1 KORINTUS 1
1
Keyagi warinakige wene
1An Paulus Ar Allah akla andalok mirogo, rasul Ar Yesus Kristus ake baninggige mende o, nen nir ninogar ninakla ebebar andagwi paga ar Sostenes enogo nimbirak nen, 2#Kis. 18:1kir Ar Allah mende jemaat o Korintus werek mende, Ar Yesus Kristus paga pulogo binagarigemo werek enogo inom, nen ir akuni o ya nda nen Ar Tuhan Yesus Kristus endaga mbalir taga mende inom, nir ninom, Ar Tuhan eti Ninombae arar ma endaga mbalir tagwi o. 3Etiar ma, Ar Allah nir Ninombae nen, Ar Tuhan Yesus Kristus eti nen, inadenggen mende inom nen kinoba pani pano dambulik dogu mende inom wokeraga dogowak o.
Ar Allah amende Ar Yesus Kristus paga wogora taga wene
4Kir Ar Allah amende Ar Yesus Kristus paga kado milogo wokeraga paga, an nen kir paga Ar Allah wa yiluk, keyagi warir taga o. 5Kir Ar Kristus amende agagupmo, kir kininggi werek erogo binagarige mende ebe eti: ye wene nde wene edo nggok kinilu aga, Kir nen akuni ye wene nde wene yanggulirau ndak agwi, 6etegerogo erir lagwi kinalok, akuni nen Kristus erir nega lagage wene obogar iniliti paga enggen yikigemo o, yiluk yokeragu dogogun o. 7Eti paga, kir Ar Yesus Kristus waganem aruwan torek dogolir, Ar nen kir wokeragage mende ambi yobok yigin dek o, nen ndak-ndak arar wokeraga nil lakinar taga o. 8Ar Kristus waganem, kir kinoba maduk dengge yigikdek pano dogobagik nen yiluk, Ar Yesus nen ndegel kinaka dogogin o. 9Ar Allah eti oba ebebar andaurak mende arar o. Ma Ar Allah nen, Ar Tuhan Yesus Kristus nir mende eti oba ambi ar kunogo binagarige.
Jemaat agorik agorek erinakwi wene
10Nogari wae, Ar Tuhan Yesus Kristus endaga paga, an nggino yokerak o, kir kinane inom nen, kir kiniliti inom, ambiar dambulik dogoni o. Kir nen jemaat agorik agorek erogo bagup o. Kir nen kinebe ambiar, kiniliti ambiar, kinane ambiar dogoni o. 11Kir endoma kinebe agorik agorek erir tagwi o yiluk, akuni ar kwe Kloe keluarga mende nen, noba agiyarik yornegama yorkeragi o. 12#Kis. 18:24An wene yokerau andagi mende eti, kir akuni kinom werek endoma nen yugu dogolir, “An Paulus nimbirak yugwi,” tuguluk ir amberak nen “An Apolos nimbirak yugwi,” tuguluk ir amberak nen, “An Petrus nimbirak yugwi,” nen ir amberak nen yugu dogolir “An Kristus nimbirak yugwi o,” yiluk yonega o. 13Etiar ogwe, Ar Kristus eti ebe mbere dek o! Paulus kir kinake warogo o kari karo paga budek o! Kir endoma ar Paulus ane waganggugupmo nen ar endaga paga ima wukinakugwa mende amberak werek a?
14 #
Kis. 18:8, 19:29; Rm. 16:23 An nen ar Krispus o nen Gayus o, imbirak perak ima wurinakigi mende, kir jemaat amberak endoma an nen ima wukinabudekma, wa yigi o. 15Eta kir ambi nen an mende o yiluk yugunem, kir endoma mende an nen ima wukinabu dek ekigimo o. (16#1Kor. 16:15Yogo ap Stefanus akburi inom kwak, ebebar an nen ima wurinakigi nilu agarik mende, akuni amberak etoma, an nen ima wuk daudek o.) 17Kristus nen kar akuni Ar Allah awene Pano Wene yorar lan o yiluk, lakbani wagagemo o. Akuni ima wurinabir lan o yiluk, lakbani warukdek o. Ar Kristus o kari karo paga warogo birugwa mende obarne dek aganem yiluk, an nen akuni iniliti nggagalek paga, nane amburu ndik-ndik paga yoralok dek o.
Ar Allah akla nggagalek inom nen Ar obarne inom, Ar Kristus adik oba penggarek yoragage wene
18Ir akuni kamburak mende pugurik nen, Ar Yesus o kari karo paga warogo birugwa wene eti, enggen mondok dek o yiluk yugwi mende, nir Ar Yesus ane eberogo waganggugumo ndil ninakige mende nen, Ar Yesus o kari karo paga warogo birugwa wene eti, odo mende enggen ebe arar o yiluk, yir tagwi o. 19#Yes. 29:14Alkitab mbalek paga, Ar Allah nen yirige wene yi o:
“Akuni inakla nggagalek dogolir erir lek taga mende eti, An nen nadok kadok erogo bagin,
nen ir akuni wene inilu mende inakla eberek mende, An nen iniliti apir erogo baga erigin o,” yiluk yirige o.
20 #
Ayb. 12:17; Yes. 19:12, 33:18, 44:25 Yogo, ir akuni wene inakla nggagalek yiluk erir taga mende eti nena ake? Ir ye eru nde eru inilu mende nen nena erugun kogop? Ar Allah nen o agar taga yoma inakla nggagalek mende eti obogar inenggal mende o yiluk titigirogo begemo o.
21Ir akuni ekwi inilu inakla tenggelek paga nen, Ar Allah ebe yegerogo o yiluk, inilu arugun mondok dek o. Ar Allah eti akla nggagalek wene ilu Ar adigar ma, nir wene yorar lektagwi yi paga kwak, ndak ndilinabigin o. 22Ir akuni Yahudi mende nen erukbuk mende kwak erurak nggino yugwi, ir akuni Yunani mende nen nir ninakla nggagalek kwak eti pano o yiluk yugwi o. 23Ogwe, Nir nen yirtagwi kwak eti, Ar Kristus warogo o paga birugwa wene yi ar yorar netagwi o. Ma ir akuni Yahudi mende nen, wene yi nena wene yirtagwi ogwe yiluk yugwi o. Ir akuni Yahudi dek mende nen, wene yi ebe inenggal yirtagwi o yiluk yugwi o. 24Ir akuni Ar Allah nen inayonggo birigemo wagangga mende, ir akuni Yahudi mende inom, akuni Yunani mende inom, nen wene yi, Ar Allah obarne ambik iliti werek nen yirigemo yirtagwi o. 25Nenaluk Ir akuni inakla nen wene yi inakla andakbuk yugwi mende, ebebar kwak eti Ar Allah akla nggagalek eti inom ndak kakbuk o. Nen Ar Allah obarne dek yiluk kugwi mende, Ar Allah kwak eti ir akuni nen Ar obarne inom ndak kakbuk o.
Ar Allah obarne werek nen akuni inobarne dek o yiluk yirige wene
26Nogari kir obogar, wanelak! Kir nen nir nenggerogo werekma, Ar Allah nen wai yoneragage yiluk, kir kinakla eberni o. Kir we ambindak mban kiniliti werek welagwi, amberak wim pago welagwi, amberak wene onde welagwi, akuni inil paga ndak talek welagagup mende o. 27Ar Allah iliti nen, ir akuni yoma niniliti werek yirtagwi mende, tebelogo bamo inenggadi aruwak nen yiluk, mirkinakigemo o. Ar Allah nen ir akuni inobarne dek mende nen, ir inobarne werek mende eti tebelogo bamo, ir inenggadi aruwak nen yiluk, kir kinayonggo birigemo o. 28Ar Allah nen ir akuni monek mende, nen inanduan mende, nen akuni o yoma inobarne werek inom nen ininggi werek inom tebelogo bagu dogowak nen yiluk, kinayonggo birigemo o. 29Eta paga nen, kir akuni yoma nen, Ar Allah uwagam, an kar yugwi yi dambe kalok dogoni o. 30Ar Allah adik nen ekige paga, kir Ar Kristus kinom kunogo binagaga, Kristus paga nen nir niniliti werek erogo binanengga, Ar Allah nen nir Ar ninom ambi dambul ninaka, nir Ar nen kede pigal ninaka, ar adik akburi pulik denogo binanengga ekige o. 31#Yer. 9:24Alkitab mbalek paga nen yega dogolir, “Kir kinakla adeknggen kalok, Ar Tuhan nen nadenggen erogo banenggemo o, yiluk andani o.”
Currently Selected:
1 KORINTUS 1: WLW
Highlight
Copy
Compare
Share
Want to have your highlights saved across all your devices? Sign up or sign in
