ROMA 14
14
Kir nen kinogariyak maduk erogo bagup yirige wene
1 #
Kol. 2:16
Ap ambi ar waganggige mende ebebar dirogo eberogo waganggikdek kalok, kir nen pik pak ar wogonaku dogoni o. Ar iliti obabur werek mende paga, wene oba agarak kunugup o. 2Ir akuni amberak nen, an kwak ye mende nde mende ugunar naurak ndak o yiluk andagwi o. Ogwe, ir amberak ebebar andarugwa mende obarne agakdek mende nen, an engga mban dago nengga dogorak andalok ekwi mende weregar o. 3Ap ambi ugunar nonggwa mende nen, ir akuni nonggwa mende elokte ambi mende mban nengga kalok, ap yi ndak dek mende o, yiluk yorurak dek o. Nen ar akuni ambi men, nonggwa mende elokte ambi mende mban pulogo nengga nen, ar ugun nonggwa yi ndak dek mende o yiluk yorurak dek o. Ar ebe Allah nen obogar waganggemo o. 4Kar kebe ta nen, ap ambi ayedoman mende inawene mbalir lektagan o? Ir inawene mbalurak mende winagik menagik ekwi dalok, eti ir inombae werek ar o. Ar Tuhan nen yedoman eti mendok togo menogo bumo, ar ebe mendek pano ar dogogin o.
5Ir akuni amberak nen, o hari amberak kwak unggune dek andalok, o hari ambi kwak unggune mende erogo bugwi, nen ir ap amberak nen o hari etoma obogar ndak-ndak pano mban erogo bugwi o. Etegerogo ekwi kalok, inadik ndak dombok nen mirtagu dogowak nen yiluk dambek daurak o. 6Akuni nen o hari ambi mban unggune ekwi kalok, ir eta ekunem, Ar Allah endaga mban wogok dugwi o. Ir akuni amberak nen, ye mende nde mende ugun ar ner nugwi kalok, ar eterogon eka dogolir, Ar Allah endaga wogokdega agarik o. Ar Allah keyagi warogo, wa yiluk yotuk nengga dogowak o. Nen, eterogon ar, ar ambi nen nonggwa mende ambi mende mban pulogo ner nega eti, Ar Allah endaga ar wogokdega dogolir, wa yoga dogolir ner nega dogorak o. 7Nir ya werek ya nen, nir ninadik ninake mban erir nugwi dek o; nen ir akuni amberak nen inadik inake paga mban kanggwi degar o. 8Nir niniluk welagwi kalok, nir nen Ar Tuhan ake niniluk dogorak o. Nen nir kambugun kalok, nir nen Ar Tuhan ake paga ar kamburak o. Nir niniluk kalok inom, nen nir kamburak kalok inom, etoma Ar Allah ake mban arar o. 9Kristus arar watatuk nen iluk menagage o. Etama, Tuhan eti akuni iniluk mende inom, warek mende inom inombae arar werek o. 10#2Kor. 5:10Wene ebe etama, nogari ae, wanelak. Kir nen kinogarak ambi yiduk maduk yorurak eti nenaluk? Nen ar ebe bogorak mende andaurak eti nena ake? Nir obogar Ar Allah uwagam ninuwak doluwak nen yiluk ari lugun o. 11#Yes. 45:23Alkitab mbalek paga den yega dogolir,
“Ebebar o,” Tuhan nen ane yega dogolir,
“akuni inadik ndak nen nuk agan, An napma inendop yungguli warugun o.
Nen akuni inadik ndak nen, An eti Ar Allah arar o yiluk, yugu dogogun o.”
12Nir ninadik ndak eku lagagu mende ake paga, Ar Allah uwagam ari lamo, ninendokma waganigin o.
Kinogariyak nugurinabugup yirige wene
13Etama, nir nen kar yegedek, an endegedek yurak dek o. Nen, kir nen maduk negen ambi kalok, kinogarak kiniliti ebebar andaga mende eti, ebe maduk ande paga ari laganem yiluk, panorogo moroku dogorak o. 14An Tuhan Yesus nimbirak kunik werek eti paga, ye wene nde wene etoma obogar agode yiluk dogorak edo negen kega dek o. Ogwe ir ambi nen eti agode werek mende yiluk andagwi kalok, eti agode werek mende arar o. 15Ogwe, kar nen kogarak Kristen mende ambi akla nen, yi maduk agode yurak andaga mende kigik, kar nen nengga keyalok, ar iliti nggagalogo bigin o. Eta ma, kar nen ar kogarak eti akba kakla andalok dek erigin o. Ar Kristus ar ap ambi eti ake inom ar wartagage kalok, kar nen ner nengga paga, ar kogarak eti maduk erogo bigin o. 16Etama, ir akuni amberak nen yi maduk andagwi mende, kir nen yi pano ma yiluk paktagup o. 17Nenaluk, Ar Allah nen akuni ambi ilitimo yabu eka kigik etoma, ar nen erom nena nau inom, nen i nena nau inom, awene paga eti ebegirak mende dek o. Wene ebegirak mende kwak eti, akuni eti nen Ar Allah iliti mirik mutok erir laurak inom, nen Ar Roh Allah nen adeknggen mende wogorigin eti wokbatalok, ar ebe iliti kodeyak mondok dogorak o. 18Ir akuni Ar Kristus eterogon eyabu ekwi mende eti, ir nen Ar Allah adeknggen erogo bugwi, nen ir akuni amberak nen ir inalon palinakwi o. 19Nenaluk eti paga, nir ninebe pano dambulik dogorak mende eti ake paga mban, eku doguwok o.
20We naungge ake paga, yabu Ar Allah nen erogo bege mende yoma, kar nen ela marogo bugup o. Naungge mende maduk oba kunik mondok dek o. Pano nunggu dogorak mende arar birige mende, ogwe kar pano nau paga nen, kogarak ambi maduk erogo bigin kalok, wene maduk eti kar arar o. 21Pano kwak eti, kogarak kiniliti ebebar andagop mende eti, ar maduk erogo bu nogo yiluk, uno mbalek naurak inom, nen anggur agi todek naurak inom, ye eru nde eru mende etoma obogar kudi biluk dogu pano ar o. 22Kar nen pano eru andagen mende eti, Ar Allah ilka paga kadigar kake paga etaurak o. Ar ambi iliti paga nen, pano yi erumo an maduk erninabigin dek andaga kalok, ar eti adeknggen arar o. 23Ogwe, ar ambi naungge mende paga, iliti anggin werek kigik nengga kalok, ap eti Allah nen kar maduk eken o yiluk yorigin o. Ye mende nde mende iniliti ebebar andagikdek dogolir ekwi eti, maduk arar o.
Currently Selected:
ROMA 14: WLW
Highlight
Copy
Compare
Share
Want to have your highlights saved across all your devices? Sign up or sign in
