ROMA 12
12
Allah ake niniluk dogorak wene
1Nawor nakbur o! Ar Allah obabur pano mondok paknirek agarik o. Etama, Ar iliti adeknggen aruwak nen yiluk, kir nen tamban ebebar mende eku dogorak eti, kir ninebe kiniluk mende eti, obogar Ar Allah ake bugu dogoni o. 2Wene o agar taga yoma, inobabur erir tagwi mutok eku dogogup o. Kir kinebe Ar Allah nen ngger mende erogo binaguwak nen yiluk, kinebe Ar wogorni o. Eta paga nen, kir nen Ar Allah iliti paga mende, wene pano ekwi inom, Ar iliti adeknggen ekwi inom, obabur pano nggirik inom, kir nen kinilu arigin o.
3Allah nen wene yi yoran yoknegemo, eti paga an nen kir obogar kinaruk warigin o. Kir nen an pano yiluk yade daktagup o. Kir Yesus oba eberogo waganggugupmo, Ar Allah nen kar ya ndak-ndak eka dogorak yokera taga eti pik pak dikbiluk, nen erir lagu dogoni o. 4#1Kor. 12:12Nir ninebe paga nininggi niniyok inom, ninoba kunik mende ambigar agarik o. Ninoba kunik mende etoma eyabu eti kunogo mban agarik o. 5Nir etegerogon ar werek o. Nir ninebe ambigar mende, ninebe Kristus ninom kunik paga eti ambi ar werek o. Nen, nir ninebe ninadik ndak eti ambigar mende, ebe ambi paga yiduk mbarok erek werek o. 6#1Kor. 12:4-11Nir ninadik ndak dombok, Ar Allah eyabu eru ake nen, Ar Roh awene tumburik karunia-karunia eti wokneragage o. Karunia-karunia etoma, Ar Allah iliti mirik paga nen wokneragage o. Etama, nir nen Allah eyabumo karunia-karunia paga eku dogowok o. Ar ambi Allah wene yorar laurak wogoge kalok, ar nen Allah wene eti, ar yorar lau yoge ndak-ndak, yorar laurak o. 7Ap ambi akuni yamak daurak wogogemo kalok, akuni panorogo yamak daurak o. Ap ambi nen akuni wene emeriraga dogorak wogogemo kalok, akuni pano togon ar emeriraga dogorak o. 8Ap ambi akuni iniliti aganggen erinaburak mende wogoge mo kalok, akuni panorogo iniliti aganggen erir nega dogorak o. Ap ambi akuni inakba eka dogorak wogogemo kalok, akuni panorogo inakba eka dogorak o. Ap ambi inewe dogowak nen yiluk wogogemo kalok, ar nen akuni pik pak mor-mor erinaka dogorak o. Nen ap ambi akuni inaba eka dogorak wogogemo kalok, ar akuni yanggorogon iliti adeknggen paga inakba eka dogorak o.
9Kiniliti pano paga, inakba eku dogoni o. Pano mende kininggim nggerok kalok, maduk mende kina'ir lakalok agode yugu dogoni o. 10Kir nen akuni ambi akburi nakba kakba dogir tagwi kwak, kir nen nakba kakba paga welagwi, keyagi war-war yugwi, eku dogoni o. 11Kineyabu ertagu dogolir kalok, kina'ir paga puk agik erugup o, kinobarne togo eku dogoni o. Ar Tuhan eyabu Roh Allah nen kinobarne ekinaka kigik, eku dogoni o. 12Anggin kinoba tebel kinaburak eka kalok, kiniliti adeknggen paga, Ar Tuhan nen yamak neyagin o yiluk, aruwam welagwi, tamban mban ekwi, eku dogoni o. 13Akuni Kristen mende amberak inake ndugurogo bugwi, ir akuni Kristen mende amberak kir kinonggokdek mende ar ogwe, kiniliti adeknggen paga kinuma wogorek unggugwi eku dogoni o.
14 #
Mat. 5:44; Luk. 6:28 Ir akuni maduk ekinakwi mende inake, Ar Allah nen pano pakarek dogowak yiluk ineramban eku dogoni o. Kir akuni pudulogo bagup o. Ar Allah nen pano eginaka dogono o, yiluk inake tamban eku dogoni o. 15Ir akuni inadeknggen ekwi dalok, kinom kinadeknggen kugu dogoni o, nen ir de akwi dalok, kir kinom de agwi, eku dogoni o. 16#Ams. 3:7Kinebe pano ambi dambulik dogoni o. Wogok dartugwi dogogup o, kir nen ir amberak tebe yiluk ekwi ndak-ndak eku dogoni o. Kir nen an obok nilu o, yiluk andagu dogogup o.
17Ir akuni nen maduk erkinakwi kalok, kir nen maduk onggo erinabugup o. Ir akuni nen ya pano andagwi mende mban eku dogoni o. 18Kir nen akuni obogar ninom pano dambulik dogowok o, yiluk eku dogoni o. 19#Ul. 32:35Nawor nakbur waa! Kir nen ap alep ma mondok warugup o, Alepma eti, Ar Allah nen ap alepma warigin o. Alkitab mbalek paga, Ar Tuhan nen yega dogolir, “An nen onggo warigin o. An nen maduk onggo wogorigin o,” yiluk yirige o. 20#Ams. 25:21-22Nen, kinawim mende erom abu kalok, erom magarano ar o. Nen, inagi abu kalok, inagi kenagirano ar o, nen kar nen eterogo eka keyalok, ar enggadi warogo bigin o. 21Kir nen maduk mende nen tebelogo binaguwak nen yiluk erugup o. Nen, kir nen maduk eru ekinaka mende eti, nen kir kinobabur pano paga, maduk mende tebelogo bugu dogoni o.
Currently Selected:
ROMA 12: WLW
Highlight
Copy
Compare
Share
Want to have your highlights saved across all your devices? Sign up or sign in
