FILIPI 4
4
Wene irep paga inaruk wakige wene
1Eti kalok, nawor nakbur niliti kunikma, kir kiniliti ninewe oba ebabar panggok diluk dogoni o. An niliti kinoba eberek agarik o. Kir kinake paga, ekigimo ar kigi o yiluk, nadeknggen arar agarik o.
2Kodak niniru Euodia inom, nen kodak niniru Sintike inom, aii nirui o! Kir akuni kiniliti ebebar andarugup mende arar ma, kiniliti ambi ar dogubagik nen yiluk nggino nggano ar yorkeragi o. 3Kar Sunsugos nogar koba yanggolek, yabu nimbirak pano eritagwi ma, komadigi inebe mbere endi yamak dau nggino yokigi o. Ir an ninom, Ar Allah Ane Pano Wene yorar nugu dogolir, ap Klemen inom, ogari amberak inom, yabu ndak-ndak eku lagagu o. Ma Buku Akuni Iniluk Mende eti paga, ir inendaga muk diru mbalek agarik o.
4Tuhan kinom pano kunik werekma, kinadeknggen togo dogoni o. An nen ambi inom, kinadeknggen togo dogoni o yiluk, yokeragagi o!
5Kinobabur kiniliti pano eti, akuni obogar nen inil kinawak o! Nen Ar Tuhan muk medak togo arar warigin o. 6Kir nen kiniliti pirik parik erugup o. Ye wene nde wene akla nen, tamban mban Ar Allah oba nggino nggano yogwi dogoni o. Kir kinamende dek kalok, Ar Allah yogu dogolir, wa yiluk keyagwi waku dogoni o. 7Ar Allah adeknggen akuni eberitagodek lektek mende eti nen, Ar Kristus Yesus ebe paga, kir kiniliti eberkwi inom, nen kinakla wadok eti inom dambulatuk dogoni o.
8Ugu paga, nawor nakbur, wene eku dogorak enggen werek mende eti, wogokdurak mende inom, wene ebe ebebar mende inom, wene mor-mor kolkwi mende inom, induk pano mende inom, wene pano yurak mende inom, etoma kinilitimo dogolir eku dogorak o. 9An nane paga inom, nebe nobabur paga inom, yokeragagi mende etoma erir lagu dogoni o. Etegerogo ekwi kinalok, Ar Allah inadeknggen edo onde werek nen, kir obogar pakerek dogogin o.
Wa yugu wene
10An nebe Tuhan akla nimbirak dogolir, nadeknggen nggok kega agarik o. Eta welagorik ar nen, kir an noba ebekop ma kigi o. Kir an noba mi agopma yiluk andagi dek ar o. Ogwe kir nen dagak neyau ar ogwe, o telek kwak dek paga, inugurnagik dek welagop ma o. 11An wene yorkeragi enda ninggimo dek agama dek o. An emertarigimo arar o. Werek kalok ninggik, dek kalok abu, eti obogar emertarigimo o. 12An ininggi dek dogirtagwi paga eti obogar karigimo o. Nen ininggi werek dogirtagwi eti obogar karigimo ar o. O maduk paga dogorak eti obogar karigi mo ar o. Ininggi werek dogu inom, ininggi dek mende dogu inom, inagarek ambik inom, inagarek dek dogu inom, obogar karigimo ar o. 13Ar Kristus obarne woknirige paga, wene maduk pano aganem, Ar obarne eti paga ndak ar dogir taga o.
14Kir nen an dida yigirik mo yamak neyagop ma, kir ekop eta pano ekop ma kigi o. 15Nawor nakbur o Filipi mende wae! Kir ebebar kinilu o, an alep ar o Makedonia dambe kalok, wene Pano Wene yorar neganem, kir nen ndak an yamak neyagwi, o maduk pano paga dogorak induk kir ndak ninom birkarugu o. 16#2Kor. 11:9; Kis. 17:1An o Tesalonika muk dibi yiluk werekma, kir kininggi mbere ambi paga yamak neyarugup o. 17Eta an nen kininggi pugu mban waganir nega dogu yiluk dek o. An nilu aru wadok andartaga eti, enggen mbalek kir ngga ndak-ndak tebelogo waganggop nilu aruwak yiluk yigi o. 18#Kel. 29:18An nake banggop mende eti, kudi warek nggeber togo ar banggop ma, an obogar kodagi o. Kininggi ekop mende yemenaga, ar Epafroditus nen muk wokniri waga o. Yogondak an namende dek mende obogar ari waga o. Nake lakbani wagop etoma obari pano mende, Ar Allah agabakma lagakwi, nem Ar Allah iliti adeknggen paga waganir taga kwak, an kodagi o. 19Ar Allah an wogokdirtaga yi, inggi werek ma, Ar Kristus Yesus paga kininggi werek ekinaka dogowak o. 20Ar Allah nir Ninombae endaga nggok mondok dogowak o! Amin.
Keyagwi ugu paga warek wene
21Ar Allah akburi obogar, Ar Yesus Kristus paga kunik mende etoma, an keyagi warinaki mende yorano o. An nogari yoma ninom werek mende nen, kir keyagi warkinaka o, yiluk yorano o! 22Ar Allah akburi kota yomala werek mende inom, ap nggok endaga mbogor Kaisar ambilamo dogir taga mende inom, nen keyagi wakinaka o.
23Ar Tuhan Yesus Kristus nen, kir obogar kininggi werek erogo binagaluk, kinakba eka dogowak o!
An Paulus ar Timotius nimbirak nen, Keyagi warkinako o, waanelak.
Currently Selected:
FILIPI 4: WLW
Highlight
Copy
Compare
Share
Want to have your highlights saved across all your devices? Sign up or sign in
