FILIPI 1
1
Edoma keyagi warek wene
1 #
Kis. 16:12
Nogari Ar Allah akburi o Filipi werek mende inom, nen kir ap nggaindak jemaat paga agotik mende inom, nen kir jemaat inaruam agotik mende inom!
An Paulus ar Timotius nimbirak, Ar Kristus Yesus ayedoman mende yi nen, 2Ar Ninombae Allah o, Ar Tuhan Yesus Kristus o nen inadenggen kinoba bugwi, nen kinoba pani pano erogo binagu dogowak nen yiluk ninakla duktek agorik o.
Ar Paulus nen jemaat inake tamban ekige wene
3O pano yeganem kinoba ebekdiluk, Ar Allah wa yiluk, yori taga o. 4Kup keyam niliti adeknggen paga, nakburi kinake tamban erir taga o. 5Alep nen yogondak kudi, kir nen an wene Pano Wene Ar Allah awene akuni yorawak nen yiluk, yamak neyagwi paga, Ar Allah wa, yiluk yorir taga o. 6Ar Allah nen yabu pano eru mende, kir kinilitimo ai yakbirigemo ma erir lagwi kinagik, Ar Yesus Kristus warigin kudi nggokbali lowak o yiluk, panggolek agarik o. 7Niliti eta negen kinoba eberumo, kir obogar an nilitimo werek o. Ar Allah nen yabu we onggo dek, kir ninom ar wokneragage eti paga, an kede warek ya nagik, ugun dogolir, wene Pano Wene erakde mbalir taga o. 8Niliti Kristus Yesus paga kinoba kunik, nen ninom dogu wadok ernaka eti, Ar Allah ilu agarik o.
9An kir kinake tamban yegerogo erir taga o: kir nen Ar Allah oba kiniliti kunik nggok aga, akuni kir kinogari mende inakba ekwi, ye wene nde wene odo kirogo kinilu aga, kiniliti kode aga eka dogowak nen yiluk, eka agarik o. 10Eta negen dogomo, kir nen pano mende miru kinilu aga, kinoba pani pano, maduk kinoba labek dek kinagik, o Ar Yesus Kristus warigin kudi arar ari lowak o yiluk, erir taga o. 11Kinebe pani pano, Ar Yesus Kristus adik nen erogo binagumo, pano mende kinilitimo nen kidu-kidu wulka kalok, Ar Allah endaga pogorakwi, anggengge biluk wogokdugwi eku dogogun o.
Kristus ake eku dogorak wene
12An noba ye wene nde wene ambik durik mago etaga kigik, ir akuni wene Pano Wene enogo yoraga paga inaruk kolalkwi, waganggwi, ekwi agarik eti kinilu arurak o. 13#Kis. 28:30Ir ap endaga mbogor akburi aruwam dogi taga mende inom, akuni o kota yoma agarik mende inom, an Kristus eyabu eka neyalok, kede warogo banenggama o, yiluk inilu agama o. 14An kede warnakama mende, ir Allah akburi o yoma werek mende nen, iniliti nggok togo ninewe oba panggolkwi, Allah awene nggok wigalkwi, erir tagwi o.
15Ir akuni amberak nen, iniliti uwa mbalek paga, an wene kunogo banuok nen yiluk ekwi mende, ir amberak nen inilti nggaruk togo, Ar Kristus wene yorar nugwi agarik o. 16Ir ap iniliti nggaruk togo Allah wene yoragwi yi, an inom, nen Ar Allah inom, iniliti kunik paga, ane Pano Wene yorawak nen yiluk noba birige ebebar yiluk andalok erir tagwi o. 17Mende, ir ap amberak iniliti maduk paga, Ar Kristus awene yoragwi o. Ir nen ir inake kwaktar nugu dogolir, Kristus wene yorar tagwi o. Eta ekunem, an kede warek ma, wene anggin ambik mondok, noba burak arar eritagwi o.
18Etegerogon ogwe, wene dek o. Iniliti maduk paga inom, inilti pano paga inom, Kristus ekige mende wene mban yoragwi ma, an niliti adeknggen agarik o. Nen an niliti eta mondok ar dogogin o. 19Kir nen nake tamban ekwi paga, Roh Yesus Kristus nen yamak neyamo, kede pigalogo wuldanugun o yiluk, nakla eberir taga o. 20An eru wadok mende andar taga eti, an yabu noba birige mende eti ekikdek dogu kwak mondok na'ir o. An nen o pano wiga paga inom, niliti nggaruk nebe nggaruk, niluk dogolir a watartuk a, nobade dek mondok dogolir, Ar Kristus endaga wogokdega dogogin o. 21Nenaluk, an nake paga eti, an niluk kalok eti Ar Kristus ake arar o! Nen an kamburak kalok eti onde ekodagin arar o. 22Ogwe, an agar taga ya dogolir, yabu nggok togo erurak ma, an nena kwak mutok ligin eti nonggokdek o. 23An wene mbere ake paga lir neyar taga o. An o yoma dambe kalok, Ar Kristus oba ari lalok nimbirak dogu paga, an niliti wadok kertaga o. Nenaluk eti kwak ebe pano mondok arar o. 24Ogwe, Kir kinake paga perak, an il ambi ar ya dogorak eti pano o. 25Wene eta ebebar andagi o. An kir ninom il ambi ar dogolir, kir yamak kinaga nagik kiniliti kode eka, kinadeknggen eka, Kristus oba korok panggok togo erogo binagaga erurak wadok andega agarik o. 26An kir kinoba warumo nen, kir Kristus Yesus kinom kunik mende nen, kinil nalok kinadeknggen ambik erugun o.
27Yogo, yogondak kir dogu edo pano mende, wene pano wene Kristus ekige mende wene, yi erni yokeraga kalok eku dogorak o. An kinoba warigin a, dek a, eti yabungga wene o. An naruk kulu wadok eti, kir kiliti kode agwi, kinabodok dek pano welagwi, wene ambi eru yugwi kalok, pano ar yugwi, ebe Ar Allah ane yirige paga panggol diluk ekwi eti an wadok o. 28Ar Allah nen kinawim mende tebelogo bagin ma, kinobade dek dogoni o. Eta dogomo, kir nen ir tebel dalok dogogun o. 29Nenaluk ar Allah nen we onggo dek kinoba bege eti, ar Kristus oba ebebar andaurak mende mban dek o, ogwe Ar Kristus kinom anggon panggon kugu dogorak yiluk inom ar o. 30Yogondak, kir an ninom wim etila ar erir tagwi o. Alep ar ninom eka neyagu lagagup ernogo, yogondak inom eka agarik kinaruk kolalkop eta arar o.
Currently Selected:
FILIPI 1: WLW
Highlight
Copy
Compare
Share
Want to have your highlights saved across all your devices? Sign up or sign in
