GALATIA 3
3
Hukum Agama ekwi paga a, Ar Kristus oba ebebar andagun eti paga a, yiluk yirige Wene
1Nawor nakbur kir akuni o Galatia mende yi! Kir kiniliti ebe mondok dek o. Ta nen kinakla nggagalkemo eritagwi o? Ar Kristus warogo o paga birugwa wene eti, kir obogar telekma tedalogo yorkeragi etnogogi! 2Yogo, wene ambi yi kirnen yonirni o: Kir agama awene kindirik ekopma Ar Roh Allah eti wokeragage a, kir Allah awene Pano Wene yokerarugumo, kiniliti Kristus oba ebebar andarugupmo wokeragage a? 3Kir akuni nggembu mende etagop eti nenaluk! Kir Roh Allah nen kinobabur ngger mende erogo binagagemo kinom agoktip mende, yogondak damber kalok kinadik kinobarne paga amodok mbalau ake kwarir wulkop a? 4Kir pano mende kodarugup mende etoma elamarek a? Nena paga ela mataga! 5Ar Allah nen Roh Kudus arar wokeragagemo, Ar paga nen erukbuk mende ambigar eka karugup etoma, agama wene kindirik ekugup paga a? Wene Pano Wene yokerarugumo, kinaruk kul diluk, kiniliti Kristus oba ebebar andarugup mo wokeragage a?
6 #
Kej. 15:6; Rm. 4:3 Eti Alkitab mbalek paga Abraham ake yirige yi ndak-ndak, “Abraham nen Allah oba iliti ebebar andarige paga, Ar Allah nen ar Abraham eti Ar Allah iliti adeknggen ekige mende o yiluk denogo birigemo o.” 7#Rm. 4:16Eta ma, kir nen panorogo kinilu arni o, Abraham umbui ebebar mende eti, ir iniliti nen Allah ebebar o yiluk Allah oba panggolir taga mende eti arar o. 8#Kej. 12:3Alkitab mbalek paga, alep ar lakarige o, Allah nen akuni Yahudi dek mende, ir nen iniliti ebebar Ar oba panggokdumo, Allah inom pano dambulugun o. Wene Pano Wene eti alep ar, ar Abraham ndak oba wene warogo bega dogolir, “Kar nen wigalek paga, yi akuni ndai akuni agar taga yoma, obogar adeknggen pano mende inoba bagin o,” yiluk yorige. 9Abraham nen oba panggolkigemo, Allah nen amende ambik kado milogo wogorige. Eta ndak-ndak akuni obogar oba panggolumo, Abraham wogorige kwak wogoragin o.
10 #
Ul. 27:26
Akuni agama wene kindirik paga penggarek werek mende, obogar pudilik apma werek. Alkitab mbalek paga nen yega dogolir, “Ir akuni nen wene Buku Hukum Agama paga kindirogo birige mende nggedorogo ekidek kalok, pudulogo barige,” yiluk diru mbalek werek o. 11#Hab. 2:4Hukum Agama wene kindirik ekwi paga, Ar Allah ninom pano dambul ninaburak dek o. Wene eti Alkitab mbalek paga nen yirige yi o, “Ir akuni Allah oba ebabar andagwi mende, Allah inom pano dambulagwi erugun o, nen ir eti perak iniluk arar dogogun o!” 12Ogwe agama wene kindirik eti, ebebar andagwi paga mutok dek o. Ma Alkitab mbalek paga nen yegerogo yirige o; Akuni hukum agama wene yugu paga erir lagwi mende, inebe agama wene yugu eti paga iniluk dogogup mende o. 13#Ul. 21:23Ogwe, Ar Kristus nen nir agama wene kindirik apma pudilikmo nen, ninoba nggoro nen ndilninakige o. Ar nen nir ninakdikmo pudularige o. Ma Alkitab mbalek paga nen yega dogolir, “Ap o mendek paga warek tugunik eti pudularnek o,” yiluk yirige diru mbalek werek o. 14Etama, Ar Kristus nen etegerogo etagagemo, Ar Allah nen Abraham ake adeknggen wokirigin yorige mende eti, ir akuni Yahudi dek mende inom ar wogoragin o. Etegerogon paga nen, nir nen Ar Allah oba ebebar andagun mende, Ar Roh Kudus eti wokneragin arar o.
Hukum agama paga a, Ar Allah ane amburu yirige paga a, yiluk yirige wene
15Nawor nakbur! An yogondak nir yoma erir tagwi mende paga walkalok yokeragin o. Ir akuni ambi nen wene eruwok nen yiluk awene inane amburu yiluk, nen inane amburu yu mende enogo obok yalogo bilukmo, ir akuni amberak nen, wene yugu enogo dek erogo bigik, nen wene ebe oba lambologo bigik erurak ndak dek o. 16#Kej. 12:7 Ar Allah nen Ane amburu wene Abraham ake yorige eti, Abraham umbui inake wene warogo birige o. Ma Alkitab mbalek paga eti, “nen ir akuni Abraham umbui mende inake,” Wene eta yirige eti, akuni dogalek ar inake yiluk yirigemo o. Ogwe wene diru mbalek ebebar mende kwak eti yi o: “Nen ap kar kumbu ake o.” Wene yi ap ambi ar ake o, ma ambiar eti ta, eti Ar Kristus ebe arar! 17#Kel. 12:40An ya yokerau andagi mende yegerogon, wene obogar ar bogoktogon alep ar warogo birigi o. Agama wene kindirik empat ratus tiga puluh tahun ekdiluk amborna nggwe nen, wene yalkige mende dek erogo burak ndak dek aga, nen Ar Allah Ane amburu birige mende eti korogo degeraru ndak dek aga ekige o. 18#Rm. 4:14Nenaluk Ar Allah nen we wokneragage eti agama wene paga tugunik kalok, eti ane amburu yirige mutok wokneragage mende dek o. Mende nenaluk Ar Allah nen Abraham wokirigin o yiluk yorige eti paga nen, Ar Allah nen arar wogorige o.
19Eta kalok, agama wene kindirik nena ake wogoragage kogop? Wene onggo eti, agama wene eti, akuni maduk ekwi kenam kugu dogowak nen yiluk, wene oba dulogo birigemo. Agama wene eti, Ar Allah nen Abraham umbu endago oba ane amburu yorige eti auan kenam agikdek welagugwama o. Agama wene yugwi etoma, ir malaikat paga nen akuni inoba wurabi wagugwa o. 20Etama, ap inebe mbere kwak inake paga dogomo, ar ambi odo menatuk inawene mbalurak o. Ogwe Ar Allah eti odo mendek mende eti a'ir arar, ma Ar adigar nen erir wagage eti arar o.
Hukum agama kindirik paga eku dogorak wene
21Hukum agama wene kindirik eti Ar Allah nen erigin ane amburu yirige mende imbirak agorek a? Imbirak agorek dek arar o! Nenaluk hukum agama wene kindirik eti wedegar Ar Allah nen akuni wogoragagemo o. Nen ebe hukum agama wene kindirik eti paga, akuni Ar Allah inom dambulku dogowak nen yiluk wogoragage o. Eti paga nen, Allah ninom dambulkwi dogolep o. 22Ogwe Alkitab mbalek paga nen, akuni obogar maduk obatne paga apma tebelogo balok welagage o yiluk yirige. Nenaluk Ar Allah nen ane amburu yirige mutok eti, Ar Yesus Kristus oba ebebar andagwi kalok mban arar ma, ir ebebar andagun mende mban inake o.
23Kristus oba ebebar andaurak mende wene auwan waga kigik, hukum agama wene kindirik nen ninaruam pakninarek welagagemo o. Hukum agama eti nen, nir kede warek talek ninaruam kigik, ebebar andaurak mende eti arar kenam agage o. 24Ebe eta ar ma, hukum agama wene kindirik nen mor erninakanem, Ar Kristus wagagerek, Allah ninom wim mbalek welagagu mende, Ar Kristus oba ebebar andagwi paga dambul ninakige. 25Yogondak ya, ir akuni nen Ar Kristus oba ebebar andalok waganuwam arar ma, hukum agama wene kindirik nen ninaruam dogu ndak dek arar o.
26Kir nen Kristus Yesus ebebar andagun paga, kir Ar kinom ambi ar arugun o; nen eti paga ma, kir kinebe Ar Allah akburi arar etarugun o. 27Kir obok Kristus endaga paga ima wukinakugwa o. Etama nen, kir kinebe paga eti Ar Kristus obabur mende arar kodarugupmo o. 28Kir kinebe obogar, Ar Kristus paga dambulogo binagarige eti paga, yogondak ya nen, yi akuni Yahudi mende, yi akuni Yahudi dek mende, nen ar yi ap ai werek, ar yi ap yedoman kuro mende, ar yi ap, ar yi kwe, yiluk mbenak kinaburak ndak dek arar o. 29#Rm. 4:13Kir kinebe Kristus amende kalok, kir Abraham akburi eti kir arar o. Nen, Allah nen wokeragin yiluk ane amburu yirige eti kir arar kodagun o.
Currently Selected:
GALATIA 3: WLW
Highlight
Copy
Compare
Share
Want to have your highlights saved across all your devices? Sign up or sign in
