ROMA 11
11
Allah nen ir Israel mende inakba nen wogonabigin yirige wene
1 #
Flp. 3:5
Ar Allah nen, ir Ar Akburi mirinakige mende eti mondok mbok dambe darige a? yiluk kinok yumo, onggo yurak eti,dek arar o! An nebe ap Israel mende, nen Abraham umbu, nalebunu Benyamin paga wigalek o. 2Dek o! Allah akburi mirinakige mende, o pagane nen mondok mbo balok dek o. Nawor nakbur kir nen, Alkitab mbalek akla etoma, ar Elia ake yirige kir obogar kinilu werek o. Ar Elia nen Israel inawene wolok Allah oba elagaka dogolir, Elia nen men yirige, 3#1Raj. 19:10, 14“Tuhan wae, ir akuni yoma nen, Kakburi imam-imam mende obogar inaka o. Inakdiluk, kurban Kar kake birtagama obogar olin ndamuk pamuk erogo bega o. Nen yogondak ya, an nadigar naru paga murnarek erirtagwi o,” yiluk yirige. 4#1Raj. 19:18 Yorigemo Ar Allah nen, ar Elia wene onggo nena yorige? Ar Allah nen wene onggo Elia yoga dogolir, “An nen ir akuni inebe tujuh ribu paga, An nake dambek dagimo werek o. Ir eti nen, Dewa Baal eti alon palogo amudi kunir tagodek mende arar o,” yiluk yorige. 5Eta ndak-ndak, yogondak Ar Allah nen akuni inakba nen, inebe bugudagar pulogo bagemo agarik o. 6Ar iliti kunik paga, inebe pulogo wogonabir taga o. Ir inobabur pano ekwi paga dek o. Nenaluk ir akuni Ar Allah nen mirinabi taga eti, ir inobabur ekwi mutok yiluk yumo, Ar Allah eti akuni inakbarek o yiluk yoraurak ndak dek o.
7Yogondak, nenggerogon andagop? Ir akuni Israel mende nen, ir kwarir nugwi mende eti kodalok dek arar o. Ir kodarugwa mende eti, ir inebe bugudagar, Ar Allah nen pulinakige mende eti arar o. Ir inebe ambigar, Ar Allah nen wai yoraganem, ir inaruk kulubuk o. 8Alkitab mbalek paga nen yegerogo agarik o, “Ar Allah nen ir inakla eberkwi inom, nen iniliti paga eberkwi inom, apir erogo birigemo; nen yogondak ya kudi paga, ir inil kaurak mende ndak dek aga, nen inaruk kolalurak mende ndak dek aga, erogo barigemo o.” 9#Mzm. 69:23-24Ar Daud nen yega dogolir,
“Ir nen dago nggok dakwi eti, ir nggedal inaburak kede baktugwi,
inoyok dumbuk togo watawam agar ande mbalogo baktugwi, nen olin ndamuk pamu ertagwi dogowak o!
10Ir inil mbuk atuk inil lakakbuk mende arar dogowak o;
Nen ir inambor kimbu atuk, teberek mondok nugu dogowak o.”
11Ir ap Yahudi mende nen nggar wukwi kalok, eti mondok-mondok ndamuk pamuk etarir tagwi a dek a? yiluk an nen kinok yumo, onggo eti, etegerogo mondok dek arar o! Ogwe, ir nen maduk ekugwa paga, ir akuni Yahudi dek mende amberak etoma ndilinaburak telek agage o. Eti paga nen, ir ap Yahudi mende nen, ir akuni Yahudi dek mende etoma inoba, inanini birtagwi o. 12Ir ap Yahudi mende nen nggodo nomalkwi, Allah iliti andalok mutok lagikdek ma, i akuni inalebunu Yahudi dek mende etoma, Ar Allah nen odo togo barige o. Ir Yahudi mende nen, Ar Allah inom pano dambulumo, Ar Allah adeknggen mende eti, ir nggok togo ar wogoragin o.
Ap inalebunu nin mende inagap endarurak wene
13Eta mende, yogondak an kir ap Yahudi dek mende yokeragin o! Yogondak ya paga, an ap nin mende inake rasul menagagi paga, an neyabu mende eti mondok nika paga arar agarik o. 14Ma, an nakla duktek kwak eti, ap an nogari Yahudi mende ir inanini erogo bega neyalok, tuan eti paga ir amberak an nen ndilinaburak paga erir taga o. 15Nenaluk ir Ar Allah nen obogar togok darige arar o, eti paga nen, o agar taga yoma obogar, Ar Allah inom pano dambulkugwa o. Ma nggok togo eti, ir inebe Ar Allah nen wogonabigin kalok, eta inebe akuni warekma nen iniluk agwi purogo arar etarurak o! 16Roti ugu alebagik nggaruk togo, Ar Allah wogogwi kalok, roti ebe obogar Allah ake wogorugun o. Nen o omanggen eti Ar Allah amende kalok, inggilobak obogar inom etoma Ar Allah amende arar o. 17O Zaitun alokbak amberak eti, ir akuni Yahudi mende arar o, nen ir amberak obok mbalogo wulinakige o. Nen o Zaitun mbalkigemo akdimo etoma, ap Yahudi dek mende etoma kunogo barigemo o. Nen nogari kir kunogo binagarige eti, mbogor taga mende paga kinadeknggen dogobagik nen yiluk, kunogo binagarige o. 18Etama, kir nen ir o edo paga nen mbalogo wuldarige mende eti, kinakla dagor erinabugup o. Kir nen nir yi alokbak mende o yiluk kinilu dogorak o. Nen, o anggup nen omanggen erom magari tagodek o, o omanggen nen inggilobak erom magaritaga mende o. 19Ogwe, kir nen yugu dogolir, “E o yiluk yugun, ogwe inggilobak eti mbalek ma, akdipmo an kunogo baninggigemo o!” 20Eta ebe wene mondok mende, ir ebebar andagidekma mbalogo wuldarige o. Ogwe kir nen ebebar yiluk oba panggologo waganggwi paga, kinebe kunggi nakigemo o. Etama, kir nen wogok daktaurak mondok maga o, ogwe tebe yurak pano ar o. 21Ar Allah nen, Yahudi mende inakba kigikdek o, alokbak ebe paga kunik mende mbalogo wuldirige o, nen Ar nen an mbalogo mbo wuldanigin dek o yiluk andaurak maga o. 22Yogo wene yoma nen, Ar Allah eti obabur mondok pano yiluk ninilu aga o. ogwe Ar Allah eti anini ambik o yiluk ninilu aga ar o. Ma Ar nen ir inomaduk werek mende kalok enagago baurak mondok dak dek arar o. Ogwe nogari kir kinoba Ar nen iliti kunik o. Ogwe kir nen Ar nen ninakba karige mende eti apma mondok dogorak o. Nen dek kalok, nogar kar ogwe mbo lakbagagin arar o. 23Ir akuni Yahudi mende eti, ir inakla ebebar andagwi mende eti mbo damber kugun kalok, kigik ar yabungga wogarinabigin o; nenaluk Ar Allah obarne paga, ir Ar inggimo wogonaburak ndak arar o. 24Kir ap Yahudi dek mende etoma, kinebe o Zaitun tekman mende alokbak eti ndak-ndak o. Yogo, kar kobabur adik mende ar keyalok ogwe, o alokbak ebebar mende mbalekma edo paga kunggakige kalok, ir Yahudi mende kwak eti, o alokbak edo ebebar mende paga kunogo baurak eti anggin dek o. Nen o zaitun edo ebebar mende edo paga kunogo ba warurak mondok ndak telek arar agarik o.
Allah nen ye akuni nde akuni obok iliti kunik erinaka wene
25Nawor nakbur wae, kir nen nir obogar ninilu aga andagup o. Wene amberak Allah nir inilu aruwak andaga mende akuni nen inonggokdek werek o. An nen kir kinilu aru wadok andaktaga eti, wene ebe yi; Ap Yahudi mende amberak iniliti mbuk mondok werek o. Ir iniliti mbuk mondok dagik, akuni Yahudi dek mende obogar, Ar Allah uwagam waruwak yiluk ekdiluk agiyarik o. 26Eta etarumo, akuni Yahudi mende obogar inagap endarigin. Wene eti Alkitab mbalek paga yegerogon yirige,
“Endaga mbogor inagap endarurak mende, o Sion nen warigin o.
Ar nen, ir ar Yakub umbui maduk ekugwa mende etoma, obogar purogo laga bigin o.
27 #
Yer. 31:33-34
An nen ir maduk ekugwa mende inoba nggorogo lakbiluk,
An nane amburu yi, ir ninom yigin o.”
28Ap Yahudi mende nen, Ar Allah wene Pano Wene waganu nina'ir yirugwama o. Ir Allah inom wim agugwa. Eta etagage paga, ap Yahudi dek mende inake o telek erek werek agage mende, Allah nen ir inumbu mikigi paga, ir ar akburi pulinakige paga, Allah nen inakba erigin o. 29Nenaluk, Ar Allah nen akuni miginatuk mo, nen Ar adeknggen mende eti wogoralokma nen, Ar Allah nen iyok paga mondok waganir tagodek o. 30O pagane etoma, kir nen Allah ane tagale mende welagagup o. Ogwe, Ar Allah nen kir maduk apma tebelek welagagup mende eti, obok nggorogo binagarige o. Nenaluk ir akuni Yahudi mende ap yu damber karugwa eti paga arar o. 31Ir Yahudi mende eta ndak-ndak ar o. Yogondak ya, ir nen Ar Allah wene mutok lagikdek werek o, eti paga nen kir maduk kinoba mende eti, dek erogo bege o. Nen ir ogwe yabungga maduk inoba mende nggorogo mbo lakbigin o. 32Nenaluk, Ar Allah nen ir akuni yoma obogar, maduk erir lagwi dogowak nen yiluk togok bagemo o. Eti ekwi paga, Ar Allah iliti akuni inakba nggirik eti paga, inakba erigin o.
Allah mban wogokdurak wene
33 #
Yes. 55:8
Allah amindi amende werek etoma il mbalu ndak dek o. Ar nen ekdinangga inom, iliti werek paga mor erninaka inom, edo ilu paga eka inom, ninom walkakbuk o! Ta nen ar nen wene kwalogo bega ilu arurak kogop? Ta nen Ar yabu erir taga mende etoma ilu agarik kogop? 34#Yes. 40:13Alkitab mbalek akla yegerogo mbalek agarik,
“Ta nen Tuhan iliti ebeka ilu agarik?
Ta nen kar yegerogo erin yiluk ar aruk warurak?
35 #
Ayb. 41:11
Ta nen, Tuhan yi kodan o, yiluk wogorigerek ma,
onggo woknirin yiluk Ar yorurak?”
36 #
1Kor. 8:6
Ar Allah nen ye mende nde mende obogar, agabak kigirogo birige. Obok ar Allah nen kenamerek, obok Ar Allah amende o, etiar ma, Ar Allah mban wogokdugu dogogun mende o! Amin.
Currently Selected:
ROMA 11: WLW
Highlight
Copy
Compare
Share
Want to have your highlights saved across all your devices? Sign up or sign in
