FILIPI 2
2
Tebe yiluk Ar Kristus obabur ndak-ndak eku dogorak wene
1Kristus kinom kunik paga kiniliti kode arar ma, Ar Kristus nen kinakba kigin arar ma, kinadeknggen dogoni o! Kir Roh Allah nen wokerek neganem, kir-kir ar nakba kakba ekwi, niliti kiliti ekwi, etegerogon eku dogoni o. 2Yogo, wene ya paga, kir nen an niliti adeknggen nggok togo etarurak mende ebe ya o: Kiniliti ambi paga nakba kakba welagwi, kiniliti wadok ambi paga, ambi ar mutok lagwi, eku dogoni o. 3Ye mende nde mende kir kinadik kinake etau andalok eku dogolir, wogokdaktau paga erugup o. Ebe eku dogorak pano mende eti, kir kinadik kendak adek, kiniliti tebe yiluk, akuni amberak ir pano o, ogwe an yi we ndak dek mende o, yiluk dogorak eti pano mondok o. 4Ir akuni adik inake paga kinil wogonaku dogolir; kir kinake mban erir lagu dogogup o. 5Kir kinobabur Ar Kristus obabur kwak dogoni o:
6Ar ebe Ar Allah nda-ndak ar ogwe,
Ar nen An nebe mbogor paga mende naitok dogogin yiluk andalokdek ar o.
7Ar nen obogar nggolalogo damber kalok, yedoman negen etagage o.
Ar ebe akuni ndak-ndak agagerek, nen Ar ebe akuni talek ar welagage.
8Ar nen ebe tebek batalok, Ar Allah nen yeganem aruk kolok erir laga kigik,
o paga menogo biluk warogo birugwama kanggige o.
9Eti ekige paga, Ar Allah nen Ar ogona paga mondogar yade dirige o,
ma ir inobarne werek mende eti tebek baga dogolir, Ar kwak obarne ogona paga yadek dirige.
10 #
Yes. 45:23
Ar Yesus wogokdu paga,
ir iniluk mbogor paga werek mende inom, nen agar taga werek mende inom,
nen agar apma werek mende inom,
ir obogar nen wogok dugun o.
11Ir obogar nen, Ar Yesus Kristus eti Tuhan arar o, yiluk yugun o.
Eta yugun paga, Ar Allah Ninombae endaga woguk dugun o.
Kinakbinak agar taga yoma yibadek dogorak wene
12Nawor nakbur niliti kunik ma, kir an ninom dogolir yokeraga nalok, kinaruk kolok eku lagagup kwak, yogondak nebe walek nen nane mbo yega nagik inom, kinaruk kolok ar eku dogoni o. Ar Allah nen ndil kinakigerek ma, kinadeknggen amburu bogok yuak yiluk eku dogoni o. Kir nen Ar Allah apma tebe yiluk, wogokdugu dogoni o. 13Ar Allah nen kinilitimo dogolir, kinoba tagin atuk, kinaruk kolok ekwi paga, Ar Allah adeknggen aruwak nen yiluk erogo binagarige o.
14Kir nen ye ekik nde ekik eku dogolir, nuwa-kuwa yigikdek, wene aredo aik war-war dek paga eku dogoni o. 15#Ul. 32:5Eta erumo, kir nen nir Ar Allah akburi pano mende o yiluk, yoragun o. Kir kinebe akuni kinobabur yanggolek mende ma, akuni inobabur maduk mende kinom werek etoma, Pano Wene inilu erogo inakba wene yoragu dogolir, kinebe paga inom, nen kinakbinak paga inom, wene yoragu dogoni o. 16Kir eterogon eku dogomo, Ar Yesus Kristus warigin o telek eti paga, kir obogar mbenago wogalek mende arar kinagin o. An eka lagagi elamarogo dek o, kinebe paga enggen mbalek yoma o yiluk, nadeknggen arirtaga o.
17Ya negen, kir Ar Allah ebebar andarugup eti kenam erogo, an nebe wakdiluk, namep Ar Allah werekma ariru paga wari unggurak eti, eti ndak-ndak erumo pano yiluk yumo kwak dogomo, an niliti adeknggen ar agarik o, nen kir ninom ar ninadeknggen kaurak ar o. 18Eta ma, kir kiniliti adeknggen kalok, ninom ar ninadeknggen kugun o.
Ar Timotius o nen Epafroditus o imbirak eku lagugwa wene
19Ninewe Yesus panggok ma, Ar nen yamar nineyamo, ar Timotius kinoba ari warigin o. Ar nen kir ekwi kinabok yornirigin eti paga, an niliti adeknggen arigin o. 20Timotius obabur eti, an nobabur ndak-ndak arar o. Ar nen kir kinebe pano dogorak mende yi paga o yiluk, yokeraga dogogin o. 21Ir amberak nen ir inake mban kwaktar tagwi o, Ar Yesus Kristus ake kwakwi dek o. 22Kir nen Timotius eti pano erir taga o yiluk, kinilu agage. Ar nen an nimbirak mondok Ar Allah ane Pano Wene yorar netagwi o. Nir nimbirak ap akbur ombae eritagwi kwak erir netagwi o. 23Eta ma, an yoma ernabu mende nilu atuk kalok, ar ebe kinoba lakbi warigin o. 24An nakla ebeka dogolir, Ar Tuhan nen yamak neyamo, an inom muk warigin arar o.
25Ar elege Epafroditus, an yamar neyawak yiluk lakbi wagagup ernogo, an yogondak kinoba lakbi warik yiluk andagi o. Ar nen an yabu ekanem, pano yamak neyartaga o. 26Ar nen kir obogar kinoba eberek agarik o. Kir nen ar ebe u wakemo o, yiluk kolalkop eti paga, iliti pirik agarik o. 27Ar korok kambilep mende, Ar Allah nen akba kegemo o. Nen, ar mban dek o. An inom niliti aik aru nogo yiluk nakba kegemo o. 28Eta paga, an nen ibar inoba lakbik o yiluk, nakla eberki o. Ar ebe kinom abuk atuk, kir kiniliti adeknggen aga, an niliti kondo yega eruak nen yiluk, kinoba lakbi warigin o. 29Kir nen ar ebe ninobabur niniliti ambi paga panggok ma yiluk, kinadeknggen paga waganino o. Ir ambetak ar ndak-ndak eku lagiya mende, kir nen keyagwi warinarno ar o. 30Ar Kristus eyabu eru ake paga, ar korok kambilep o. Nen ar an yamar neyau ake, kir kinendaga paga, an niluk dogu eti ebegirak dek o yiluk, an yamar neyagemo arar o.
Currently Selected:
FILIPI 2: WLW
Highlight
Copy
Compare
Share
Want to have your highlights saved across all your devices? Sign up or sign in
