FILIPI 3
3
Wene ebebar mende eti aitok mondok dogogin yirige wene
1Nawor nakbur, wene ugu paga ya, Ar Tuhan kinom kunik dogolir, kir kiniliti adeknggen mban ar dogoni o. Kir ndilik pano dogu paga, an wene alep ar yokeragagi mende, ambi inom ar, yokerau wadok kigi o. 2Kir nen ap maduk ekwa mende kalok inaruwam panorogo dogoni o. Ir ap eti inebe ‘yangge’ kwak arar o. Ir nen akuni yoma sunat erurak yiluk, yugwi o. 3Ogwe, nir eti ir sunat erek mende eti arar, nen ir kwak dek o. Nir Roh Allah nen yorneraga kigik, Ar Allah woguk dugwi o. Nen nir Yesus Kristus ninom kunik paga, Ar Allah wa yiluk yoruwok o. Nir nen agar taga mende u ekwi paga, oba penggarek agorik dek o. 4Ebebar kwak eti, ir akuni amberak nen nir ninaru eritagwi paga penggari tagwi yugwi kalok, an nen nir eritagwi paga odo nggwe penggari unggumo kwak eti ndak o. 5#Rm. 11:1; Kis. 23:6, 26:5An endago o delapan hari paga welagugwarik, nen an sunat ernakugwa, an ap nebe Israel mende paga endarnakugwa, nalebunu Benyamin mende, an ap Ibrani nai werek an arar o. Agama Yahudi wene kindirik eru paga, an ap Farisi mende welagagimo o. 6#Kis. 8:3, 22:4, 26:9-11An nanini ambik dogolir, ir jemaat warinabir nega lagagimo o. Ninobabur nininggi ekugu mende lakamo, agama Yahudi wene kindirik mende, an nilai nggok mondok waganggimo o. Ap pano mor-mor eka lagagi an arar o. 7Ogwe, nenaluk Ar Kristus ake nen, pagane eka lagagimo nggwe etoma, an onde ekodaga lagagi o, nen o yogondak ya lakamo eti, ninggi dek ekodaurak mende arar waganggigimo o. 8Agama wene kindirik mban dek mende, wene amberak inom paga, maduk erninaburak lak kalok yir taga o. Yogondak pago agorik yi, ninggi werek ernaburak mende o. Ebe Kristus Yesus newe yi nen arar o. Ar Kristus ake paga, ye mende nde mende obogar nggolalogo dambe kalok, Ar Kristus ebe kwak odo mondok batalok, amberak dirubu mende yiluk mbo dambe karigi o. 9Nen nebe Kristus nimbirak arar komak tagagumo o. Ar Allah nimbirak pano kunik yoma agama, wene kindirik ekigimo dek o. Ar Allah inggimo agarik o. Nimbirak pano kunik eti edo Ar Allah paga nen wagagemo o. Ar Kristus oba ebabar panggol kigimo nen noba wagagemo o. 10Niliti nen Kristus ebe dik togo nilu aru wadok nggok kertaga o. Nen ar obarne paga kambiluk iluk agage eti, noba aru wadok ambik kertaga o. Ar Kristus nen Ar anggin panggin waganogo wartagage o. Nen an eta ndak-ndak ernabu wadok ar kertaga o. 11Nen an kambiluk mo niluk ekdanu yiluk, niliti dulik mondok ar agarik o.
Mbu agan onggo koda laurak wene
12An nen, irep paga obogar pano eki yigikdek, nen obogar amburu mbalki yigikdek ar o. An nen Kristus Yesus nen onggo bege etoma koda laknen yiluk, walker taga o. Eti ake, an ndilnaka nen nebe ar engga werek adik ake bartega ekigemo o. 13Nawor nakbur, an onggo koda laurak mende eti arar koda lagimo yiluk nakla awan andagikdek o. Eta ar ogwe, ambi an nen erurak mende yi o, an namborna mende mi erogo dambe kalok, neloktekma nggwe mende mban mutok nggebegerik ligin o. 14Ninamende mbogor taga birige mende, niniluk dogorak mende koda lau paga, Ar Allah nen Kristus Yesus paga ninayonggo bege eti, koda lagaluk mbu agan lektaga o. 15Nir mbogor paga nen endago mende arar ninanggok kalok, ninobabur eta ndak-ndak dogorak o. Nen kir endoma mende amberak iniliti adik werek kalok, Ar Allah nen telekma dega ninilu arigin o.
16Eta mende, wene yi panorogo dikbini o; Nir nen yegerogon dogorak o yiluk, kudi warek welaga ndak-ndak dogorak o. 17#1Kor. 4:16, 11:1Nawor nakbur, kir obogar! An erir taga ndak-ndak eku dogoni o. Nir nen ninobabur il walkalok eku dogorak pano mende arar wokeragagu o. Eta ma, nir ninobabur ekwi lakninagik eruwok nen yiluk kalok, ninobabur mende panorogo mbenagago nen ninobabur mende mutok nugu dogono o. 18Wene alep ar yokeragagi mende, yogondak ambi inom ar yokerar taga yi o. Akuni ninggalok inobabur paga, Ar Kristus o paga warogo birugwa wene maduk erogo birtagwi o. 19Ir akuni eterogo mende, inebe irep paga arar dek arir wari tagwi o. Ir inumbu eti ir inebe iniliti nengga mende eti arar o. Wene enggadi werek wene, ir nen yadek dugwi o. Ir nen agar taga ya dogolir eku dogorak mende mban, eberir lagwi o. 20Nir yi, akuni mbogor paga inai werek arar o. Etoma nen Ar Tuhan ndilninakwa, ninewe Yesus Kristus warigin o. Nir nen Ar ebe mende warigin yiluk aruwam torek doguwok o. 21Nir ninagakdo kambir taga mende, obatne dek mende ma, Kristus nen adik ngger ekdiluk, Ar agakdo pano ndak-ndak ekdinanigin o. Ar obarne werek mende obogar. Ar apma tebelekma, Obarne eti paga erninabigin o.
Currently Selected:
FILIPI 3: WLW
Highlight
Copy
Compare
Share
Want to have your highlights saved across all your devices? Sign up or sign in
