ROMA 2
2
Ar Allah nen hukuman wurabigin wene
1 #
Mat. 7:1; Luk. 6:37 Nawor nakbur o, kir kwak tani ma nen ir akuni amberak maduk eketek mende, kir kinane kode yorartagwi? Kir nen kinerakde mbalaurak mende ambi mondok dek arar o! Nenaluk, kir nen ir mban maduk yoragwi ogwe, kir ogwe maduk ir ekwi mende ekwi ar ma, kir kinengga werek ogwe maduk kinoba baktaurak ar o. 2Allah nen akuni maduk eterogon mende ekwi dalok, Ar Allah nen ir inomaduk onggo hukuman wogoragin eti, ebebar ninilu agorik o. 3Nen nakburi, kir nen ir mban maduk ekwa o, yiluk yoragwi mende, kir nen, maduk erir lagwi ar ma, Ar Allah nen kinomaduk onggo hhukuman kinoba wurabigin dek andalok yitagwi a? 4Ar Allah nen, kir maduk ekwi mbo dambe kalok, kiniliti kwaktawak yiluk kinakba nen, torkinaka werek o. Kir nen Ar Allah iliti pano kinakba nen, o telek erogo wokerage yoma, kinakla pagakbuk a? 5Ogwe, kir kinaluwak obarne tebe yubuk, nen mor-mor eru kina'ir o. Eti paga nen, Ar Allah nen o irep paga, hukuman anggin mende maduk ekwi ndak-ndak wurabi warigin eti, kir nen ebiluk anggin erogo batar tagwi o. 6#Mzm. 62:13; Ams. 24:12Ar Allah nen, yabongga akuni ir inadik ndak nen eku dogogun ndak-ndak, ir onggo wogoragin o. 7Ar Allah nen, iniluk edo nabedal kabedal pano mende eti, ir akuni pano mban eku lagugwa mende, inendaga nggok dombok mende inom, inalon palek mende inom, inaitok mondok mende inom, aktibar wogoragin o. 8Nen, ir akuni ir inake mban etagu lagugwa mende inom, Allah wene yugu mutok lagikdek welagugwa mende inom, maduk mban mutok nugu lagugwa mende inom, Allah anini inoba wurabigin o. 9Ir akuni nen maduk mban ekwi mende eti, anggin panggin mende wokbiluk, kener wakwi eku dogogun o. Ir Yahudi mende ibibir o, nen ir akuni dek mende yabonggane erinabigin o. 10Ogwe, ir akuni pano mende mban eru wadok mende eti, inalon palek mende inom, inendaga nggok mende inom, inadeknggen dogorak mende inom, Ar Allah nen wogoraga dogolir; ir Yahudi mende kalok inalep wogoraga, nen ir akuni yahudi dek mende kalok yabongga wogoraga erigin o. 11#Ul. 10:17Nenaluk Ar Allah nen, ir akuni obogar, wene ambi ndak-ndak mban arar erinabigin o.
12Ir akuni nin mende nen Yahudi inawene kindirik inonggokdek dogolir maduk eku lagugwa ma, Yahudi inawene kindirik paga bikalok maduk onggo wogoragin degar o. Ir Yahudi mende nen, ir inawene Musa yirige wene kindirik inilu dogolir, maduk eku lagugwa paga, wene kindirik eti bikigik maduk onggo wogoragin o. 13Akuni Allah inom pano dambulurak eti, agama Yahudi inawene kindirik inilu paga dek o. Arte ir nen Musa wene mbalek ebe dirogon ekwi paga, Ar Allah ebe inom pano dambulugun o. 14Akuni nin mende nen, agama Yahudi inawene kindirik inonggodek arar o. Ogwe ir nen Yahudi inawene kindirik ndak-ndak ekwi dalok, ir Yahudi inawene kindirik inonggodek ogwe, ir iniliti eti nen, ir inake wene kindirira taga o. 15Ir inobabur erir lagwi paga, wene kindirik eti ir inilitimo nen wulka daktagwi, nen ir iniliti paga nen wene mbaleraga dogolir, iniliti eti nen ar yi maduk o, yi pano o, yiluk mbenarirar taga o. 16O yabongga irep paga ari lugun eti paga, eterogon ar etarigin o. O eta ari laga kigik, wene Pano Wene an yorar nektaga yi, Ar Allah nen Yesus Kristus paga, wene ap inakla tebelek mende inom, inilitimo kimago mende inom, bugalogo inuwak doligin.
Akuni Yahudi mende inom, nen agama Yahudi inawene kindirik inom wene
17Nen kir nen nir akuni Yahudi mende yiluk yugwi mende, yogondak kinobabur nenggedek werek o? Kir nen agama Yahudi wene kindirik pago ma, Ar Allah ninom pano kunik werek andagwi o. 18Kir wene kindirik eti nen wokerek paga, Ar Allah wadok mende, kinilu atuk elokte pano mbenaru ndak ar agokip o. 19Kir nen nir yi akuni inil mbuk tuan lau didarek inom, akuni o amum inairaga inom, nir arar kinilu werek o. 20Kir nen akuni yu ndurek mende, mor erinakwi, elege emeriragwi ekwi o. Agama Yahudi wene kindirik paga, ye wene nde wene edo obok kinilu, wene pano erurak mende kinilu ar o. 21Kir nen akuni emeriraurak mende, nenaluk kir kinake emetagikdek eritagwi o? Kir nen kinilmudu kimarugup o, yiluk yoragwi mende, kir nen kinilmudu kirakwi agoktip o. 22Kir nen kumi kinilmudu erugup yoragwi mende, kir nen kumi ugunar kinilmudu erinakwi o! Kir nen amudi kunik kina'ir mende, kir nen ye mende nde mende amudi kunik uma nen waganir tagwi o. 23Kir nen nir Musa wene onde nir ar o, yiluk yugwi mende, Allah ane mutok lagikdek paga, kir nen Allah miyuk meyak erogo biktagwi o. 24#Yes. 52:5Alkitab paga yegerogo mbalek werek o, kir Yahudi mende nen ekwi paga, akuni ir ninggalok mende nen, Ar Allah endaga maduk erogo biktagwi o.
25Musa wene nggedok togo eku dogolir, sunat erek pano andugwi mende. Kir nen agama Yahudi wene kindirik werek ndak-ndak ekidek kalok, sunat erek dek mende ndak-ndak ar werek o. 26Ap nin mende, sunat erekdek mende nen, agama Yahudi wene kindirik dombok togo erir laga kalok, Ar Allah nen ar sunat erek arar yiluk andagin dek andagen a? 27Ir ap sunat erek dek mende, ir nen agama Yahudi wene kindirik mende dirogon ekwi paga, kar kayo agado mbalek, kebe ap Yahudi mende nen, agama Yahudi wene kindirik tebelogo bega paga, ir nen kar tebelogo bagagun o. 28Ap Yahudi ebebar mende eti, Yahudi paga endago mende dek o, nen sunat ebebar mende eti sunat akuni paga erek mende dek ar o. 29#Ul. 30:6Nen, ap Yahudi ebebar mende eti, ar ebe iliti nen an nebe Yahudi mende arar andalok eka, sunat ebebar mende erek eti, sunat erek inendaga buku paga mbalek eti paga dek o, ogwe ilitimo Roh Allah nen diru mbalogo bege eti paga arar o. Nen akuni etegerogo ekwi mende eti, akuni nen wogok bagwi dek ogwe, Ar Allah nen perak wogok bagin o.
Currently Selected:
ROMA 2: WLW
Highlight
Copy
Compare
Share
Want to have your highlights saved across all your devices? Sign up or sign in
