GALATIA 6
6
Yamak-yamak eku dogorak wene
1Nawor nakbur ap ambi maduk eka kinil kalok, kir Ar Roh Allah kinom werek mende nen, ap eti mor-mor erogo, tuan pano yi paga o, yiluk kwalogo bini o. Kiniliti yanggolek paga, nir eti ndak-ndak nggar wurninaburakma yiluk, tuam watagu dogolir eku dogoni o. 2Kir nen ar ninogar ambi anggin oba aga kalok, yamak-yamak eku dogoni o. Eterogon erumo, kir nen Kristus ane yirige mutok eku dogogun o. 3Ar ambi ebe ndak dek mende ar ogwe, an kwak mondok unggune mende arar o yiluk andega kalok, ar eti enggal mende arar yitar taga o. 4Akuni inadik ndak nen an nobabur maduk agarik a, pano agarik a yiluk dikbalok dogorak o. Pano kalok, an pano ar yiluk wogokdatarak ndak ar o. Ogwe akuni amberak inoba il warurak maga o. 5Nenaluk ir akuni inenggal werek nen, ir inake paga ertagu dogorak o.
6Ap ambi nen angguru Kristus awene emerega kalok, ar amende inggimo werek mende munggulogo wogoga dogorak o.
7Kir ap kinambotna dagalagup o. Allah eti ambotna dagalir tagodek. Aingge nena ai yarigin kalok, eti mende arar enggen mbaligin o. 8Ap ambi nen, ar obabur akuni mende paga yaga kigik ai yarumo, enggen ebe kanggwi mende enggen ar mbaligin o. Ogwe, ap ambi Roh Allah nen yoga kigik ai yaka dogogin kalok, enggen eti ar iluk aitok mondok dogorak mende, nabedal kabedal edo eti arar, Ar Roh Allah nen wogorigin o. 9Etama, nir nen pano eruwok yiluk, nina'ir paga eku dogorak dek o. Nir nen pano mende erir lagunem, o kibi ambi paga enggen mbalugun ar o. 10Yogo, o nir ninake telek werek ya paga, nir akuni obogar pano erogo bagu dogorak ogwe, nggok togon pano erogo bagu dogorak kwak eti, nir ninogariyak ninom ebebar andugwi mende eti arar o.
Kurumbi inom, keyagwi warek inom wene
11Diru ekwi enda pik pak birkani o. An ninggi paga, kolan edo nggok ndak paga mbalkimo o. 12Ir akuni o agar paga mende paga endago mende nen, wogokdatar nugu dogolir, kir sunat erni o yiluk yokerar tagwi o. Ir ap Yahudi mende nen, Kristus wakugwa wene pago mende ma, ninakunem yiluk yokerar tagwi o. 13Ir akuni sunat erukdek mende amberak nen, ir agama wene kindirik dirogo ekwi degar dogolir mende, ir nen kir sunat erni o, kir agama wene kindirik mutok lagwi dogoni o, yiluk yokerar tagwi o. 14Ye ekwi nde ekwi paga, an wogokdartau na'ir o. Nir mende Ar Tuhan Yesus Kristus, ebe warogo o paga menogo birugwa eti paga perak, an nen wogok daktaurak wadok o. Ar ebe o kari-karo paga wartagage eti paga, agar taga yoma mende erir lau niliti adeknggen dek agagemo o. Ma agar taga yoma erir nega lagwi mende eru paga, an nadeknggen arar dek agage o. 15Sunat erek o, nen sunat erukdek o, eti enggen werek mende dek o. Wene unggune kwak eti, akuni ninebe ngger mende erogo binanurak kwak eti arar o. 16Akuni inakla eta werek mende inom, Allah akburi obogar inom, Allah nen pano mende adeknggen mende wogoragin, andar taga o.
17Ugu paga ya, kir ambi nen niliti aik ernabugup o. An nebe nagakdo paga yoma nen, an yi Kristus amutok mende, yitagwi o.
18Yogo, nir mende Tuhan Yesus Kristus enogo nen, kunik kanik adeknggen kinoba binagaga dogowak o. An Paulus nen keyagwi warkinaki o. Amin.
An Paulus nen, Keyagi wakinaki o, waanelak.
Currently Selected:
GALATIA 6: WLW
Highlight
Copy
Compare
Share
Want to have your highlights saved across all your devices? Sign up or sign in
