ebebar ekwa o yiluk, nir ninilu dega, akuni Yesus oba ebebar andagun mende, ir nen Ar Allah inom dambulkwi arar o.
27Ebe eta paga, nir nen an nggok kar nggok yurak ndak dek o. Eta nena ekoma? Nir nen agama Yahudi wene kindirik ekoma a? Dek o. Nir ebebar andago paga, Allah ninom dambulik dogogun o. 28Wene ebe odo mende yi o. Agama Yahudi inawene kindirik ekwi paga, Ar Allah ninom pano dambulugun dek o. Arte nir nen, Ar Yesus Kristus oba ebebar andagun paga, Ar Allah ninom pano dambulugun o.
29Ar Allah eti, ir Yahudi mende inadik inombae a? Nen ir akuni Yahudi dek mende inombae Allah inom ar dek a? Ebebar, ir akuni Yahudi dek mende inombae Ar Allah mban arar o. 30#Ul. 6:4; Gal. 3:20Ar Allah ebe ambi ar. Allah ambi nen ar, ir ap Yahudi mende ebebar andagwi paga, Ar Allah inom dambulugun o. Ir akuni Yahudi dek mende, ebebar andagwi paga, Ar Allah inom dambulinaka, eterogo erir taga o. 31Eta nir Kristus oba panggolkwi dogolir, agama Yahudi inawene kindirik mbo dambe kuwok a? Dek o! Nir nen ebebar andago paga, agama wene kindirik eti alon palogo dogowok o.
Currently Selected:
ROMA 3: WLW
Highlight
Copy
Compare
Share
Want to have your highlights saved across all your devices? Sign up or sign in
