ROMA 1
1
Keyagi edoma warek wene
1Kir nawor nakbur o Roma mende, Allah nen Ar akburi dogowak nen yiluk kinayonggo binagarigemo agokip o.
An Paulus, Ar Allah eyabu eka dogolir, awene Pano Wene yorar nega dogowak nen yiluk, nayonggo birigerek ma, wene ambi yokerak o. 2Wene Pano Wene eti, Ar Allah o pagane ar, ap nabi-nabi inoba wene warogo birigemo, ir nen Alkitab paga arar mbalkugwa werek o. 3Wene Pano Wene eti, Ar Allah Akbur, Tuhan Yesus Kristus awene mende eti arar o. Ar ebe akuni o agar taga yoma paga eti, ar Daud umbu arar endak tagage o. 4Nen, mbogor taga mende paga eti, Ar ebe Ar Allah Akbur arar o. Eta Ar ebe watarik yiluk kener waka lagagerek, Ar obarne paga iluk agage paga, Ar Allah akbur yiluk yugwi o. 5Ar paga nen, Allah awene yorar nega dogowak nen yiluk, Kristus wogok dega dogolir, ap inalebunu dombok etoma, ebebar andalok Ar mutok lagu dogowak nen yiluk, menogo baninggige o. 6Ap inalebunu dombok yigi eta, kir akuni o Roma werek mende, Ar Yesus Kristus akburi aruwak yiluk, wai yokiragage mende inom, kinebe obogar yiluk yigi o.
7Eti paga, an nen surat erogo kinoba lakbi wagi o. Yogo, Ar Allah Ninombae nen, Tuhan Yesus Kristus nen, inadeknggen kinoba bugwi, pano ekinakwi dogowak o, wanelak.
Tamban Ar Allah keyagi wakige wene
8Alep agik, Yesus Kristus paga, akuni o ya nda obogar kir Kristus oba ebebar andarugup mende, inilu agama o, an kir kinake paga, Ar Allah wa yiluk yorir taga o. 9An tamban eka dogolir kalok, kup keyam kinoba mi agikdek, Ar Allah il paga ar ekama, an yigi eta ebebar ar ilu agarik o. Ar Allah eti an nen eyabu eka, ar Akbur awene Pano Wene yorar nega, erir taga o. 10Ar Allah nen, kir kinoba bikinar lakbani waruak nen yiluk, an yogondak Allah nggino nggano yorirtaga, o. 11An kir ninom abuk atuk, Roh Allah awene tumburik wokeramo, kiniliti kode ekinaka dogorak wadok andalok yorkeragi o. 12Nir obogar Ar Yesus Kristus ebebar o yiluk, wene eberogo waganggop mende, kiniliti aik war-war eku dogobagik nen yiluk yorkeragi. 13#Kis. 19:21Nawor nakbur wae! An kinoba warik yiluk ekanem, wene werek agik mban erir taga kinilu o. An nakla nen, ap nin mende inuma wene Pano Wene eti, ir yoragagimo waganggugwa kwak, kir eterogon waganu kinowadok nen, kina warigin o. 14Ir ye akuni nde akuni iniliti werek mende, iniliti dek mende, edo ekwi inilu mende, ekwi eru inobakte mbalek mende, inake yorau noba birige werekma, yorak nen yiluk warigin o. 15Eta ma, wene Pano Wene eti, kir o Roma werek mende kinake paga, yokerau wadok ma, yokera warigin o.
Pano Wene obarne paga erir taga mende wene
16 #
Mrk. 8:38
An Pano Wene paga panggolek werek o. Pano Wene eti, Ar Allah obarne paga, ye akuni nde akuni obogar ebebar andagwi paga, ndilinaburak ma, alebagik eti ap Yahudi mende ndilinaka dogoluk, nen ir ap nin tekman mende yabongga ndilinabigin o. 17Wene Pano Wene eti paga, akuni ar oba iniliti panggolumo, Allah ninom dambulurak pano arurak mende ninilu arigin o. Eti Alkitab mbalek paga werek ndak-ndak o. “Akuni nen Allah oba um palogo ane waganumo, ir Allah inom pano dambul latuk, inebe iniluk pano dogogun o!”
Akuni maduk ekwi mende wene
18Maduk ekwi paga Allah awene emedek inil kaurak ndak dekma, akuni maduk mban ekwi kalok Allah mbogor paga nen anini inoba wurabi waritaga o. 19Allah ar yuk werek mende ap iliti aga dombok birigemo ir nen Allah ebe ilu ar agarik o. 20O pagane Ar Allah nen, mbogor agar kenam erogo bega dogolir, Ar Allah ebe inil kegekdek mende, ebe Allah obarne ambik aitok mende, ir akuni nen o agabak kigirogo birige paga, Allah ebe werek o yiluk, ir inerakde mbalagun mondok dek o. 21#Ef. 4:17-18Akuni nen Allah ebe werek inilu mende, ir akuni nen Allah oba um palek dek dogolir, Allah wa, yorurak ndak dek o. Ir nen ebe dek mende odo-odo ekwi paga, iniliti apir agagemo o. 22Ir nen niniliti werek andagwi mende, ebe iniliti mondok dek, o. 23Ir nen Allah ebe wogok dugwi mondok dek. Ir nen warek agage elokte agabak kigirik mende, akuni amudi kunik mende, tewe mende, wado lekbeliluk lektaga mende, wabir mende wogokdir netagwi o.
24Eta erir nugwi dalok, Allah nen monogo barigemo, ir iniliti mirik paga erir nugunem maduk erir letagwi o. Eku dogolir, ir inebe paga maduk ekodar lektagwi o. 25Ar Allah ebabar mende, ir nen akdikmo ebe dek mende bugwi, waltek mende alon palkwi dek, ir nen Walkarige mende alon palogo inamendek wogogwi, endaga mbalkwi eritagwi o. Ir nen ar Walkarige ebe yi o, yiluk woguk dugwi o. 26Ir akuni nen etegerogon ekwi dalok, Ar Allah nen monogo mbo barigemo, ir iniliti nen nengga kalok, maduk mban erir lektagwi o. Ir kumi nen, ap inom noge yu dambe kalok, ir kumi-kumi wadi ekwi erir letagwi o. 27Ir ap nen eterogon ar, ap nen kumi inom noge yu dambe kalok, ir ap-ap ar wadi erir lagwi ma, inomaduk etagwi onggo ndak-ndak ar kodagun o. 28Ir akuni nen nir Allah nina'ir yugunem, Allah nen ir inilitimo maduk ai paluok yiluk dambe darigemo ir nen eru ina'ir kigik eti ar erir lektagwi o. 29Ir inilitimo pano mende ebekikdek, maduk mende mban ebekwi, iniliti wadok nggirik ekwi, inilitimo maduk mban ebekwi, na'ir ka'ir yugwi, war-war yugwi, ndugi bugwi, inenggal wene tamakwi, nanini kanini yugwi, akuni inabok mbalir nugwi, eritagwi o. 30Akuni inendaga maduk erogo bugwi, woguk daktagwi, wene yugwi inaruk mondok kulubuk, Allah ane waganu ina'ir, an-an mban yir nugwi. Maduk erurak mban kwarir nugwi, inagwiya inombae inane dirogo kolkikdek, erir letagwi o. 31Akuni amberak nen yugwi dalok waganukbuk, inobabur kek mbogolik mende, akuni pano dogitagwi mende inonggokdek mondok. 32Allah wene mbalek paga, akuni etegerogon ekwi dalok, mondok warinaburak o, yiluk inilu mende, inilu nen ar erir lagwi, ir nen akuni amberak etegerogon ar eku dogorak yugwi agarik o.
Currently Selected:
ROMA 1: WLW
Highlight
Copy
Compare
Share
Want to have your highlights saved across all your devices? Sign up or sign in
