GALATIA 5
5
Kede pigalek agokip eti aruam pik pak dogoni yoragage wene
1Nir yogondak ya inuwakma agorik dek o. Nenaluk Ar Kristus nen kede pigalogo binaninggige paga o! Kir nen yedoman mende ekinabuwak nen yiluk erugup o. Inai werek dogolir erir tagwi mende kwak eku dogoni o.
2Kinakla eberek dogoni o! Kir nen sunat erurak nggino yugwi kinalok, Ar Kristus eti kir kinake we enggen dek mende arar o. Wene yi, an Paulus nen yigi o. 3An nen ambi inom yokerak o, ap sunat erurak wadok nen nggino lektaga mende kalok dikbini o, ar ap eti agama wene kindirik mondok nggidik nggedok arar eka dogowak o. 4Agama wene kindirik paga, kir Allah kinom yaluwok nen yiluk ekwi kinalok, kir Kristus kinom kudi arar bogopma o. Eta paga nen, kir kinebe Ar Allah nen ninakba karige mende eti, abel tekman nggwe arar ari wulkopma o. 5Ogwe, nir yi, Roh Allah nen yamak ninaga kigik, niliti Kristus oba ebebar panggolumo, Allah nen Ar ninom pano aru paga telek erogo binanigin o. 6Nir nen Kristus ninom kunik dogomo, sunat erek a, sunat erekdek a, eti awene mondok dek o. Odo mende eti, nir nen Kristus oba niniliti ebebar o, yiluk panggolek dogorak mende yi arar o. Eta paga, nir nen akuni amberak niniliti kunik kenam arigin o.
7O pagane ar, kir nen pano ar mutok lagu lagop o! Yogondak ya nenaluk Ar Allah akla wadok mende mutok lagikdek eritagwi o? Tanen kinaruk wakemo eritagwi o? 8Eta ekwi kinalok, Ar Allah kinayonggo birige mende nen eka dek o, akuni nen eritagwi o. 9#1Kor. 5:6Akuni inane wolok yirtagwi eti, ragi bugudak mende, roti nggok wigalogo birtaga mende eti ndak-ndak o. 10Nir Kristus ninom ambiar agagurikmo, kir wene adik mende waganugun dek o, yiluk nakla eberir taga o. Nen, ap kir dadek padek ekinabir taga mende eti, Allah nen hukuman oba bigin o, yiluk nak ebebar andar taga o.
11An nake paga, nawor nakbur, an nen sunat erurak wene yorar nega neyagop, nenaluk an ninom wim mbalurak? An eta ndak-ndak yorar nega neyalok, Ar Kristus ao kari karo abok wene yorar neganem, wene oba werek arurak dek o. 12Pano negen mende eti, ir ap kir kiniliti nggagik-nggagok erir taga mende eti, kinom dogorak mondok dek, nggarelurak arar o.
13Nakburi, kir kinadik ar dogobagik nen yiluk erogo binagarigemo o. An nadik ekdanggigemo yoma, an niliti andalok ela dogik yiluk erugup o. Nen, kir nen kiniliti yamak-yamak ekwi eti, eku dogoni o. 14Hukum agama wene ake paga, wene enggen mende yimbuk dambuk yomala agarik o, “Kar kebe kiliti kunik agandik kwak, akuni amberak kiliti kunigar erinaka dogon o!” 15Mende, kir nen kir-kir ar kinenggabir likbil-likbil yugwi kinalok, dikbini o! Kar kogar kimbirak-kimbirak arar bulatagun o.
Roh Allah wadok inom, akuni wadok inom, imbirak dambulukbuk yirige wene
16Kir kinobabur akuni paga endago nen, wadok andalok wokerek neganem o yiluk, andalok yigi o. Ar te Ar Roh Allah nen kwak wokerek nega, erir nugu dogoni o. 17#Rm. 7:15-23Akuni nen wadok andagwi mende, Roh Allah awim mbalek werek ma, Roh Allah nen wadok mende, akuni nen inawim mbalek ar. Imbirak wim mbalek ma, kir nen nena eru andagun mende, eru ndak dek ekinabigin o. 18Mende, kir Roh Allah nen wokerek neganem, hukum agama wene kindirik apma tebelogo binagagin dek o.
19Ir akuni inakla wadok andagwi mende eti, inobabur ekwi paga kenam arir waga dogolir; kagar-kagar ugunar ekwi, maduk agode werek mende ekwi, wene yugu tagalkwi, 20amudi kunik wogok bugwi, ye mende nde mende obarne werek yiluk amudi kunogo pago welagwi, tiduk mbabuk yugwi, ndugi bugwi, nagwe eken yugwi, wenemuk perak togon yurak mban ebekwi, inadik inake etaurak mban ebekwi; 21ir adek mban nenaluk yiluk andugwi, mabuk mban ekwi, dago dakbiluk ndai nggidik mban warir nugwi, nen amberak etoma obogar inom inake paga, an o pagane kinilu erogo kinaruk wakigi ndak-ndak, yogondak kinaruk warigin mban ar o. Ma, ir akuni wene etoma ekwi mende eti, Ar Allah akburi arugun mondok dek arar o.
22Ogwe elokte medo kalok birkamo, ir akuni Roh Allah nen wogorek nega mende enggen yugu inobabur eti: niliti kiliti ekwi, iniliti adeknggen mban welagwi, iniliti abodok dek welagwi, iniliti lukbuk, nen ir akuni amberak pano erinakwi, wene yugu dirogon ekwi, 23ir iniliti teberek, maduk eru erinakanen wogalau ndak. Ma wene ya, hukum agama wene kindirik paga ambi nen, wene ya oba maduk yiluk yege dek arar o. 24Ir akuni Kristus Yesus amende agugwa mende, ir nen akuni inobabur pagane mende inom, iniliti paga nen wadok andagwi mende inom, obogar warogo birugwama o. 25Ar Roh Allah nen ninebe ninobabur ngger mende erogo binaninggigemo. Etama, Ar nen ar nir woknerek nega dogorak o. 26Nir nen wogok dartugwi, nir-nir ar niniliti aik erogo bartugwi, na'ir ka'ir paga inom dogorak maga o.
Currently Selected:
GALATIA 5: WLW
Highlight
Copy
Compare
Share
Want to have your highlights saved across all your devices? Sign up or sign in
