ROMA 16
16
Inadik ndak inake keyagi warek wene
1An ar kodak iniruak Febe eti, ir jemaat Kengkrea etoma yamak daktaga mende ma, ar ebe kinilu aruwak nen yokerak o. 2Ar ebe Tuhan akbur ar ma yiluk, kir nen keyagi warogo waganini o. Nen ir akuni Allah akburi mende nen eku dogorak ebe pano negen eti, ar ambi nen ar ambi keyagi warogo waganggik, eku dogorak etegerogon arar ma, ar ebe waganini o. Ar nen akuni amberak yamak daga dogolir, an inom ar yamak neyaga laga o. Ma, ar oba dibi yiluk yama kaurak nggino yega kalok, kir nen ar yamak kaurak nggino yorkeragi o, nogari.
3 #
Kis. 18:2
An nogariyak Akwila o nen ar Priskila imbirak, Ar Kristus Yesus eyabu ninom ndak-ndak erir taga mende etnaga, ar Paulus nen keyagwi wakinake o, yiluk yorano o.#Kis. 18:2 4Ir nen an ndilnabuwok yiluk ekunem, mondok warinakugwa mende iniluk werekma, an nen wa yiluk yoragi o. Eta an nen mban dek mende, ir jemaat akuni inalebunu Yahudi dek mende obogar inom, wa yorar tagwi o. 5Ir jemaat, ir inuma inom tamban erir taga mende etoma obogar, an nen keyagwi warkinake yorano o. O Asia etoma, ap Epenetus eti, ar ndak Kristus ebebar o yiluk waganggidek ma, an niliti kunik o. Ma an nen keyagi wakake o, yiluk yorno o. 6Kwe Maria eti kir kinake yabu nggok eka lagarik ma, an nen keyagi wakaki o. 7Ap Andronikus inom, Yunias inom, eti an nogari ap kebe ma, ninom kede warogo malninakugwa an Kristus ane auwan waganggikdek neyagik, ir imbirak ndak Kristus wene waganggugwa ma o. Ir imbirak inebe ap rasul obogar inilu o. An keyagi warinaki mende, keyagi wakinake o yiluk, yorani o.
8Ap Ampliatus eti nimbirak ndak-ndak, Tuhan paga kunagagu mende eti, an niliti kunik ma, an nen keyagi wakaki o. 9Ap Urbanus, Ar Kristus eyabu ninom ndak-ndak erir taga mende ma, an nen keyagi wakaki yige o yiluk, yorno o. Nen Stakhis niliti kunik ma, keyagi wakaki yege o yiluk, yogorno ar o. 10Ar Apeles eti, Ar Kristus imbirak mondok kunik werek obok ninilu ma, an nen keyagi waki o. Ar Aristobulus mende keluarga inom, an nen keyagi wakinaki o. 11Nen Herodion eti an nogar ap kebe ambi mende ma, an nen keyagi wakaki yege yiluk, yorno o. Nen, ninakburi ebebar andagwi mende nen, ar Narkisus mende keluarga inom werekma, an nen keyagi warkinaki o.
12Trifena inom, Trifosa inom, Tuhan eyabu nggok erir lagwi ma, an nen keyagi wakinaki yege o, yiluk yorano. Persis eti Tuhan eyabu anggin ambik erir taga mende ma, niliti kunik o. Ma, an nen keyagi wakaki yege o yiluk yorno o. 13#Mrk. 15:21Rufus inom, nen ar agwiya eti an nagwiya negen agagerek ma, keyagi waki o. Nen Rufus eti ap pulik mende mondok wogok dugwi ma, an nen keyagi wakinaki o. 14Ir Asinkritus, Flegon, Hermes, Patrobas, Hermas inom, ir iniliti ebebar andarugwarik inom werek mende inom, an nen keyagi warkinaki o. 15Ar Filologus o, ar Yulia o, nen ar Nereus o, nen kodak ar iruak inom, nen Olimpas ir imbirak ebebar andarugwa mende werek etoma, obogar inom, an nen keyagi wakinaki o. 16Kir nen kinebe Ar Yesus akburi ambi ar dogolir, keyagi war-war eku dogoni o. Ir Ar Kristus akburi yoma mende nen, kir keyagi warkinaka ar o.
Ugu paga inaruk wakige wene
17Nawor nakbur wae! An yogondak nggino nggano yorkeragin o. Kir ir akuni nen agorik agorek erkinakwi, Tuhan ane ebebar waganggugup mende tagik-tagok ekinakunem, tuam pano togo dogoni o. Wene eta nir nen emerkirarugu mende imbirak ndugi mbalek o. Ap eterogon ekwa mende eti, inagode yugu dogono o. 18Ir akuni nen etegerogon erir nugwi eti, nir mende Ar Kristus Tuhan eyabu ekwi dek o. Ir iniliti nen nengga kalok, iniliti nengga mutok erir lektagwi o. Inane amburu ye wokiragun nde wokiragin yiluk, akuni ugun akerak mende nuk puk erinabir tagwi o. 19Kir nen wene Allah wene Pano Wene ininggim nggerok togon pano werek yiluk akuni obogar inilu werek o. Eti paga an nen kir eta werek paga niliti adeknggen ambik agarik o. An wadok eti, kir wene pano eru mende yenggak kinil kugwi, maduk eru mende kinil yenggak ar kugwi, eku dogoni o. 20Ar Allah akuni inadeknggen mende wogoragwa nen, ar Iblis waganogo kinapma bi watuk ebe tagik tagok warigin o.
Yogo nogari kir obogar, Ar Yesus Kristus nen pano pakerek dogolir, adeknggen dogowak o.
21Timotius nogar nimbirak yabu pano erir taga mende nen, kir obok keyagi wakinake o. Eterogon ar ir Lukius, Yason, ar Yosipater, an nogari ap kebe ma, ir nen keyagi wakinaka o.#Kis. 16:1
22Surat yi an Tertius nen diru mbalki o. An nen kir obogar keyagwi wakinaki o.
23 #
Kis. 19:29; 1Kor. 1:14; 2Tim. 4:20 Gayus nen, wa yiluk, keyagi wakinake o. An ar uma nimbirak dogolir, ir nir ninakburi Allah ane koluok yiluk uma yoma unggwi waritagwi o. Erastus o Kota yoma kepala keuangan werek nen keyagwi wakinake o. Nen ar ninawor Kwartus nen, inom ar keyagi wakinake o.
[24Yogo, nir mende Tuhan Yesus Kristus nen, kir obogar pano ekinaka dogowak o amin.]
Surat irep kede warogo yoragage wene
25Ar Allah ar wogok dugu dogowak o! Ar obarne ambik ma, kir nen Allah wene Pano Wene Yesus Kristus ekige wene yokeragagi etoma, Allah nen yoran o, yiluk yornirigemo yokeragagi o. Wene etoma Allah nen erik yiluk pulogo birigemo, akuni inonggokdek kigik ye tahun nde tahun ambigar erir wagagemo. 26Nen, yogondak Allah aitok mende nen, wene erik yiluk yirige mende enogo, akuni obogar ap nabi-nabi inagolan mbalek paga yoragage o. Ir akuni yoma obogar nen wene yi ebebar o, yiluk Allah wene mutok lowak nen yiluk yoragage o. 27Allah eti ar Allah adik ar, nen wene akla kwalek mondok o.
Ar Yesus Kristus pagaru, Ar ebe mondok wogok dugwi dogowok o, Amin!
An Paulus, Ar Kristus Yesus ayedoman nen, wa yiluk yorkeragi o, wanelak.
Currently Selected:
ROMA 16: WLW
Highlight
Copy
Compare
Share
Want to have your highlights saved across all your devices? Sign up or sign in
