GALATIA 4
4
1Ogwe an wene ambi obatne ketaga o; elege ambi eyakte kodau auwan kalok, akuni ir ambi nen aruam dogolir, ar ake paga ye wene nde wene etoma kokbalogo bagwi kigik, ar ombae eyakte kodau umur arar ertaga kudi o. Ar ebe auan kigik, ar ebe yedoman mende talek o, ogwe ar ebe amende werek eti kigik ar. 2Ar elege eti, o etoma ondewerek ar arar mende, auwan paga yedoman erek dogitaga mende o. 3Eti ndak-ndak ar, nir auwan ninanggok agikdek ninagik, ir irimbo agataga yoma tebelir taga mende nen, inapma yedoman erninaku lagama o. 4O arar ari wagagemo, Ar Allah nen Akbur agar taga yoma lakbi wagage o. Ar Akbur eti, kwe ambi hukum agama wene kindirik obatne apma dogir taga mende nen endarkige o. 5#Rm. 8:15-17 Eti paga nen, nir Ar Allah akburi mende etaruwak nen yiluk, Ar nen nir agama wene kindirik obatne paga tebelek welagagu mende, ninebe kede pigalogo binaninggige o.
6Kir Allah akburi agagupmo, Ar Allah nen Akbur aguringge kir kinakla, an nakla malak birigemo, Ar Roh Allah eti nen “Nombae, Nombae o yiluk yin o,” yiluk tuguner taga o. 7Kir yogondak yedoman dek, Ar Allah akburi o. Kir ar Allah akburi ma, ar Allah nen nakburi inake yiluk ndugurogo birige mende, kir wokeragin o.
Galatia mende inobabur ekwi mende paga, ar Paulus iliti watarige wene
8O pagane Ar Allah kinonggokdek ma, irimbo agataga mende yoma obatne paga, ar ebe alah dek mende kigik, kinombae ebe pano talek apma welagagupmo. 9Yogo, yogondak kir Allah ebe mende arar kinilu aga. Ar Allah nen kir arar ilu agama, yogondak nenagaluk kir kiniyok paga, ar irimbo iliti dek mende eti oba lektagwi o? Nena wokerawak nen yiluk, irimbo ayedoman ari letagwi o? 10Kir nen, ar irimbo maduk mende eti ake dago darkwi kinagik, ye hari nde hari ekwi, ye bulan nde bulan ekwi, nen ye tahun nde tahun ekwi agoktip o. 11Niliti anggin eti, ir inake mep dagik dagok elamatagar eka lagagimo andaktaga o.
12Nawor nakbur! Kir an ndak-ndak etarubagwik nen yiluk, nggok togon nggino yokerar taga o. An kir ndak-ndak ar agagimo, kir nen an noba maduk erogo bugup o. 13Kir kinakla eberek werek ketaga, alep ar an nenaluk wene Pano Wene kir yokera wagagi. Eta edo an u nakigemo nen yokera wagagi o. 14Eta paga nagode yurak mende kigik, ir malaikat Ar Allah mende eti wogonabu kwak, nen Ar Yesus Kristus waganu kwak, an arar woknakugup o. 15Eta paga kinadeknggen ambigar welagagup o. Ogwe yogondak, kinadeknggen eti nggoma werek? An nilu kir kinadeknggen o eta paga eti, kir erni yokeramo dek ar ogwe, kir kinil enggen an nake kidilu yokeramo, eti erumo ambi etaru werek dogolepma, o eta paga, kir kinil kidilu kinoba ndak mondogar kinarigi o. 16Yogondak, kir wene ebe wene arar bugalogo, telekma yokerar taga paga, kir nen an tili mende bani lertagwi a?
17Ap amberak inilitimo maduk kigik, inobabur inane nen pano-pano erogo, an dambe daniluk, kir kinadeknggen paga, ir mugurek lawak yiluk, kwak kinabir waritagwi o. 18Ebebar, pano eru paga kinomanggen ndederogon eru pano mende, an nebe ninom nagik mban dek, an nebe dek nagik, kir kinomanggen ndedek togon eku dogoni o. 19Nakburi kinebe obogar niliti kunik o! An yogondak ya kir paga kener warir taga o. Kumi elege endaruwok nen yiluk, kener waritagwi ndak-ndak, kener waritaga o. Kristus obabur mende kinilitimo yagar tagakdek kalok, ambi inom ar kwak kener waka dogogup mende o, yiluk andaga agarik o. 20Yogondak ninom dogu a yiluk nakla andar taga o. An nane adik paga yokerau wadok ar agarik o. Eta ma, an nen ambi nenggerogon yokerakbuk o.
Kwe Hagar o nen kwe Sara o imbirak inoba lirik wene
21Nawor nakbur, kir kinebe agama wene kindirik apma dogu wadok mende, nane panorogo kinaruk kolini o! An nen Musa agama wene kindirogo mbalkige mende dirogon yokeragin o. 22#Kej. 16:15, 21:2Etomala mbalka dogolir, Abraham akburi inebe mbere, elege ambi agwiya kwe edo kwe eti ebe kwe ai werek mende, nen elege ambi agwiya eti kwe kuro yedoman mende. 23Elege kwe anduan nen endago eti, ar wadok paga nen endakigemo. Nen elege kwe edo kwe nen endago eti, Ar Allah nen yirige ndak-ndak endarkigemo. 24Elege ekugwa ya il walkigik ekugwama, kumi inebe mbere eta wene mbere ndak-ndak. Ambi Sinai ado paga nen, eti kwe Hagar, agadak anduan endak tagemo. 25Yogo Hagar eti, Sinai ado paga mende, o kuri Arab etoma mende. Kwe Hagar eti, o Yerusalem paga ye akuni nde akuni yedoman werek mende etoma, inoba walkigik arar o. 26Ogwe o Yerusalem surga mende eti, kwe edo kwe enogo arar o, kwe eti nir ninagwiya arar. 27#Yes. 54:1Alkitab mbalek paga nen kwe Sara ake yegerogon yirige,
kwe yibidi mende, elege endakikdek mende, kadeknggen togon dogono.
Kak endaktak nen yiluk, aik nen kener wakikdek ma, kakla adeknggen ar dogono o.
Nen kwe agun nen peralogo bigin mende eti, ar mende agwi pakalok endarinaka kigik!
Nen ar we agun imbirak dogogin mende eti dek o.
28Newe nawor! Kir kinebe Allah akburi arar o. Ar Allah ane yirige paga endakinakige. Kir Isak ndak-ndak endakinakigemo. 29#Kej. 21:9Elegedak paga dogolir, elege akuni wadok paga endago nen, ar elege Roh Allah nen wadok paga endago enogo mep dagik dagok ekige o. Eta ndak-ndak, nir yogondak eterogon ar erninabir tagwi o. 30#Kej. 21:10Nen, Alkitab mbalek paga yege ambi werek a? Etoma nen yega dogolir. “Kwe yedoman mende ak eti mugogo wuldino o. Kwe yedoman mende ak eti, kwe edo kwe ak imbirak eyakte bugu onde erugun dek o.” 31Nawor nakbur, nir yoma kwe anduan agwi dek o, nir kwe edo kwe agwi arar o.
Currently Selected:
GALATIA 4: WLW
Highlight
Copy
Compare
Share
Want to have your highlights saved across all your devices? Sign up or sign in
