ROMA 15
15
Kir kinake mban maga, ir akuni amberak inadeknggen inomar erinaku dogoni yirige wene
1Nir nen ebebar andarugu mende nininggi nggerok kalok pago dogolir, ir iniliti ebebar andagwi auwan kode agikdek mende inake nen, erogar togorek dogorak o. Nir ninadik niniliti adeknggen ake mban erir lagu dogorak dek o. 2Nen nir nen ninogariyak amberak ir pano dogolir, iniliti ebebar andagwi eti kode aruwak nen yiluk, iniliti aganggen erinabir lagu dogorak o. 3#Mzm. 69:8Nenaluk, Ar Kristus nen Ar Ebe adik pano Adeknggen dogorak mende mban ebeka dogoluk dek. Alkitab mbalek akla yegerogo yirige, “Wene inane maduk Koba lagabi wagugwa mende an noba muk inaburak nggar wura wagiya o.” 4Wene Alkitab akla mbalek werek mende etoma, nir emer ninaburak ake werek o. Nenaluk Alkitab akla nen wene emerek emerneraga paga, nir niniliti ago wartaga, obarne aga erigin paga, nir nen Allah oba ninakla mbektek mondok dogogun o. 5Wene etama, Ar Allah nen akuni inakla mbektek dogorak mende inom nen iniliti yinggin yonggon etaru mende inom wokeraga paga, kir kinebe pano mondok Ar Kristus Yesus obabur mutok eku dogoni o. 6Kir kiniliti ambi ar dambulik dogolir, Ar Allah, Ninombae Yesus Kristus eti endaga mban woguk dugwi, eku dogoni o.
Wene Pano Wene ap Yahudi dek mende inake wene
7Etama, nawor nakbur Kristus nen wokinakige kwak, kir nen kiniliti adeknggen paga ar, Ar Allah wogok dugu dogorak yiluk, kar ambi nen ar ambi waganggik eku dogoni o. 8Nenaluk, kinakla eberek dogoni o. Ar Kristus nen ir Yahudi mende yamak darige eti, Ar Allah nen wene yabungga erigin yiluk, Ane amburu nir ninumbui yorarige mende etoma, apma nggedok togon eka yenggak kowak nen yiluk yabu ekige o. 9#2Sam. 22:50; Mzm. 18:50Ar Yesus nen, Allah iliti pano eti, ir akuni Yahudi dek mende etoma nen ninakba karige yiluk woguk dugu dogorak paga, yabu erir taga o. Ma Alkitab akla yegerogo mbalek werek o,
“Eta ma, an nen ap inuwakma dogolir, kendaga mbalka,
an nen kar kendaga ndai paga woguk dega,” eritaga o.
10 #
Ul. 32:43
Wene amberak mbalek yegerogo werek,
“Ye ap nde ap yoma,
Allah akburi pulik mende kinom kinadeknggen eku dogoni o!”
11 #
Mzm. 117:1
Ambi yi inom ar,
“Ap yoma obogar nen, Allah endaga mban wogok dugu dogoni o.
Ar endaga akuni obogar nen wogok dugu dogoni o!”
12 #
Yes. 11:10
Ar Yesaya nen wene yi inom yirige o,
“Ap Isai umbui wigalek mende paga nen,
ap ambi akuni inawene mbalka dogorak ake menarigin o.
Ir ap inalebunu dombok obogar nen Ar Oba mban inakla mbektek dogogun o.”
13Ar Allah eti kir kiniliti oba mbektek dogu werek arar o. Kir kiniliti ebebar andarugup eti paga, kir kiniliti paga etoma adeknggen erkinaka, no dek erkinaka dogogin o. Ar Roh Allah obarne erkinaka paga, kir nen Allah oba kinakla nggok togon mbektek dogogun o.
Ar Paulus nen wene edo ilu atuk, wene bugak togo diru mbalkige wene
14Nawor nakbur wae! Kir kinoba ye wene nde wene, pano erurak mende ambik werek andega agarik o. Kir nen ye wene nde wene edo ambik kinilu ma, kar ambi nen, ar ambi yanggu ligik eku dogorak ndak mondok agokip o. 15Ar Allah eyabu eti eruwak yiluk woknegemo, an surat yi paga, wene amberak kir kinilu arurak mende etoma, telekma bugaktogo surat yi paga yokerak o. 16Ar nen, ir akuni Yahudi dek mende, Ar Kristus Yesus abok yorar lowak nen yiluk, nayonggo birigemo o. Nen an nebe imam ndak-ndak ertatuk, Allah wene Pano Wene eti ir akuni Yahudi dek mende etoma yoramo, ir inebe waganogo Ar Allah ake wogorugumo, Ar Allah nen wogonabigin o. Eta ma, Ar Roh Allah nen, ir inebe Ar Allah adik ake pulogo bagin o. 17Etiar ma, an Kristus Yesus nimbirak arar kunarigirik ma, an neyabu Ar Allah ake erir laga mende eti, nakla adeknggen arar kertaga o. 18An nen wene nobade dek telekma yorkeragi eta, Ar Kristus nen, an eka paga, ir akuni Yahudi dek mende nen, Ar Allah alon palogo apma tebe yi wagiya paga nen yorkeragi o. An nen yabu eka agarik eti, nane paga inom, nen ninggi eka paga inom arar o. 19Eka neyagik, erir tagodek mende inom, nen wene elalin mende inom, Ar Roh Allah obarne paga eka kigik, eka agarik o. Ar Kristus awene Pano Wene eti, ir akuni obogar o Yerusalem nen, o Ilirikum kudi yoragagi o. 20An niliti mirik mende yi arar o, Allah wene Pano Wene eti, o wedekma, Ar Kristus Ane inonggokdek mende werekma, ir inake yorar laurak mban wadok o. Nenaluk, an nen ir ap amberak yabu kedaga birugwama, oba dulogo palurak na'ir o. 21#Yes. 52:15Etama, Alkitab paga diru mbalek eti yi o,
“Ir akuni Ar awene auwan waganggikdek mende nen, inil kugun o.
Nen, ir inaruk kolkikdek mende nen, iniliti paga nen andagun o.”
Ar Paulus o Roma laurak kolkige wene
22 #
Rm. 1:13
Eti paga nen, an kinoba warurak andagetek mende, wene ilkon watarir taga o. 23Nen yogondak, an o yanda etoma yabu eru mende, obogar ar ekimo o. Etama, kir kinoba waru tokega nagik, tahun ambigar eki o. 24An o Spanyol laga dogolir, kir kinuma nggwe tu ligin ma, ninom abuk atuk, ninadeknggen ekwi eruwok nen o. Eta ninom dogoluk kalok, kir nen an o Spanyol lau mende, yamagago lakbanubagik nen o. 25#1Kor. 16:1-4Ogwe, yogondak ya an nen o Yerusalem etoma, Ar Allah akburi inake nandodek wolok wogora ligin o. 26Nenaluk, ir jemaat Makedonia mende inom, Akhaya mende inom, nen ir Allah akburi ininggi dek mende, o Yerusalem werek mende inake burak paga obogar inane dambulka o. 27#1Kor. 9:11Ir iniliti adeknggen paga, nir nen ir inake yamak dawok o, yiluk yegama o. Eta ebabar, ir akuni inogariyak ininggi dek, o Yerusalem werek mende yamak daurak paga arar o. Nenaluk ir akuni Yahudi mende paga nen, ir akuni Yahudi dek mende eti, Ar Allah amindi amende etoma wogoragage o. Eti kalok, ir akuni Yahudi dek mende nen, ir akuni Yahudi mende inake paga, inamende agar taga mende paga yamak daurak arar o. 28An yabu yi arar ekdiluk kalok, ir Yerusalem werek mende inake kuwak erogo bega yoma arar wogoralok kalok, an o Spanyol arar lagaluk kalok, kir kinuma nggwe tu warigin o. 29An kir kinoba nggwe tu warigin kalok, Kristus agarik agarek kir kinake ambigar wolok warigin o.
30Nir ninewe Yesus Kristus endaga paga, Ar Roh Allah iliti kunik erninakige paga, kir an ninom, an nake Allah nggok togon ayonggo buok nen yiluk, mondok nggino nggano yorkeragi o. 31Ar Allah nen, an nebe ir akuni ebebar andagikdek o Yudea paga etoma, ir ininggimo nen pigalnabuak yiluk, nake tamban eku dogoni o.Ir Allah akburi inake birugwa mende, wolok ir Allah akburi o Yerusalem werek mende wogora lamo, ir iniliti adeknggen paga kodagwi eruwak o. 32Eterogon ma, Allah nen an laurak eti pano arar o, yiluk yega kalok, niliti adeknggen pano paga kinoba warigin o. Nen, an kir ninom abuk atuk dogolir, niliti yonggo nabubagip o. 33Ae wa, wene eta ar ma, Ar Allah akuni nonaik mbalinakwa nen, adeknggen wokerek nega dogowak o! Amin.
Currently Selected:
ROMA 15: WLW
Highlight
Copy
Compare
Share
Want to have your highlights saved across all your devices? Sign up or sign in
