ROMA 13
13
Pemerintah inake eku dogorak wene
1Akuni obogar pemerintah inane kolek dogorak o. Pemerintah mende obogar, Allah nen wene pago dogowak nen yiluk wogoragagemo o. Pemerintah yogondak wene pago werek yoma, Allah nen wene onde dogoni o yiluk yoragagemo pago werek o. 2Etama, akuni nen pemerintah inane tebelogo bugwi kalok, Allah nen mor erogo birige mende tebelogo birtagwi o. Akuni eterogon ekwi mende, hukuman inoba wuragin o. 3Akuni pano ekwi mende nen pemerintah inoba inobade dogorak dek o. Akuni maduk ekwi mende nen kalok, pemerintah inoba inobade dogorak o. Kir nen pano mban ekwi dogorak o. Pano eka keyalok, kar pano yiluk yokirugun o. 4Pemerintah eti Allah ayedoman, kir pano dogowak nen yiluk yabu eritagwi o. Nen kir nen maduk ekwi kalok, pemerintah nen nenggerogon ekinabugun yiluk kinobade togon dogorak. Ir pemerintah Allah ayedoman ma, um palogo togok binagagun mondok dek o. 5Etegerogon werekma, kir nen pemerintah inane yugwi kalok, dirogo eku dogorak o. Kiniliti paga nen kinaru kinobade paga dek o. Etama kir nen pemerintah inane mutok lagu dogorak o. Kiliti paga nen pemerintah inane mutok lagu dogorak, karu kobade paga dek o.
6 #
Mat. 22:21; Mrk. 12:17; Luk. 20:25 Eta paga nen, kir pajak wogoratagwi o. Pemerintah mende etoma Allah eyabu mende ma, yabu denogo barigemo eritagwi o. 7Pemerintah inake wogoraurak mende kalok, wogoragwi ar dogoni o. Pajak wogoraurak kalok pajak wogoragwi ar dogoni o. Kir nen ap agar onde mende wogoraurak mende werek kalok, agar onde wogoragwi dogoni o.
Akuni yonggwa daurak wene
8Kir nen akuni inanomar agade nggigilugup o. Kir nen akuni amberak kiniliti kunik erinaburak agade nggigilku dogoni o. Akuni iniliti kunik erinakwi mende eti, Musa nen wene yirige mende nggedok togo erir tagwi o. 9#Kel. 20:13-15, 17; Im. 19:18; Ul. 5:17-19, 21Yahudi inawene kindirik paga yega dogolir yirige yi o, kwe mbainak erugup o, akuni inarugup o, kinilmudu waganugup o. Akuni amberak inamendek wadok-wadok andagup o. Wene ya paga, wene amberak yirige mende obogar alep kede werek agarik o. Wene alep kede warek ebe eti, “Kar kebe kiliti kunik etartagan kwak, akuni amberak kiliti kunik erinaka dogon o.” 10Ar akuni ambi nen, akuni amberak iniliti kunik erinakwi kalok, ar nen akuni amberak maduk erinabigin dek o. Wene ebe obogar dambuk togo hukum agama paga yirige mende eti, kar kebe kiliti kunik etartagan kwak, akuni amberak kiliti kunik erinaka dogon o.
11Eta obogar, o yogondak ya nir niniluk aruwam arar aga o, yiluk kinilu agu dogoni o. Nir auwan ebebar andagwi kigik, ndilninaburak paga korok panggo yi warirtaga o, yiluk kinil dogorak o. 12Kukbaga mende arar lagaluk laga kigik, o dinggagane ari waritaga o. Eta ma, nir nen ninobabur kirak-kirak maduk mende eku dogorak dek o. Kir nen tige pago telekma dogorak o. 13Nir nen o dindaga paga akuni pano erirtagwi kwak, pano mende mban eku dogorak o. Nggok mban nak yiluk darir lagu dogorak dek o. Lungga wadi ugun ekwi, maga enggadi werek mende ekwi erurak dek o. Ndugi bugwi, na'ir ka'ir welagwi erukbuk o. 14Kir erurak mende, Ar Tuhan Yesus Kristus nen mban pano mor ekinabuwak o. Nen, akuni inobabur maduk nen endago paga, maduk erurak ekinaka kalok, erurak dek o.
Currently Selected:
ROMA 13: WLW
Highlight
Copy
Compare
Share
Want to have your highlights saved across all your devices? Sign up or sign in
